1 Áádóó baa hoolzhiizh tʼáá éí yihahgo Nephi dineʼé dóó Laman dineʼé ałchʼįʼ náádadeezbaaʼ. Áádóó azhą́ tsíłkéí nishłį́į ńdi, ayóó shitah hótsaaz; éí bąą Nephi bidineʼé binaatʼáanii deeshłeełgo shikʼidadiilniiʼ, doodaiiʼ bándaabaahí binaatʼáanii deeshłeełgo.

2 Áko baa hoolzhiizh hastʼą́ʼaadah shinááhaigo Nephi dineʼé bindaabaahí binanitʼaʼí nishłį́įgo bił dah diiná, éí Laman dineʼé bikʼijįʼ; éí bąą táadi neeznádiin dóó baʼaan naadin hastʼą́ą́ ałtso nááhai.

3 Áádóó baa hoolzhiizh táadi neeznádiin dóó baʼaan naadiin dóó baʼaan tsostsʼid yihahgo Laman dineʼé tʼáá íiyisíí ayóó ádabóodziilgo nihikʼijįʼ dadeezbaaʼ, wónáásiiʼ shá ndaabaahyę́ę nídaasdzííd, éí bąą doo yił ałkiiʼjééʼ da, dóó nahookǫsjigo kéyah yichʼįʼ dah dadínííchą́ą́ʼ.

4 Áádóó baa hoolzhiizh Angola kin haalʼáadi niiʼná, dóó kin haalʼą́ bee ádídahosiilniiʼ, dóó Laman dineʼé bił daʼahidiighą́ą́łgo bichʼįʼ hashtʼeʼádaʼdiilyaa. Áádóó baa hoolzhiizh kin haalʼá tʼáá íiyisíí bidziilgo binídaʼsiitłʼin; wołíbee hółdzilgo ádahwiilyaa ndi Laman dineʼé nihikʼiijééʼ dóó kin haalʼáádóó chʼídanihineeskaad.

5 Áádóó David bikéyahdóó ałdóʼ chʼídanihineeskaad.

6 Áádóó náás niiʼná Joshua bikéyahjįʼ, éí eʼeʼaahjigo tónteel nihiníyįįh bíighahgi.

7 Áádóó baa hoolzhiizh tʼáá bídeeyínííghahgo nihidineʼé ahídahiitʼéezh, áko tʼááłáʼí dahyiikah doo biniyé.

8 Ákondi shooh, éí kéyahgiʼ daʼniʼįįhii hadeezbin dóó Laman dineʼé yił kéédahatʼį́; áádóó shidineʼé azhą́ ayóó átʼáo abidiʼdooldįįł ndi, doo yáʼáshóonii yaa naakaiígíí tʼáadoo yaa ńdaʼooskan da; éí bąą daʼahigą́ dóó ndaʼahiltseedgo tsʼídá ałtso kéyah bikááʼgóó hazlį́į́ʼ, tʼáá ałah Nephi dineʼé dóó Laman dineʼé ałdóʼ bitahgóó; dóó tʼáá ałtso kéyah bikááʼgóó yéego ałkʼiji danilį́ daazlį́į́ʼ.

9 Áádóó áko, Laman dineʼé aláahdi naatʼáanii łaʼ bee hólǫ́, dóó éí Aaron wolyé; áádóó dizdiin dóó baʼaan dį́į́ʼ dimííl yázhí áneilaago bindaabaahí yił nihikʼijįʼ dadeezbaaʼ. Áádóó áko shooh, shí dóó dizdiin dóó baʼaan naaki dimííl yázhí ndaabaahí bił bikʼeh dadiidlį́į́ʼ. Áádóó baa hoolzhiizh shindaabaahí bił bikʼeh dadiidlį́į́ʼ áko nihitsʼą́ąjįʼ dahdinííchą́ą́ʼ. Áádóó áko shooh, díí tʼáá átʼé ádahóótʼįįd, dóó táadi neeznádiin dóó baʼaan tádiin nááhaigo bił ahoolzhiizh.

10 Áádóó baa hoolzhiizh Nephi dineʼé doo yáʼátʼéehii yaa ndaʼookąąhgo dahdiikai, dóó Samuel Diyin yá yáłtiʼii yee haadzííʼyę́ęgiʼ átʼáo adaʼniichah; háálá áko shooh diné da binaalyéhé doo tʼah dahyoolééł da doo, háálá daʼniʼįįhii, dóó aghaʼdaʼiiʼnííłii, dóó ndaʼałtseedii, dóó nichxǫ́ǫ́ʼígo éédahósinii, dóó daʼdiłgąshii kéyah biyiʼ dahólǫ́.

11 Áádóó áko díí biniinaa kéyah tʼáá ałtso bikááʼgóó dahoʼdiʼní dóó daajichahgo hodeeshzhiizh, Nephi bidineʼé bitahgóó íiyisíí kóhoodzaa.

12 Áádóó baa hoolzhiizh shí, Mormon, dazhdiʼní dóó daajichah dóó Diyin Bóhólníihii bidááhdóó yínííł dajílį́įgo baa ákoniizį́į́ʼ, shijéí biyiʼdi bił hóózhǫǫd, Diyin Bóhólníihii bee ajoobaʼ dóó nizaadgóó-biʼatihooʼnííh bééhózingo, éí bąą yaa joobaʼ dooleeł nisin áko da diyinkʼehgo náádeiyíkááh dooleeł.

13 Ákondi shooh tʼáadoo biniyéhígo shił hózhǫ́ǫ lá, háálá yínííł danízinyę́ę éí doo ádaanáʼookąąhígíí biniinaa da, háálá Diyin God biyáʼátʼéehii biniinaa; ákondi tiʼdahooʼnííhgo bá nidahwiistʼánígíí átʼée lá, háálá Diyin Bóhólníihii bąąhági ádajítʼį́įgo bitsʼą́ą́dóó ił hózhǫ́ǫ doogo doo yee hasʼą́ą da.

14 Áádóó áko bijéí dóó biyiʼ sizʼíinii doo yínííł danilį́įgóó Jesus yaa heeskai, ákondi Diyin God tʼóó deiyódziih, dóó dadíʼnííʼnééł danizin. Ákotʼée ndi bichʼįʼ ndahwiiʼnáago beʼiina béésh hał yee yichʼą́ą́h ndaazbaaʼ.

15 Áádóó baa hoolzhiizh yínííł nishłínéé shiiʼnááhásdlį́į́ʼ, áádóó ajoobaʼ bichʼįʼ yoołkáłę́ę tʼóó bił ahoolzhiizhgo yííłtsą́, atsʼíís dóó iiʼ sizíiniikʼehgo; háálá miil yázhí bilááhgóó Diyin God yikʼijį́ danilíigo ábiʼdisdįįdgo yiiłtsą́, dóó kéyah bikááʼgóó chąąʼ deeskʼid nahalingo ádabiʼdiilyaa. Áádóó áko táadi neeznádiin dóó baʼaan dizdiin dóó baʼaan dį́į́ʼ ałtso nááhai.

16 Áádóó baa hoolzhiizh táadi neeznádiin dóó baʼaan dizdiin dóó baʼaan ashdlaʼ yihah góneʼ Nephi dineʼé éí Laman dineʼé yitsʼą́ą́jįʼ dahdadínííchą́ą́ʼ; áádóó bikééʼdaʼíbááhgo kéyah Jashonjįʼ adaneezhchą́ą́ʼ, áko tʼáadoo bidááh niʼíldeeʼ da.

17 Áádóó áko, kintah Jashon bíighahgi Ammaron diné baa haneʼ Diyin Bóhólníihii yichʼįʼ łeeh yiyíʼą́, áko doo doolchxǫǫł da. Áádóó áko shooh Ammaron ádííniidyę́ę bikʼehgo ákǫ́ǫ́ níyá, dóó Nephi bibéésh tʼą́hí nídiijaaʼ, áádóó Ammaron bizaadígíí bikʼehgo bikááʼ nehézoh.

18 Áádóó Nephi bibéésh tʼą́hí bikáaʼgi tʼáá ałtso bibąąhági átʼéii dóó íiyisíí woolchʼįįd ádeiyiilaayę́ę bikááʼ náházoh; ákondi díí béésh tʼą́hí bikááʼ doo tʼáá átʼé bąąhági átʼéii doo íiyisíí woolchʼídígíí bikááʼ ííshłaa da, háálá áko shooh, áłahjįʼ bąąhági ádaatʼéii dóó tʼáá íiyisíí daalchʼídígíí ádajitʼį́įgo shinááł ádaʼjiłʼį́įgo éí tʼáá níléídę́ę́ʼ tʼáá ánístsʼísídą́ą́ʼ yishʼį́įgo hoolzhiizh.

