1 Áádóó áko, éí Christ doo dayoodlánígíí ałdóʼ baa yáshtiʼ doo.

2 Áko shooh, ákoósh nihá ndahwiitʼaah bijį́įdi índa daʼiidoodląął—áko shooh, áajįʼ ayííłką́ągo Diyin Bóhólníihii níyáago, aooʼ, tsʼídá ayóó átʼéego ayííłką́ągo ndi nahasdzáán éí dínóolmas haneʼ daasdisę́ę nahalingo éí ałchʼįʼ kódoonííł, dóó nahasdzáán bee hadilyaaígíí ałtso didoołhįh, aooʼ, éí áajįʼ ayííłką́ągo Diyin God biDibé Yázhí bidááhdóó danihiʼdiilzįʼgo—ákohgo daatsʼí Diyin God éí ádin dadohníi doo?

3 Índa daatsʼí tʼahdii Christ doo deinohdlą́ą da doo, éí doodagoósh Diyin God biDibé Yázhí deidoołtsééł? Ákoósh bąąhági átʼéii baa nisíníyáhą́ą baa yínííł nanináago bił kééhashtʼį́į doo nínízin? Daʼ bibee hazʼáaniiyę́ę kʼíhínítiʼígíí nihiiʼ naazíinii yéego baa yínííł nanináago Diyin dílzinii baa shił hózhǫ́ǫgo bił kééhashtʼį́į doo nínízin?

4 Áko shooh, nihichʼįʼ haasdziihigo Diyin God bá hodílzinii dóó tʼáá ákogiʼ átʼéii bił kéédahonohtʼį́įgo éí tsʼídá doo nihił dahózhǫ́ǫ da doo, háálá bąąhági átʼéii baa nijiyáhą́ą éí bee tʼóó baaʼihii hąąhgo bee ádaa ntsíjíkees doo, áko chʼį́įdiitahdi bił hazʼą́ą́jígo éí tʼáá nihá yáʼátʼéeh doo.

5 Háálá áko shooh, Diyin God bidááhdóó nihiʼdiilzį́įʼgo nihibąąhági átʼéii ałtso baa ákodínóohsįįł, tʼáá jilchííʼ nahalingo, dóó ałdóʼ Diyin God biyáʼátʼéehii, dóó Jesus Christ bidiyinii, éí kǫʼ doo nitsésígíí nihikʼijįʼ kwíidoolííł.

6 O índa nihí doo daʼoohdlánígíí, Diyin Bóhólníihii éí deinohdląąh; Jesus bízhiʼ binahjįʼ éí Diyin aZhéʼé nilíinii íiyisíí bichʼįʼ sodadołzin, áko doo nihąąh chingóó, nihiyiʼ daniłtólígo danohshónígo, danołgaigo, nihaa ákodínóozįįł, Dibé Yázhí bidił deeznaʼą́ą bee táʼníhíʼdísgizgo, éí ákótʼé ayóó átʼéii dóó akéeʼdi honíłką́ągo.

7 Áádóó shí ánáánihidishní Diyin God nihił ííshją́ą́ éʼéłʼį́ doo deinohdlánígíí, dóó bił yooʼahóóyá dadoohní, dóó nihił ííshją́ą́ éʼélʼíinii kʼad ádin dadohní, doodaiiʼ náásgóó ádahodooníłígíí, doodaiiʼ diyingo aa halyéhígíí ádin, doodaiiʼ atsʼíís doo nádziih da, doodaiiʼ ałʼąą dineʼé bizaad doo bee yáʼátiʼ da, dóó diyinkʼehgo ataʼ haneʼígíí ádin dadohní;

8 Áko shooh ánihidishní, díí doo yoodlánígíí éí Christ binahatʼá bee yisdáʼiildéehii doo bił bééhózin da; aooʼ, éí Diyin bizaad bee akʼedaʼashchínígíí tʼahdoo yółtaʼ da; yiyííłtaʼ ndi, doo yikʼiʼdiitįįh da.

9 Háálá Diyin God baa daʼííníiltaʼgóísh éí tʼáá adą́ą́dą́ą́ʼ, dóó díí jį́, dóó hoolʼáágóó, tʼááłáhági átʼé, dóó doo ałʼąą átʼée da dóó tʼįįhdígo ndi doo łahgo áánííł da?

10 Áádóó áko, łaʼ diyin éí ałʼąą ánááʼníiłgo baa ntsídadoohkéezgo, dóó łaʼ éí diyin áłtsʼíísígo ałʼąą ánááʼnííł danoozį́į́ʼ, índa Diyin God doo álílee yee naalnish da danoozį́į́ʼ.

