1 Ere chiney e musap gaed, pi walageg nib tʼuf rog, gu baʼadag ni nggu non ngomed; ya gag, Nephi, e dab gupag ni ngam lemniged ni gimed ba matʼaw nga rogon fapi Gentiles nra yaeni aw. Ya musap gaed, faʼanra dab mu fol gaed ko fapi motochiyel rokʼ Got ma gimed gubin ni boed yaed ni gimed rayimʼ; ere bachan e fapi thin ni kanoeg ma dab mu lemniged riy ni fapi Gentiles e arame kan gatheayraed ni poloʼ.

2 Ya musap gaed, gube yoeg ngomed ni oren pi Gentiles nra kalngaenʼ e ireram e pi gidiiʼ ni falʼeg Somoel e mʼag u thilraed; ma oren fapi Jews ni dabra kalgaed ngaenʼraed e yira chuwegraed; ya fare Somoel e dar ma falʼeg e mʼag u thilrow beeʼ ni aram rogon, ma kemus ni piʼin ni ma kalngaenʼ me michaenʼraed ngakʼ Fak, niʼir Fachaʼ nib Thothup ku Israel.

3 Ere chiney, e nggu prophesy nag boech banʼen ni morngaʼagen fapi Jews nge fapi Gentiles. Ya tomuren, nra yib fare ke babyor niʼir e kug weliy morngaʼagen, min yoloey nge yaen ngakʼ fapi Gentiles, min chaʼariy bayay ngakʼ fare Somoel, ma arame boʼor e piʼin nra michaenʼraed ko fare thin ni kan yoloey; ma arame bay rafeked iyaen ngakʼ e piʼin ni ke magaey rokʼ pifakdaed.

4 Ma arame piʼin ni ke magaey u pifakdaed e bay ra naʼab gaed nga morngaʼagdaed, nge rogon ni dabaed nga wuruʼ yu Jerusalem, ma ku yaed gidiiʼen fapi Jews.

5 Ma fare gospel ku Yesus Kristus e bay ni weliy u fithikʼraed; ere, bay ni sulwegraed ko naʼab u morngaʼagen e pi chitamangraed, nge fare naʼab u morngaʼagen Yesus Kristus, ni immoy u fithikʼ e pi chitamangraed.

6 Ma arame bay ra falfalaenʼ gaed; ya bay ra nanged nib tawaʼath ngoraed ni yib u paʼ Got; nge pi iman e lumor e bayi tabab ko mul u oewchraed; ma boʼor e mfen ni dabra mʼaed u fithikʼraed, ni faʼan yaedra paer nib machalbog nge gidiiʼ nib felʼ dakean.

7 Ma bay yibi buch ni fapi Jews ni kar garar gaed e ku bayi tabab i michaenʼraed ngakʼ Kristus; ma bay ra tabab gaed ko mukun nga taʼabang u dakean e fayleng; ma oren e piʼin nra michaenʼraed ngakʼ Kristus e kuyaedra mang bogi gidiiʼ nib felʼ dakeanraed.

8 Ma bay yibi buch ni fare Somoel ni Got e bayi tabab nag e muruwel rokʼ u fithikʼ gubin e pi nam, nge mfen, nge thin, nge gidiiʼ, ni nge gagyeg nag fare sulyarmen ko gidiiʼ rokʼ u dakean e fayleng.

9 Ma yalen nib matʼaw e fare Somoel ni Got e ra pufthin nag e piʼin nib gafgow riy, me fonow nib matʼaw ni fan ngakʼ e piʼin nib gumʼaenʼ nu fayleng. Ma ra gechig e fayleng ko thin u lʼugun; ma nifngin i lʼugun e ra liiʼ e piʼin nib kireb ngay.

10 Ya fare ngiyalʼ innʼem e be yib ni rib papay ni fare Somoel ni Got e bayi gagyeg nag ba kiiʼ nga fithikʼ fapi gidiiʼ, ma piʼin nib kireb e yira gatheayraed; ma ra tay e tirokʼ e gidiiʼ, arragon, ni faʼanra nge gatheay e piʼin nib kireb ko nifiy.

11 Ma tin nib matʼaw e ramang liʼed u lukungun, nge yulʼyulʼ nge ramang liʼed u kiruʼ.

12 Ma arame bayi paer e wolf u fithikʼ e saaf; nge leopard e bayi mol nga butʼ u charen pifak e kaming, ma pifak e garbaw, nge lion, nge gamanman nib sugsug, u taʼabang; e bayi powiʼiyraed beeʼ nib bitir.

13 Ma garbaw nge bear e yaedra abich u taʼabang; ma pifakraed e yaedra mol nga butʼ u taʼabang; ma layon e yaedra kay kenggin e grain ni boed e garbaw.

14 Nge bitir nib achichig nra i fafel u langan i tafen e porchoyog ma dabi kʼaed, nge bitir ni kub achig nra tay paʼ nga lan tafen e porchoyog ma dabi kʼaed.

15 Ma dabra kʼaeded ara madʼad gaed ngakʼ beeʼ u gaʼangin yang fare burey rog nib thothup, ya fayleng ni poloʼ e ra sug ko llowaenʼ rokʼ Somoel, ni boed e day nibe tharey e butʼ u maday.

16 Ere, gafarig ko gubin e pi nam e goʼyira nang; arragon, gubin banʼen ma yira dag ngakʼ e gidiiʼ.

17 Dariy banʼen nib miith ni dab ni yiʼiy nag; dariy e muruwel nu milmor ni dab ni dag nga lan e tamilang; ma dariy banʼen ni kan tel ni dab ni pag.

18 Ere, gubin banʼen ni kan yiʼiy nag ngakʼ e gidiiʼ e yira yiʼiy nag ko re rran nem; ma Satan e arame bayi paer ni dakuriy gelingin nga dakean i gumʼirchaʼen e gidiiʼ, nib nʼuw napʼan. Ere chiney, pi walageg nib tʼuf rog, nggu museg e thin rog u roey.