Դաս 16․ Ուսուցչի նյութ

Ինչպես Հիսուս Քրիստոսի միջոցով երջանկություն ձեռք բերել ընտանեկան կյանքում

«Ընտանեկան կյանքում երջանկության հասնելու ամենամեծ հավանականությունն այն դեպքում է, երբ ընտանիքը հիմնված է Տեր Հիսուս Քրիստոսի ուսմունքների վրա» («Ընտանիք․ Հայտարարություն աշխարհին», ChurchofJesusChrist.org): Այս դասին ուսանողները կքննարկեն, թե իրենց անձնական և ընտանեկան կյանքը ինչպես կառուցեն Հիսուս Քրիստոսի հիմքի վրա: Հրավիրեք նրանց բացահայտել խոչընդոտները, որոնք կարող են խանգարել իրենց այդ գործում, և ուղիներ` դրանք հաղթահարելու համար:

Ուսուցման առաջարկներ

Մեր անձնական և ընտանեկան կյանքը Հիսուս Քրիստոսի հիմքի վրա կառուցելով՝ պաշտպանում և զորացնում ենք մեզ

Ցուցադրեք Ֆիլադելֆիայի (Պենսիլվանիա) տաճարի կից նկարը: Հիշեցրեք ուսանողներին շենքի հիմքի նպատակի մասին (տես նախապատրաստական նյութի բաժին 1-ը)։

Ֆիլադելֆիայի (Պենսիլվանիա) տաճարը

Միասին կարդացեք Երեց Դոնալդ Լ. Հոլսթրոմի հետևյալ հայտարարությունը, որում նա նկարագրել է Ֆիլադելֆիայի (Պենսիլվանիա) տաճարի համար ուժեղ հիմք ստեղծելուն ուղղված ինժեներական ջանքերը:

Երեց Դոնալդ Լ. Հոլսթրոմ

Տաճարը կենթարկվի … կործանարար քամիների և խորտակիչ ստորգետնյա ջրերի ազդեցությանը: Այդ դաժան պայմանները, եթե չվերահսկվեն, կարող են նշանակալիորեն վնասել և նույնիսկ կործանել այս վեհաշուք շինությունը:

Իմանալով, որ այդ ուժերը անխնա հարձակվելու են տաճարի վրա, ճարտարագետները նախագծել են, և կառույցի ողջ տարածքի տակ կապալառուն փորել է 32 ոտնաչափ (10 մետր) խորությամբ անցք: Անցքը փորվել է Պենսիլվանիայի բնական գրանիտի մեջ` ապահովելով անշարժ հիմք, որպեսզի դրա վրա կառուցվի տաճարը: Այնուհետև, բետոնե հենակետերը և հիմքերը ժայռային խարիսխներով կապվել են գրանիտե հիմնաժայռին, որպեսզի դիմանան ուժգին քամիներին և հզոր ստորերկրյա ջրերին: Խարիսխները 50-175 ֆուտ (15-53 մ) փորվել են գրանիտի մեջ:

Ես այդպիսի մանրամասն տեղեկատվություն եմ տալիս` ուսուցանելով այս միտքը. ի տարբերություն շենքի կառուցվածքի (որը ժամանակավոր է), մեր հավիտենական (և, հուսով ենք, հավերժական) կյանքը կառուցելիս, մենք երբեմն դժբախտաբար քիչ ուշադրություն ենք դարձնում մեր հիմքերի ճարտարապետությանն ու շինարարությանը: Հետևաբար, մենք շատ խոցելի ենք դառնում և հեշտությամբ հարվածի ենթարկվում վտանգավոր ուժերի կողմից: (“Jesus Christ: Our Firm Foundation,” Ensign, Apr. 2016, 58)

Հրավիրեք ուսանողներին իրենց մտքում պահել այդ տաճարի հիմքի նկարագիրը, երբ միասին վերանայեք Հելաման 5.12-ը:

