1 Fapi thin rokʼ Jacob, ni fare pagael ni walagen Nephi, ni weliy ngakʼ fapi gidiiʼ ku Nephi.

2 Musap gaed, pi walageg, gag, Jacob, e bachan e ke piningeg Got, ma kan yibliyeg u rogon fare yaram nib thothup, ma bachan e ke gapgep nigeg walageg i Nephi, niʼir e gimed be sap ngakʼ ni pilung ara tayoror romed, ma ire gimed be tagaʼ ngakʼ nib yoror romed, ere musap gaed, gimed manang ni kug weliy bogi banʼen ngomed ni rib yoʼor.

3 Machane, ngkug non ngomed bayay; ya gubaʼadag ni nggu waen ngaenʼ rogon e paer ko yaʼel romed. Arragon, magafaenʼ rog ngomed e rib gel; ma gimed, ma gimed manang ni kaʼaram rogon iyib. Ya kug fonow nagmed u gubin nib felʼ rogon; ma kug fil ngomed e pi thin rokʼ e chitamag; ma kug non ngomed ni morngaʼagen gubin e pinʼen ni kan yoloey, aram u napʼan nni sunmiy e fayleng.

4 Ere chiney, e musap gaed, nggu non ngomed ni morngaʼagen e pinʼen ni bay, nge pinʼen ni bay yib; ere, nggu biʼeg ngomed e pi thin rokʼ Isaiah. Ma ireram e pi thin ni baʼadag walageg ni nggu weliy ngomed. Ma nggu non ngomed ni fan ngomed, ni nge yog ni ngam filed mi gimed rir nag fithingan e Got romed.

5 Ere chiney, e pi thin ni nggu biʼeg e ire weliy Isaiah ni morngaʼagen gubin e gidiiʼ ku Israel; ere, rayog ni ngam taʼareb niged rogon ngomed, ya gimed e gidiiʼ ku Israel. Ma rib yoʼor bogi banʼen ni ke weliy Isaiah morngaʼagen ni rayog ni ngan taʼareb nag rogon ngomed, ni bachan e gimed e gidiiʼ ku Israel.

6 Ere chiney, baʼaray e pi thin: Baʼaray rogon ni yoeg fare Somoel ni Got: Musap gaed, bay gu pug paʼag ngalang ngakʼ fapi Gentiles, mug dag e yalen rog ngakʼ e gidiiʼ; ma bay rafeked e pi pagael ni fakmed nga lan ngorngor raed, nge pi ppin ni fakmed e bay rafeked yaed u dakean poeraed.

7 Ma pi pilung e ngar manged pi chitamangmed ni ngar chathowoliyed gimed, ma pi leʼengin e pilung roraed e ngar manged pi chitiningmed ni ngar chathowoliyed gimed; yaedra siroʼ ngomed nib wup oewchraed nga butʼ, mar lilʼlʼed e fiyath u rifrifan aymed; ma gimed ra nang ni gag fare Somoel; ya dabi tamraʼ e piʼin ra soen nigeg.

8 Ere chiney e gag, Jacob, e gubaʼadag ni nggog boech e thin ni morngaʼagen e pi thin ney. Ya musap gaed, fare Somoel e ke dag ngog ni piʼin ni ur moyed u Jerusalem, ko gin ni dabaed riy, e kan liiʼraed ma kan fekraed ni bogi kalbus.

9 Machane, fare Somoel e ke dag ngog ni yaedra sul bayay. Ma ki dag ngog ni fare Somoel ni Got, ni Fachaʼ nib Thothup ku Israel, e ra dag ir ngoraed u lan e dowef; ma tomuren ni ra dag ir ma yaedra toey mar kuruth niged, ni boed rogon fapi thin rokʼ fare angel niʼir e ke non ngog.