19 Áádóó bąąhági átʼéii yaa naakaiʼígíi biniinaa yéego shiʼdiiłʼá; háálá shijéí yínííł bee haʼdeezbin bąąhági ádaatʼinígíí biniinaa, tʼáá niléídę́ę́ʼ ákótʼé; ákotʼée ndi, nihoníyáadi éí yisdáʼshidiʼdooltééł.

20 Áádóó baa hoolzhiizh díí yihahígíí biyiʼ Nephi bidineʼé hanáádabiʼdinitaah dóó nináádabidiʼnidzood ńtʼę́ę́ʼ. Áádóó baa hoolzhiizh kéyah nahookǫsdi siʼánígíí bichʼįʼjigo nihiʼdiʼnoodzood éí Shem holyéedi.

21 Áádóó baa hoolzhiizh kintah Shem éí hózhǫ́ anaaʼí bichʼįʼ hółdzilgo ádeilyaa, áádóó nihidineʼé ahídahiitʼeezh tʼáá bóhoneidzánígíí bikʼehgo, áko ábidiʼdooldįįł da bitsʼá dadiitʼish.

22 Áádóó baa hoolzhiizh táadi neeznádiin dóó baʼaan dizdiin dóó baʼaan hastą́ą́ yihahígíí biyiʼ nihichʼįʼ náádadeezbaaʼ.

23 Áádóó baa hoolzhiizh shidineʼé bichʼįʼ haasdzííʼ, dóó ayóó átʼáo sheʼadziil bee bichʼįʼ naʼiisékan, áko dabidziilgo Laman dineʼé yichʼįʼ deidoozįįł áko bizáanii, dóó badaʼáłchíní, dóó dabi kin, dóó dabighan yá daʼahidoogą́ą́ł.

24 Áádóó shizaad dabidiisnááʼ éí yee akʼijįʼ deizįʼ, éí biniinaa Laman dineʼé tʼáadoo yitsʼą́ą́ dahdadíníichą́ą́ʼ da, áko dabidziilgo yichʼįʼ niikai.

25 Áádóó baa hoolzhiizh nihindaabaahí tádiin dimííl ánéíláágo dóó áajigo ashdladiin mííl yázhí ánéílaaʼgo bikʼijįʼ dahdadiibaaʼ. Áádóó baa hoolzhiizh yéego bił daʼahiighą́ą́ʼ áko nihitsʼą́ąjįʼ dahdadíníichą́ą́ʼ.

26 Áádóó baa hoolzhiizh nihitsʼą́ą́jįʼ dahdadínííchą́ą́ʼgo nihindaabaahí yikʼéé dahdadiibaaʼ, dóó yikʼínáánákai, dóó yikʼehdadeesdlį́į́ʼ; ákotʼée ndi Diyin Bóhólníihii bibeʼadziilii éí doo nihił dahólǫ́ǫ da, aooʼ, tʼáá nihí ákʼindeildzil dasiidlį́į́ʼ, áko Diyin Bóhólníihii biʼIiʼ Sizį́ Diyinii doo nihiyiʼ dahólǫ́ǫ da; éí bąą nihikʼiské nahalingo doo danihidziil da dasiidlį́į́ʼ.

27 Áádóó shijéí yinííł sílį́į́ʼ háálá shidineʼé ayóó átʼáo bichʼįʼ ndawiiʼnánígíí biniinaa, háálá doo yáʼádaashóonii dóó tʼáá íiyisíí ádajoodléii ádeełʼínígíí biniinaa. Ákondi shooh, Laman dineʼé dóó Gadianton daʼniʼįįhii bikʼijįʼ dahdadiibaaʼ, kéyah nihaadahaastʼánéé nihí ndaasdlį́į́ʼjįʼ índa.

28 Áádóó áko táadi neeznádiin dóó baʼaan dizdiin dóó baʼaan náhástʼéí ałtso nááhai. Áádóó áko táadi neeznádiin dóó baʼaan ashdladiin yiihah góneʼ Laman dineʼé dóó Gadianton daʼniʼįįhii bił ałhaʼdaʼdeitʼą́, éí biyiʼ kéyah nihaadadeestʼánéé ałtsʼádaasdzohgo nihá ádaalyaa.

29 Áádóó Laman dineʼé éí kéyah nahookǫsjigooígíí nihaadeideezʼą́, aooʼ, azhą́ áhoołtsʼóózí chʼíhonítʼiʼjįʼ ndi éí kéyah shádiʼáahjigo bichʼįʼ. Áádóó Laman dineʼé éí kéyah shádiʼáahjigooʼígíí tʼáá átʼé baa dadiniitʼą́.