11 Ákondi shooh, Diyin God álílee yee naalnishígíí éí nihił ííshją́ą́ ádeeshłííł, éí éiyá Abraham biDiyin God, dóó Isaac biDiyin God, dóó Jacob biDiyin God; dóó tʼáá éí tʼéiyá Diyin God yádiłhił dóó nahasdzáán áyiilaa, dóó tʼáá ałtso biiʼ naazláhígíí.

12 Áko shooh, éí éiyá Adam áyiilaa, dóó Adam asiihígíí biniinaa diné Diyin God yitsʼákai. Áádóó diné asihgo biniinaa Jesus Christ níyá, éí éí Diyin nihiTaaʼ nilíinii dóó aYeʼ nilínígo ndi; dóó Jesus Christ binahjįʼ diné bá nináʼílyá.

13 Áádóó háálá Jesus Christ yá nináʼídláhígíí biniinaa, éí bee, diné Diyin Bóhólníihii bił hazʼą́ góneʼ bił yah anaʼiildééh; aooʼ, díí éí bee diné tʼáá ałtso bá nináʼílyá, háálá Christ seesyínée binahjįʼ diné tʼáá ałtso náádahiidooʼnaał, éí éiyá diné anoonééł bidaʼiiłhaazhyę́ędę́ę́ʼ yá nináʼídlá; díí diné tʼáá ałtso daʼałhoshę́ędę́ę́ʼ éí Diyin God bibee adziilii binahjįʼ chʼéédabidiʼdooldził dilní diistsʼą́ą́ʼgo; diné tʼáá aʼohgo ádaatʼéii dóó ayóó ádaatʼéii éí ńdidoojah, tsʼídá tʼáá ałtso beʼánihwiitʼaah dasitánígíí bidááhdóó náhizhdookah, éí éí hoolʼáágóó ánoonéłę́ę bitsʼą́ą́dę́ę́ʼ bá nináʼdoolyééł, éí ánoonéłígíí éí atsʼíísę́ę bikʼehgo.

14 Áádóó índa Diyin Ayóó Átʼéii bá nihodooʼááł; dóó índa éí tʼáá háiida doo yáʼátʼéehgo njigháhą́ą éí tʼahdii doo yáʼájítʼéeh da doo; dóó tʼáá háiida diyinkʼehgo hinánée éí tʼáá diyinkʼehgo hináa dooleeł; tʼáá háiida bił hózhónée éí tʼahdii bił hózhǫ́ǫ dooleeł; dóó doo bił hózhónée éí tʼahdii doo bił hózhǫ́ǫ da dooleeł.

15 Áádóó áko, O tʼáá ánółtso łaʼ Diyin God doo álíleekʼeh naalnishgóó baa ntsídaahkeesígíí, éí nanihídíshkid dooleeł, díí baa hweeshneʼígíísh tʼáá íídą́ą́ʼ ádahóótʼįįd? Tʼah doósh nihoolzhíish da? Áko shooh nihichʼįʼ haasdziihigo éí, Ndagaʼ; dóó Diyin God éí tʼah doo álílee naanish niʼkwíiléeh da.

16 Áko shooh, daʼ Diyin God tʼáadoo leʼé áyiilaaígíísh doo nihił ayóó ánoolnin da doo? Aooʼ, áko háísh éí Diyin God binaanish ayóó átʼéii yikʼiʼdidootį́į́ł?

17 Háísh díí yádiłhił dóó nahasdzáán bizaad bee dahazlį́ʼígíí doo álílee bee naʼanishígíí átʼée da; dóó bizaad bidziilii binahjįʼ éí doo nahasdzáán bitsʼą́ą́dóó diné ályaa da; dóó bizaad bidziilii binahjįʼ álílee doo bee ndaʼazhnish da didoohniił?

18 Áádóó háísh éí doo Jesus Christ álílee bee naʼanish ayóó ádaatʼéii áyiilaa dadidoohniił? Áádóó hastóí bikʼihodiiniiʼígíí álílee naʼanish ayóó ádaatʼéii tʼóó ahayóí ádayiilaa.

19 Áádóó álíleekʼehgo naanish ádaalyaago índa, haash yitʼáo éí Diyin God kʼad doo álílee yee naalnish da dóó ákondi doo Diné éí łahgo ánááʼniił da? Áádóó áko shooh, nihichʼįʼ haasdziihigo éí doo éí łahgo ánááʼniił da; łahgo ánááʼniiłgo éí doo Diyin God nilį́į da doo ńtʼę́ę́ʼ; ákondi Diyin God éí tʼahdii Diyin nilį́, dóó Diyin God álílee yee naalnishii nilį́.

