I le muai olaga sa tatou “talia le fuafuaga a le [Tama Faalelagi] e mafai ai e Lana fanau ona maua se tino faaletino ma maua le tomai faalelalolagi latou te maua ai le atoatoaga” (“O Le Aiga: O se Folafolaga i le Lalolagi,” Ensign po o le Liahona, Nov. 2010, 129). O o tatou tino faitino o se faamanuiaga sili; e ui i lea, e mafai ona aafia i latou i le tele o faaosoosoga a Satani. E ala mai i le Togiola a Iesu Keriso, e mafai ona tatou manumalo i nei faaosoosoga ma toe foi atu i lo tatou Tama Faalelagi.
Faitauga Faaopoopo
David A. Bednar, “O Mea e Pei Ona I Ai Lava,” Liahona, Iuni 2010, 16–25.
O lo tatou aafiaga i le olaga faitino e taua mo le ola e faavavau
Faaali atu le saunoaga lenei a Elder David A. Bednar o le Korama a Aposetolo e Toasefululua, ma valaaulia se tamaitiiti aoga e faitau leotele:
Ata
Elder David A. Bednar
“Pe ua tatou mafaufau moni ea pe aisea e taua tele ai le mauaina o se tino faaletino? … Pe ua tatou malamalama moni ea pe aisea e matuai totonugalemu ai le tino i le fuafuaga o le fiafia a le Tama? Pe o tatou taulotoina soo ma faia o se tiute ae tatou te toilalo e iloa lona taua moni? Ou te manao ia i tatou e matuai suesue loloto atili i lenei fesili taua faavavau e uiga i le ala e taua tele ai se tino. E iu lava ina aafia mea uma tatou te faia i le tali” (“Ye Are the Temple of God,” Ensign, Set. 2001, 14).
E tusa ai ma le saunoaga a Elder Bednar, aisea e tatau ai ona tatou saili ia malamalama pe aisea e taua ai o tatou tino faaletino?
Valaaulia tamaiti aoga e tusi se tali i le fesili lenei: Ao faagasolo le lesona, uunaia i latou e tusi nisi mafaufauga ma manatu faaopoopo.
Aisea e matuai taua ai o tatou tino faaletino i le fuafuaga o le fiafia a le Tama Faalelagi?
Valaaulia ni tamaiti aoga e faitau le leoa le parakalafa lona tolu “O Le Aiga: O Se Folafolaga i le Lalolagi” ma vaavaai mo le fuaitau lena e faamanino mai ai pe aisea e matuai manaomia ai se tino faaletino i lo tatou alualu i luma e faavavau.
Valaaulia se tamaitiiti aoga e faitau leotele le faamatalaga lea mai ia Elder David A. Bednar. Fai i tagata o le vasega e faalogo pe aisea e matuai taua ai o tatou tino i le fuafuaga a le Tama Faalelagi. Mafaufau e tuuina atu i tamaiti aoga taitasi se kopi o lenei fuaitau ae lei faitauina.
Ata
Elder David A. Bednar
“O o tatou tino faaletino ua mafai ai ona tatou maua le faalauteleina, loloto, ma se malosi o aafiaga lea e le mafai ona maua i o tatou tofi i le muai olaga. Sa aoao mai Peresitene Boyd K. Packer, le Peresitene o le Korama a Aposetolo e Toasefululua, “Ua tuufaatasia lo tatou agaga ma lo tatou tino i se auala ua avea ai lo tatou tino ma se meafaigaluega o lo tatou mafaufau ma le faavae o lo tatou tagata” (“The Instrument of Your Mind and the Foundation of Your Character” Faigalotu a le Church Educational System, Fep. 2, 2003, 2; speeches.byu.edu]. O le mea lea, o a tatou sootaga ma isi tagata, lo tatou malosi e iloa ai ma faatino e tusa ai ma le upumoni, ma lo tatou tomai e usitai ai i mataupu faavae ma sauniga o le talalelei a Iesu Keriso e faateleina e ala i o tatou tino faaletino. I le potuaoga o le olaga faitino, tatou te lagonaina ai le agamalu, alofa, agalelei, fiafia, faanoanoa, lē fiafia, tiga, e oo foi i luitau o le tapulaa o le malosi faaletino i auala e saunia ai i tatou mo le faavavau. I se faaupuga faigofie, e i ai lesona e ao ona tatou aoaoina ma aafiaga e tatau ona tatou maua, e pei ona faamatala mai i tusitusiga paia, “e tusa ma la le tino” (1 Nifae 19:6; Alema 7:12–13)” (“O Mea e Pei Ona I ai Lava,”Liahona, Iuni 2010, 22).
