Դաս 11․ Ուսուցչի նյութ

Ինչպե՞ս ընտրել հավերժական զուգընկեր

Տերը ցանկանում է օգնել մեզ հավերժական զուգընկեր գտնելու մեր ջանքերում: Այս դասում ուսանողները կբացատրեն, թե ինչպես կարող են հավատք դրսևորել Հիսուս Քրիստոսի հանդեպ, երբ ջանքեր են գործադրում՝ հակառակ սեռի ներկայացուցիչների հետ հարաբերություններ հաստատելու և ամուսնանալու համար: Ուսանողներին կհրավիրեն ընտրել նաև այնպիսի Քրիստոսանման հատկություններ, որ իրենք կարող են զարգացնել, և որոնք կօգնեն նրանց նախապատրաստվել կամ ավելի լավ համապատասխանել հավերժական ամուսնությանը:

Ուսուցման առաջարկներ

Տերն ակնկալում է, որ մենք գործենք Իր հանդեպ հավատքով, երբ փնտրում ենք հավերժական զուգընկեր

Դասարանը բաժանեք փոքր խմբերի և յուրաքանչյուր խմբի համար նշանակեք ղեկավար: Յուրաքանչյուր ուսանողի տրամադրեք հետևյալ սցենարի 1-ին մասը և դրան հաջորդող հարցերը: Ուսանողներին հանձնարարեք միասին բարձրաձայն կարդալ սցենարը և քննարկել հարցերը: (Հնարավորության դեպքում սցենարի 1-ին մասը ուսանողներին ուղարկեք դասից առաջ, որպեսզի նրանք կարողանան կարդալ և մտածել դրա մասին):

Նշում. մտածեք այն եղանակների մասին, որոնցով կարող եք հարմարեցնել սցենարը՝ այն ավելի համապատասխան դարձնելով ուսանողների հանգամանքներին, հարցերին կամ մշակույթին:

Բարելավել մեր ուսուցումն ու ուսումնասիրությունը

Փոքր խմբերով քննարկումները կարող են օգնել ուսանողներին խորությամբ ըմբռնել նյութը: Փոքր խմբերը հնարավորություն են տալիս, որ ավելի մեծ թվով ուսանողներ եռանդուն մասնակցեն քննարկումներին: Փոքր խմբերին մասնակցելու հնարավորություն ունենալով՝ ինքնամփոփ ուսանողները կարող են վստահություն ձեռք բերել: Նշանակեք խմբի ղեկավար, ուսանողներին հստակ ցուցումներ տվեք իրենց անելիքների վերաբերյալ, սահմանեք ժամկետ՝ հրավիրելով յուրաքանչյուր անդամի մասնակցել, և ուսանողներին խրախուսեք պատրաստ լինել կիսվել իրենց սովորածով:

Սցենար 1, մաս 1

Հավերժական ընտանիք. Ուսուցչի նյութ. Դաս 11

Լուիսը միսիայից վերադարձել է մոտ երկու տարի առաջ: Քանի որ նա անհանգստանում է ապագա ընտանիքը ապահովելու համար, որոշել է կես դրույքով աշխատել, քանի որ ինքն է վճարում իր կրթության համար: Նրա ժամանակը սահմանափակ է, բայց նա բավականություն է ստանում իր ինստիտուտի շաբաթական դասից և այն դարձնում է առաջնահերթություն: Լուիսը սովորաբար ստուգում է սոցիալական ցանցերը և խաղեր խաղում ավտոբուսում կամ դասերից առաջ: Տուն վերադառնալուց հետո նա շատ աղջիկների չի հանդիպել: Նա իր ընտանիքին ասում է, որ զգում է, որ ավելի լավ կլինի ուսումն ավարտելուց հետո լրջորեն զբաղվի ամուսնությամբ: Նա կարծում է, որ եթե իրեն նախատեսված է ավելի շուտ ամուսնանալ, դա տեղի կունենա:

Էմման հաճախում է ինստիտուտի նույն դասարանը, բայց չի հանդիպել Լուիսին: Նա սովորաբար նստում է իր ընկերների մոտ և հազվադեպ է խոսում ուրիշների հետ: Նա հիասթափված է տղամարդկանց հետ հանդիպումից և ընդհանրապես՝ ժամադրությունից: Նա անհանգստանում է, որ եթե ինքը սկսի այլ հարաբերություններ, ապա դրանք կավարտվեն այնպես, ինչպես բոլոր նախորդները: Նրա զգացմունքները կարծես հանգել են, և նա համարում է, որ բավարար եռանդ չունի այլ հարաբերություններ սկսելու համար: Նա դպրոցն ավարտել է մեկ տարի առաջ և ունի լրիվ դրույքով աշխատանք: Նա անհանգստանում է, որ գուցե երբեք չհանդիպի իր իսկական սիրուն կամ կնքվի տաճարում, և մտածում է՝ արդյոք պետք է հանդիպի Եկեղեցու ոչ անդամի հետ:

Սցենարը միասին կարդալուց հետո քննարկեք հետևյալ հարցերը.

