1 Áádóó áko baa hoolzhiizh táadi neeznádiin dóó baʼaan hastą́diin dóó baʼaan tááʼgóó yihahgo éí Nephi dineʼé ndaabaahígíí kéyah Ádahasdįįdóó, Laman dineʼé yaatiih yíkai.

2 Áádóó baa hoolzhiizh Nephi dineʼé bindaabaahígíí éí ńléí kéyah Ádahasdįįdʼígi nátʼą́ą́ʼ anábidiʼnoolkaad. Áádóó tʼáadoo háádajilyį́hí éí Laman dineʼé, tʼah doo chʼééh dikáhígíí hakééʼ yíkai; áádóó tsʼídá yéego yił daʼahoogą́ą́ʼ, áko índa Laman dineʼé éí Ádahasdįįdgi kinsinilyę́ę éí Nephi dineʼé yighadeistʼą́, dóó tʼóó ahayóí Nephi dineʼé ndeistseed, dóó ląʼída éí yił ndahaazdéél.

3 Áádóó tʼáá dajoodziʼígíí éí Teancumdi kintah kéédahatʼínígíí bichʼįʼ adahizhneezhchą́ą́ʼ dóó áadi bił ahíjiikai. Áko kintah Teancum éí tónteel bíighahgi éí siʼą́ dóó éí kintah Ádahasdįįd holyéhę́ę bíighahgi.

4 Áádóó Nephi dineʼé bindaabaahígíí éí Laman dineʼé yaatiih yíkaiígíí biniinaa atídabiʼdiilyaa; háálá doo ákódáádzaagóó, éí Laman dineʼé doo biláahgo ádabóodziil da doo ńtʼę́ę́ʼ.

5 Ákondi, shooh, Diyin God bibee ánihwiitʼaahii éí diné bąąhági átʼéii yaa naakaiʼígíí bikʼeh didoodleeł; dóó diné bąąhági átʼéii yaa naakaiʼígíí éí bąąhági átʼéii yaa naakaiʼígíí atídabidoolííł, háálá éí diné bąąhági átʼéii yaa naakaiʼígíí éí bílaʼashdlaʼii baʼáłchíní yíniʼ yá ádahaleʼgo dineʼé ndeiłtseed.

6 Áádóó baa hoolzhiizh Laman dineʼé éí kintah Teancum yikʼijįʼ dadoobah biniyé hashtʼeʼádaʼdiilyaa.

7 Áádóó baa hoolzhiizh táadi neeznádiin dóó baʼaan hastą́diin dóó baʼaan dį́į́ʼgóó yihahgo Laman dineʼé kintah Teancum yaatiih yíkai, áko Teancum ałdóʼ shodeidoołtʼeeł biniyé.

8 Áádóó baa hoolzhiizh Nephi dineʼé éí nátʼą́ą́ʼ áńdabineeskaad. Áádóó Nephi dineʼé Laman dineʼé nátʼą́ą́ʼ áńdeineeskaadígíí biniinaa tʼáá bí dabidziilígíí yee ádaa náádajoosdliʼ; áádóó tʼáá bí dabidziilígíí binahjįʼ, kintah Ádahasdįįd wolyéhę́ę éí yaatiih náánákai dóó shónáádayoostʼeʼ.

9 Áádóó díí ałtso baa naʼasdeeʼ, dóó tʼáá ałchʼishjí Nephi dineʼé dóó Laman dineʼé, tʼóó ahayóí dimííl yázhí ánéelą́ą́ʼgo ndaaztseed.

10 Áádóó baa hoolzhiizh táadi neeznádiin dóó baʼaan hastą́diin dóó baʼaan hastą́ą́ ałtso nááhaigo, Laman dineʼé éí Nephi dineʼé yaatiih náánákai; dóó ákondi Nephi dineʼé doo yáʼáshóonii yaa naakaiyę́ę tʼáadoo yaa ńdaʼooskan da, ndi tʼóó tséʼádin bąąhági átʼéii yaa deíkááh.

11 Áádóó díí Nephi dineʼé dóó Laman dineʼé tʼááʼáłáh atídaʼahiilyaayę́ę dóó ndaʼahistseeyę́ę, tʼáá háiida hazhóʼó yaa hodoolnihígíí, dóó yaa náʼiidoozohígíí éí doo bíighah da, doo baa hojoolneʼígi átʼée da; dóó tʼáá ałtso bijéí daastłʼis, áko tʼáá áłahjįʼ ndaʼahiłtseedgo tʼéiyá yaa bił dahózhǫ́.

