1 Áádóó áko, shooh, díí dineʼé yitsʼą́ą́dóó deíkáahgo chʼéédzíʼígíí éí bichʼįʼ hadeesdzih, Diyin God díí shizaad yeiníláago, éí binahjįʼ bizází adaʼoolʼįįł yę́ę bił béédahodoozįįł; aooʼ, Israel bighandóó chʼídasoohdzíʼígíí, éí nihichʼįʼ haasdziih; dóó díí saad bee haasdziih:

2 Israel bighandóó danohłínígíí nihił béédahózin.

3 Ádaa ńdaʼdoohkąąłgo nihił béédahózin, éí doodago éiyá doo yisdádoohkah da.

4 Díí nihił béédahózin bee daʼahoogánígíí niʼ ndanoohnííł, dóó naʼatseed tʼáadoo nihił danilíní, éí doo bikánáádadidoohchił da; tʼáá hazhóʼó Diyin God ánihidííniidgo tʼéiyá.

5 Nihił bééhózin nihizázíyę́ę béédahodoosį́į́ł, dóó tʼáá ałtso nihibąąhági ádaatʼéii dóó ndaʼayoosihígíí baa ńdaʼoohkąąh, dóó Jesus Christ, éí Diyin God biYeʼ nilį́įgo deinohdlą́, dóó Jew dineʼé dabiisxį́, dóó Diyin aZhéʼé bibeʼadziilii yee náádiidzá, ákogo anoonééł yikʼehdeesdlį́į́ʼ; dóó ałdóʼ anoonééł bikʼeʼáyééʼ yikʼehdeesdlį́į́ʼ.

6 Áádóó éí éiyá daneeznánée nááʼiiná yee yá hwiidoołʼaał, áko beʼánihwiitʼaah-bikááʼdahʼasdáhí bidááhdóó deidoozįįł dóó bá ndahwídiyootʼááł.

7 Áádóó nihokááʼ yikááʼ dahináanii yá nináʼnídlá, ákogo tʼáá háiida doo ádąąh dahastʼą́ą́góó ánihwiitʼaah biiníłką́ądi éí Diyin God bił hazʼą́ądi kééhaatʼį́į doo, yáʼąąshdi sin bee ahééh ílíinii doo ninítʼiʼii diyin yá nidaalʼaʼí yee yił dahataał doo, Diyin aZhéʼé nilíinii yichʼįʼ, aYeʼdoʼ bichʼįʼ, dóó Iiʼ Sizį́ Diyinii bichʼįʼ, éí tʼááłáʼí yee Diyin God danilį́, ił hózhóonii doo ninítʼiʼii bił dahólǫ́ǫgo.

8 Éí bąą ádaa ńdaʼoohkąąh, dóó Jesus bízhiʼ binahjįʼ tó bee danihiʼdiilzį́į́h, dóó Christ binahatʼá bee yisdáʼiildéehii daołtsóód; éí nihaa doolyééł, doo tʼáá díí haneʼígíí biyiʼdóó tʼéiyá da, ndi Jew dineʼé baa haneʼígíí Gentile dineʼé bił ííshją́ą́ ádoolnííł, éí hane ʼGentile dineʼé bitsʼą́ą́dóó nihichʼįʼ kódoolnííł.

9 Háálá áko shooh, díí haneʼ deidoohdląął biniyé ályaa; dóó éí deinohdlą́ągo díí ałdóʼ deidoohdląął; dóó díí deinohdlą́ągo éí nihizází ádaʼiilaa yę́ę nihił béédahodoodzįįł, dóó ałdóʼ ayóó átʼéego ndaʼazhnish Diyin God bibee adziilii bee.

10 Áádóó Jacob bitsʼą́ą́dóó dahosoolį́ʼígíí ałdóʼ nihił bédahodoozįįł; éí bąą Diyin God áłtsé bił ahadaʼdeestʼánée éí dineʼé bił nihił daʼóltaʼ; dóó Christ deinohdlą́ą́dą́ą́ʼ, dóó tó bee nihiʼdoolzį́įʼgo, tó áłtsé bee, áádóó índa kǫʼ dóó Iiʼ Sizį́ Diyinii bee nihiʼdoolzį́įʼgo, Yisdáʼiiníiłii íʼiilaaígíí bikʼeh wohkahgo, ánihidííniidę́ę bikʼehgo, éí nihodootʼáałjįʼ ayííłką́ągo éí yáʼátʼéehgo nihił hazʼą́ą doo. Amen.