Naaltsoos Mormon Wolyéhígíí Áłtsʼíísígo Baa Haneʼ

Naaltsoos Mormon Wolyéhígíí ałkʼidą́ą́ʼ Americagi diné dah deíkáahgo binaʼasdzo dílzinígíí átʼé, dóó béésh tʼą́hí bikááʼ náháasdzo. Díí haneʼ bitsʼáádóó nídiilyé dóó ahiihyiʼnilígíí éí díídí:

1. Nephi Bibéésh Tʼą́hí, éí naaki ałʼąą átʼé: Áłtsʼíísí dóó ntsaago béésh tʼą́hí. Áłtsʼíísígíí éí iiʼ sizį́jíkʼehgo bídadéétʼiʼígíí, dóó Diyin yá yádaałtiʼii binaʼnitin dóó tádadeeskaiígíí baa naʼíísdzo, ntsaaígíí diné dah deíkáhígíí nátʼą́ą́ʼ náháneʼii bídéétʼiʼígíí íiyisíí baa naʼíísdzo (1 Nephi 9:2–4). Ákondi, Mosiah hinánée dóó, béésh tʼą́hí ntsaaígíí hózhǫ́ iiʼ sizíiniijígo bídadéétʼiʼígíí ałdóʼ biyiʼ.

2. Mormon Bibéésh Tʼą́hí, éí Mormon Nephi bibéésh tʼą́hí ntsaaígíí áłtsʼíísígo áyiilaaígíí biyiʼ, dóó tʼáá bí bizaad ląʼída biyiʼ. Díí béésh tʼą́hí ałdóʼ Mormon nátʼą́ą́ʼ náhaneʼii yaa náhoolneʼ dóó biyeʼ Moroni ałdóʼ yighą́ąhjįʼ akʼeʼeeshchį́.

3. Ether Bibéésh Tʼą́hí, Jared dineʼé binátʼą́ą́ʼ náhaneʼ yaa halneʼ. Díí naʼasdzooígíí Moroni áłtsʼíísígo áyiilaa; tʼáá bí bizaad dóó nátʼą́ą́ʼ náhaneʼ yił ahíyiizóóh “Ether Binaaltsoos” wolyéego.

4. Béésh Łitsoii Tʼą́hí Lehi bidineʼé Jerusalemdę́ę́ʼ deiníʼánígíí Jesus bidiʼdoochííłjįʼ 600 B.C. yihahgo ádahóótʼįįd. Díí “Moses binaaltsoos ashdlaʼgo, … dóó Jew dineʼé hazlį́į́ʼ dóó naʼasdzooígíí ałdóʼ, … dóó Zedekiah, Judah dineʼé aláahdi binaatʼáanii dah neezdáajįʼ naʼasdzooígíí biyiʼ; Dóó Diyin yá yádaałtiʼii dadiyinii náásgóó ádahodoonííł yaa dahoolneʼę́ę ałdóʼ biyiʼ” (1 Nephi 5:11–13). Isaiah dóó Diyin yá yádaałtiʼii naaltsoos sání dóó doo naaltsoos sání biyiʼ baa dahaneʼígíí dabizaad díí béésh tʼą́hí, Naaltsoos Mormon Wolyéhígíí biyiʼ bee akʼeʼeeshchį́.

Naaltsoos Mormon Wolyéhígíí ashdlaʼáadahgo ałtsʼáádzo, naaltsoos daolyéego, tʼááłáʼí tʼéiyá doo naaltsoos wolyée da, dóó ałʼąą diné akʼedaʼashchínígíí bízhiʼ bee dawójíigo ályaa. Áłtséhígíí (áłtsé hastą́ągo naaltsoos sinilígíí, Omnijįʼ) Nephi bibéésh tʼą́hí Áłtsʼíísígíí bitsʼą́ą́dę́ę́ʼ ályaa. Naaltsoos Omni dóó Mosiah wolyéhígíí bitaʼgi łaʼ saad dah shijaaʼ Mormon Bizaad wolyéego. Díí saad dah shijaaʼígíí béésh tʼą́hí ałtsʼíísígíí dóó ntsaago béésh tʼą́hí Mormon áłtsʼíísígo áyiilaaígíí bee ahidiiʼnil.

Ląʼídí naʼasdzooígíí, Mosiah dóó Mormon, wóltaʼ 7jįʼ, Nephi bibéésh tʼą́hí ntsaa wolyéhę́ę Mormon áłtsʼíísígo ánáyiidlaaígíí átʼé. Akéeʼdiígíí, Mormon wóltaʼ 8 dóó naaltsoos ałtsojįʼ, Mormon biyeʼ Moroni akʼeʼeshchį́, éí, bizhéʼé beʼiinaʼ ałtso nááyíizohgo, Jared dineʼé bináʼíísdzohyę́ę áłtsʼíísígo áyiilaa (Ether binaaltsoos wolyéego) dóó náásgóó Moroni binaaltsoos wolyéhígíí bídiidzohgo áyiilaa.

Jesus náádiidzáádóó A.D. 421 yihahgo ádahóótʼįįd, Moroní, tsʼídá akéeʼdi Nephi dineʼé Diyin yá yáłtiʼii-nátʼą́ą́ʼ náhaneʼ yaa halneʼii, diyingo naʼasdzooígíí yidáʼdeeshjééʼ dóó Diyin Bóhólníihii yichʼįʼ néideesʼį́į́ʼ, dííshjį́įdi deiyoołkáałjįʼ hadootʼááł biniyé, Diyin ałkʼidą́ą́ʼ Bá yádaałtiʼii biníkáá góneʼ yee haadzíiʼgo áhodoonííł nínéegi átʼáo. Jesus náádiidzáádóó A.D. 1823 yihahgo ádahóótʼįįd, Moroni tʼáá bí, nááhiináʼígíí nilį́įgo, Diyin Yá Yáłtiʼii Joseph Smith yaa níyá dóó bikʼijįʼ béésh tʼą́hí bikʼeʼeshchínígíí yeiníʼą́.

Kʼad díí akʼeʼeshchínígíí baa haneʼ: Íiyisíí alą́ąjįʼ ahetʼáád, naaltsoos biyiʼ siláhígíí bilą́ąjįʼ, éí béésh tʼąhí bitsʼą́ą́dóó ńdiilyá dóó éí diyingo naʼasdzo bił silá. Saad Bee Ąą Álnéehii doo saad naaniigo bee bikʼeʼeshchínígíí, 1 Nephi dóó Mosiah Wóltaʼ 9 bitséedi, éí ałdóʼ diyingo naʼadzo bidéétʼiʼ. Saad Bee Ąą Álnéehii saad naaniigo bee bikʼeʼeshchínígíí, wóltaʼ bitsijįʼgiʼ átʼáo, éí doo íiyisíí saad yę́ę bidéétʼi da, ákondi ákaʼaʼayeed ádaatʼé wółtaʼgo.

Naaltsoos Mormon Wolyéhígíí áłtséédą́ą́ʼ Bilagáanaakʼehjí ádaalyaahą́ą łahgo áłtsʼíísígo biiʼ ndaʼiisdzííʼ. Díí kʼad akʼeʼeshchínígíí ndaʼiisdzíʼę́ę hashtʼeńdaalyaa áko ałkʼidą́ą́ʼ ndaʼasdzo yę́ę dóó Diyin Yá Yáłtiʼii Joseph Smith naʼazo yę́ę hózhǫ́ bikʼehgo ádoolníiłgo ályaa.