1 Ma arame bay gunʼ ba tang ngakʼ e chaʼ nib tʼuf rog ni morngaʼagen e adag rog ko mileayʼ rokʼ. Chaʼ nib tʼuf rog e bay bangi mileayʼ rokʼ u lan bangi falang nib galwog.

2 Ma ke yororiy, ma ke kunuy e malang ke chuweg riy, ma ke yung e tin thʼabi felʼ e grape ngay, me toey ba wulyang nga lulukungun, ma ki falʼeg fen e falʼeg waeyin riy; me soen ni nge piiʼ e grape, ere me piiʼ e grape ni pan.

3 Ere chiney, O gimed pi gidiiʼen yu Jerusalem, nge pumoʼon nu Judah, wenig ngomed mu dugiliyed laniyaenʼmed u thilmow e mileayʼ rog.

4 Mang e kubay ni susun e ngan rinʼ ko mileayʼ rog ni dawor gurinʼ? Mangfan, ni kug soen nag napʼan ni nge piiʼ e grape me piiʼ e grape ni pan.

5 Ere chiney e musap gaed; nggog ngomed ko manga nggu rinʼ ko farengi mileayʼ rog—Nggu chuweg e yoror riy, nge kay e gamanman, mug buthug e rungrung riy nga butʼ, nge yaen e gamanman u dakean;

6 Ma nggu pag ngan gatheay; ma dab kun thʼethʼaeb paʼangin ara ni fofuʼog taʼaben; ya bay yib racholoyʼ nge rachangal nga dakean; ma ku bay gog ko manileng ni nga dabki awnag e nʼuw nga dakean.

7 Ya farengi mileayʼ rokʼ fare Somoel ko Yoʼor e ireram fapi gidiiʼ ku Israel, ma fapi gidiiʼ nu Judah e yaed e wuldug rokʼ nib falaenʼ ngoraed; me sap ni nge guy ni kar gagyeg gaed nib matʼaw, me guy ni yaed be gafgow nigey; me sap ni nge guy e tin nib matʼaw, machane me rungʼag, ba lam nibe yoer.

8 Gafgow ngakʼ e piʼin ni ma chagiy rebe naʼun nga rebe naʼun, nge madaʼ ko ngiyalʼ ni dakuriy tagilʼ u butʼ, ni nge yog ni ngar pired ni yigoʼ yaed nga lulukungun e fayleng!

9 Lan tel med, e ke gaʼar fare Somoel ko Yoʼor ngay, rriyulʼ nib yoʼor e pi tabinaew ni bay ni pag, nge pi binaw ni gagangʼ mab felʼ usun e bayi paer ni dakuriy e gidiiʼ riy.

10 Arragon, ragag yang e acres ni mileayʼ e ra yognag taʼareb e bath, awoch u reb e homer e ra yognag reb e aphah.

11 Gafgow ngakʼ e piʼin ni yaed ma od ni kakadbul, mar gayed e rrom ngar unumed, mar tuʼoged iyaen nge nepʼ, ni ke mʼay faraed ching ko waeyin!

12 Ma fare harp, nge fare viol, nge tabret, nge baley i ngael, nge waeyin e yaed be madnom ngay; ma darur lemniged fare muruwel rokʼ Somoel, ara ra lemniged e pi muruwel nibe yib u paʼ.

13 Ere, gidiiʼ rog e kan fekraed ni kalbus, ni bachan e dariy e gonop roraed; ma pi gidiiʼ roraed nib totolang e kar mʼaed ni makʼiy, nge pi gidiiʼ roraed e kar malikʼ gaed ni balel.

14 Ere, infierno e ke gaaʼ nag ir, me bing lʼugun ni dariy folan; ma rir roraed, nge ulung roraed, nge mad roraed nib felʼ usun, nge chaʼ nibe falfalaenʼ, e ra mul nga langgin.

15 Ma yug gidiiʼ e yaedra mʼing nga butʼ, ma beeʼ nib gilbugwan e ra sobutʼaenʼ, ma oewchen e piʼin nib ʼuf e ra sobutʼaenʼraed.

