Lesona 28: Faalauiloaina o le Aiga o se Iunite Faavae o Malo
Lesona 28
Faalauiloaina o le Aiga o se Iunite Faavae o Malo
Folasaga
Ua tautino mai e perofeta o aso nei: “Matou te valaau atu i tamalii ma failauga ma taitai o malo i soo se mea ina ia faalauiloa atu na fua faatatau ua fuafuaina ina ia faatumauina ma faamalosia le aiga o se iunite faavae o malo” (“O le Aiga: O se Folafolaga i le Lalolagi,” Ensign po o le Liahona, Nov. 2010, 129). O lenei lesona o le a fesoasoani i tamaiti aoga e malamalama ai pe faapefea ona latou mafai ona mulimuli ma puipuia lenei fautuaga faaperofeta.
“Transcript of News Conference on Religious Freedom and Nondiscrimination” (Jan. 27, 2015), mormonnewsroom.org/article/publicstatement-on-religious-freedom-and-nondiscrimination.
O lo tatou tiute e puipuia le aoaoga faavae ma faavae mama aiai o le aiga
Saunia tamaiti aoga mo lenei lesona i le tauina atu ia i latou faapea e taulai atu le lesona i o tatou tiutetauave e puipuia le aiga. Faasoa atu le saunoaga lenei a Elder Bruce D. Porter o le Fitugafulu:
Ata
Elder Bruce D. Porter
“O le Ekalesia o se faalapotopotoga laitiiti e faatusatusa atu i le salafa o le lalolagi. Ae ui i lea, o le Au Paia o Aso e Gata Ai o ni tagata e le tatau ona manatu mama i le mana o a tatou faataitaiga, faapea foi lo tatou malosi e faatauanau ai manatu o tagata lautele, suia amioga leaga, po o le valaaulia o agaga o loo sailiili e ulufale i le faitotoa ma savavali i le auala ua filifilia e le Alii. E tatau ona tatou tuuina atu la tatou taumafaiga sili, i le galulue faatasi ma tagata ma faalapotopotoga tatou te tutusa, e puipuia le aiga ma siitia se leo o le lapataiga ma se valaaulia i le lalolagi” (“Defending the Family in a Troubled World,” Ensign, June 2011, 18).
O a ni ou manatu e uiga i le tiutetauave o le Au Paia o Aso e Gata Ai e puipuia le aiga i le lalolagi i aso nei?
Tau atu i tamaiti aoga i ni taimi eseese, na maua e sa Nifae o latou saolotoga faalelotu ma tulaga faatauaina o aiga ua i se tulaga lamatia ona o sa Lamana. I le suesueina o o latou aafiaga, e mafai ai ona tatou aoaoina mataupu faavae na e mafai ona faatusatusa i o tatou aso. (O le faatusatusaina o tusitusiga paia ia i tatou lava o se tomai tau suesuega faaletusitusiga paia e mafai ona e faamamafaina i lenei lesona.) Faamatala atu faapea o le tasi aafiaga o sa Nifae o loo i le Alema 43.
Tusi le Alema 43:9,30,45,48 i le laupapa, ma fai i tamaiti aoga e suesue mo upu ma fuaitau na e fesoasoani ia i tatou e malamalama ai i le taua o le puipuia o tulaga faatauaina o aiga ma saolotoga faalelotu i le lalolagi o aso nei. Fautua atu i tamaiti aoga ina ia latou faailogaina upu ma fuaitau nei.
O a upu ma fuaitau e faaalia ai le taua o le puipuia o tulaga faatauaina o o tatou aiga ma saolotoga faalelotu? O le a le mataupu faavae na e aoaoina e uiga i le taua o le puipuia o tulaga faatauaina o o tatou aiga ma saolotoga faalelotu? (O tali e tatau ona aofia ai le mataupu faavae lenei: Ua ia i tatou se tiute paia o le puipuia ma faalauiloa atu tulaga faatauaina ma saolotoga faalelotu o o tatou aiga.)
