1 Ya musap gaed, fare Somoel, ni fare Somoel ko Yoʼor, e ke fek rokʼ yu Jerusalem nge yu Judah, e ggan nge garbad, ni fagi ggan ni flowa ni poloʼ, nge fagafi garbad ni raen ni poloʼ—

2 Ni piʼin nib yargael, nge piʼin ni gidiiʼen e mael, nge fare tapuf-oloboch, nge fare profet, nge piʼin nib gonop, nge piʼin ni kakrom;

3 Nge kapten ko wugem e salthaw, nge fachaʼ nib gaʼbugwan, nge taʼayuw, nge tafalʼeg sikoʼ nib salap, nge chaʼ nib salap ko welthin.

4 Ma bay gu piiʼ e bitir ngoraed ni ngar manged pilung roraed, nge bitir nib achig e yaedra gagyeg nagraed.

5 Ma fapi gidiiʼ e bay ni abngeyraed, ni gubin e gidiiʼ nra beeʼ ma be rinʼ ngakʼ beeʼ, ma gubin e gidiiʼ nra beeʼ ma be rinʼ e buguliyoror rokʼ ngakʼ; fare tir e rarinʼ u fithikʼ e ufanthin nib togopluw ngakʼ pi kakrom, nge fachaʼ nib kireb e ra togopluw ngakʼ fachaʼ nib gaʼbugwan.

6 Napʼan nra beeʼ ni ke malleʼ ngakʼ walagen ni pumoʼon ko fare naʼun rokʼ e chitamangin, me gaʼar: Gur e bay e mad rom, gur e ngam mang gaaʼ romaed, ma dab mu pag e biney e gafgow nge gagyeg u tan paʼam—

7 Lan e re rran nem e ra micheg riy, nibe gaʼar: Dab gumang beeʼ nib tagolnigey; ya lan e naʼun rog e dariy e ggan riy ara mad; dab mu tayed gag nggu mang gaaʼ ko fapi gidiiʼ.

8 Ya Jerusalem e kan gatheay, nge Judah e ke puth, ni bachan e thin roraed nge ngongol roraed e kiiʼ i togopluw ngakʼ Somoel, ni nge kʼaring e puwaenʼ u oewchen e rir rokʼ.

9 Fare rarogon ni yaʼan i oewchraed e micheg nib togopluw ngoraed, ma be yoeg e denen roraed ni taʼareb rogon nga Sodom, ma dabiyog ni ngar mithaeged. Rigafgow ko pi yaʼel roraed, ya kar miliyed wengan e kireb nga dakeanraed!

10 Me yoeg ngakʼ e piʼin nib matʼaw nib felʼ rograed; ya yaedra kay waʼamngin e pi ngongol roraed.

11 Rigafgow ngakʼ e pi tadenen, ya yaedra yimʼ; ya wenigan i paʼaraed e ra aw nga dakeanraed!

12 Ma gidiiʼ rog, e pi bitir roraed ireram e gafgow roraed, ma piʼin nib ppin e be gagyeg nagraed. O gidiiʼ rog, piʼin ni yaed be powiʼiymed e yaed be balyang nagmed ma yaed be gatheay e pi woʼ romed.

13 Fare Somoel e ra sakʼiy ni nge wenig nag, maki sakʼiy ni nge pufthin nag e gidiiʼ.

14 Fare Somoel e ra pufthin nag e gidiiʼ rokʼ ni kakrom nge pilung roraed; ya kam kayed e ggan u mileayʼ rokʼ e piʼin nib gafgow ma kam feked e chugum roraed nga langgin e naʼun romed.

15 Mang e gabe yipʼ fan? Gabe gafgow nag e gidiiʼ rog, mag ker mite piʼin gafgow, nibe yoeg fare Somoel ni Got ko Yoʼor.

16 Nge ku boech, ni yoeg fare Somoel ni gaʼar: Bachan e fapi rugod nu Zion e kar ʼuf gaed, ma kar yangliyed wachreʼraed ko nifeng ma yaed be piiʼ e changar nib dirngal, ni yaed be yif ayraed nib chuchugur thilin, ma be choeb e churwoʼ u ay raed—

17 Ere fare Somoel e ra piiʼ e gechig ni malaed nga dakean i loelugen fapi rugod nu Zion, ma fare Somoel e ra dag e yungin nib miith u doewraed.

18 Lan e re rran nem e fare Somoel e ra chuweg roraed e pinʼen ni yaed be ʼuf ngay, nge urwaech, nge churwoʼ roraed ni boed yaʼan e pul;

19 Nge pi nochiyaelʼ i chen, nge pi bachael, nge mad ni upongen oewchraed;

20 Nge pi urwaech, nge pi nunuw u ayiy, nge pi nunuw u loelugey, nge pi florida, nge pi talbuch roraed;

21 Nge pi luwaw, nge pi talbuch u pʼethnguy;

22 Nge pi mad ni ma thilthil yaʼan, nge pi wuruʼ e mad, nge pi mad ni ma upnguy loelugey, nge pi ping ni ma tunugnug nag loelugey;

23 Nge pi thirik, nge mad ni falelʼ, nge pi mad u loelugey, nge pi mad ni ma upnguy oewchey.

24 Ma bay yibi buch, ni bayi mʼay e felʼ boen me yibe meal; ma mad ni yima mʼag nga lukunguy, e ra mogchoth; ma ra mʼay e piy, nge yibe midroeʼ; ma mad ni ma upnguy ngorngorey, e ra chuw nge paer bangi mad ni tutuw nga luwan; me chuw e felʼ usun nge paer e fath nga luwan.

25 Gidiiʼ rom e yaedra yimʼ ko sayden nge pi yargael rom e yaedra yimʼ ko mael.

26 Ma pi garog rokʼ e bay ra yoer gaed ma yaed be gelʼgelʼ; ma bayi paer ni kan pag, ma kari mʼing kawon.