16 Machane fare Somoel ko Yoʼor e yira chibiy ngalang nib gilgilmatʼaw, ma Got nib thothup e yira thothup nag nga fithikʼ e tin nib matʼaw.

17 Ma arame bayi duruwoʼ e pi saaf u rogonni yaed ma rinʼ, ma pi yungi nʼen ni kan pag e bayi abich e pi milekag riy.

18 Gafgow ngakʼ e piʼin ni kar mʼaged yaed ko kireb nge denen ni bachan e tin dariy fan banʼen;

19 Nge piʼin ni ma gaʼar: Mu pag nge falʼeg nib papay mab gur e muruwel rokʼ, ni nge yog ni ngad guyed; ere mu pag fare fonow rokʼ Fachaʼ nib Thothup ku Israel nge chugur me yib, ni nge yog ni ngad nanged.

20 Gafgow ngakʼ e piʼin ra pining e felʼ ko tin nib kireb, nge kireb ko tin nib felʼ, nge piʼin ni ma tay e lumor nib tamilang, nge tamilang nib lumor, nge piʼin ni ma tay e moʼoy nib athibthib, nge athibthib nib moʼoy!

21 Gafgow ngakʼ e piʼin ni yaed be lemnag ni yaed ba gonop ma yaed be lemnag nib tanam laniyaenʼraed!

22 Gafgow ngakʼ e piʼin nib almarin ko muʼun waeyin, nge gidiiʼ nib gel ko maʼaruy rrom;

23 Ni piʼin ni ma falʼeg e rokʼ e piʼin nib kireb ni nge fek puluwon, me chuweg e tin nib matʼaw rokʼ e chaʼ nib matʼaw!

24 Ere, rogon e nifiy ni ma urufiy e matbul, nge dramrom ni ma urufiy fitiruʼ e grain, e aram rogon nra lʼud likʼngiraed, nge floras roraed nra malikʼ nge changeg ni boed e fiyath; ni bachan e kar nʼiged fare motochiyel rokʼ fare Somoel ko Yoʼor, mar dubuyed fare thin rokʼ Fachaʼ nib Thothup ku Israel.

25 Ere, fare damomuw rokʼ Somoel e ke yib nib togopluw ko gidiiʼ rokʼ, ma ke kʼiyeg paʼ nge gechig nag e gidiiʼ rokʼ, me liiʼraed; ma pi yungi falang e murur, nge pi dowef roraed e masasey u lulukungun e kanawo. Ere gubin e pinnʼey e arayfan ni de chefeg e damomuw rokʼ nga orel, machane me paer ni kube kʼiyeg paʼ.

26 Ma bayi pug ngalang bangi falak, ngakʼ e pi nam nib palog, ma bayi hiss ngoraed ko rengi nʼen nib palog u fayleng; ma musap gaed, bay rabaed nib papay nib gur; ma dariy bagyaed nra magaf ara doelʼ u fithikʼraed.

27 Dariy beeʼ nra milngeng ara chuchuw; ara lalwur e liiʼed u lukungun, ara mathʼ gafan e sus rokʼ;

28 Ni piʼin nib mʼuth gane gatʼing roraed, nge gubin e gatʼing roraed mab mataltal, me lan ay e pi os roraed e yira lemnag ni boed e pacheʼ, ma tayya roraed e boed e nifeng nibe chelchel, nge lamraed e boed laman ba layon.

29 Yaedra moen ni boed laman e layon nib bitir; arragon, yaedra moen, mar koeled kʼonraed, min fekraed ni dariy beeʼ nra yog ni nge pagraed.

30 Ma lan e re rran nem e yaedra moen nib togopluw ngoraed ni boed lingan e day nibe migir; ma faʼan yaedra sap nga dakean e nam, ma musap gaed, lumor nge kirbaenʼ e yaedra guy, ma ke lumor e tamilang u lan e lang.