1 Mmotoyil gaed ngog, gimed e piʼin ni gimed ma falwok ko tin nib matʼaw. Musap gaed ko farengi war nni thʼaeb med riy, nge fare loew ko won nni ker ngan fekmed riy.

2 Mu lemniged Abraham, ni chitamangmed, nge Sarah, ni gargeleg med; ya kemus e chaʼ nug pining, nggu tawaʼath nag.

3 Ya fare Somoel e ra gapasegaenʼ Zion, ra gapasegaenʼ gubin yang e yungin ni ke kireb; ma rafalʼeg wuruʼ e binaw rokʼ nge boed yu Eden, ma gi rad rokʼ e boed faregi mileayʼ rokʼ Somoel. Falfalaenʼ nge falaenʼ e yira pirʼeg riy, og magaer nge laman e tang e yira pirʼeg riy.

4 Mu fol gaed rog, gimed e gidiiʼ rog; mi gimed motoyil ngog, O nam rog; ya bay yib rog ba motochiyel, mug gonopiy u wunʼug nge paer nge mang ba tamilang ni fan ko gidiiʼ.

5 Yalen rog nib matʼaw e ke chugur; woʼen e thap rog e ke ʼulʼul iyaen, ma paʼag e ra pufthin nag e gidiiʼ. Pi donguch e yaedra soen nigeg, ma yaedra tay e pagaenʼ roraed nga paʼag.

6 Mu puged oewchmed nga tharmiy, mi gimed sap nga butʼ nga dakean e fayleng; ya tharmiy e ra mʼay ngab yang ni boed e ath, ma fayleng e ra wod ni boed e mad. Ma piʼin ni yaedra paer riy e yaedra yimʼ ni aram rogon. Machane woʼen e thap rog e ra paer ni gubinfen, ma tirog nib matʼaw e dabi mʼay.

7 Mmotoyil gaed ngog, gimed e piʼin ni gimed manang e tin nib matʼaw, ni pi gidiiʼ ni kug yoloey e motochiyel rog nga langgin gumʼirchaʼraed, dab mu rus gaed ko nonnon ko gidiiʼ, ara mu rus gaed ko pi gathibthib roraed.

8 Ya ra longuyraed e ngael ni boed e mad, nge faklʼud ni ra longuyraed ni boed bunuʼen e gamanman. Machane tirog nib matʼaw e ra paer ni gubinfen, nge woʼen e thap rog e ra af u rebe mfen ngo rebe mfen.

9 Muʼod, muʼod! Munʼ gelingim nga dakeanam, O paʼam Somoel; muʼod ni boed ko tin kakrom e rran. Gathi gur faram e mu thʼethʼaeb Rahab, mag madʼad ko fare dragon?

10 Gathi gur faʼanem nim malikʼ nag e rigur, farengi day nib toʼaer; mag falʼeg e pi yungi nʼen nib toʼaer u maday ni nge mang woʼen e piʼin ni kan bayuliyraed ni nga ranoed u dakean?

11 Ere, fapiʼin ni kan bayuliyraed rokʼ Somoel e yaedra sul, marbaed ni yaed be tang iyib nga Zion; ma falfalaenʼ nge thothup ni dabimus biʼid e ra aw nga dakean loelugraed; me yog ngoraed e falaenʼ nge falfalaenʼ; ma kirbaenʼ nge mayoer e ra chuw.

12 I gag fachaʼ; arragon, I gag fachaʼ ni ma piiʼ e gapas nga laniyaenʼmed. Musap gaed, gur miniiʼ, ni ngam rus ko gidiiʼ, ni ra yimʼ, ma fak e gidiiʼ, nra paer nib fos ni boed napʼan e pan?

13 Ma kam pagtilin fare Somoel niʼir e sunmiyem, niʼir e pithig lanelang, me ufung e dayif ko fayleng, ma gabe rus ni gubin e rran, ni bachan e maʼangech ko piʼin nibe abngeymed, ni gowa ke felʼ rogon ni nge gatheayey? Ere biyuʼuw e maʼangech rokʼ fachaʼ ma abngeyey?

14 Chaʼ nib kalbus e yira chuweg nib gur, ni nge yog ni ngan pag, ni nga dabi yimʼ u lan e loew, ara mʼay e ggan rokʼ.

15 Machane gag fare Somoel ni Got rom, nibe migir lingan e nʼew rokʼ; fare Somoel ko Yoʼor e fithingag.

16 Kug tay e thin rog nga lʼugnam, ma kug upnguyem nga foen i rifrifani paʼag, ni nge yog nug yung lanelang mug ufung e dayif ko fayleng, mug gaʼar ngakʼ Zion: Musap, gur e gidiiʼ rog.

17 Muʼod gaed, muʼod gaed, mu sakʼiy gaed ngalang, O gimed yu Jerusalem, ni kam unumed u paʼ Somoel ko fare kap ko damomuw rokʼ—kam unumed uwan e damomuw ko fare kap ko murus ni mapʼ riy nga butʼ—

18 Ma dariy beeʼ ni nge powiʼiy u fithikʼ gubin e pi pagael ni ke gargeleg; ara beeʼ ni nge koel paʼ, u fithikʼ gubin e pi pagael ni fak ni ke chuguliyraed kar ilal gaed.

19 Gal ni baʼaray e pagael e nga rabow ngom, miniiʼ e ra kirbaenʼ ngom—ni kan nʼigem nge mogothgoth ni kam tay ngom, nge fare uyngol nge sayden ni ke aw ngom—ere miniiʼ e gura midil nigem ngakʼ nge gapas anʼum?

20 Pi pagael ni fakam e kar mul gaed, ma kemus ni yigoʼ galney; ma kar pirew nga tamdardar ko kanawoʼ; ni boed ba garbaw u lan e nug, ni kar sug gow ko damomuw rokʼ Somoel, ni fare fonow rokʼ Got.

21 Ere mmotoyil e chiney ko bin baʼaray, gur ni kam gafgow, ma kam ching, ni gathi kam chingawʼ ko waeyin:

22 I gaʼar fare Somoel rom, fare Somoel ma Got rom e non ni paʼ e gidiiʼ rokʼ; musap gaed, kug chuweg u paʼmed fare kap ko murus, nge uwan e damomuw rog ko fare kap; ere dab kum unumed bayay.

23 Machane bay gu tay nga paʼ e piʼin ni yaed be gafgow nagmed; ni piʼin ni kar gaʼar gaed ngomed: Mu paraw gaed nga butʼ nggu waroed u dakean med—magmed thig nga butʼ ngam manged butʼ nge kanawoʼ ngakʼ e piʼin ni yaed be yaen u dakean.

24 Muʼod gaed, muʼod gaed, munʼed nga dakeanmed gelingmed, O Zion; munʼed nga dakeanmed e mad romed nib felʼusun, O Jerusalem, ni fare binaw nib thothup; ya ngiyalʼ ney iyaen nga mʼon e dab kiyib ngom e piʼin ni dawor ni madʼad ngoraed nge piʼin ni de beʼech.

25 Mu rurug nge chuw e fiyath u doewam; mu bagbag ngalang, ngam paer nga butʼ, O Jerusalem; mu pithig e gaf u balelʼugnam, O sib ni ppin nu Zion.