1 Fare gafgow nu Babylon, e guy Isaiah ni fare pagael ni fak Amoz.

2 Mu pug ngalang bangi falak u dakean e burey nib tolang, mag tolul ngoraed, mag chingeg paʼam, ni gomanga ranoed nga lan e pi garog ko piʼin nib matʼaw.

3 Kug chiyliy ngakʼ e piʼin nib thothup rog, ma ku kug pining e piʼin nib yargael rog, ya damomuw rog e dariy nga dakean e piʼin ni yaed be falfalaenʼ nga fanag pilung.

4 Kan rungʼag lingan fare ulung ni bay u dakean e pi burey ni boed lingan ba ulung i gidiiʼ nib yoʼor, ba lingan e wagaey nibe yib ko pi gilʼ e lung ko pi nam ni ke mukun nga taʼabang, fare Somoel ko Yoʼor e ra kunuy nga taʼabang e salthaw ngar falʼeged rograed ko mael.

5 Ma yaedra yib u ba nam nib palog, u taʼan e lang, arragon, fare Somoel, nge pi talin e mael ko damomuw rokʼ, ni nge gatheay fare nam ni poloʼ.

6 Ngar mu gelʼgelʼ gaed, ya fare rran rokʼ Somoel e ke chugur ngay; ma ra yib ni mogothgoth ngakʼ fachaʼ ni Gubin Marayog Rokʼ.

7 Ere gubin e paʼayif ma ra thig nge ʼaw nga butʼ, ma gubin ma ra ranraen gumʼirchaʼen ko murus;

8 Ma yaedra tamdag; amith nge kirbaenʼ e ra aw ngoraed; ra balyangaenʼraed ngoraed; ma ra munrow oewchraed ko tamraʼ.

9 Musap gaed, fare rran rokʼ Somoel e be yib, nib noemow ko damomuw nge puwaenʼ, ni nge pag e nam ni dakuriy beeʼ nibe paer riy; me gatheay e pi tadenen ni bay riy nge chuw.

10 Ya pi tʼuf nu tharmiy nge pi yu ulung i tʼuf ni bay riy e dabi piiʼ raʼen; fare yalʼ e ra lumor u napʼan ni ke mʼug, ma fare pul e dabi piiʼ raʼen nge mat.

11 Ma gura gechig nag fare fayleng ni bachan e kireb, nge piʼin ni kireb ni bachan e pi denen roraed; gura tileg e siʼufʼuf rokʼ e piʼin nib ufanthin, ma gura tileg e ufanthin rokʼ e piʼin nib yargael.

12 Gura sunmiy beeʼ ni rib tʼuf ko gol; ni beeʼ ni rib felʼ nga bangi gol nu Ophir.

13 Ere, bay gu rurug e tharmiy, ma fayleng e ra chuw u gilʼ, u fithikʼ e damomuw rokʼ fare Somoel ko Yoʼor, ngu lan fare rran ko damomuw rokʼ nib maʼangech.

14 Ma ra yaeni aw ni boed ba kaming ni yibe tuluf, nge ba saaf ni dariy beeʼ nibe gafaliy; ma yaed gubin nra beeʼ me chel ko gidiiʼ rokʼ, nge tulufraed ni yaed gubin iyaen nga lan e binaw roraed.

15 Gubin e piʼin nib ʼuf e yira kurufraed; arragon, nge gubin e piʼin nib peth ko kireb e yaedra yimʼ ko sayden.

16 Pi bitir roraed e yira liiʼraed u pʼoewchraed; pi naʼun roraed e ra suguy e salthaw nge pi leʼengiraed e yira matogel ngoraed.

17 Musap gaed, gura kʼaring fapi Medes ngar togopluw gaed ngoraed, ni yaed e dariy fan e silber nge gol u wunʼraed, ara yaed be falfalʼaenʼ ngay.

18 Pi gatʼing roraed e ra thikiy e pi pagael nib felʼ yangren nga butʼ; ma dabi wurengaenʼraed nga waʼamngin inaey; ma dabra feked oewchraed rok e piʼin bitir.

19 Ma yu Babylon, ni fare rir ko pi nam, niʼir e thʼabi felʼ yaʼan u tafen fapi Chaldeesʼ, e ra boed rogon ni gatheay Got yu Sodom ngu Gomorrah.

20 Me yaeni aw ni dab kun tafnaʼ, ara ni paer riy u rebo mfen ngo reb: ara nʼuf e gidiiʼ nu Arab e tent roraed u roem; ara chuguliy e pi tachugol e gamanman roraed u roem.

21 Machane gamanman ni malboch nu lan e rad e yaedra paer riy; ma pi naʼun roraed e ra sug ko gamanman ni kirbaenʼ; nge archeʼ ni owls e ra paer u roem, nge pi satyrs e bay i churuʼ riy.

22 Ma pi gamanman ni malboch ko pi donguch e ra ur yoer gaed u lan e pi naʼun roraed ni kan pag, nge pi dragon u lan e pi yungi nʼen nib felʼ u lan e naʼun roraed; ma nepʼ rokʼ e ke chugur ni nge yib, ma fare rran rokʼ e dabki nʼuw napʼan. Ya gura gatheay ni rib papay; arragon, ya ra wureng anʼug ko gidiiʼ rog, machane piʼin nib kireb e yaedra yimʼ.