O a aoaoga a Elder Bednar e uiga i le ala e taua ai se tino faaletino mo lo tatou alualu i luma faavavau? (Atonu o tali e eseese, faamamafa atu le upumoni lenei:Faatasi ai ma se tino faaletino, tatou te aafia i ni tulaga o le olaga faitino e saunia ai i tatou mo le faavavau.
O a ni auala e avea ai o tatou tino “ma se meafaigaluega o lo tatou mafaufau ma le faavae o lo tatou tagata”?
E faapefea e “lo tatou mafaia ona usiusitai i mataupu faavae ma sauniga o le talalelei … ona faateleina e ala i o tatou tino faaletino”? (O tali e mafai ona aofia ai mea nei: O se tino e mafai ai e i tatou ona usiusitai i le poloaiga e fanafanau ma uluola i le lalolagi. E faatagaina e le tino i tatou e aafia i le olioli o le ola ai i ni aiga, lea tatou te aoao ai ma faatino mataupu faavae o le talalelei i le aiga—mo se faataitaiga, tatou te aoao e pulea o tatou le fiafia i totonu o o tatou aiga.)
Valaaulia ni tamaiti aoga e feauauai i le faitauina leotele mai o le Aperaamo 3:25 ma le 2 Nifae 2:27–29 ao vaavaai le vasega pe faapefea e nei fuaitau ona galulue faatasi e fesoasoani ia i tatou ia malamalama i faamoemoega o le mauaina o se tino.
E ui lava o le mauaina o se tino o se faamanuiaga sili, e faapefea ona avea le mauaina o se tino ma se vaega o la tatou suega i le olaga faitino? (O le tele o faaosoosoga a Satani e faateleina lava ona e i ai o tatou tino.)
E faapefea e le filifiliga “e tusa ma la le tino” ona tuuina atu i le tiapolo “le mana e faatagataotaua [ai]”?
Valaaulia se tamaitiiti aoga e faitau leotele le Mose 6:53–54, ma fai i le vasega e vaavaai ona faamatala mai lea o mea ua aoao mai e nei fuaiupu e uiga i lo tatou tulaga i le taimi o lo tatou fanau mai. Matau o le upu “mama” i lenei tusiga o lona uiga o le saoloto mai aafiaga o le solitulafono a Atamu.
Ona fai lea i le tamaitiiti aoga e faitau le Mose 6:49 ma le 55, ma fai atu i tagata o le vasega:
O a mea ua aoao mai e nei fuaiupu e uiga i le ala e aafia ai i tatou i le Pau o Atamu ma Eva i o tatou olaga faitino? (Afai tatou te gauai atu i faaosoosoga a Satani tatou te tofo i taunuuga oona o a tatou filifiliga ia e faaletagata, faalelalolagi, ma faaletiapolo. E mafai ona e vaai i le Eteru 3:2, lea e aoao mai faapea “ona o le pau o o matou natura ua matou leaga ai pea e le aunoa.”)
Fai i se tamaitiiti aoga e faitau leotele ni nai laina muamua o le Mosaea 3:19. Tusi fesili nei i luga o le laupapa:
O le a le tagata o le natura?
Aisea e avea ai le tagata o le natura o se fili i le Atua?
Tuu atu i tamaiti aoga ni nai minute e suesue ai i tali i nei fesili ma faalautele lo latou malamalama i le faaupuga “tagata o le natura” e ala i le suesue i vaefaamatalaga mo le fuaiupu 19 (ae maise lava le vaefaamatalaga a ma isi foi fuaitau e faatatau i vaefaamatalaga). A uma se taimi talafeagai, talanoaina mea na maua e tamaiti aoga. Faasino atu faapea o lenei faaupuga e faamatalaina ai se tulaga e aoga uma i alii ma tamaitai.
Afai e maua e se tagata uiga o se tagata o le natura, o le a le aafiaga e ono mafai ona oo i le faaipoipoga po o se aiga?
Fai i le tamaitiiti aoga lava lea e faauma le faitauina o le Mosaea 3:19, ma valaaulia le vasega e vaavaai mo se mataupu faavae e uiga i le ala e mafai ai ona tatou manumalo i le tagata o le natura. (Ao tali mai tamaiti aoga, tusi lenei mataupu faavae i le laupapa: E ala atu i le taliaina o le Togiola a Iesu Keriso ma le gauai atu i uunaiga a le Agaga Paia, e mafai ona tatou tuuese le tagata o le natura ma avea ma se tagata paia.
