1 Áádóó áko éí shidineʼé, éí Nephi dineʼé, nidaaztseedígíí ałtso baa hodeeshnih. Áádóó baa hoolzhiizh Laman dineʼé bilą́ąjįʼ yiiʼnééł.

2 Áádóó shí, Mormon, éí Laman dineʼé biʼaláahdi naatʼáanii saad bichʼįʼ íishłaa, dóó ńléí Cumorah kéyahjįʼ shidineʼé ahiidoonéełgo bííkeed, Cumorah wolyéego dah yiskʼid bíighahgi, dóó áadi da bił daʼahidiigą́ą́ł.

3 Áádóó baa hoolzhiizh Laman dineʼé biʼaláahdi naatʼáanii éí bííníshkeedę́ę lą́ shidííniid.

4 Áádóó baa hoolzhiizh Cumorah kéyahgóó niiʼná, dóó áadi Cumorah dah yiskʼid binaagóó nihiníbaal ndahsiiʼnil; dóó ákweʼé kéyah bikáaʼgi tó tʼóó ahayóí dah naazyį́, tooh dańlíní, dóó hadaazlį́; dóó kweʼé éí Laman dineʼé bikʼeh dadidiidleeł laanaa daniidzin.

5 Áádóó táadi neeznádiin dóó baʼaan tseebídiin dóó baʼaan dį́į́ʼ ałtso nááhaigo, nihidineʼé tʼah daadziihígíí ńléí Cumorahdi ałtso ahíhiiʼná.

6 Áádóó baa hoolzhiizh nihidineʼé tʼáá ałtso bił ahíikai Cumorah kéyahdi, áko shooh shí, Mormon, hasistih; dóó díí éí tsʼídá akéedi shidineʼé bił tiʼdahwiideeshnihgo shił bééhózin, dóó Diyin Bóhólníihii éí kóshidííniid díí nihizází baa haneʼ náás deiníʼánéé, diyingo hadilyaaígíí, éí Laman dineʼé doo bílákʼedooltsʼił da, (háálá Laman dineʼé éí deidoołchǫǫł) éí bąą díí éí Nephi bibéésh tʼą́hí łaʼ bikááʼ íishłaa, dóó tʼáá ałtso haneʼ Diyin Bóhólníihii yee shaa joozlíʼígíí éí ńléí Cumorah dah yiskʼidę́ęʼdi ńdéłʼį́į́ʼ, tʼáá hazhóʼó béésh tʼą́hí tʼáá díkwíhígo éí shiyeʼ Moroni baa nínil.

7 Áádóó baa hoolzhiizh shidineʼé, bizáanii danilínígíí dóó badaʼáłchíní bił, éí kʼad Laman dineʼé bindaabaahígíí bichʼįʼ yinéełgo dayiiłtsą́; dóó diné bąąhági átʼéii yaa naakaiígíí anoonééł yéédaaldzidígi átʼáo, éí bichʼįʼ yinéełgo yibaʼ dah yikah.

8 Áádóó baa hoolzhiizh nihaatįįh yíkai, dóó tʼááłáʼí nízínígo yééʼ nihiyiʼ hadadéébįįd háálá áájí tʼóó báhádzidígi ánéelą́ʼígíí biniinaa.

9 Áádóó baa hoolzhiizh shidineʼé yił daʼahiʼniigą́ą́ʼ béésh hał bee, dóó ałtį́į́ʼ, dóó kʼaaʼ, dóó tsénił, dóó tʼáá átʼé ałʼąą átʼéego bee daʼahijigánígíí bee.

10 Áádóó baa hoolzhiizh shidiné bił ndaashbaaʼą́ą nidabiʼdistseed, aooʼ, azhą́ neeznáadi mííl yázhí bił naashkaiyę́ę ndi, dóó shídóʼ atídashiilaago atah naaʼíítłizh; dóó tʼóó shíighahgóó chʼíheezhjééʼ áko tʼáadoo dashiisxį́į da.

11 Áádóó nihikʼi chʼíníjééʼgo dóó shidineʼéyę́ę ałtso nideistseed tʼáá hazhóʼó naadiin dį́įʼgo tʼéiyá chʼéékai, (Moroni shiyeʼ éí atah) dóó nihí tʼéiyá nihidineʼéyę́ę bitahdóó deidzíʼígíí, éí biiskání, Cumorah dah yiskʼid bílátahdóó, deiiltsą́, Laman dineʼé ńléí dah yinééłyę́ęgóó anáánáago, neeznáadi mííl yázhí, dah yishʼishę́ę, éí ałtso nidaaztseed.