• Ի՞նչ է ուսուցանում այս հատվածն այն մասին, թե անհատներն ու ընտանիքները ինչո՞ւ պետք է հոգևոր հիմք կառուցեն Հիսուս Քրիստոսի վրա: (Օգնեք ուսանողներին բացահայտել նմանատիպ մի սկզբունք. Երբ անհատներն ու ընտանիքները կառուցում են իրենց հիմքը Հիսուս Քրիստոսի վրա, սատանան զորություն չի ունենա կործանելու նրանց:)

• Որոնք են հակառակորդի այն մի քանի սովորական «զորեղ քամիները, … նետերը պտտահողմում, … կակուտը և … զորեղ փոթորիկ[ները]», որոնց բախվում են ընտանիքները մեր օրերում:

• Անհատներն ու ընտանիքները ի՞նչ եղանակներով կարող են կառուցել իրենց հիմքը Հիսուս Քրիստոսի վրա: (Որպես այս քննարկման մաս՝ հրավիրեք ուսանողներին կիսվել երեց Դեյվիդ Ա. Բեդնարի և երեց Հոլսթրոմի հայտարարություններից իրենց սովորածով, ինչպես նաև «Գրի առեք ձեր մտքերը» նախապատրաստական նյութի բաժին 1-ի վարժությունից:)

• Դուք կամ ձեր ընտանիքն ի՞նչ փորձառություններ եք ունեցել, որտեղ Հիսուս Քրիստոսի հիմքի վրա կառուցելն օգնել է դիմակայել կամ հաղթահարել տարբեր տեսակի փոթորիկներ:

Հիսուս Քրիստոսի ուսմունքներով ապրելը երջանկություն է բերում ընտանեկան կյանք

Ցուցադրեք հետևյալ միտքը ընտանիքի հռչակագրից. «Ընտանեկան կյանքում երջանկության հասնելու ամենամեծ հավանականությունն այն դեպքում է, երբ ընտանիքը հիմնված է Տեր Հիսուս Քրիստոսի ուսմունքների վրա» («Ընտանիք․ Հայտարարություն աշխարհին», ChurchofJesusChrist.org):

Բարելավենք մեր ուսուցումն ու ուսումնառությունը

Խրախուսեք ուսանողներին մասնակցել դասին: Փնտրեք եղանակներ, որպեսզի խրախուսեք բոլոր ուսանողներին մասնակցել դասին: Յուրաքանչյուր ուսանող ունի եզակի ծագում, հետաքրքրություններ, հույսեր և խնդիրներ, որոնք լրացնում են նրա գաղափարներն ու հարցերը: Ուսանողների հստակ տեսակետները կարող են անհատական ուղիներով օրհնել դասարանում գտնվող մյուս ուսանողներին: Երբ ուսանողները մասնակցում են, ուշադիր լսելով կարող եք նաև գնահատել նրանց կարիքներն ու մտահոգությունները:

Հրավիրեք ուսանողներին բացել սուրբ գրության իրենց գտած հատվածը, որը պարունակում է Հիսուս Քրիստոսի մի ուսմունք, որն իրենց երջանկություն է բերել իրենց անձնական կամ ընտանեկան կյանքում, երբ կիրառել են այն: (Տես նախապատրաստական նյութի բաժին 2-ը: Գուցե ձեզ անհրաժեշտ լինի ուսանողներին մի քանի րոպե հատկացնել` հատվածը գտնելու համար:)

Դասարանը բաժանեք փոքր խմբերի։ Հրավիրեք ուսանողներին կիսվել սուրբ գրությունների իրենց հատվածներով՝ հետևյալ հարցերի իրենց պատասխանների հետ միասին (ցուցադրեք հարցը կամ գրեք այն գրատախտակին):

• Ավետարանի այդ ուսմունքին հետևելով՝ ինչպե՞ս կարող եք օրհնել որևէ մարդու, որևէ ամուսնություն կամ ընտանիքի:

