1 Áádóó baa hoolzhiizh Laman dineʼé tʼáadoo nihikʼijįʼ náádadeezbaaʼgo neeznáá nináánááhai. Áádóó áko shooh, Nephi dineʼé, éí shidineʼé shá dadeeshnish, anaaʼ nááhodooleeł biniyé bikéyah dóó yee ndadoobahígíí hashtʼeʼdeilééh.

2 Áádóó baa hoolzhiizh Diyin Bóhólníihii áshiłní: Díí diné náokąąh—Ádaańdaʼoohkąąh, dóó shikééʼ ninohkááh, dóó tó bee danihiʼdiilzį́į́h, dóó shisodizin háádabiyołyeed, dóó éí binahjįʼ yisdáʼdoohkah.

3 Áádóó díí dineʼé néísiskan, ákondi chʼééh ádííniid; dóó Diyin Bóhólníihii yinahjįʼ yisdáákaigo doo yaa ádahalchį́į́h da, dóó tʼáá ádaańdaʼdookąąłgo yeidiníʼą́. Áádóó áko shooh biDiyin Bóhólníihii yichʼįʼ tʼóó bijéí deistłʼis.

4 Áádóó baa hoolzhiizh neeznáá nááhai dóó bikʼijįʼ, éí, díí yihahígíí bił, táadi neeznádiin dóó baʼaan hastʼą́diin nááhai Christ níyáádóó, Laman dineʼé biʼaláahdi naatʼáanii haneʼ sheiníʼą́, éí bee shił bééhózin nihichʼįʼ náádadeezbaaʼgo nihichʼįʼ hashtʼeʼánáádadilnééh lá.

5 Áádóó baa hoolzhiizh kéyah Kéyah Ádahasdįįddi shidineʼé ahiidoohkah bidííniid, éí kéyah bibąąh kin dashijaaʼgi, éí kéyah shádiʼááhjigo ałtsʼóózigo bichʼįʼ chʼíhonítʼįʼ.

6 Áádóó áadi nihindaabaahí hadaʼasííd dooleełgo bił niikai, áko Laman dineʼé bindaabaahí yichʼą́ą́h ndoojah biniyé, áko nihikéyah doo nihighahdahodiʼdootʼááł da; éí bąą nihánidaabaahí tʼáá átʼé yee bidziilgo ádeilyaa.

7 Áádóó baa hoolzhiizh táadi neeznádiin dóó baʼaan hastʼą́diin dóó baʼaan tʼááłaʼí yihah góneʼ Laman dineʼé kintah Ádahasdįįdjįʼ nihikʼiidoojah biniyé yah iiná; áádóó baa hoolzhiizh éí yiihah biyiʼ bikʼehdadiidlį́į́ʼ, áko tʼáá bí bikéyahgóó anídahaazná.

8 Áádóó baa hoolzhiizh táadi neeznádiin dóó baʼaan hastʼą́diin dóó baʼaan naaki yihah góneʼ nihichʼįʼ náádadeezbaaʼ. Áádóó bikʼeh náádadiidlį́į́ʼ, dóó tʼóó ahayóí ndasiiltseed, dóó daneeznánígíí tónteel biiʼ dahaastłʼííd.

9 Áádóó áko, díí shidineʼé, Nephi dineʼé danilíinii ayóó átʼáo, ádaʼiilaaʼígíí biniinaa, tʼáá bí beʼadziil yee ádaadahaʼniihgo yaanídiikai, áádóó yáʼąąsh yidááhdóó ádééhadahadziih áko bikʼiské anaaʼ ndabistseedígíí yá yikʼénínáʼdaʼdoodlééł.

10 Áádóó yáʼąąsh yee ádéé hadaasdzííʼ dóó ałdóʼ Diyin God dahsidáádóó yee, áko ákǫ́ǫ́ doonáhgo beʼanaaʼ yikʼijįʼ ndadoobah, dóó kéyah bikááʼdóó ádeidoołdįįł.

11 Áádóó baa hoolzhiizh shí, Mormon, shidineʼé bitnaatʼáanii dóó bindaabaahí bá aláajįʼ sízį́į dooleełígíí tsʼídá doo niizį́į́ʼ da, háálá doo yáʼádaashóonii dóó tsʼídá aláahdi woolchʼííd ádeiłʼínígíí biniinaa.

12 Áko shooh, binaatʼáanii nishłį́įgo bił nishkai, azhą́ tsʼídá doo yáʼádaashǫ́ǫ da ndi tʼóó ahayóídi ndaʼabaahgo nináshíʼeezh, dóó ayóó ííníshníi ńtʼę́ę́ʼ, Diyin God bee ayóóʼóʼóní shiyiʼ hólónígíí bee, shijéí tʼáá átʼé bee, dóó shiiʼ sizíinii tʼáá áłahjįʼ shiDiyin God bee bichʼįʼ bá sodiszin ńtʼę́ę́ʼ, ákotʼée ndi, sheʼoodląʼ bąąh ádin, háálá bijéí deistłʼisígíí biniinaa.

