1 Ya fare Somoel e ra wurengaenʼ ngakʼ Jacob, ma bayi melʼeg Israel, me tayraed nga lan e binaw roraed; ma pi milekag e yaedra peth ngoraed, mar mang gaed ko fapi gidiiʼ ku Jacob.

2 Ma fapi gidiiʼ e yaedra fekraed iyaen nga taferaed; arragon, ko yungi nʼen nib palog u fayleng; ma yaedra sul ko pi nam roraed nni michmicheg ngoraed. Ma fapi gidiiʼ ku Israel e yaedra tafnaʼ e yu ginnʼem, ma fare nam rokʼ Somoel e ra paer ni fan ngakʼ e pi tapigpig nge pi tapigpig nib ppin; ma yaedra fekraed ni bogi kalbus iyaen ngakʼ e piʼin ni ba kalbus; ma yaedra gagyeg nga dakean e piʼin ni ma abngeyraed.

3 Ma bay yibi buch u lan e re rran nem ni fare Somoel e ra piiʼ ngom e toffan, ko kirbaenʼ rom, nge murus rom, nge kalbus ni tayem ni ngam pigpig riy.

4 Ma bay yibi buch u lan e re rran nem, ni gur e bay moeg e re bugithin ney nib togopluw ngakʼ fare pilung nu Babylon, ni ngam gaʼar: Uw rogon make tal fare taʼabngeyey, make tal fare lan binaw ni gol!

5 Fare Somoel e tʼaer fare sog rokʼ e piʼin nib kireb, nge fapi scepters rokʼ e piʼin nib tagagyeg nigey.

6 Chaʼ nra liiʼ fapi gidiiʼ u fithikʼ e damomuw ni dar tal, ir ni gagyeg nag e pi nam u fithikʼ e damomuw, e yira gechig nag ma dariy beeʼ ni rayog ni nge tileg.

7 Fare fayleng ni poloʼ e ke toffan, ma ke math lamraed; ma kar tabab niged e tang.

8 Arragon, fayuke gakʼiy ni fig e kar falfalaenʼ gaed ni bacham, nge ku aram rogon ngakʼ fapi cedars nu Lebanon, ni yaed be gaʼar: Napʼan ni kan thikiyem nga butʼ ma dakuriy beeʼ ni ke yib ni nge thʼaeb mad.

9 Infierno u ʼaer e ke mithmith ni fan ngom ni nge madaʼ nigem u napʼan e wub rom; ke pug e pi yamʼ ni bacham, ni boed gubin e tin pilung u fayleng; ma ke sakʼiy nag ngalang gubin e pilung ko pi nam u gilʼilungraed.

10 Yaed gubin ni yaedra non mar gaʼar gaed ngom: Gur e gathi kam moʼowaer ni woed gamaed? Gur e gathi kam boed gamaed?

11 Falʼngim e kan fek nga loew; lingan e gita rom e dakunir rungʼag; ke nad e faklʼud u tanginaem, nge pi faklʼud e kar thareyed gur.

12 Uw rogon ni kam mul u tharmiy, O Luchifer, ni fak e fasiraen! Gur e kan lufem nga butʼ, ni kam moʼowaer nag e pi nam!

13 Ya gur e kam gaʼar u lan gumʼirchaʼem: gura yaen ngalang nga tharmiy, gura langlang nag gilʼig nge tolang ko pi tʼuf rokʼ Got; ma kug ra paer nga dakean e burey ko fare ulung, ko rengi nʼen nib palog nga lan e leluʼoch;

14 Gura yaen ngalang nggu tolang ko pi manileng; gura boed fachaʼ ni Thʼabi Tolang.

15 Machane gur e yira fekem nga butʼ nga infierno, ko yungin thʼabi toʼaer u muloew.

16 Piʼin ni be guyem e yaedra falʼeg i yaliyem, mar dugiliyed ni gur, mar gaʼar gaed: Ireray fare moʼon ni rurug e fayleng, me rurug e pi gilʼelung?

17 Me falʼeg fare fayleng ni bangi wuruʼ e binaw, me gatheay e binaw riy, ma de bing e naʼun ko pi kalbus rokʼ?

18 Gubin e pi pilung ko pi nam, arragon, yaed gubin, ma kan molegraed nga fithikʼ e rir, ni yaed gubin nra bagyaed ma bay u lan e naʼun rokʼ.

19 Machane gur e kan yinʼem nga wuruʼ e loew rom ni boed ba paʼangin nib kireb, ma boed e piʼin ni ke magaey rokʼ e piʼin ni kan liiʼraed, ni kan thʼaebraed nga bangi sayden, ma ka ranoed ko pi malang u loew nib mʼay langin; ni boed ba ldoew ni yibe yaen u dakean.

20 Gur e dab ni unegem ngoraed ko gumʼeyag, ni bachan e gur e kam gatheay e nam ma kam liiʼ e gidiiʼ rom; pi awochngin e piʼin ni ma rinʼ e kireb e dariy liyiben mar gilbugwan gaed.

21 Ngan falʼeg rogoy ngan fek pogofan ko pi bitir rokʼ ya bachan e pi denen rokʼ e pi chitamangraed, ni nge siy ra puw gaed ngalang bayay, ara ra feked fare nam, ara ra suguyed dakean e fayleng ko binaw.

22 Ya gura puw ngalang nggu togopluw ngoraed, ni yoeg fare Somoel ko Yoʼor, mug thʼaeb nge chuw u Babylon fare fithingan, nge piʼin ni ke magaey, nge fakay ni pagael, nge pagael ni fak walagey, ni yoeg fare Somoel.

23 Ma kug ra falʼeg nge mang tafen e archeʼ nu maraen; ma gura wolguy ko wolguwen e mogothgoth, ni yoeg fare Somoel ko Yoʼor.

24 Fare Somoel ko Yoʼor e ke micheg, ni gaʼar: Rriyulʼ ni boed nug lemnag, e aram rogon nra yibi buch; nge boed nug tanmeg, e aram rogon nra yaeni aw—

25 Ni gura fek fapi gidiiʼ nu Assyria nga lan e binaw rog, ma dakean e pi burey e yira yitʼraed riy nga tan rifrifanʼey; ma aram min chuweg e matʼ rokʼ roraed, me chuw e gafgow rokʼ u dakean poeraed.

26 Ireray fare tanam nni tanmeg u dakean fare fayleng ni poloʼ; ma ireray fare paʼayif ni kan kʼiyeg nga dakean gubin e pi nam.

27 Ya fare Somoel ko Yoʼor e ke tanmeg, ma miniiʼ e rayog rokʼ ni nge siyeg? Ma ke kʼiyeg paʼ, ma miniiʼ e rayog rokʼ ni nge sulweg?

28 U lan fare duw ni yimʼ fare pilung i Ahaz e ireray fare gafgow.

29 Dab mu falfalaenʼ, gur yu Palestina ni poloʼ, ni bachan fare layi sog rokʼ fachaʼ ni ma dumow e ke mʼing; ya ra yib nga butʼ u likʼngin e porchoyog ba porchoyog ni yub, ma waʼamngin e ra mang ba porchoyog ni be changeg nib dramrom.

30 Ma bin mʼon i fak e piʼin gafgow e yira duruwiʼiyraed, ma piʼin nib tʼuf banʼen roraed e yaedra mol nga butʼ u fithikʼ e pagaenʼ; ma gura liiʼ likʼngimed ko uyngol, me thang e tin ni ke magaey romed.

31 Mu gelʼgelʼ, O garog; mu yoer, O fare binaw; gur yu Palestina ni poloʼ, e dam yaram; ya bay yib u lan e leluʼoch bangi ath, ma dariy beeʼ ni yira pag ko re ngiyalʼ inʼen nni dugliy ngakʼ.

32 Mang e ra fulweg fapi tamalʼog ko pi nam? Ni fare Somoel e sunmiy yu Zion, nge piʼin gafgow ko pi gidiiʼ e ra pagaenʼraed riy.