10 Ma tomuren ni kar ʼelʼel niged gumʼirchaʼraed ma kar ʼelʼel niged laniyaenʼraed ngakʼ Fachaʼ nib Thothup ku Israel, musap gaed, pi gechig rokʼ Fachaʼ nib Thothup ku Israel e bay yibi aw nga dakeanraed. Ma fare rran e bay yib ni ngar pirʼeged e gafgow nge amith.

11 Ere, tomuren ni kan suruyraed nga mʼon, nge tomur, ya aray rogon ni yoeg fare angel, ma boʼor e piʼin ni yaedra pirʼeg e amith ko dowef, ma dab ni pagraed ngar mʼaed, ni bachan e pi meybil rokʼ e piʼin nib yulʼyulʼ; ma bay ni garareg raed, min gafgow nagraed, min fananikayraed; machane, fare Somoel e ra wurengaenʼ ngoraed, ma napʼan ni ra tamilang laniyaenʼraed rokʼ e Tabiyul roraed, ma bay ni kunuy raed nga taʼabang bayay ko fapi yungi nam ni taferaed.

12 Ma nge felʼ waʼathan fapi Gentiles, ni yaed fapiʼin ni yoloey fare profet morngaʼagraed; ya musap gaed, faʼanra yaeni chey ni yaedra kalngaenʼ ma dabra cham gaed ngakʼ Zion, ma dabra gabliyed yaed ko fare galasia nib gaaʼ ni ire thabi kireb, ma yaedra thap; ya fare Somoel ni Got e ra muguʼuliy e pi mʼag rokʼ ni ke tay ko bitir rokʼ; ere ireray fan ni ke yoloey fare profet e pinnʼey.

13 Ere, piʼin ni yaedra cham ngakʼ Zion nge pi gidiiʼ ni falʼeg Somoel ba mʼag nga thilraed e yaedra lilʼ e fiyath u rifrifanʼay raed; ma gidiiʼ rokʼ Somoel e dabra tamraʼ gaed. Ya gidiiʼ rokʼ Somoel e piʼin ni ma soen nag; ya ku yaed be soen nag fare wub rokʼ fare Messiah.

14 Ere musap gaed, boed rogon e thin rokʼ fare profet, ni fare Messiah e bayi guy rogon bayay ko yan lʼagruw yay ni nge ayuwegraed; ere, bayi mʼug ngoraed u fithikʼ e gelingin nge rir, nge yaeni madaʼ ko ngiyalʼ ni kan gechig nag e pi toʼogor roraed, u napʼan fare rran ni bay yib ni bayi michaenʼraed ngakʼ; ma dariy beeʼ ni yira gechig nag nib michaenʼ ngakʼ.

15 Ma piʼin ni dar michaenʼraed ngakʼ e yira gechig nagraed, ko nifiy, nge yokoʼ, nge durruʼ, nge puʼoeg rachaʼ, nge mʼar ni ubchiyaʼ, nge uyngol. Ma arame bay ra nanged ni fare Somoel e ir Got, ni Fachaʼ nib Thothup ku Israel.

16 Ya gul rayog ni ngan fek kʼon e chaʼ nib yargael, ara rayog ni chaʼ ni bayfan ni nge kalbus e ngan pag?

17 Ya gaʼar fare Somoel: Mus ko pi kalbus rokʼ e piʼin nib madangdang ma yira fekraed, nge kʼon e piʼin nib kireb e yira thapegraed; ya fare Got ni Gubin Marayog Rokʼ e ra thapeg e gidiiʼ rokʼ ni falʼeg ba mʼag nga thilraed. Ya gaʼar fare Somoel: Gura cham ngakʼ e piʼin ni yaedra cham ngomed—

18 Ma gura duruwʼiy e piʼin ni yaed be yargael ngomed, nga doewngiraed; ma bay ra ching gaed nga rachaʼraed ni boed e waeyin nib athibthib; ma gubin e yafos ma ra nang ni gag fare Somoel ni Tathapeg romed nge Tabiyul romed, ni Fachaʼ ni Gubin Marayog rokʼ, ku Jacob.