Saad Bee Ąą Álnéehii

Naaltsoos Mormon Wolyéhígíí éí Diyin God Bizaad bee akʼedaʼashchínígíí átʼé Bible átʼéhígi átʼéego. Diyin God Kédaayah America Daolyéhígíí bikáaʼgi ałkʼidą́ą́ʼ diné dahinánée yił naashnishgo naʼasdzo dóó nahatʼá bee yisdáʼiildéehii doo ninítʼiʼii, tʼáá ałtso dabiyiʼ.

Éí naaltsoos ląʼída ałkʼidą́ą́ʼ Diyin yá yádaałtiʼii éí diyingo áhodooníłígíí dóó diyingo ił ííshją́ą́ ályaaígíí yee akʼedaʼashchį́. Éí dabizaad, béésh óola tʼą́hí bikááʼ nááháasdzo, Diyin God yá yáłtiʼii nátʼą́ą́ʼ náhálneʼii Mormon wolyéego saad nááyíizo dóó áłtsʼíísígo áyiilaa. Naʼasdzo naakigo ayóo átʼéego dineʼé dah yikah ńtʼę́ę́ʼgo yaa halneʼ. Łaʼ éí Jerusalemdę́ę́ʼ yíkai Jesus bidiʼdoochííłjįʼ 600 B.C. yihahgo ádahóótʼįįd áádóó bikʼijįʼ naakigo dineʼé ałtsʼákai, Nephi dineʼé dóó Laman dineʼé daolyéego. Łaʼígíí éí tʼah yíwohdą́ą́ʼ yíkai éí Diyin Bóhólníihii Babel Kin Yadiinéézdi bizaad ałʼąąh ádaatʼéego ályiilaayę́ędą́ą́ʼ. Díí yíkaaígíí éí Jared dineʼé daolyéé ńtʼę́ę́ʼ. Ląʼí dimííl yázhí nááhaigo, tʼáá ałtso ásdįįd tʼáá hazhóʼó Laman dineʼé tʼéiyá, dóó éí éiyá Americagi bitsįʼ yishtłizhii łaʼ bizází ádaatʼį́.

Tsʼídá aláahdi Naaltsoos Mormon Wolyéhígíí biyiʼ áhóótʼįįdgo nááháasdzooígíí éí Diyin Bóhólníihii Jesus Christ tʼáá bí Nephi dineʼé yitah binaanish áyiilaa Nááhiiná dóó bikʼijįʼ. Éí nahatʼá bee yisdáʼiildéehii yaa halneʼ, haitʼáo bee yisdáʼadoodááłgo yaa halneʼ, áádóó haitʼéego diné díí iiná biyiʼ ahodiilzeeʼ dóó náás iiná biyiʼ hoolʼáágóó yisdáʼiildéhígíí yee yił halneʼ.

Mormon tʼáá átʼé náyíízoh yę́ę, éí náháasdzoohígíí biyeʼ Moroni yeiníʼą́, éí éiyá áłchʼį́į́dígo bizaad łaʼ yiih yiyiizoh dóó béésh tʼą́hí Cumorah Dah Yiskʼid yąąh néideesʼį́į́ʼ. Biniʼantʼą́ą́tsohgi yiziłígíí biyiʼ 21góó yoołkáałgo, 1823 yihahgo, tʼáá éí Moroni, ayóó átʼé silį́į́ʼ, dóó nááhiinaʼ, Diyin God Yá Yáłtiʼii Joseph Smith yichʼįʼ ííshjání áʼdiilyaa áádóó ałkʼidą́ą́ʼ naʼasdzoh yę́ę dóó naasdi Bilagáanaa bizaadkʼehjí ádoolníłígíí yee neineeztą́ą́ʼ.

Náasdi índa béésh tʼą́hí Joseph Smith beítʼą́, éí Diyin God bibee aʼiilyéii dóó bibee adziilii bee saad łahgo bee ályaa. Díí naʼasdzooígíí aniidigo ła Diyin bizaad bínááneetʼą́ dóó ooʼíinii átʼé Jesus Christ éí Diyin God hináanii biYeʼ nilį́ dóó tʼáá átʼé Yikééʼ niikaaígíí dóó Binahatʼá bee yisdáʼiildéehii biyiʼ bibee hazʼáanii índa bibee óʼoolʼįįł yikʼeh dahółʼínígíí éí yisdádookah.

Diyin God Yá Yáłtiʼii Joseph Smith díí naʼasdzooígíí baa náhátʼį́įgo kódííniid: “Shikʼisóó Naaltsoos Mormon Wolyéhígíí éí nahasdzáán bikáaʼgi aláahdi naaltsoos hadaałtʼééh átʼé, dóó tʼáá ałtso nihinahaghaʼ bídéétʼiʼígíí átʼé, dóó binahjįʼ diné Diyin God tʼáá íiyisíí yééhodoosįįł binaʼnitin yikʼeh hółʼį́įgo, dóó doo łaʼ naaltsoos kótʼée da.”

Joseph Smith bił, Diyin Bóhólníihii hastóí łaʼtsʼáadah béésh óola tʼą́hí tʼáá bí deidínóołʼįįłgo yá hoołʼaʼ dóó Naaltsoos Mormon Wolyéhígíí tʼáá aaníí dóó diyingo átʼéhígíí yá tʼáá íiyisíí ooʼíinii danilį́į dooleeł. Tʼáá aaníí deiiltsą́ daaníigo díí naaltsoos biyiʼ nááháasdzo éí éiyá “Tááʼ Daʼiiłtsáanii Bizaad Tʼáá Aanínígíí” dóó “Tseebíí Daʼiiłtsáanii Bizaad Tʼáá Aanínígíí.”

Bílaʼashdlaʼii tʼáá ałtso Naaltsoos Mormon Wolyéhígíí deiyidóołtah daniidzin, biyiʼ bikʼidiʼdootį́łígíí bijéí yee yéego yaa ntsídadookos, áádóó Christ bízhiʼ binahjįʼ, Hoolʼáágóó nihiTaaʼ nilíinii Diyin God éí díí naaltsoosísh tʼáá aaníí daaníigo ndeídídóołkił. Tʼáá háíshį́į́ naʼídíłkidgo díí yikʼeh hołʼį́įgo dóó oodlą́ągo Iiʼ Sizį́ Diyinii bibee adziil binahjįʼ tʼáá aaníí dóó diyingo bił ííshją́ą́ ádoolnííł. (Moroni 10:3–5jįʼ deiyidoołtah)

Háida Iiʼ Sizį́ Diyinii yitsʼą́ą́dóó diyingo iiłtsą́ągo tʼáá éí adziilii binahjįʼ ałdóʼ Jesus Christ nahasdzáán Yisdáʼiiníiłii nilį́įgo bił bééhodoozįįł, dóó Joseph Smith éí Yá diyingo bił ííshją́ą́ éʼélʼíinii dóó dííjį́įdi Diyin yá yáłtiʼii nilį́, dóó Jesus Christ Binahaghaʼ Akéeʼdi dayoołkáałgo yá naazínígíí éí Diyin Bóhólníihii nahasdzáán bikáaʼgi bił hazʼáanii átʼé, Messiah Nínáádoodááł Bijį́į́di biniyé hashtʼeʼádíníílzin.