12 Áádóó shiyeʼ Moroni shidineʼé neeznáadi mííl yázhígo dah yooʼishę́ę ałdóʼ deiiltsą́.

13 Áádóó áko shooh, Gidgiddonah neeznáadi mííl yázhígo neiʼeeshę́ę nidabiʼdistseed, dóó bídóʼ atah.

14 Áádóó Lamah dóó neeznáadi mííl yázhígo diné yił ndaabaahyę́ę ałdóʼ yił neezná; dóó Gilgal dóó neeznáadi mííl yázhígo diné yił ndaabaahyę́ę ałdóʼ yił neezná; dóó Limhah dóó neeznáadi mííl yázhígo diné yił ndaabaahyę́ę éí ałdóʼ yił neezná; dóó Jeneum dóó neeznáadi mííl yázhígo diné yił ndaabaahyę́ę éí ałdóʼ yił neezná; dóó Cumenihah, dóó Moronihah, dóó Antionum, dóó Shiblom, dóó Shem, dóó Josh, éí tʼáá ałtso neeznáadi mííl yázhígo diné yił ndaabaahyę́ę yił daneezná.

15 Áádóó baa hoolzhiizh neeznáá náánáltʼéego ałdóʼ béésh hał bee nidabiʼdistseed, éí neeznáadi mííl yázhí yił ndaabaahą́ą́ bił; aooʼ, shidineʼé tʼáá ałtso, tʼáá hazhóʼó naadiin dį́įʼgo bił naashkaiyę́ę tʼéiyá chʼéékai, dóó ałdóʼ tʼáá díkwíí shádiʼááh kéyahjígo łaʼ adahineezhchą́ą́ʼ, dóó łaʼ Laman dineʼé yichʼijí daazlį́į́ʼ, éí ndaastseed; dóó éí bitsʼíís, dóó bitsʼin, dóó bidił niʼ bikáaʼgo nikidébéézh, tʼáá nidabistseedę́ęgo éí kéyah bikááʼgóó dadííłdzid, dóó łeezh ńdadoodleeł dóó bimá nahasdzáán yiiʼjįʼ nídaasdlį́į́ʼ.

16 Áádóó tʼáá íiyisíí shiiʼ sizíinii yínííł niizį́į́ʼ, háálá shidineʼé nidabiʼdistseedígíí biniinaa, dóó yícha:

17 O diné danóhshóníyę́ę, haʼátʼíísh éí biniinaa Diyin Bóhólníihii bichʼįʼ honítʼiʼígíí bitsʼáhisookai! O diné danóhshóníyę́ę, hash yitʼáo éí Jesus tʼáá nihichʼįʼ dah doolnih ndi doo danohsin da!

18 Áko shooh, díí tʼáadoo ádááhdzaagóó éí doo ánihiʼdisdįįd da doo ńtʼę́ę́ʼ. Ákondi shooh, ndaʼasiyoosíʼígíí, biniinaa tʼáá íiyisíí nihaa yínííł nisin.

19 O, ayeʼké dóó atsiʼké danóhshóníyę́ę, dóó amá dóó azhéʼé danohłínée, eʼesdzą́ą́ dóó ahastiin, danóhshóníyę́ę, haash yitʼáo éí ndaʼasiyoosííʼ!

20 Ákondi shooh, ałtso ánihiʼdisdįįd, dóó yínííł nihá nisinígíí doo nidánihidoolóos da.

21 Áádóó doo éí tsʼídá náhodidooʼnaał da díí nihitsʼíís éí doo daatsaahii dadohłeełjįʼ, dóó díí atsʼíís kʼad dabidiʼniiłdzidígíí éí tʼáadoo hodíínaʼí doo dadííłdzid da dooleeł; dóó índa Christ biʼánihwiitʼaah-dahʼsidáádóó bichʼįʼ nidíínááł, éí naanish íinlaaígíí éí binahjįʼ ná nihodootʼááł; dóó yáʼátʼéehgo hinohnáá ńtʼę́ę́ʼgo, índa nihizhéʼé danilínée bił nihikʼidahojidoodliił.

22 O dooládóʼ tʼahdoo ánihiʼdildįįhyę́ędą́ą́ʼ ádaa ńdaʼdoohkąął ńtʼę́ę́ʼ. Ákondi shooh, ásoodįįd, dóó Diyin nihiTaaʼ nilíinii, aooʼ, éí yáʼąąshdi Hoolʼáágóó nihiTaaʼ nilíinii, éí ádáołaaígíí bił bééhózin; dóó tʼáá bí bee ajoobaʼ dóó biʼtʼáá ákogi átʼáo nihá nihodooʼááł.