Lesona 17: O Le Poloaiga ia Fanafanau ma Uluuluola i le Lalolagi
Lesona 17
O Le Poloaiga ia Fanafanau ma Uluuluola i le Lalolagi
Folasaga
O le poloaiga ia fanafanau ma uluuluola i le lalolagi o se vaega taua o le fuafuaga e faavavau a le Tama Faalelagi ma o loo tumau pea le aoga i le aso. O lenei lesona o le a fesoasoani i tamaiti aoga ia iloa ai e mafai ona taitaiina i latou ia latou filifiliga e uiga i le aumaia o fanau i le lalolagi ao latou suesue i upu a perofeta soifua ma saili le taitaiga a le Tama Faalelagi e ala i le tatalo.
Faitauga Faaopoopo
Neil L. Andersen, “Tamaiti,” Ensign po o le Liahona, Nov. 2011, 28–31.
“O le uluai poloaiga na tuuina e le Atua ia Atamu ma Eva, e faatatau i lo la agavaa mo le tulaga faamātua, o se tane ma se ava. Matou te ta’utino atu o le poloaiga a le Atua i Lana fanau ia fanafanau ma uluuluola i le lalolagi, ua faamalosia ma faatumauina.”
Amata le vasega i le fesili atu:
O a ni ou manatu ao e mafaufau i nei fuaiupu e lua?
Valaaulia tamaiti aoga e suesue le Kenese 1:27–28, Kenese 9:1, ma le Kenese 35:11, ma vaavaai mo suafa o tagata na poloaiina e le Atua e fanafanau ma uluuluola i le lalolagi. E mafai ona e uunaia tamaiti aoga e fesootai nei mau ia latou tusitusiga paia, ma faia ai se filifili o mau. Ia mautinoa ua malamalama tamaiti aoga e faapea o lenei poloaiga na tuuina mai i tisipenisione uma lava o le talalelei.
Faaali atu le saunoaga lenei a Elder Neil L. Andersen o le Korama a Aposetolo e Toasefululua, ma valaaulia se tamaitiiti aoga e faitau leotele:
Ata
Elder Neil L. Andersen
“O se faamanuiaga maoae mo se tane ma se ava le fanauina o ni fanau ina ia maua ni tino faaletino o nei fanau agaga a le Atua. Tatou te talitonu i aiga ma e tatou te talitonu foi i le fanau.
“Pe a fanau mai se tamaitiiti i se tane ma se ava, ua la faataunuuina se vaega o le fuafuaga a lo tatou Tama Faalelagi i le aumaia o fanau i le lalolagi” (“Tamaiti,” Ensign po o le Liahona, Nov. 2011, 28).
Faamamafa atu le fuaiupu mulimuli o lenei saunoaga i le tuuina atu o lenei mataupu faavae: Pe a fanauina e se tane ma se ava se tamaitiiti i le lalolagi, ua la faataunuuina le vaega o le fuafuaga o le fiafia a le Tama Faalelagi. Faasino i fuaiupu i le laupapa ma fesili atu:
Aisea e te manatu ai o le Alii, e ala mai i Ana perofeta o aso nei, ua tuuina mai pea le poloaiga ia “fanafanau ma uluuluola i le lalolagi” i o tatou taimi nei? (O se faataitaiga, e mafai ona e tau atu i tamaiti aoga faapea talu mai le 1960, o le aofai o pepe e fananau mai i tina ua faaipoipo i le Iunaite Setete o Amerika ua faaitiitia i le 45 pasene.)
O a ni mafuaaga talafeagai ua matele ai ulugalii faaipoipo ina ia laiti ifo fanau e maua? (O tali e ono aofia ai mea e pei o le le lava o tupe, faaumaina o le aoga, ma le faatali sei amata se galuega.)
E faapefea e se malamalama i le fuafuaga a le Atua mo Lana fanau ona fesoasoani i se tane ma se ava o loo filifili po o le a le taimi e maua ai ni fanau ma pe toafia e tatau ona maua?
