Tááʼ Daʼiiłtsáanii Bizaad Tʼáá Aanínígíí

Bééhózin dooleeł tʼáá ałtso nihokááʼ dineʼé dah deíkááhgóó, ahidaʼdiilchíín, bizaad ałʼąą ádaatʼéii, dóó nihokááʼ dineʼé díí naanish bichʼįʼ kódoolnííł: Áko nihí, nihiTaaʼ Diyin God bibee ajoobaʼ, dóó nihiDiyin Bóhólníihii Jesus Christ binahjįʼ, éí béésh óola tʼą́hí bikááʼ naʼasdzooígíí deiiltsą́, éí éiyá Nephi bidineʼé baa haneʼ náhasdzooígíí átʼé, dóó Laman dineʼé ałdóʼ, bikʼisóó danilíinii, dóó Jared bidineʼé, yá bichʼįʼ hadaʼítłʼinyę́ędą́ą́ʼ baa haneʼ yitsʼą́ą́dę́ę́ʼ yíkaiígíí ałdóʼ. Áádóó Diyin God bibee aʼiilyéii dóó bibee adziilii bee ályaago nihił béédahózin, háálá bizaad yee nihił hoolneʼ; éí biniinaa díí naanish tsʼídá tʼáá aaníí átʼéego nihił béédahózin. Áádóó tʼáá aaníigo ádadiiʼní béésh óola tʼą́hí bikʼi naʼasdzooígíí deiiltsą́; dóó Diyin God bibee adziilii éí binahjįʼ nihił ííshjání ályaa, doo éí bílaʼashdlaʼii binahjįʼ da. Áádóó saad naʼiiłnáanii bee ádadiiʼní, Diyin God bá naalʼaʼí yáʼąąshdę́ę́ʼ adááyá, dóó béésh óola tʼą́hí yíníʼą́ dóó nihił ííshją́ą́ áyiilaa, áko béésh óola tʼą́hí dóó bikááʼ naʼasdzooígíí deiiltsą́, dóó nihiTaaʼ Diyin God bibee ajoobaʼii, dóó nihiDiyin Bóhólníihii Jesus Christ binahjįʼ nihił béédahózingo deiiltsą́ dóó kʼad baa dahwiilneʼ díí éí tʼáá aaníí ádaatʼé, Dóó ayóó átʼéego baa ntsídeiikeesgo deiitʼį́. Áko, Diyin Bóhólníihii nihídóʼ díí tʼáá aaníigo baa dahołneʼ nihiłní; ákohgo, Diyin God bibee hazʼáanii bikʼeh honiilʼį́į dooleełgo, díí tʼáá aaníigo baa dahwiilneʼ. Áko nihił béédahózin Christ deiniidlą́ągo, nihí tʼáá ałtso nihokááʼ dineʼé bibąąhági ádaatʼéii doo nihąąh siláa da dooleeł, dóó Christ bibee ánihwiitʼaah-bikááʼdahʼasdáhí nihokááʼ dineʼé tʼáá ałtso bidił doo nihiʼééʼ bąąhgóó doo nihąąh chingóó bidááhdóó nihidiikah, dóó yáʼąąshdi hoolʼáágóó bił honiidlǫ́ǫ dooleeł. Dóó nihiTaaʼ nilíinii, dóó aYeʼ dóó Iiʼ Sizį́ Diyinii, éí tʼááłáʼí Diyin God danilį́įgo baa haʼniih. Amen.