Naaltsoos Mormon Wolyéhígíí

1 Áádóó áko shí, Mormon, deiłtsánígíí dóó disétsʼą́ʼígíí náházoh, áádóó díí náházohígíí éí Naaltsoos Mormon Wolyéhígíí bee yíízhiʼ.

2 Áádóó Ammaron béésh bikááʼ haneʼ Diyin Bóhólníihii yichʼįʼ néideesʼį́į́ʼyę́ędą́ą́ʼ, shaa níyá, (áko neeznáá shinááhai nahalzhiizhyę́ędą́ą́ʼ dóó shidineʼé yídahoołʼą́ʼígíí éí bíhooshʼaahgo baa ńdiisdzá) dóó Ammaron éí kóshidííniid: Tʼahdii áłchíní nílį́įgo, honiyą́ągo bee naa ákonisin;

3 Éí bąą, naadiin dóó baʼaan dį́į́ʼ náhááh góneʼ díí dineʼé tʼáadoo leʼé yaa naakaigo yiníłtsʼánígíí éí béénílniih dooleeł; dóó ákónéelą́ą́ʼ ninááhaigo kéyah Antumgóó díínááł, dóó Shim wolyéego dah yiskʼidígíí éí baa díínááł; áadi éí tʼáá ałtso béésh bikááʼ díí diné baa haneʼ diyinii hadilyaahą́ą Diyin Bóhólníihii bichʼįʼ ńdéłʼį́į́ʼ.

4 Áádóó áko shooh, Nephi bidineʼé baa haneʼígíí ndidííʼááł, dóó łaʼ éí bíniʼ tʼáá sinilígi sinil dooleeł; dóó díí dineʼé tʼáadoo leʼé yaa naaskaigo háínísidyę́ę éí Nephi bibéésh tʼą́hí bikááʼ baahaneʼ bikááʼ ádíílííł.

5 Áádóó shí, Mormon, éí Nephi bitsʼą́ą́dóó hosélį́į́ʼ, (dóó shizhéʼé éí Mormon wolyéé ńtʼę́ę́ʼ) Ammaron yichʼįʼ shííłʼaadyę́ę éí bénáshniih.

6 Áádóó baa hoolzhiizh shí, łaʼtsʼáadah shinááhaigo, éí shádiʼááhjígo, kéyah Zarahemla wolyéegóó shizhéʼé bił níʼáázh.

7 Tʼáá ałtso kéyah bikááʼgóó éí kin hadaalʼá silį́į́ʼ, dóó tónteel bibąąhgóó séí hólónígiʼ átʼáo, éí diné tʼóó ahayóí.

8 Áádóó baa hoolzhiizh kóneʼ yihahgo éí Nephi dineʼé, éí éí Nephi dineʼé dóó Jacob dineʼé dóó Joseph dineʼé dóó Zoram dineʼé danilį́įgo; dóó Lemuel dineʼé dóó Ishmael dineʼé éí Laman dineʼé danilį́įgo, dóó díí Nephi dineʼé dóó Laman dineʼé daʼahoogą́ą́ʼ.

9 Áko Laman dineʼé dóó Lemuel dineʼé dóó Ishmael dineʼé éí tʼáá ałtso Laman dineʼé daolyéé ńtʼę́ę́ʼ; dóó naakigo dah oonéłígíí éí Nephi dineʼé dóó Laman dineʼé daolyéé ńtʼę́ę́ʼ.

10 Áádóó baa hoolzhiizh ałkiijééʼ Zarahemla bił nááháasdzooígíí bibąąhgóó dóó Sidongi tó naazyínígi bíighahdi.

11 Áádóó baa hoolzhiizh Nephi dineʼé éí diné ahąʼ ádayiilaa, tádiin dóó baʼaan dimííl yázhí bilááh ndi. Áádóó baa hoolzhiizh díí kóneʼ yihahgo éí ląʼídi ńdaʼahoogą́ą́ʼ, éí éí Nephi dineʼé éí Laman dineʼé yikʼeh dadeesdlį́į́ʼ dóó tʼóó ahayóí ndeistseed.