Faamatala atu faapea o tane ma ava o le a maua faamanuiaga mai le Atua lena o le a mafai ai e i laua ona tausia le poloaiga e fanauina fanau, e oo lava i tulaga faigata. Faasoa atu le aafiaga lenei mai le olaga o Elder James O. Mason o le Fitugafulu, e pei ona faamatalaina e Elder Neil L. Andersen:
Ata
Elder Neil L. Andersen
“Sa i ai se aafiaga o Elder Mason i le taimi faatoa atoa ai ni nai vaiaso talu ona faaipoipo, lea na fesoasoani i lona faatulagaina muamua o ona tiutetauave faaleaiga. Fai mai a ia:
“‘Sa ma fetuutuunai ma Marie, ina ia faaumaina la’u aoga faafomai o le a talafeagai le faigaluega pea o Marie. E ui e le o se mea na ma [mananao] e fai, ae o le a faamulimuli le fai o ni tamaiti. [Ae a o ou matamata i se mekasini a le Ekalesia i le fale o o’u matua] sa ou vaai ai i se tusiga a Elder Spencer W. Kimball, a o avea o ia i lena taimi ma se tasi o le Korama a le Toasefululua, [na faamamafaina ai] tiutetauave e fesootai ma le faaipoipoga. E tusa ai ma manatu o Elder Kimball, o se tasi o tiutetauave paia, o le fanafanau ma uluuluola i le lalolagi. Sa [latalata] le fale o o’u matua i le Ofisa o le Pulega a le Ekalesia. Sa ou savali faanatinati atu loa i le ofisa, ma e tolusefulu minute talu ona ou faitauina lana tusiga, ae ou saofai faafesagai ma Elder Spencer W. Kimball i luga o le kesi.’ (E le faigofie lenei tulaga i le asō.)
“‘Sa ou faamatala atu i ai sa ou manao e avea ma se fomai. E leai se isi auala ae na o le tolopoina o le faia o se ma fanau. Sa faalogologo ma le onosai Elder Kimball ona tali mai lea o ia i se leo lemu, “Uso Mason, mata e finagalo le Alii e te solia se tasi o ana poloaiga taua ina ia avea ai oe ma se fomai? O le fesoasoani mai o le Alli, e mafai ai ona fanau mai se lua fanau ma avea foi [oe] ma se fomai. O fea lou faatuatua?”’
“Sa faamatalaina pea e Elder Mason: “E le’i atoa le tausaga mulimuli ane ae fanau le ma pepe muamua. Sa ma galulue malosi ma Marie ma sa toina mai e le Alii pupuni o le lagi.’ Sa faamanuiaina le au Mason i nisi tamaiti se toalua a o lei faauu o ia mai le aoga faafomai i le fa tausaga mulimuli ane” (}“Tamaiti,” 29).
O le a se mea ua faagaeetia ai oe e uiga i lenei aafiaga?
Faamamafa atu faapea o le faaipoipo o se vaega taua o le tausia o le poloaiga ia fanauina fanau. Faitau lenei fuaitau mai le folafolaga i le aiga:
“E tatau ona fanauina fanau i totonu o feagaiga o le faaipoipoga, ma ia tausia e se tamā ma se tina o ē ua faamamaluina ma le faamaoni atoatoa feagaiga faaleulugalii.”
O a tulaga lelei e maua e fanau pe a latou fananau “i totonu o le feagaiga o le faaipoipoga”?
O a manatu ma lagona ua e maua e uiga i le fesoasoani i le Tama Faalelagi e faataunuu Lana fuafuaga e ala i le aumaia o fanau i lenei lalolagi?
Faaali atu le saunoaga lenei a Elder Neil L. Andersen, ma fai i se tamaitiiti aoga e faitau leotele:
Ata
Elder Neil L. Andersen
“O le taimie fanau ai se tamaitiiti ma pe toa fia le aofai o le fanau o ni faaiuga faalilolilo lea e faia i le va o se tane ma le ava ma le Alii. O ni faaiuga paia ia—o ni faaiuga e ao ona faia ma se tatalo faamaoni ma galue i ai ma le faatuatua tele” (“Tamaiti,” 28; faaopoopo le faatusilima).
O le a le uiga o nei filifiliga e tatau ona “galue i ai ma le faatuatua tele”?
Fai i tamaiti e suesue le 1 Nifae 15:11 ma le Mataupu Faavae ma Feagaiga 29:6 e aoao ai ni mataupu faavae e mafai e tane ma ava ona faaaoga pe a latou sailia tali i fesili e uiga i le taimi e fanau ai se tamaitiiti ma pe toafiale aofai o le fanau.