• Ի՞նչ կարծիքի եք Լուիսի և Էմմայի անհանգստությունների մասին:

• Հաշվի առնելով մեր սովորածը նախապատրաստական նյութի բաժին 1-ից, ի՞նչ օգտակար խորհուրդ կտայինք Լուիսին: Ի՞նչ օգտակար խորհուրդ կտայինք Էմմային:

• Եթե ձեր խմբային քննարկման ժամանակ դեռևս չեք խոսել հետևյալ հատվածների մասին, միասին կարդացեք դրանք և քննարկեք, թե դրանք ինչպես կարող են վերաբերել Լուիսին և Էմմային. Առակաց 3.5–6, 2 Նեփի 22.2, Վարդապետություն և Ուխտեր 58.26–28: Ինչպե՞ս եք գործադրել կամ ինչպես կգործադրեք ձեր հավատքը Տիրոջ հանդեպ՝ հավերժական զուգընկեր գտնելու ձեր ջանքերում:

© 2022 by Intellectual Reserve, Inc. All rights reserved․

Սցենար 1, մաս 1

ուսուցչի օժանդակ նյութ

Երբ ուսանողները բավարար ժամանակ ունենան սցենարը և հարցերը քննարկելու համար, հրավիրեք նրանցից մի քանիսին կիսվել քննարկման ժամանակ իրենց սովորածով կամ զգացածով: Երբ ուսանողները կիսվեն, կարող եք օգնել նրանց բացահայտել նմանատիպ ճշմարտություններ. Հավատքն առ Հիսուս Քրիստոսը կօգնի մեզ քաջություն և համբերություն ունենալ հավերժական զուգընկեր գտնելու մեր ջանքերում: Աստված մեզանից ակնկալում է, որ մենք կօգտագործենք մեր ազատ կամքը՝ իր ծրագիրն առաջ մղելու համար: Գրատախտակին գրեք այն ճշմարտությունները, որոնք ուսանողները բացահայտում են:

Զարգացնելով Քրիստոսանման հատկություններ և փնտրելով հայտնություն՝ կօգնենք մեզ պատրաստվել ամուսնության

Յուրաքանչյուր ուսանողի տրամադրեք սցենարի 2-րդ մասը: Հանձնարարեք նրանց կարդալ այն և իրենց խմբերում քննարկել հաջորդող հարցերը:

Սցենար, մաս 2

Հավերժական ընտանիք. Ուսուցչի նյութ. Դաս 11

Հավերժական ամուսնությանը վերաբերող ինստիտուտի դասից հետո Լուիսն ու Էմման հուշում են ստանում՝ կատարելու որոշ փոփոխություններ և ավելի շատ վստահելու Տիրոջը: Երբ հաջորդ շաբաթ Լուիսը գալիս է ինստիտուտի դասի, նա նստում է Էմմայի կողքին և ներկայանում: Ժամանակի ընթացքում նրանք դառնում են լավ ընկերներ: Նրանք ծրագրում են բազմաթիվ միջոցառումներ, որոնք թույլ են տալիս միասին ժամանակ անցկացնել և ավելի լավ ծանոթանալ միմյանց: Ժամանակի ընթացքում նրանց մեջ ուժեղ զգացմունքներ են առաջանում միմյանց հանդեպ:

Սակայն Էմման որոշակի մտահոգություններ ունի: Նա ունի այն հատկությունների ցանկը, որ ցանկանում է տեսնել ապագա ամուսնու մեջ: Լուիսն ունի այս հատկությունների մեծ մասը, բայց ոչ բոլորը:

