1 ’Me ebe hore sane se ngotsoeng se tla etsahala: Binang, Oho nyopa, uena ea sa kang a tsoala; lumisa litlatse ka ho bina, ’me u hoelehetse haholo, uena ha u a ka ua tseba bohloko ka ngoana; hobane ba fetang ke bana ba ts’enyeho ho feta bana ba mosali ea nyetsoeng, ho bolela Morena.

2 Eketsa sebaka sa tente ea hau, ’me etsa hore e otlolle masira a bolulo ba hau; se ke oa boloka, lelefatsa likhoele tsa hau ’me u matlafatse litereke tsa hau;

3 Hobane u tla namela ka letsohong le letona le ka ho le lets’ehali, ’me peo ea hau e tla ja lefa Balicaba le ho etsa hore ho senyehe metse e tlang ho luloa.

4 Se ke oa ts’aba, hobane u ke ke ua soaba; le ha e le ho hloloa, hobane u ke ke oa soabisoa; hobane u tla lebala ts’oabo ea bocha ba hau, ’me u ke ke ua hopola nyatso ea bocha ba hau, ’me ha u na hlola u hopola nyatso ea bohlolohali ba hau.

5 Hobane ’Mopi oa hau, monna ua hau, Morena oa Makhotla ke lebitso la hae; ’me Molopolli ua hau, Mohalaleli oa Iseraele—Molimo oa lefats’e lohle o tla bitsoa joalo.

6 Hobane Morena o u bitsitse joaloka mosali ea furaletsoeng le ho hlokofala moeeng, le mosali oa mocha, ha u ne u hannoe, ho bolela Molimo oa hau.

7 Bakeng sa nako e nyane ke u furaletse, empa ka mehau e meholo ke tla u bokella.

8 Ka khalefo e nyane ke ile ka pata sefahleho sa ka ho uena bakeng sa nakoana, empa ka mosa o sa feleng ke tla ba le mohau ho uena, ho bolela Morena Molopolli oa hau.

9 Hobane ana, metsi a Noe ho ’na, hobane joaloka ka ha ke ikanne hore metsi a Noe a se hlole a eba holim’a lefats’e, le joalo ke ikanne hore nke ke ka ba le khalefo ka uena.

10 Hobane lithaba li tla falla ’me maralla a tlosoe, empa mosa oa ka o ke ke oa falla ho tsoa ho uena, le ha e le hore selekane sa khotso ea ka se tlosoe, ho bolela Morena ea nang le mohau ho uena.

11 Oho uena ea hlokofetseng, ea lahloang ka sefefo, ’me u sa ts’elisoe! Bona, ke tla beha majoe a hau ka mebala e metle, ’me ke behe metheho ea hau ka lisafira.

12 ’Me ke tla etsa lifenstere tsa hau ka agate, ’me likhoro tsa hau ka rubise, ’me meeli eohle ea hua ka mahakoe a bohlokoa.

13 ’Me bana ba hua ba tla rutoa ke Morena; ’me e tla ba kholo khotso ea bana ba hau.

14 Ka ho loka u tla thehoa; u tla ba hole le khatello hobane ha u na ho ts’aba, le ho ts’oso hobane e ke ke ea tla haufi le uena.

15 Bona, kannete ba tla ipokella hammoho khahlanong le uena, e se ka ’na; mang kapa mang ea tlang ho ipokella hammoho khahlanong le uena o tla oa molemong oa hau.

16 Bona, ke bopile motehi oa ts’epe ea futhelang mollo ka mashala, ’me ea etsang sesebelisoa bakeng sa mosebetsi oa hae; ’me ke bopile metsi ho timetsa.

17 Ha ho sebetsa se thehiloeng khahlanong le uena se tlang ho atleha, ’me leleme le leng le le leng le nyefolang khahlanong le uena ka kahlolo u tla le ahlola. Lena ke lefa la bahlanka ba Morena, ’me ho loka ha bona ke ha ka, ho bolela Morena.