1 Machane, amith e dabi mang magawon ngakʼ, u napʼan, ni aram ko sommʼon nib baʼud ni un gafgow nag fare binaw nu Zebulun, nge fare binaw nu Naphtali, me tomur riy me ubchiyaʼ nag e gafgow u kanawoʼ nib sor nga Red Sea nga baʼanem yu Jordan nga langgin e Galilee ko pi nam.

2 Fapi gidiiʼ ni ranoed u fithikʼ e lumor e kar guyed bangi tamilang nib gaaʼ; piʼin nibe paer u lan fare nam u toglulʼlʼan e yamʼ, e ke aw bangi tamilang nga dakeanraed.

3 Gur e kam yoʼor nag fare nam, ma kam gel nag e falfalaenʼ—kar falfalaenʼ gaed u pʼoewchem ni boed rogon ni yima falfalaenʼ u napʼan e togbey, mar falfalaenʼ gaed u napʼan ni yaed be fʼoeth e chugum ni yog u tane mael.

4 Ya gur e kam tʼaer fare matʼ ko gafgow rokʼ, nge fare layi gul ni immoy u dakean poen, nge fare koelingin e dumow rokʼ fachaʼ ma gafgow nag.

5 Ya gubin e mael ko salthaw ma rib maʼathuk lingan, nge mad roraed ni ke lep u fithikʼ e rachaʼ; machane biney e bayi mang dramrom nge gapgep ko nifiy.

6 Ya kan gargeleg beeʼ nib bitir ngodaed, kan piiʼ beeʼ nib pagael ni fak ngodaed; ma bayi paer niʼir e am; ma fithingan e yira pining ni, Maʼangʼang, Taʼayuw, Fare Got ni Gubin marayog Rokʼ, Fare Chitamangiy ni Manemus, nge Fare Pilung ko Gapas.

7 Gagyeg ko am nge gapas e dabi tal, u dakean tagilʼ David, ngo dakean gilʼilungun ni nge yarmiy riy, ma ngki gagyeg nag u fithikʼ e yulʼyulʼ nge justice ko ngiyalʼ ney iyaen nga mʼon, ni manechubog. Ma fare tiyaenʼ ko fare Somoel ko Yoʼor e rarinʼ e rennʼey.

8 Fare Somoel e piiʼ e thin rokʼ ngakʼ Jacob ma ke gaelʼ dakean yu Israel.

9 Ma gubin e gidiiʼ ma ranang, ni boed yu Efraim nge pi gidiiʼ nu Samaria, ni yaed be gaʼar u fithikʼ e ufʼuf nge gaaʼ ngalang: ko gumʼ ircha.

10 Fapi rengga e ke muchbuʼ nga butʼ, machane gamaed ra ufung ko malang ni falelʼ; fapi gakʼiy ni sycamores e kan thʼaeb nga butʼ, machane gamaed ra thilyeg ko pi gakʼiy ni cedars.

11 Ere fare Somoel e ra sunmiy e pi toʼogor rokʼ Rezin ngar togopluw gaed ngakʼ, me puthuy e toʼogor rokʼ nga taʼabang;

12 Ni gidiiʼ nu Syria nga mʼon nge gidiiʼ nu Philistine nga tomur; ma bay ra fulʼed yu Israel. Ma gubin e pinnʼey e dar chefeg e damomuw rokʼ nga orel, ya kub kʼiyeg paʼ nge paer.

13 Ya fapi gidiiʼ e darur chel gaed ngakʼ niʼir e rayog ni nge gechig nagraed, ara ra chel gaed ngar gayed fare Somoel ko Yoʼor.

14 Ere fare Somoel e ra thʼaeb rokʼ yu Israel e loelugen nge pochon, nge paʼangin nib tolang nge pan u sobutʼ u lan taʼareb e rran.

15 Chaʼ nib ilal, e ire loelugen; ma fare profet ni ma fil ngoyiy e tin nib baen, e ir pochon.

16 Ya fapi tiyugangʼ ko pi gidiiʼ ney e ra olobochiyed raed; ma piʼin ruʼuned u paʼaraed e ra mʼaed.

17 Ere fare Somoel e dabi falaenʼ ngakʼ e pi pagael nib felʼ yangren roraed, ara wurengaenʼ ngakʼ e pi gidiiʼ roraed ni ke yimʼ e pi chitamangraed nge piʼin ni kanimʼ roraed; ya yaed gubin ma ba tadumʼthin nge tarinʼ e kireb, nge gubin e langef ma dar yoeg e tin nib yalʼuw. Ma gubin e pinnʼey e dar chefeg e damomuw rokʼ riy nga orel, ya kub kʼiyeg paʼ nge paer.

18 Ya pi ngongol nib kireb e ra muʼuruf ko nifiy; ra urufiy e pi racholoyʼ nge rachangal, ma ra urufiy e garger nib dubʼag, mar changeg gaed ngalang ni boed e ath.

19 Damomuw rokʼ fare Somoel ko Yoʼor e ra lumor nag dakean fare nam, ma fapi gidiiʼ e yaedra mang gapgep ko nifiy; ma dariy beeʼ nra pag walagen nib fos.

20 Ma bayi chel ni nge fekʼ banʼen ni nge kay u baʼani matʼaw i paʼ ma ra paer nib bilig; ma bayi chel nge abich u baʼani gilaeyʼ i paʼ ma dabi sow; ere gubin e gidiiʼ nra beeʼ me chel nge kay e ufin u paʼ—

21 Manasseh ngakʼ Efraim; nge Efraim ngakʼ Manasseh; yow u taʼabang ni yow ra togopluw ngakʼ yu Judah. Ma gubin e pinnʼey e dar chefeg e damomuw rokʼ riy nga orel, ya kub kʼiyeg paʼ nge paer.