1 I awor mi ta papia konserniente boutismo. Mira, èldernan, presbíteronan, i maestronan a wòrdu batisá; i nan no a wòrdu batisá eksepto nan a duna fruta apropiá pa manifestá ku nan tabata digno di esaki.

2 Tampoko nan a risibí ningun pa boutismo eksepto nan a bini ku un kurason kibrá i un spiritu abatí, i testifiká na e iglesia ku berdaderamente nan a arepentí di tur nan pikánan.

3 I no tabata risibí ningun pa boutismo eksepto nan tuma riba nan e nòmber di Kristu, teniendo un determinashon pa sirbié te na fin.

4 I despues ku nan a wòrdu risibí pa medio di boutismo, i e poder di e Spiritu Santu a obra den nan i purifiká nan, nan tabata kontá entre e pueblo di e iglesia di Kristu; i nan nòmbernan tabata wòrdu registrá, pa por a kòrda riba nan i nutri nan pa medio di e bon palabra di Dios, pa warda nan den e kaminda korekto, pa konservá nan kontinuamente atento pa hasi orashon, konfiando solamente riba e méritonan di Kristu, ku tabata e outor i perfekshonadó di nan fe.

5 I e iglesia a reuní frekuentemente, pa ayuná i pa hasi orashon, i pa papia unu ku otro konserniente e bienestrar di nan alma.

6 I nan a reuní huntu ku frekuensia pa partisipá di pan i biña, den memoria di Señor Hesus.

7 I nan tabata estrikto den opservá ku no tabatin ningun maldat entre nan; i ken ku a wòrdu hañá ta kometé maldat, i tres testigu di e iglesia a kondená nan dilanti e èldernan, i si nan no a arepentí, i no a konfesá, nan nòmbernan tabata wòrdu kitá, i nan no tabata wòrdu kontá entre e pueblo di Kristu.

8 Pero kada bia ku nan a arepentí i buska pordon, ku berdadero intenshon, nan tabata wòrdu pordoná.

9 I nan reunionnan tabata wòrdu kondusí dor di esnan di e iglesia segun e manera di e manifestashonnan di e Spiritu, i pa medio di e poder di e Spiritu Santu; pasobra konforme e poder di e Spiritu Santu a guia nan sea pa prediká, òf pa eksòrtá, òf pa hasi orashon, òf pa supliká, òf pa kanta, asina e tabata wòrdu hasí.