Aisea i lou manatu e taua ai mo tagata o le Ekalesia ona faalauiloa atu ma puipuia le aiga i o latou alalafaga?
E mafai faapefea ona faalauiloa atu ma puipuia le aiga e faaaoga ai fesootaiga faaagafesootai.
Faaali atu le saunoaga lenei mai ia Elder L. Tom Perry(1922-2015) o le Korama a Aposetolo e Toasefululua:
Ata
Elder L. Tom Perry
“Tatou te mananao ia lagonaina lo tatou leo e faasagatau atu i sitaili eseese taufaasese o le olaga ia ua taumafai e suia le faalapotopotoga o le aiga lea na faavaeina e le Atua Lava Ia. Tatou te mananao foi ia lagonaina lo tatou leo i le lagolagoina o le olioli ma le faamalieina lea e aumai e aiga ua masani ai. E tatau ona tatou faaauau pea ona faailoa atu o tatou manatu i le lalolagi atoa i le tautino atu lea o le mafuaaga e taua tele ai le faaipoipoga ma le aiga, le mafuaaga e matuai afaina moni ai lava le faaipoipoga ma le aiga, ma le mafuaaga o le a taua ai pea” (“Aisea e Taua ai le Faaipoipoga ma le Aiga—I Soo se Mea i le Lalolagi,” Ensign po o le Liahona, Me 2015, 42).
E tusa ai ma Elder Perry, o a mea e tatau ona tatou tautino atu e uiga i le aiga?
O a ni mea ua e matauina ua fai e isi e tutu atu ai ma lagolagoina le taua o le aiga po o le puipuia agai i osofaiga i le aiga? (Faasino atu o le puipuia o le aiga e aofia ai le tausia o se aiga malosi faapea foi le puipuia o le aiga i nofoaga faitele pe a manaomia.)
Faasoa atu le saunoaga lenei a Elder Neil L. Andersen o le Korama a Aposetolo e Toasefululua:
Ata
Elder Neil L. Andersen
“Talu ai nei, sa ou talanoa ai i se Lora e nofo i le Iunaite Setete. Ou te sii mai i lana imeli:
“‘O le tausaga ua mavae atu nei sa amata ai ona tusia e nisi o au uo i luga o le Facebook o latou manatu e uiga i le faaipoipoga. Sa toatele na lagolagoina le faaipoipoga o le itupa e tasi, ma e feoloolo nai talavou o le Ekalesia sa faailoaina lo latou “fiafia” i le tusiga. E leai sa’u faamatalaga na faia.
“‘Sa ou filifili loa e tau atu lou talitonuga i le faaipoipoga ua masani ai i se ala magafagafa lelei.
“‘I lo’u ata i lou talaaga otooto, sa ou faaopoopo i ai le faamatalaga, “Ou te talitonu i le faaipoipoga i le va o se alii ma se tamaitai.” Sa lei pine ae amata ona ou mauaina ni feau. “E te manatu faapito.” “E te tusitusilima.” Sa faatusaina au e se tasi o se pule o pologa. Ma sa ou mauaina lenei tusiga mai se uo lelei tele o ia o se tagata malosi o le Ekalesia: “E ao ona faafou ou manatu. O loo suia lava ia mea ma ua tatau foi ona e sui.”
“‘Ou te le i toe finau i ai,’ o lana tala lea, ‘ae ou te le i aveesea lau faamatalaga mai luga o la’u itulau.’
“Sa ia faaiuina e faapea: ‘O nisi taimi, e pei ona saunoa mai Peresitene Monson, “E tatau ona e tu na o oe.” E faamoemoe i le avea ai o ni talavou, o le a tatou tutu faatasi i le faamaoni i le Atua ma i aoaoga a Ana perofeta soifua’” (“Asiosio Faaleagaga,” Ensign po o le Liahona, Me 2014, 19–20).
O a ni ou aafiaga i le faalauiloaina atu ma le puipuia o le aiga?
O le a se taunuuga o au upu ma faatinoga na i ai i nisi?
Molimau atu faapea e mafai ona tatou maua se uunaiga lelei i o tatou alalafaga ma faalautele ai le faamoemoega o le fuafuaga a lo tatou Tama Faalelagi ao tatou faalauiloa atu ma puipuia mea uma e faamalosia ai aiga.
O le puipuia o le aiga faatasi ma le fesoasoani a le Atua ma le faaaloalo i isi
Tau atu i tamaiti aoga o mataupu 46 ma le 48 o le Alema o loo taua ai faapea na taufaamatau e sa Lamana ia sa Nifae. Vaelua le vasega. Fai i le afa o le vasega e suesue le Alema 46:10–13, 16, ma le isi afa e suesue le Alema 48:7–13. Fai i tamaiti aoga e faailoa mai pe faapefea ona tatou ono mulimuli i faataitaiga a le Taitaiau o Moronae i auala lelei e lagolago ai taumafaiga e faatumau ma faamalosia ai le aiga. A maea se taimi talafeagai, fesoasoani i tamaiti aoga e faatusatusa nei fuaitau i o tatou aso i le fai atu o fesili nei:
E mafai faapefea e taumafaiga a Amalekia ma e na mulimuli ia te ia ona faatusatusa i taumafaiga a i latou o loo osofaia le aiga i aso nei?
O le a se mea tatou te aoaoina mai faatinoga a le Taitaiau o Moronae? (Fesoasoani i tamaiti aoga ia malamalama i le mataupu faavae lenei: Pe a tatou sailia le fesoasoani a le Atua ma tauivi e faaaoga uma a tatou lava punaoa, o le a tatou mauaina le poto ma le malosi e faamalosia ma puipuia ai o tatou aiga, la tatou tapuaiga, ma o tatou saolotoga.
O a nisi o auala lelei e mafai ona tatou faalauiloa atu fua faatatau e faamalosia ma puipuia ai aiga?
Mafaufau e faaaoga saunoaga nei a Gordon B. Hinckley (1910–2008) ma Elder Dallin H. Oaks o le Korama a Aposetolo e Toasefululua e suitulaga i le talanoaina o le fesili na muamua atu:
Ata
Peresitene Gordon B. Hinckley
“Ia tatou aafia i faamoemoega lelei i afioaga. Atonu e i ai tulaga e aafia ai tulaga ogaoga o amioga lelei, ae e le tatau ona tatou fetuunaia mataupu o le amioga lelei. Ae o ni tulaga faapena e mafai ona tatou faatuiese ma le faaaloalo ae aua le faia ma le inoino. E mafai ona tatou faailoa atu le faamaoni o i latou o o latou tulaga e le mafai ona tatou taliaina. E mafai ona tatou talanoa atu e uiga i mataupu faavae ae le o uiga o tagata”Teachings of Gordon B. Hinckley [1997], 131).
Ata
Elder Dallin H. Oaks
“A faalauiloa atu e tagata lotu o latou tulaga i tulaga faaupufai, e tatau ona latou onosai i taimi uma e uiga i manatu ma tulaga o i latou o e e le tutusa o tatou talitonuga. E tatau i tagata lotu ona tautatala ma le alofa ma faaali atu le onosai, agaga malamalama, ma le agalelei agai i o latou fili. Ua poloaiina tagata lotu Kerisiano ina ia alolofa atu i o latou tuaoi (tagai Luka 10:27) ma faamagalo atu (tagai Mataio18:21–35). E tatau foi ona latou manatua aoaoga a le Faaola e “faamanuia atu i e ua fetuu mai ia te i [latou], ia agalelei atu i e ua inoino mai ia te i [latou], ia tatalo foi mo e ua tuuaifua mai ma faasaua mai ia te i [latou]” (Mataio 5:44)” (Dallin H. Oaks, “Faapaleniina o le Upumoni ma le Faapalepale ,” Liahona, Fep. 2013, 30–31).
E faapefea i lou manatu ona e faataitaia mataupu faavae na aoaoina mai e Peresitene Hinckley ma Elder Oaks?