20 Áádóó bílaʼashdlaʼii baʼáłchíní bitahgóó doo álílee bee naʼanish da éí doo daʼoodlánígíí biniinaa, dóó yáʼátʼéehgo honítʼiʼjíyę́ę yitsʼákai, dóó Diyin God yadaʼólíi dooleełę́ę éí doo bił béédahózingóó biniinaa.

21 Áko shooh, nihichʼįʼ haasdziihigo éí tʼáá háiida tsʼídá tʼáá aaníí Christ yoodlą́ągo, tʼáadoo bił naaki nilíní, haʼátʼííshį́į́ nihiTaaʼ Christ bízhiʼ binahjįʼ yókeedígíí éí baa doolyééł; dóó tʼáá ałtso nihokááʼ dineʼé ndi, éí díí kótʼáo tʼáá ałtso bee bił ahaʼdeetʼą́.

22 Háálá áko shooh, Diyin God biYeʼ, Jesus Christ, éí táaʼgo naakitsʼáadahii danilínée tʼáá nahadzáán yikááʼ neiikai doo dadííniidę́ę, dóó łahjįʼ tʼáá ałtso naakitsʼáadahii, nahdę́ę́ʼ diné daʼíístsʼą́ąʼgo, kóyidííniid: Tsʼídá tʼáá ałtso nihokááʼ bikááʼgóó éí nahatʼá bee yisdáʼiildéehii bíndaʼnołtin dooleeł.

23 Áádóó tʼáá háiida oosdląądgo dóó tó bee biʼdoolzį́įʼgo éí yisdáńdoodááł, ndi tʼáá háiida doo oodlánígíí éí doo náásgóó íhoołʼaah da dooleeł.

24 Áádóó díí binahjįʼ ééhózinii daʼoodlánígíí éí bikééʼgóó ádahoonííł—shízhiʼ binahjįʼ éí bidaʼiiníziinii ayiʼdę́ę́ʼ hadeiniiłkaad doo; łaʼ nááná saad ániidígíí éí yee yádaałtiʼ doo; naʼashǫʼii bádahadzidii ndeijaah doo; dóó tʼáá haʼátʼííshį́į́ atsʼíís doo bá yáʼátʼéhígíí dayoodlą́ą ndi doo ádabidoolíłí da; dóó doo bitah dahatsʼídígíí éí yitsiitʼáá dah ńdadilnihgo éí hadaałtʼé ninádahádléeh doo;

25 Áádóó tʼáá háiida shízhiʼ yinahjįʼ oodlą́ągo, dóó tsʼídá doo bił naakiígíí, éí díí shizaad bił ííshjání ádeeshłííł, índa nahasdzáán bikááʼgóó adahwiisʼáago, díí shizaad bił ííshją́ą́ ádeeshłííł.

26 Áádóó áko, shooh, háísh éí kʼad Diyin Bóhólníihii binaanish yikʼijįʼ sizį́į dooleeł? Saad yee haadzíʼígííshąʼ éí háí doo yidoodląął da? Háísh éí Diyin Bóhólníihii bibee adziil ayóó átʼéii yikʼijįʼ yidoozįįł? Háísh éí Diyin Bóhólníihii binaanish yikʼijįʼ yáłtiʼ dooleeł? Háísh éí Christ baʼáłchíní yikʼijįʼ yáłtiʼ dooleeł? Áko shooh, tʼáá ánółtso Diyin Bóhólníihii binaanish bikʼijįʼ yádaałtiʼígíí dóó ndaahłnishígíí, háálá nihí éí dooládóʼ doodada danohsin dóó dadínóonééł.

27 O índa tʼáadoo éí bikʼijįʼ yádaałtiʼí, dóó dooládóʼ doodada tʼáadoo danohsiní, ndi Diyin Bóhólníihii bizaad éí deísínóołtsʼą́ą́ʼ, dóó Diyin aZhéʼé nilíinii haʼátʼííshį́į́ bee nihichʼįʼ ańdahaztʼiʼígíí éí Jesus bízhiʼ binahjįʼ deínóhkeed. Tʼáadoo nihił ndaakií, ákondi daʼiinohdlą́, dóó ałkʼidą́ą́ʼyę́ęgi átʼáo, dóó tʼáá átʼé nihijéí bee Diyin Bóhólníihii bichʼįʼ nihokááʼ, dóó bińdaałdzid dóó nihitah dahoditłidgo yisdáʼnáhidoohkahígíí bindaałnish.

