1 Áádóó baa hoolzhiizh Nephi dineʼé bitahgóó dahdiiyá, dóó bee ádéíhaasdzííʼyę́ę baa náʼiisiskan éí doo biká anáádeeshwoł da dííniid ńtʼę́ę́ʼ; dóó bindaabaahí binanitʼaʼí nishłį́įgo ánáádashiidlaa, háálá tiʼdahoonííh biyiʼdééʼ yisdadeeshʼish dashoʼníigo.

2 Ákondi shooh, shí éí doo haʼííníshníi da, háálá shił bééhózingo Diyin Bóhólníihii bá nihwidooʼááł; háálá bąąhági ádaatʼínígíí tʼáadoo yaa ńdaʼooskan da, Ábiilaaʼígíí doo yichʼįʼ sodadilzin da áko bichʼįʼ ndahwiiʼnáago dahiiná.

3 Áádóó baa hoolzhiizh Laman dineʼé nihichʼįʼ dadeezbaaʼ Jordan bikintahgóó deiyínííchééł; ákondi shooh, nátʼą́ą́ anánoolkaad éí kindashiijaaʼ tʼáadoo yee ádídahoosnííʼ da íídą́ą́ʼ.

4 Áádóó baa hoolzhiizh nihikʼijįʼ náádadeezbaaʼ, dóó kin dashiijaaʼ tʼah bee nihidahoolnííh. Áádóó áłdóʼ nááná łaʼ kin dashijaaʼ Nephi dineʼé tʼah yee ádídahólnííh, éí bidziilgo nihichʼą́ą́h yadaʼdiitłʼin áko díí kéyah siʼánígíí yiihdoonééłgo doo bá bííghah da, éí nihikéyah yiiʼ kéédahatʼínígíí nideidoołtsxiłgo yikáʼádaatʼį́.

5 Ákondi baa hoolzhiizh kéyah bíighah chʼíniiʼnánígíí, dóó yiiʼ kéédahatʼinígíí tʼáadoo ahííkai da, éí Laman dineʼé ndabistseed, dóó bikintah, dóó dabighanyę́ęgóó, dóó bikin hadaasʼáhą́ą́ adeideeskʼą́ą́ʼ; dóó áko táadi neeznádiin dóó baʼaan tsostsʼidiin dóó baʼaan náhástʼéí nááhaigo ahoolzhiizh.

6 Áádóó baa hoolzhiizh táadi neeznádiin dóó baʼaan tséébídiin yiihah góneʼ Laman dineʼé nihichʼįʼ náádadeezbaaʼ, niheʼadziil bee bidááhdóó niniikai; ákondi chʼééh ádeitʼįįd, háálá tʼóó ahayóíʼ yiltʼéhígíí biniinaa Nephi bidineʼé tʼóó yikʼi naazhjééʼ.

7 Áádóó baa hoolzhiizh dahnáádadínííchą́ą́ʼ, áádóó łaʼ yilááhgo dadilwoʼígíí éí Laman dineʼé yaa dadínííchą́ą́ʼ, áádóó Laman dineʼé łaʼ doo yilááh dadilwoʼígíí tʼóó bikʼi chʼíníná dóó ndabiʼdiztseed.

8 Áádóó áko shooh, shí, Mormon, dił dóó ndaʼaztseed bee nitsihodinídéélgo shinááʼ bee yiiłtsánígíí tsʼídá nihokááʼ dineʼé biiʼ sizíinii doo bíniʼ yideishaał da nisin; ákondi shí, shił bééhózingo díí tʼáá átʼé béédahodoozįįł, dóó díí tʼáá átʼé ndanilʼinígíí éí hoghan-bilátahdóó nihił ííshją́ą́ ádadoolnííł—

9 Áádóó díí diné yitsʼą́ą́dóó deeskaiʼígíí ałdóʼ bił béédahodoozįįł, áádóó Gentile dineʼé ałdóʼ, éí díí dineʼé daʼníłtsʼą́ąjigo ałtsʼádeidíʼnóołkał ní Diyin Bóhólníihii, áádóó díí dine doo bił daʼílį́į da doo—éí bąą tʼáá ałtsʼíísígo nááhásóóh, doo tʼáá ałtso yiiłtsʼánígíí baa hodeeshnih da nisin, háálá bee hazʼánii shił ííshjáá ályaaʼígíí biniinaa, dóó ałdóʼ díí diné tʼáá íiyisíí bąąhági adaatʼínígíí biniinaa doo ayóó átʼáo yínííł dadohlééł da.

10 Áádóó áko shooh, díí bilástsiiʼ bee bichʼįʼ haasdzííʼ, dóó ałdóʼ Gentile dineʼé éí Israel bighandóóʼígíí yaa ádahalyą́, éí yaa ákodanízin dóó háádééʼ bikʼidahojídlíhígíí bił béédahózin.

11 Háálá shił bééhózin Israel bighandóó danilínígíí bił nitsohodinídéél yaa yínííł dadooleeł; aooʼ, díí dineʼé ábidiʼdooldį́į́łgo yaa yínííł dadinóozįįł, yaa yínííł dadinóozįįł díí dineʼé tʼáadoo ádaańdaʼooskangóó éí da Jesus bińdaazchid doo ńtʼę́ę́ʼ.

12 Áko kʼad díí Jacob yitsʼą́ą́dóó deeskaiʼígíí bá ńdahaasdzoh; áádóó díígiʼ átʼáo ńdahaasdzoh, háálá Diyin God bił bééhózin bąąhági ádaatʼínígíí biniinaa doo baa dooʼnił da; áádóó Diyin Bóhólníihii yitsʼąą neiniłʼin dooleeł tʼáá bí kʼad niizį́į́ʼgo índa yichʼįʼ ííshjáá íídoolííł.