12 Áádóó baa hoolzhiizh Laman dineʼé éí nátʼą́ą́ʼ náhideeskai, dóó kéyah biyiʼ kʼé náhásdlį́į́ʼ; dóó kʼé hólǫ́ǫgo dį́į́ʼ nááhai, áko doo ndaʼahiltseedgóó.

13 Ákondi kéyah bikááʼgóó bąąhági ádaatʼéii náhásdlį́į́ʼ; áko índa Diyin Bóhólníihii bitáaʼgo yikééʼ naazínígíí ayóí áyóʼnínée éí nínéidííʼnil, dóó álílee naʼanish dóó hadaałtʼé áńdaʼalneʼę́ę ádin silį́į́ʼ háálá diné bąąhági átʼéii yaa naakaiígíí biniinaa.

14 Áádóó Diyin Bóhólníihii éí doo akʼihojídlíi da silį́į́ʼ, dóó Iiʼ Sizį́ Diyinii éí tʼáá háiida doo bił hólǫ́ǫ da ńtʼę́ę́ʼ, háálá bąąhági átʼéii yaa naakaiígíí dóó doo daʼoodlánígíí biniinaa.

15 Áádóó shí, ashdlaʼáadah shinááhaigo dóó hazhóʼó ntséskeesgo, éí bąą Diyin Bóhólníihii éí shaa níyá, dóó Jesus biyáʼátʼéehii ayóó átʼéhígíí éí séłnih dóó shił bééhoozin.

16 Áádóó díí diné nanishtin doo chʼééh nisingo, ndi shizééʼ éí daʼdeilkaal, dóó áko ndíʼnéeshtįįłę́ę éí shichʼįʼ baa hóchįʼ ńtʼę́ę́ʼ; háálá áko shooh biDiyin God éí tʼáá bí ádeinízingo doo yikʼeh dahółʼį́į da; dóó táaʼgo Diyin Bóhólníihii yikééʼ naazínígíí ayóí áyóʼnínée éí kéyah biyiʼdę́ę́ʼ chʼétʼeezh, háálá bąąhági átʼéii yaa naakaiígíí biniinaa.

17 Ákondi shí éí bitahgóó naashá, ndi ndinéeshtįįłígíí éí shichʼįʼ baa hóchįʼ ńtʼę́ę́ʼ, háálá bijéí deistłʼisígíí biniinaa; dóó bijéí deistłʼisígíí biniinaa kéyahą́ądóʼ doo yáʼátʼéehii bee bá haʼoodzííʼ.

18 Áádóó daʼniʼįįhii Gadianton, éí Laman dineʼé yitahgóó hólónée, éí kéyah ałtso bikááʼgóó tʼóó ahayóí silį́į́ʼ, áko índa éí kéyah yikááʼgóó kéédahojitʼínée éí daʼílíinii łeeyiʼgóó ndaazdeesʼį́į́ʼ; dóó honaalyéhéyę́ę bídéeltǫʼ silį́į́ʼ, háálá kéyah doo yáʼátʼééhgóó Diyin Bóhólníihii yee yá haadzíʼę́ę biniinaa, chʼééh honaalyéhéyę́ę dajótąʼgo hatsʼą́ą́ʼ yóóʼ ahinidéehgo, dóó doo nibééhóyoozįįh da.

19 Áádóó baa hoolzhiizh diné bee daʼiiníziinígíí, dóó daʼdiłgąshii, dóó nichxǫ́ǫ́ʼígo éédahósinii hazlį́į́ʼ; dóó chʼį́įdii doo yáʼáshóonii bibee adziil éí tsʼídá ałtso kéyah yikááʼgóó hazlį́į́ʼ, áko Abinadi dóó Samuel Laman Dineʼé Nilíinii bizaadę́ę éí tʼáá ałtso bidahoolyaa.