Faamamafa atu le mataupu faavae lenei: Ao tatou faalauiloa atu fua tatau e puipuia ma faamalosia le aiga, e tatau ona tatou faaalia le faaaloalo i isi ma le faapalepale i o latou manatu.
O le faaluiloaina atu o fua tatau na e faamalosia ai le aiga
Faaali atu le saunoaga lenei, ma fai i se tamaitiiti aoga e faitau leotele:
“Matou te valaau atu i tamalii ma failauga ma taitai o malo i soo se mea ina ia faalauiloa atu na fua faatatau ua fuafuaina ina ia faatumauina ma faamalosia le aiga o se iunite faavae o malo” (“O le Aiga: O se Folafolaga i le Lalolagi,” Ensign po o le Liahona, Nov. 2010, 129).
Tau atu i tamaiti aoga faapea ia Ianuari 2015, na faia ai se fonotaga faapitoa a taitai o Ekalesia lea na latou valaaulia ai taitai o malo ina ia pasia ni tulafono na o le a puipuia ai saolotoga faalelotu ma puipuia ai le paia o le aiga. Faamatala atu faapea e ui lava o taitai o Ekalesia na faapitoa lava le talanoaina o le puipuiga o saolotoga faalelotu i lenei fuaitau, o a latou upu na faatatau foi i le puipuia o tulaga faatauaina o le aiga. E tele saolotoga faalelotu e faatatau tonu lava i le aiga, e pei o le paia o le faaipoipoga.
Faasoa atu i tamaiti aoga le saunoaga lenei a Elder Dallin H. Oaks o se aotelega o mea na tuuina atu i lena fonotaga faapitoa:
Ata
Elder Dallin H. Oaks
“Ua faailoa atu e Le Ekalesia a Iesu Keriso o le Au Paia o Aso e Gata Ai mataupu faavae nei e faalagolago i aoaoga a Iesu Keriso, ma le faiga tutusa o tagata uma, e aofia ai tagata o le faatuatua:
“1. Matou te tuuina atu i tagata uma le aia tatau na tuuina mai e le Atua ma le Faaletulafono e ola ai i lo latou faatuatuaga e tusa ma o latou lava loto fuatiaifo, e aunoa ma le afaina o le soifua maloloina po o le saogalemu o isi.
“2. Matou te faalauiloa atu faapea o lena lava saolotoga o le lotofuatiaifo e tatau ona faatatau i alii ma tamaitai i soo se mea e mulimuli i le faatuatuaga faalelotu o la latou lava filifiliga, pe o le leai lava foi pe a latou filifilia.
“3. Tatou te talitonu o tulafono e tatau ona fuafuaina ia ausia ai se paleni i le puipuia o saolotoga o tagata uma ao faaaloalogia i latou e ese tulaga faatonuina.
“4. Tatou te teena sauaga ma soo se taui ma sui, e aofia ai sauaga o le faailoga lanu, aganuu, talitonuga faalelotu, tulaga tautupe po o eseesega o itupa po o tulaga taufeusuaiga” (Dallin H. Oaks, “Transcript of News Conference on Religious Freedom and Nondiscrimination” [Jan. 27, 2015], mormonnewsroom.org/article/publicstatement-on-religious-freedom-and-nondiscrimination).
O a mea na e aoaoina mai lenei fuaitau e mafai ona fesoasoani ia te oe e siitia fua tatau e faamalosia ai le aiga o se iunite faavae o malo? (I le avea ai o se vaega o lenei talanoaga, faamamafa atu faapea o le tausia o fanau i ala a le Alii, lagolagoina o aiga, faalauteleina o valaauga i le Ekalesia, ma le faamalolosia o o tatou afioaga o taumafaiga uma ia e faalauiloa atu ai le aiga.)
Valaaulia tamaiti aoga e mafaufau i mea e mafai ona latou faia e faalauiloa atu ai fua tatau na e faamalosia ma puipuia ai le aiga.