Faamatala atu i lenei tusiga, o le gauai o lona uiga o le usitai po o le lolo atu i uunaiga a le Agaga Paia.
E faapefea e se tagata ona iloa le mea ua uunaia ai o ia e le Agaga Paia e fai?
E mafai ona e faasoa mai se aafiaga e le patino tele lea na uunaia ai oe e le Agaga Paia e tuuese le tagata o le natura?
Molimau atu faapea ao tatou gauai atu i uunaiga a le Agaga Paia, tatou te maua le mana o le Togiola.
Valaaulia se tamaitiiti aoga e faitau leotele le Mosaea 16:3–6 ao mulimuli i ai le vasega, ma vaavaai mo le mea o le a fesoasoani ia i tatou e manumalo ai i aafiaga o le Pau i o tatou olaga.
O a ni sauniuniga i le fuafuaga a le Tama Faalelagi e mafai ai ona tatou manumalo i lo tatou natura pau? (Tusi le aoaoga faavae lenei i le laupapa: E ala i le Togiola a Iesu Keriso, e mafai ona faaolaina i tatou mai lo tatou tulaga leiloloa ma le pauu.)
Faaali atu le saunoaga lenei a David A. Bednar, ma fai i se tamaitiiti aoga e faitau leotele:
Ata
Elder David A. Bednar
“O naunauga uma, manaoga, faamoemoega, ma moomooga o le tagata natura, e mafai ona faatoilalo e le ma e ala i le Togiola a Iesu Keriso. Ua tatou i ai iinei i le lalolagi e atiina ae uiga auaumama faaleatua ma pulea lelei tuinanau uma o le tino” (“Matou te Talitonu i le Nofo Mama,” Ensign po o le Liahona, Me 2013, 43).
Faamatala i tamaiti aoga afai tatou te maua le faatuatua i le Togiola, tatou te maua le alofa tunoa o Iesu Keriso, na mafaia ona o Lana taulaga togiola. O le manatu autu lava o le upu [alofa tunoa] o le “auala paia o le fesoasoani po o le malosi, ua aumaia e ala mai i le alofa mutimutivale ma le alofa naua o Iesu Keriso.” O se “mana galue” lea e fesoasoani ia i tatou ia salamo ma ia atiina ae ni uiga e le mafai ona tatou atiina ae e i tatou lava ia (tagai Bible Dictionary, “Grace”). Ina ia fesoasoani i tamaiti aoga ia iloa uiga faaKeriso e tatau ona tatou atiina ae, fai ia i latou e iloilo le lisi o uiga ia e taitaia i tatou ia avea ma ni tagata paia, e pei ona maua i le Mosaea 3:19.
Na faapefea ona fesoasoani le Faaola ia te oe e atiina ae se tasi o uiga ua lisiina i le Mosaea 3:19?
Na faapefea ona e vaaia tagata ua mauaina se tasi po o le sili atu o nei uiga ua avea ma faamanuiaga i o latou aiga?
E mafai faapefea ona atiina ae se tasi po o le sili atu o nei uiga e ala i le mana galue o le alofa tunoa o le Faaola e fesoasoani ia te oe ia avea o se tane po o se ava, tama po o se tina e sili atu?
Faamatala i tamaiti aoga ua tuua i tatou taitoatasi ma se fesili taua e tali o se taunuuga o le lesona o le aso. Faaali atu le saunoaga lenei a Elder David A. Bednar ma fai i tamaiti aoga e faitau le leoa:
Ata
Elder David A. Bednar
“O le uiga moni lava la o le suega i le olaga nei, e mafai ona aoteleina i le fesili lea: Pe o le a ou tali atu ea i faamoemoega o le tagata natura, pe o le a ou gauai atu i uunaiga a le Agaga Paia ma tuu ese le tagata natura ae avea ma tagata paia e ala i le Togiola a Keriso le Alii (tagai Mosaea 3:19)? O le suega lena” “Matou te Talitonu i le Nofo Mama,” } 43).
Tuu atu i tamaiti aoga ni nai minute e tusi ai se tali i le fesili a Elder Bednar. Valaaulia i latou e mafaufau loloto i uiga faaKeriso o loo maua i le Mosaea 3:19 ma fai se fuafuaga e amata ai ona atiina ae se tasi o na uiga ia sili atu le atoatoa.