13 Áádóó díí bee hazʼáanii shił chʼétʼą́; áádóó áko shooh, Diyin Bóhólníihii ádííniidgo índa baa dooʼnił, kʼad niizį́įgo índa, bił ééhózinígíí bikʼehgo.

14 Áádóó áko shooh, Jew dineʼé doo daʼoodlánígíí bíł ííshją́ą́ ádadoolnííł; dóó kóhwiinidzingo bił ííshją́ą́ ádadoolʼnííł—áko díí bee Jesus tʼáá aaníí Christ nilį́įgo deidoodląął, éí Diyin God hiináanii biYeʼ nilį́; áko diyin Ázhéʼé nilíinii, Áyóó Áyóníinii binahjįʼ, biʼayóó átʼáo dóó hoolʼáágóó biniyéii bééhodoozįįł, éí Jew dineʼé, doodaiiʼ Israel bighandóó dahikahígíí tʼáá átʼé, kéyah baa dahideestʼánée bikáaʼjįʼ bééʼdoolnih, éí Bóhólníihii biDiyin God yeidiníʼą́, éí binahjįʼ yił ahaʼdeetʼánée bohodoolnííł;

15 Áádóó ałdóʼ díí dineʼé bílástsiiʼ nahatʼá bee yisdáʼiildéehii tʼáá átʼé hózhǫ́ deidoodląął, éí Gentile dineʼé bitsʼą́ą́dééʼ baa dahidoolyééł; háálá díí dineʼé adahwiisʼáágóó daʼníłtsʼą́ąjigo ałtsʼádahidínóolkał, dóó daniłhin, dóó daachin, dóó tʼóó badaaʼih dadooleeł, nihitahgóó doo łaʼ ákótʼée da ńtʼę́ę́ʼ, aooʼ, azhą́ Laman dineʼé bitahgóó ndi, dóó díí éí doo daʼoodlánígíí dóó bidaʼalyaii deidósinígíí biniinaa.

16 Háálá áko shooh, Diyin Bóhólníihii biʼIiʼ Sizį́ Diyinii tʼáá íídą́ą́ʼ bizázíyę́ę doo bił dahólǫ́ǫ da silį́į́ʼ; áko nahasdzáán bikáaʼgi Christ dóó Diyin God doo bił daholǫ́ǫ da; dóó tłʼoh naadą́ą́ʼ bąąh nanooldeeʼ bił naayolgo nanidzood doo.

17 Łah diné bádahózhóonii danilį́į́ ńtʼę́ę́ʼ, dóó Christ dibé bá yikʼideezʼííʼii nilį́į́ ńtʼę́ę́ʼ; Diyin God aZhéʼé nilíinii bilą́ąjįʼ sizį́į ńtʼę́ę́ʼ.

18 Ákondi kʼad, shooh, Chʼį́įdii yikééʼ naakai, dóó tłʼoh naadą́ą́ʼ bąąh nahnooldeeʼ bił naayolgo nabiʼdinidzood, doodaiiʼ tsinaaʼeeł tónteel dah nabiʼdiilghan nahalingo, doodaiiʼ biníbaal dóó béésh bee dah náhátłʼóhígíí ádingo, doodaiiʼ bee naadloʼígíí ádingo; áko átʼéhígi átʼáo, bídóʼ ákódaatʼé.

19 Áádóó áko shooh, Diyin Bóhólníihii éí bee bikʼi hozhdoodliiłyę́ę yá hashtʼeʼ niinínil, éí da bikéyahdi shódeiyoostʼeʼ doo ńtʼę́ę́ʼ, éí Gentile dineʼé kéyah yee ádídahoosníʼígíí bá.

20 Ákondi shooh, díí baa hodoolzhish éí Gentile dineʼé nabidiʼnidzood dóó daʼníłtsʼą́ąjigo ałtsʼádabidíʼnóolkał; áádóó Gentile dineʼé nidabidiʼneesdzoodgo dóó daʼniłtsʼą́ą́góó adabidiʼnoolkaadgo, shooh, áko Diyin Bóhólníihii Abraham dóó Israel bighandóóʼígíí yee yił ahadaʼdeestʼánée tʼáá átʼé yéédoolnih.

21 Áádóó ałdóʼ Diyin Bóhólníihii diyinkʼehgo deiyíkáhígíí bisodizin yéédoolnih, éí yichʼįʼ ádá sodadoolzin.

22 Áádóó áko, O Gentile dineʼé, haash yitʼáo Diyin God yee bidziilígíí bidááhdóó deidoosįįł, tʼáá hazhoʼó ádaańdaʼsookango dóó doo yáʼáshóonii bitsʼą́ąjįʼ kódáohdzaago tʼéiyá?

23 Daʼ Diyin God nihaʼáhályánígíísh doo nihił béédahózin da? Daʼ tʼáá áłtsojįʼ bidziilígíísh doo nihił béédahózin da, dóó ayóó átʼáo nahazdzáán yichʼįʼ hadoodzih áko naaltsoos yisdisí nahalingo yisdis doo?

24 Éí bąą, ádaańdaʼoohkąąh, dóó bidáádóó hojoobaʼgo ádaʼdołnééh, doodago éiyá nihá nihwiidooʼááł—doodago Jacob yitsʼą́ą́dóó deeskaiʼígíí náshdóí bitsiiʼjįʼ dadiʼilʼígíí nahalingo nihitah doogááł, dóó ndanihidoołdlał, dóó ádin doo binahjįʼ yisdádookáhí da.