13 Áádóó táaʼdi biʼanaʼí bilákʼeedóó yisdááʼeezh, dóó bibąąhági ádaatʼéii tʼáadoo yaa ńdaʼooskan da.

14 Áádóó tʼáá áłtso nihiDiyin Bóhólníihii dóó nihiYisdáʼiiníiłii Jesus Christ doodah nínééʼ yee ádéíhadahaasdzííʼgo, áko beʼanaaʼ yichʼįʼ dadeezbaaʼgo, dóó bikʼiské ndabidiztseedyę́ę yá ninádaʼídléehgo, áko shooh Diyin Bóhólníihii bizaad sidítsʼą́ą́ʼ, kóní:

15 Kʼééhodidooʼníłígíí éí bee shóhólnííh, dóó shí kʼéédideeshʼnííł; áádóó háálá díí diné yiisdáʼbíínil ndi tʼáadoo ádaańdaʼooskan da, áko shooh, nahasdzáán bikááʼdóó ábidiʼdooldįįł.

16 Áádóó baa hoolzhiizh sheʼanaaʼí bichʼįʼ ndeeshbahgo tsʼídá doo nisin da; dóó Diyin Bóhólníihii áshidííniidyę́ę bohooshłaa; áádóó adahwiisʼą́ą́góó tʼóó shinááł ádahóótʼįįdígíí éí deiłtsánígíí dóó dasidétsʼą́ą́ʼígíí baa hweeshneʼ, éí Iiʼ Sizį́ Diyinii ííshją́ą́ áyiilaaígíí bikʼehgo éí náásgóó ádahodooniłígíí tʼáá aníigo yaa hoolneʼ.

17 Éí bąą nihichʼįʼ éʼéshłééh, Gentile dineʼé, áádóó áłdóʼ Israel bighandóó danóhłíinii, naanish hanáádaołwodgo, áko nihikéyah nihaa dahideestʼánééʼ bichʼįʼ hashtʼeʼádaʼdoołnééh doo.

18 Aooʼ, áko shooh, nihokááʼ dineʼé bichʼįʼ éʼéshłééh; aooʼ, nihí, Israel binaakitsʼáadah dahohkahígíí, éí naakitsʼáadah Jesus neiyiizlaaʼgo bikéé naakaiʼígíí bá ndahodooʼááł Jerusalem bikéyahdi.

19 Áádóó díí diné bitsʼą́ą́dóó chʼéédziʼígíí ałdóʼ bichʼįʼ éʼéshłééh, éí áłdóʼ bá ndahodiyootʼááł éí Jesus naakitsʼáadah díí kéyah bikáaʼgi neiyiizláʼę́ę ndahidooʼááł; dóó éí éiyá tʼáá nááná łaʼ naakitsʼáadah bá ndahidiyooʼááł éí Jesus Jerusalem kéyahdi yikʼidadiilniiʼyę́ę.

20 Áádóó díí éí Iiʼ Sizį́ Diyinii shił ííshjáá áyiilaa; éí bąą tʼáá ánółtso nihichʼįʼ éʼéshłééh. Áádóó díí biniinaa nihichʼįʼ éʼéshłééh, áko nihił béédahodoozįįł Christ nahwiiʼaahii-dahsidáádóó tʼáá ánółtso bidááhdóó deidoosįįł, aooʼ, tʼáá ałtso iiʼ sizíinii Adam bighandóó nihokááʼ dineʼé tʼáá átʼé dahdeiyíkahígíí; dóó nihinaanish ádaahłaaʼígíí bee nihá ndahodiyootʼááł, yáʼátʼééh doodaiiʼ doo yáʼáshóonii ádaołaahígíí;

21 Áádóó ałdóʼ Jesus Christ binahatʼá bee yisdáʼiildéehii deidohdląął, éí nihitah hólǫ́ǫ dooleeł; áádóó ałdóʼ Jew dineʼé, diné Diyin Bóhólníihii yił ahadaʼdeestʼáanii, nááná łaʼ hwił ííshjáá ádaʼdoolííł háálá éí éí Jesus deiyiiłtsʼą́ dóó deideeztsʼą́ą́, jó éí deiyiishxį́, éí tʼáá aaníí Christ dóó tʼáá aaníí Diyin God átʼį́į ńtʼę́ę́ʼ.

22 Áádóó nahasdzáán ndahwiisʼáajįʼ tʼáá ałtso náoshkąąhgo ádaańdaʼdookąął dóó Christ nahwiiʼaahii-dahsidáádóó yidááh deidoozįįłgo hashtʼeʼádaʼdoolnííł nisin.