1 Machane musap gaed, boʼor e piʼin ni bayi gaʼar—ko re rran nem u napʼan ni bay gu tabab irinʼ ba muruwel nib maʼangʼang u fithikʼraed, ni nge yog ni yib nganʼug fapi mʼag rog nug falʼeg u thilmaed e gidiiʼ, ni nge yog nug kʼiyeg paʼag bayay ko yan lʼagruw yay ni nggu sulweg e gidiiʼ rog, ni piyu Israel;

2 Ma ku arragon, ni ngki yog ni paer u wunʼug fapi michmich nug tay ngom, gur Nephi, nge ku arragon ngakʼ e chitamam, nra ʼug lemnag pifakmew; nge pi thin rokʼ pifakmew e nge yaen u lʼugnag ngakʼ pifakmew; ma thin rog e bay yaen nge madaʼ ngakʼ e gidiiʼ ko tin tomur e rran u fayleng, nib pow ngakʼ e gidiiʼ rog, ni piyu Israel;

3 Ma bachan e thin rog ni bay iyaen—ma boʼor fapi Gentiles ni ra gaʼar: Bible! Bible! Bay baken e Bible romaed, ere dakuriy baken e Bible ngabang.

4 Machane baʼaray rogon e nʼen ni yoeg fare Somoel ni Got: O pi meechiyang, rayog bake Bible ngoraed; nra yib rokʼ fapi Jews, ni gidiiʼ rog ni kakrom nug falʼeg ba mʼag u thilmaed. Ere buʼuw rogon ni kar oged e magaer ngakʼ fapi Jews ko fare ke Bible ni ke yog ngoraed roraed? Arragon, mang e nomeg fapi Gentiles? Gul ku yaed manang fapi gafgow, nge muruwel, nge amith ko fapi Jew, nge lʼagaenʼ roraed ngog, nge yulʼyulʼ roraed ngog, ni ngar thapeged fapi Gentiles?

5 O gimed e Gentiles, ke yib ngaenʼmed fapi Jews, ni fapi gidiiʼ rog ni kakrom nug falʼeg ba mʼag u thilmaed? Dawor; ya kam gerniged yaed, ma dawor mu guyed rogon ni ngam sulweged raed. Machane musap gaed, gura sulweg gubin e pinnʼey nga dakean loelugmed; ya gag Somoel e dawor gupag talin e gidiiʼ rog.

6 Gimed ba meechiyang, e piʼin ni gimed ra gaʼar: Ba Bible, bay baken e Bible romaed, ma daki tʼuf romaed baken e Bible. Gathi yog e Bible ngomed ni yib rokʼ fapi Jews?

7 Damnanged ni bay e nam nib yoʼor ko taʼareb? Damnanged ni gag, fare Somoel ni Got romed, e gu sunmiy gubin e gidiiʼ, ma ku gumnang e piʼin ni bay u dakean e pi donguch u maday; ma gag e gube gagyeg u lan e tharmiy u lang ngu fayleng u butʼ; ma gube fek e thin iyib ngakʼ e gidiiʼ, arragon, u dakean gubin e pi nam nu fayleng?

8 Ere mangfan ni gimed be nonnon, ni bachan boech e thin rog ni bay thap ngomed? Damnanged ni mich rokʼ lʼagruw e nam e ire michriy ngomed ni gag Got, ma ku taʼab rogon u wunʼug rebo nam nga reb? Ere, taʼareb rogon e thin ni gube yoeg nga rebo nam ngo reb. Ma napʼan ni ra yaen fagal nam u taʼabang ma mich rokʼ fagal nam e kura yaen u taʼabang.

9 Ma gube rinʼ e rennʼey ni nge yog nug micheg ko yoʼor ni gag e taʼareb rogog fowap, daʼir, nge manemus; ma guma yoeg e thin rog u rogon nib mʼag u wunʼug. Ere bachan e kugog taʼabbug e thin ma dab mu lemniged ni dab ki yog ni gura yoeg bbug; ya muruwel rog e dawori mʼay; ma kudabi mʼay nge yaeni taw nga napʼan ni ke mus e gidiiʼ, ara ngiyalʼ nem iyaen nga mʼon nge manemus.

10 Ere, bachan e bay bake Bible romed ma dab mu lemniged ni gubin e thin rog ma bay riy; ara mu lemniged ni dabiyog ni kug ra guy rogon boech ngan yoloey.

11 Ya gubin e gidiiʼ ma gube chiyliy ngoraed, ni ruw rabaʼ, lan e ngek ngu lan e ngael, lan e leluʼoch, ngu lan e yimuch, ngo dakean e pi donguch nu maday, ni ngar yoloeyed e pi thin ni gube yoeg ngoraed; ya fare ke babyor ni yira yoloey e gura pufthin nag e fayleng riy, ni gubin e gidiiʼ nra beeʼ ma be yaen u rogon e pi muruwel rok, ni boed rogon e pinʼen ni kan yoloey.

12 Ya musap gaed, gura non ngakʼ fapi Jews ma yaedra yoloey; ma kug ra non ngakʼ fapi Nephites ma yaedra yoloey; ma kug ra non ngakʼ boech e ganong ko gidiiʼ ku Israel, ni yaed e kug wawliyraed ngab yang, ma yaedra yoloey; ma kug ra non ngakʼ gubin e pi nam u fayleng ma yaedra yoloey.

13 Ma bay yibi buch ni fapi Jews e rayog ngoraed fapi thin ko Nephites, ma fapi Nephites e rayog ngoraed fapi thin ko Jews; ma fapi Nephites nge fapi Jews e rayog ngoraed fapi thin rokʼ fapi ganong ku Israel ni kar malog gaed; ma fapi ganong ku Israel ni kar malog gaed e rayog ngoraed fapi thin rokʼ fapi Nephites nge fapi Jews.

14 Ma bay yibi buch ni gidiiʼ rog, ni gidiiʼ ku Israel, e bay ni kunuy raed nga tabinaew ko fapi nam ni taferaed; nge thin rog e ku aram rogon nra mukun nge taʼareb. Ma bay gudag ngakʼ e piʼin ni ma cham nib togopluw ko thin rog ma ma togopluw ko gidiiʼ rog, ni gidiiʼ ku Israel, ni gag fare Got, nug falʼeg ba mʼag u thilmow Abraham ni gura tay u wunʼug pifak ni manemus.