28 Nahasdzáán bikáaʼgi dahinohnáago hazhóʼó baa dahonohsą́; bąąhági átʼéii nahjįʼ ádąąh kódaahłééh; deínóhkeedígíí, ákondi tsʼídá tʼáá aaníí doo łahgo óhnéehgo, ndi tʼáadoo nihił ndaakaií, áko doo éí bąąhági átʼéii nihikʼehdidleehí, ndi Diyin God tʼáá aaníinii dóó hinánígíí bá ndaałnishgo sodadidoołzįįł.

29 Tʼahdii bąąhági átʼéii nihee dahólǫ́ǫgo tʼáadoo tó bee danihiʼdiilzį́hí; bąąhági átʼéii nihee dahólǫ́ǫgo bááh dóó tó Christ bee bééhániihii bikʼih sohodoozinígíí tʼáadoo choodaałʼíní; áko bąąhági átʼéii nihąąh ádaadingo tsʼídá tʼáá ałtsoní bindaałnish, Jesus Christ bízhiʼ binahjįʼ, Diyin God hináanii biYeʼ; dóó díí kótʼáo bidaʼołʼį́įgo, dóó są́ biyiʼjįʼ tʼáá áłahjįʼ yáʼátʼéehii bee nisoozį́įgo, éí doo nahjįʼ kónihidiʼdoolníił da.

30 Áko shooh, náádadiilyáhą́ą bitahdóó yáshtiʼ nahalingo éí nihichʼįʼ yáshtiʼ; háálá shizaad dadidoohtsʼį́įłgo éí shił bééhózin.

31 Doo hanishtʼéhígíí biniinaa, shizheʼé ałdóʼ, doo haałtʼéhígíí biniinaa tʼáadoo nihikʼijįʼ yádaałtiʼí, áádóó tʼáá ałtso bilą́ąjįʼ ndaʼíízoyę́ę ałdóʼ; ndi Diyin God éí bichʼįʼ ahééh danohsin háálá doo hadaniiltʼéhígíí nihił ííshją́ą́ áyiilaa, áko nihiláahdi dahinohyą́ągo bídahwiidoołʼááł binahjįʼ éí nihiláahdi hódzą́ bídahwiidoołʼááł.

32 Áádóó áko, shooh, díí haneʼ éí nihił béédahózinígíí binahjįʼ ádeiilyaa; díí bee ninádaʼiidzohígíí éí Egypt dineʼé bizaad ánályaaígíí dabidiiʼní, haashį́į́ nihizaadę́ę́ʼ náas yitʼááł dóó nihizaadígíí bikʼehgo łahgo ádeiilyaa.

33 Áádóó díí béésh óola bikááʼ tʼáá hótsxaago éí Hebrew dineʼé bizaadkʼehjí ádeilyaa doo ńtʼę́ę́ʼ; ndi Hebrew dineʼé bizaad éí ałdóʼ łah átʼéego áńdeiyiidlaa; ndi Hebrew dineʼé bizaadkʼehjí ádeilyaago éí díí nihaa haneʼ niʼiisdzíʼígíí biiʼ ádin dooleeł ńtʼę́ę́ʼ.

34 Ákondi ndaʼsiidzooígíí éí Diyin Bóhólníihii bił bééhózin, dóó ałdóʼ tʼáá háiida dineʼé éí doo nihizaad bił béédahózin da; dóó háálá díí náánáłaʼ dineʼé nihizaad doo bił bééhózinígíí biniinaa, éí bąą Diyin God bee yídóoltʼáhígíí hashtʼeyiilaa.

35 Áádóó díí éí nááháasdzo, áko nihikʼiské doo daʼoodlánígíí éí bidił nihiʼééʼ doo daabąąh da dooleeł.

36 Áádóó áko shooh, díí éí nihikʼiské bá laanaa daniidzin, aooʼ, índa Christ baa haneʼígíí bił bénádahodoodzįįł daniidzin, díí éí tʼáá ałtso Diyin yá naazínígíí kǫ́ǫ́ kéédahatʼínée kótʼéego yaa ńdaʼooskan.

37 Áádóó éí bedaʼoodląʼ binahjįʼ bisodizin Diyin Bóhólníihii Jesus Christ yá yidaʼdoolííł; dóó Diyin God nihiTaaʼ nilíinii éí Israel bighandóó danilíinii yił ahadaʼdeestʼánée éí yénálniih dooleeł nisin; dóó Jesus Christ dayoodlánígíí binahjįʼ, hoolʼáágóó yikʼihojidoodliił. Amen.