Լուիսը նույնպես սկսում է նյարդայնանալ: Նա սիրում է Էմմային, բայց տեսնելով, թե ինչպես է քայքայվում իր ծնողների ամուսնությունը, վախենում է սխալվել ընտրության հարցում: Նա ուշադիր քննարկում է այն ամենը, ինչ իմացել է Էմմայի մասին՝ իրենց համատեղ զրույցներից և փորձառություններից: Նա զգում է, որ իրենց նպատակները համընկնում են և ցանկանում է խնդրել Էմմային ամուսնանալ իր հետ, բայց դեռ շատ անհայտ գործոններ կան: Լուիսն աղոթում է որևէ նշանի համար, որ Էմմայի հարցում իր ընտրությունը ճիշտ է: Առայժմ ոչինչ տեղի չի ունեցել:

• Անդրադարձեք նախապատրաստական նյութի բաժին 2-ից ձեր սովորածին: Ի՞նչը կարող է օգնել Էմմային այն մոտեցման հարցում, թե նա ինչ է փնտրում հավանական ամուսնու մեջ: Ի՞նչ խնդիրների կարող ենք բախվել, եթե հավանական զուգընկերոջից մեր ակնկալիքները շատ ցածր են կամ շատ բարձր:

• Ի՞նչը կարող է օգնել Լուիսին հասկանալ իր վախերը: Հայտնություն ստանալու մասին ի՞նչը կարող է օգտակար լինել նրա համար: (Կարող եք կրկնել նախապատրաստական նյութի բաժին 3-ը:)

• Ի՞նչ գործողություններ կամ փորձառություններ կարող են օգնել երկու մարդկանց՝ ընկերություն հաստատել և ավելին իմանալ միմյանց հատկությունների, անձի և արժեքների մասին: Որո՞նք են Փրկիչի մեկ կամ երկու հատկությունները, որոնք դուք հույս ունեք զարգացնել՝ պատրաստվելով ամուսնությանը կամ շարունակելով ձեր ամուսնությունը:

© 2022 by Intellectual Reserve, Inc. All rights reserved․

Սցենար, մաս 2

ուսուցչի օժանդակ նյութ

Բավարար ժամանակից հետո հրավիրեք մի քանի ուսանողների կիսվել, թե ինչ են սովորել կամ զգացել իրենց քննարկումների ժամանակ։

Կրկնեք ցանկացած նյութ նախապատրաստական նյութի բաժին 2 և 3-ից, որը կօգնի ուսանողներին: Դուք կարող եք հատկապես առանձնացնել հետևյալ ճշմարտությունները. Մենք ամուսնանում ենք ներուժի, այլ ոչ թե կատարելության հետ: Եթե ցանկանում եք, որ հավերժական զուգընկերն ունենա որոշակի հոգևոր որակներ, ապա դուք պետք է ձգտեք զարգացնել այդ հոգևոր որակները ձեր մեջ։ Եթե մեր որոշումներում փնտրենք Տիրոջ առաջնորդությունը, Նա խաղաղություն կխոսի մեր մտքին, և մենք կզգանք, թե երբ են մեր ընտրությունները ճիշտ:

Եթե ձեր դասարանում ամուսնացած ուսանողներ կան, կարող եք հրավիրել մեկին կամ երկուսին իրենց փորձով կիսվել այս ճշմարտություններից որևէ մեկի մասին: Եթե դուք ամուսնացած եք, կիսվեք նաև ձեր փորձով: Վկայեք, որ Տերը ցանկանում է օգնել ուսանողներին հավերժական զուգընկեր գտնելու իրենց ճանապարհին:

Դուք կարող եք հարցնել ուսանողներին՝ արդյոք հարցեր ունեն այսօրվա դասի վերաբերյալ: Եթե այո, որոշ ժամանակ հատկացրեք և դասարանով քննարկեք նրանց հարցերը: Այնուհետև դասի ավարտին մի քանի րոպե տվեք ուսանողներին, որպեսզի գրանցեն այն տպավորությունները, որոնք կարող էին զգալ սեփական իրավիճակի վերաբերյալ: Հրավիրեք նրանց որոշել, թե ինչպես կարող են շարունակել հավատք գործադրել Տիրոջ հանդեպ՝ ծանոթություններ հաստատելու իրենց ջանքերում կամ ինչ պետք է անեն՝ Նրա հանդեպ ավելի մեծ հավատք գործադրելու համար:

Հաջորդ անգամ

Հրավիրեք ուսանողներին պատրաստվել հաջորդ դասին՝ ուսումնասիրելով նախապատրաստական նյութը և հարցնել երջանիկ զույգին, թե նրանք ինչպես են պահպանում և զարգացնում իրենց ամուսնությունը և ամուր պահում իրենց հարաբերությունները: