1 Baʼaray fare bugithin, ni Isaiah, ni fachaʼ ni fak Amoz, e guy ni morngaʼagen yu Juda nge Jerusalem:

2 Ma bay yibi buch nu lan e tin tomur e rran, u napʼan ni fare burey ko naʼun rokʼ Somoel e kan nʼuf ngalang u dakean e burey, ma kan nʼuf ngalang nib tolang ko yungi falang, ma gubin e pi nam ma bay ranoed ngay.

3 Ma boʼor e gidiiʼ ni bay ranoed miyaed gaʼar, Mired, nga daroed ngalang ko fare burey rokʼ Somoel, ko fare naʼun ku Got rokʼ Jacob; ma bayi fil ngodaed morngaʼagen e pi kanawoʼ rokʼ, ma gaed yaen ko kanawoʼ rokʼ; ya yu Zion e ra yib fare motochiyel riy, ma fare thin rokʼ Somoel e ra yib u Jerusalem.

4 Ma ra pufthin u thilin e pi nam, me fonow nag boʼor e gidiiʼ: ma yaedra pirdiʼiy e sayden roraed nge mang martilyow, nge sarey roraed nge mang kuwa—nam e dabki pug e sayden ngalang nge togopluw nga rebo nam, ara kur filed rogon e mael.

5 O gidiiʼ rokʼ Jacob, mired nga daroed u fithikʼ e tamilang rokʼ Somoel; arragon, mired, ya gimed gubin ni kam maroed nga wuruʼ e woʼ, nra beeʼ ma ke yaen ko birokʼ e woʼ nib kireb.

6 Ere, O Somoel, gur e kam pag e gidiiʼ rom, ni gidiiʼ ku Jacob, ni bachan e kar sug gaed u lan e ngek, ma kar motoyil gaed ngakʼ e pi tamarong ni boed ni ma rinʼ e pi Philistines, ma yaed baʼadag yug gidiiʼ ni milekag.

7 Nam roraed e ba sug ko silber nge gol, ma ku dabi mʼay e pi falaʼab roraed; nam roraed e ba sug ko os, ma ku dabi mʼay e karro roraed ni ma girngiy e os.

8 Nam roraed e ba sug ko liyos; yaed ma liyoer ko nʼen ni ke sum ko muruwel u paʼaraed, ni kar falʼeged nga bugulipaʼaraed.

9 Ma gidiiʼ ni darma dumʼ e darma siroʼ, ma beeʼ nib gilbugwan e dabi sobutʼaenʼ, ere, dab mu nʼaegfan rokʼ.

10 O gimed e piʼin nib kireb, mmaroed nga thilin e war, ngam miith gaed nga fithikʼ e fiyath, ya murus ngakʼ Somoel nge fare rir ko liw rokʼ e ra liiʼmed.

11 Ma bay yibi buch ni tolangaenʼ ko gidiiʼ e bayi sobutʼ, ufʼuf ko gidiiʼ e ra lumel nga butʼ, ma fare Somoel ni yigoʼ ir e ra tolang u lan e bin tomur e rran.

12 Ya fare rran rokʼ Somoel ko Yoʼor e ke chugur ni nge yib nga dakean gubin e pi nam, arragon, nga dakean gubin e gidiiʼ; arragon, nga dakean e piʼin nib ʼuf mab tolangaenʼ, ngo dakean gubin e piʼin ni kar langlang niged yaed ngalang, ma yira sulweg raed nga butʼ.

13 Arragon, nge fare rran rokʼ Somoel e bay yib nga dakean gubin pi gakʼiy ni cedars nu Lebanon, ya yaed ba tolang ma kar ʼuf gaed ngalang; ngo dakean gubin e pi gakʼiy ni oak nu Bashan;

14 Ngo dakean gubin e pi burey nib tolang, ngo dakean gubin e pi yungi falang, ngo dakean gubin e pi nam ni kar ʼuf gaed ngalang, ngo dakean gubin e gidiiʼ;

15 Ngo dakean gubin e wulyang nib tolang, ngo dakean gubin e yoror;

16 Ngo dakean gubin e pi barkow u maday, ngo dakean gubin e pi barkow nu Tarshish, ngo dakean gubin e pi yungi nʼen nib felʼ yaʼan.

17 Ma pi tolangaenʼ ko gidiiʼ e bayi lumel nga butʼ, ma pi ufʼuf ko gidiiʼ e bay ni sobutʼeg; ma fare Somoel ni yigoʼ ir e ra tolang u lan e re rran nem.

18 Ma pi liyos e yira gatheay ni gubin.

19 Ma bay ranoed nga lan e pi yungi nʼen nib kur ko war, ngo lan e pi ruʼ ko fayleng, ya fare murus ngakʼ Somoel e bayi aw nga dakeanraed ma fare rir ko liw rokʼ e bayi liiʼraed, u napʼan ni bayi tabab i rurug e fayleng nib gel.

20 Ma lan e re rran nem ra beeʼ ma bayi nʼaeg e pi liyos rokʼ nib silber, nge liyos rokʼ nib gol, ni ke falʼeg ni fen ni nge liyoer ngay, nga paʼ e pi boroʼ nge pi maglʼeaw;

21 Ni nge yaen nga lan e yungin nib pil ko war, ngo lan e pi yungi tiloewloew u dakean e war, ya fare murus ngakʼ Somoel e bay yibi aw nga dakeanraed nge fare liw ko rir rokʼ e bayi liiʼraed, u napʼan ni bayi tabab I rurug e fayleng nib gel.

22 Mu talgaed ko tagaʼ ngakʼ e gidiiʼ, niʼir e ma pogofan u pʼethngun; ya mang tapgin niʼir e ngan liyoer ngakʼ?