12 Áádóó hádą́ąʼdida éí doo kótʼáo Lehi baʼáłchíní bitahgóó bąąhági átʼéii hólǫ́ǫ da ńtʼę́ę́ʼ; doodago Diyin Bóhólníihii bizaad áníigo, éí tsʼídá tʼáá ałtso Israel bighandóó danilíinii bitahgóó tsʼídá tʼah doo kónéeh da ńtʼę́ę́ʼ, díí diné bitahígi átʼéhígi átʼáo.

13 Áádóó baa hoolzhiizh Laman dineʼé kintah Ádahasdįįdʼgi shónáádayoostʼeʼ, háálá Nephi dineʼé yiláahdi éí bidineʼé ánéelą́ąʼgo biniinaa.

14 Áádóó kintah Teancum ałdóʼ yichʼįʼ náádeeskai dóó yaatiih náánákai, dóó akweʼé kéédahojitʼínée chʼídahoneeskaad, dóó asdzání dóó áłchíní éí yił ndahaazdéél, dóó éí éiyá ndeiłtseedgo biyishchíín yichʼįʼ náádeiyiisniiʼ.

15 Áádóó baa hoolzhiizh táadi neeznádiin dóó baʼaan hastą́diin dóó baʼaan tsostsʼid yihahgo, éí Nephi dineʼé bá dahóóchįįd háálá Laman dineʼé badaʼáłchíní dóó bidaʼasdzą́ą́ ndeistseed dóó náádeiyiisniiʼgo biniinaa, áko tsʼídá bá dahóóchįįdgo Laman dineʼé yikʼijįʼ náádeeskai, dóó Laman dineʼé yikʼeh náádadeesdlį́į́ʼ, dóó bikéyahdóó chʼínádeineeskaad.

16 Áádóó Laman dineʼé éí doo Nephi dineʼé yikʼijįʼ nináádaabaahgo táadi neeznádiin dóó baʼaan tsostsʼidiin dóó baʼaan ashdlaʼ nááhai.

17 Áádóó díí yihaiígíí biyiʼ Nephi dineʼé tʼáá ałtso bibee adziilii yee yaatiih yíkai; dóó tsʼídá tʼóó ahayóígíí biniinaa tʼáadoo wóóltaʼ da.

18 Áádóó kodóó éí Nephi dineʼé áádóó Laman dineʼé doo yikʼeh dadeesdlį́į́ʼ da, ndi tʼóó dahtooʼ jóhonaaʼéí bilą́ąjįʼ áádįįłígi átʼéego tʼóó áhoʼdooldįįł.

19 Áádóó baa hoolzhiizh Laman dineʼé Ádahasdįįdʼígi kintahą́ą yikʼijįʼ náádeeskai; dóó áko kéyah Ádahasdįįd holyéhę́ęgi éí ayóó átʼáo daʼahijoogą́ą́ʼ; áko Nephi dineʼé éí bikʼehodeesdlį́į́ʼ.

20 Áádóó éí Boaz holyéegi kintahgi anáádahizhneezhchą́ą́ʼ, dóó áadi tsʼídá yéego dabidziilę́ę Laman dineʼé yił náádaʼahoogą́ą́ʼ, áko índa tʼáadoo hakʼeh dadeesdlį́įʼ da náánágo índa Laman dineʼé hakʼeh dadeesdlį́į́ʼ.

21 Áádóó náánákaigo, Nephi dineʼé éí ayóó átʼáo ndabidiʼneeskaad dóó ndabiʼdistseed tsʼídá ayóó átʼáo ndabiʼdistseed; bidaʼasdzání dóó badaʼáłchíní éí biyishchíín yichʼįʼ náádeiyiisniiʼ.

22 Áádóó baa hoolzhiizh Nephi dineʼé dah náádadínéezhchą́ą́ʼ, dóó tʼáá ałtso diné yił kéédahatʼínée kintah dóó binaagóó kéédahatʼínée, yił dah diiná.

23 Áádóó áko shí, Mormon, díí Laman dineʼé kʼadę́ę kéyah ałtso shódayoołtʼeehgo éí yiiłtsą́ éí bąą Shim wolyéego dah yiskʼidgóó níyá dóó Ammaron tʼáá ałtso haneʼ Diyin Bóhólníihii yichʼįʼ néideesʼį́ʼę́ę éí háánil.