Բավարար ժամանակ տրամադրելուց հետո հրավիրեք մի քանի ուսանողի դասարանի հետ կիսվել իրենց խմբերում քննարկածով։

Հրավիրեք ուսանողներին լուռ վերանայել 4 Նեփի 1.1, 11–13, 15–18-ը, փնտրելով բառեր կամ արտահայտություններ, որոնք արտահայտում են Փրկիչի ուսմունքները, որոնցով այդ մարդիկ ընտրեցին ապրել: Հրավիրեք ուսանողներին կիսվել իրենց գտածով:

• Ընտանիքը ինչ օրհնություններ կարող է ստանալ, երբ նրանք ձգտում են միասին ապրել ըստ Փրկիչի ուսմունքների: Որտե՞ղ եք տեսել այդպիսի օրհնությունների օրինակներ:

• Ի՞նչ եղանակներով է հակառակորդը փորձում խանգարել մեզ ստանալ այդ օրհնությունները: (Անհրաժեշտության դեպքում ուսանողներին հրավիրեք վերանայել օրինակները նախապատրաստական նյութի բաժին 3-ում:)

Ցուցադրեք երեց Բրեդլի Դ. Ֆոսթերի հետևյալ հայտարարությունը, ով նախկինում ծառայել է որպես Յոթանասունի անդամ:

Երեց Բրեդլի Դ. Ֆոսթեր

Պարտադիր չէ, որ շեղումը չար լինի՝ արդյունավետ լինելու համար: («Մայրիկն ասել է ինձ», Լիահոնա, մայիս 2010, 99)

• Որոնք են այն մի քանի շեղումները, որոնք գուցե ի բնե չար չեն, բայց կարող են խանգարել մեզ ամուր հիմնվել Հիսուս Քրիստոսի և Նրա ուսմունքների վրա: Ի՞նչ եք արել, որպեսզի նվազեցնեք կամ վերացնեք մեկ կամ մի քանի այդպիսի շեղումները ձեր կյանքից:

• Ի՞նչ օրհնություններ կարող են մարդիկ բաց թողնել, եթե նրանց հիմքը կառուցված է օրինակ՝ մշակութային ավանդույթի, զվաճության կամ փողի վրա:

Մտածեք, թե ինչպես կարող եք օգնել ուսանողներին իմաստալի վարվել՝ այս դասում իրենց սովորածի հիման վրա: Օրինակ՝ կարող եք ուսանողներին մի քանի րոպե հատկացնել՝ վերանայելու երեց Գարի Ի. Սթիվենսոնի հայտարարությունը և «Գործիր» վարժությունը նախապատրաստական նյութի բաժին 3-ում: Ապա հրավիրեք ուսանողներին գրել լրացուցիչ մտքեր՝ կապված իրենց նպատակի կամ ծրագրի հետ:

Կարող եք եզրափակել` կիսվելով ձեր վկայությամբ այն երջանկության վերաբերյալ, որը դուք եք զգացել ձեր անձնական և ընտանեկան կյանքում, երբ կառուցել եք ձեր հիմքը Հիսուս Քրիստոսի և Նրա ուսմունքների վրա:

Հաջորդ անգամ

Հրավիրեք ուսանողներին մտածել, թե երբ են տեսել, որ ամուսինն ու կինը աշխատում են միասին որպես հավասար գործընկերներ: Նրանք գուցե մտածեն այն ժամանակների մասին, երբ ականատես են եղել զույգերի, ովքեր չեն աշխատել որպես հավասար գործընկերներ ինչ-որ պատճառով: Քաջալերեք ուսանողներին ուսումնասիրել հաջորդ դասի նյութը` մտքում ունենալով այս օրինակները և որոշել, թե իրենք ինչպիսի ընկերակցություն կկամենային ունենալ իրենց սեփական ամուսնության մեջ: