1 Áádóó baa hoolzhiizh Laman dineʼé tʼáadoo nihikʼijįʼ náádadeezbaaʼgo neeznáá nináánááhai. Áádóó áko shooh, Nephi dineʼé, éí shidineʼé shá dadeeshnish, anaaʼ nááhodooleeł biniyé bikéyah dóó yee nidadoobahígíí hashtʼedeilééh.

2 Áádóó baa hoolzhiizh Diyin Bóhólníihii áshíłní: Díí diné náokąąh—Ádaa ńdaʼoohkąąh, dóó shikééʼ ninohkááh, dóó tó bee danihiʼdiilzį́į́h, dóó shisodizin háádabiyołyeed, dóó éí binahjįʼ yisdádoohkah.

3 Áádóó díí dineʼé néísiskan, ákondi chʼééh ádííniid; dóó Diyin Bóhólníihii yinahjįʼ yisdáákaigo doo yaa ádahalchį́į́h da, dóó tʼáá ádaa ńdaʼdookąąłgo yeidiníʼą́. Áádóó áko shooh biDiyin Bóhólníihii yichʼįʼ tʼóó bijéí deistłʼis.

4 Áádóó baa hoolzhiizh neeznáá nááhai dóó bikʼijįʼ, éí, díí yihahígíí bił, táadi neeznádiin dóó baʼaan hastą́diin nááhai Christ níyáádóó, Laman dineʼé biʼaláahdi naatʼáanii haneʼ sheiníʼą́, éí bee shił bééhózin nihichʼįʼ náádadeezbaaʼgo nihichʼįʼ hashtʼeʼánáádaʼdilnééh lá.

5 Áádóó baa hoolzhiizh kéyah Kéyah Ádahasdįįddi shidineʼé ahiidoohkah bidííniid, éí kéyah bibąąh kin dashijaaʼgi, éí kéyah shádiʼáahjigo ałtsʼóózigo bichʼįʼ chʼíhonítʼįʼ.

6 Áádóó áadi nihindaabaahí hadaʼasííd dooleełgo bił niikai, áko Laman dineʼé bindaabaahí yichʼą́ą́h ndoojah biniyé, áko nihikéyah doo nihighahdahodiʼdootʼááł da; éí bąą nihánidaabaahí tʼáá átʼé yee bidziilgo ádeilyaa.

7 Áádóó baa hoolzhiizh táadi neeznádiin dóó baʼaan hastą́diin dóó baʼaan tʼááłáʼí yihah góneʼ Laman dineʼé kintah Ádahasdįįdjįʼ nihikʼiidoojah biniyé yah ííná; áádóó baa hoolzhiizh éí yihah biyiʼ bikʼehdadiidlį́į́ʼ, áko tʼáá bí bikéyahgóó anídahaazná.

8 Áádóó baa hoolzhiizh táadi neeznádiin dóó baʼaan hastą́diin dóó baʼaan naaki yihah góneʼ nihichʼįʼ náádadeezbaaʼ. Áádóó bikʼeh náádadiidlį́į́ʼ, dóó tʼóó ahayóí ndasiiltseed, dóó daneeznánígíí tónteel biiʼ dahaastłʼííd.

9 Áádóó áko, díí shidineʼé, Nephi dineʼé danilíinii ayóó átʼáo, ádaʼiilaaʼígíí biniinaa, tʼáá bí beʼadziil yee ádaa dahaʼniihgo yaa nídiikai, áádóó yáʼąąsh yidááhdóó ádee hadahadziih áko bikʼiské anaaʼ nidabistseedígíí yá yikʼénínáʼdaʼdoodlééł.

10 Áádóó yáʼąąsh yee ádee hadaasdzííʼ dóó ałdóʼ Diyin God dahsidáádóó yee, áko ákǫ́ǫ́ doonáhgo beʼanaaʼ yikʼijįʼ ndadoobah, dóó kéyah bikááʼdóó ádeidoołdįįł.

11 Áádóó baa hoolzhiizh shí, Mormon, shidineʼé binaatʼáanii dóó bindaabaahí bá alą́ąjįʼ sézį́į dooleełígíí tsʼídá doo niizį́įʼ da, háálá doo yáʼádaashóonii dóó tsʼídá aláahdi woolchʼííd ádeiłʼínígíí biniinaa.

12 Áko shooh, binaatʼáanii nishłį́įgo bił níshkai, azhą́ tsʼídá doo yáʼádaashǫ́ǫ da ndi tʼóó ahayóidi ndaʼabaahgóó nináshíʼeezh, dóó ayóó ííníshníi ńtʼę́ę́ʼ, Diyin God bee ayóóʼóʼóʼní shiyiʼ hólónígíí bee, shijéí tʼáá átʼé bee, dóó shiiʼ sizíinii tʼáá áłahjįʼ shiDiyin God bee bichʼįʼ bá sodiszin ńtʼę́ę́ʼ, ákótʼée ndi, sheʼoodląʼ bąąh ádin, háálá bijéí deistłʼisígíí biniinaa.

13 Áádóó táadi biʼanaʼí bilákʼeedóó yisdááʼeezh, dóó bibąąhági ádaatʼéii tʼáadoo yaa ńdaʼooskan da.

14 Áádóó tʼáá ałtso nihiDiyin Bóhólníihii dóó nihiYisdáʼiiníiłii Jesus Christ doodah nínée yee ádéíhadahaasdzíiʼgo, áko beʼanaaʼ yichʼįʼ dadeezbaaʼgo, dóó bikʼiské ndabidiztseedyę́ę yá ninádaʼídléehgo, áko shooh Diyin Bóhólníihii bizaad sidítsʼą́ą́ʼ, kóní:

15 Kʼééhodidooʼníłígíí éí bee shóhólnííh, dóó shí kʼéédideeshʼnííł; áádóó háálá díí diné yisdábíínil ndi tʼáadoo ádaa ńdaʼooskan da, áko shooh, nahasdzáán bikááʼdóó ábidiʼdooldįįł.

16 Áádóó baa hoolzhiizh sheʼanaaʼí bichʼįʼ ndeeshbahgo tsʼídá doo nisin da; dóó Diyin Bóhólníihii áshidííniidyę́ę bohooshłaa; áádóó adahwiisʼą́ą́góó tʼóó shinááł ádahóótʼįįdígíí éí deiłtsánígíí dóó dasidétsʼą́ą́ʼígíí baa hweeshneʼ, éí Iiʼ Sizį́ Diyinii ííshją́ą́ áyiilaaígíí bikʼehgo éí náásgóó ádahodooníłígíí tʼáá aaníigo yaa hoolneʼ.

17 Éí bąą nihichʼįʼ éʼéshłééh, Gentile dineʼé, áádóó ałdóʼ Israel bighandóó danohłíinii, naanish hanáádaołwodgo, áko nihikéyah nihaa dahideestʼánééʼ bichʼįʼ hashtʼeʼádaʼdoołnééh doo.

18 Aooʼ, áko shooh, nihokááʼ dineʼé bichʼįʼ éʼéshłééh; aooʼ, nihí, Israel binaakitsʼáadah dahohkahígíí, éí naakitsʼáadah Jesus neiyiizlaaʼgo bikééʼ naakaiʼígíí bá ndahodooʼááł Jerusalem bikéyahdi.

19 Áádóó díí diné bitsʼą́ą́dóó chʼéédziʼígíí ałdóʼ bichʼįʼ éʼéshłééh, éí ałdóʼ bá ndahodiyootʼááł éí Jesus naakitsʼáadah díí kéyah bikáaʼgi neiyiizláʼą́ą ndahidooʼááł; dóó éí éiyá tʼáá nááná łaʼ naakitsʼáadah bá ndahidiyooʼááł éí Jesus Jerusalem kéyahdi yikʼi dadiilniiʼ yę́ę.

20 Áádóó díí éí Iiʼ Sizį́ Diyinii shił ííshją́ą́ áyiilaa; éí bąą tʼáá ánółtso nihichʼįʼ éʼéshłééh. Áádóó díí biniinaa nihichʼįʼ éʼéshłééh, áko nihił béédahodoozįįł Christ nahwiiʼaahii-dahsidáádóó tʼáá ánółtso bidááhdóó deidoosįįł, aooʼ, tʼáá ałtso iiʼ sizíinii Adam bighandóó nihokááʼ dineʼé tʼáá átʼé dah deíkáhígíí; dóó nihinaanish ádaahłaaʼígíí bee nihá ndahodiyootʼááł, yáʼátʼééh éí doodaiiʼ doo yáʼáshóonii ádaołaahígíí;

21 Áádóó ałdóʼ Jesus Christ binahatʼá bee yisdáʼiildéehii deidohdląął, éí nihitah hólǫ́ǫ dooleeł; áádóó ałdóʼ Jew dineʼé, diné Diyin Bóhólníihii yił ahadaʼdeestʼáanii, nááná łaʼ hwił ííshją́ą́ ádaʼdoolííł háálá éí éí Jesus deiyiiłtsą́ dóó deidiiztsʼą́ą́ʼ, jó éí deiyiisxį́, éí tʼáá aaníí Christ dóó tʼáá aaníí Diyin God átʼį́į ńtʼę́ę́ʼ.

22 Áádóó nahasdzáán nidahwiisʼą́ąjįʼ tʼáá ałtso náoshkąąhgo ádaa ńdaʼdookąął dóó Christ nahwiiʼaahii-dahsidáádóó yidááh deidoozįįłgo hashtʼeʼ ádadoolnííł nisin.