O a mataupu faavae na e maua i nei fuaitau e mafai ona fesoasoani i tane ma ava e filifili ai le taimi e maua ai fanau ma pe toafia ni tamaiti e ao ona mauaina? (Faamamafa atu le mataupu faavae lenei: Ao faaaogaina e tane ma ava le faatuatua ma saili le Alii i le tatalo, o le a Ia taitaia i laua ia la filifiliga e uiga i le fanauina mai o fanau.)
Aisea i lou manatu e taua ai mo tane ma ava le filifili ma le Atua i nei mataupu?
Faaali atu le saunoaga lenei a Elder Dallin H. Oaks o le Korama a Aposetolo e Toasefululua, ma fai i se tamaitiiti aoga e faitau leotele:
Ata
Elder Dallin H. Oaks
“O le a le aofai o le fanau a se ulugalii e tatau ona fai? Le aofai uma lava e mafai ona la tausia! Ae o le tausia o fanau, ua loloto atu nai lo le na o le avatu ia i latou o le ola. E tatau ona alofaina fanau ma aoaoina, ma tausia, fafaga, faalavalava, malutia, ma amata lelei i le ala e avea ai i latou ma matua lelei” (“O le Fuafuaga Tele o le Fiafia,” Liahona, Ian. 1994, 84).
E faapefea ona mafai e aoaoga a Elder Oaks ona fesoasoani i se ulugalii e filifili pe toafia se fanau e tatau ona maua?
I lenei lesona, ia popole i na tamaiti aoga atonu e le maua le avanoa e avea ai ma ni matua i lenei olaga. O le saunoaga lenei mai ia Elder Neil L. Andersen e mafai ona fesoasoani:
Ata
Elder Neil L. Andersen
“O le fanauina o se fanau e mafai foi ona avea ma se mataupu e nutimomoia ai le loto mo ulugalii amiotonu o e ua faaipoipo ae iloa ifo e le mafai ona maua sa laua lava fanau na la faamoemoeina ma le naunautai pe mo se tane foi ma le ava o e fuafua ia maua se aiga toatele ae e faamanuiaina i se aiga toalaiti.
“Tatou te le o mafai ona faamatalaina i taimi uma ia faigata o lo tatou olaga faaletino. O nisi taimi ua foliga mai ua le talafeagai le olaga—aemaise lava pe afai o lo tatou naunautaiga sili o le faia o le mea tonu lava lea ua poloai mai ai le Alii. I le avea ai ma auauna a le Alii ou te faailoa atu ia te outou o lenei folafolaga e mautinoa: ‘O tagata faamaoni o le ekalesia o e le faatagaina i latou e o latou tulaga ma laasaga e mauaina faamanuiaga o le faaipoipoga e faavavau ma le tulaga faamātua i lenei olaga, o le a mauaina faamanuiaga folafolaina uma i le faavavau, pe afai latou te tausia feagaiga sa latou osia ma le Atua’ [Tusitaulima 2: Taitaiina o le Ekalesia (2010), 1.3.3]” (“Tamaiti,” 30).
Fai atu i se tamaitiiti aoga e faitau leotele le Salamo 127:3.
O le a le uiga “o fanau o le tofi mai le Atua”? (O fanau o se meaalofa mai le Atua.
Faitau le vaega lenei mai le folafolaga i le aiga: “Matou te faamaonia le paia o le ola ma lona taua i le fuafuaga e faavavau a le Atua.” Molimau atu i lenei mataupu faavae: Pe a tatou malamalama o fanau o ni meaalofa mai le Atua, tatou te malamalama atili ai i le paia o o latou olaga. I le tele o vaega o le lalolagi, o le faapau pepe ua taliaina, ma e faitau miliona pepe e faapauu i tausaga taitasi. Ina ia fesoasoani i tamaiti aoga ia malamalama i le aiaiga a le Ekalesia i le faapau pepe, faasoa atu le fuaitau lenei ma fai i tamaiti aoga e faalogo mo tulaga e mafai ai ona tauamiotonuina se faapau pepe:
“O le olaga o le tagata o se meaalofa paia mai le Atua. O le faapau pepe ma le loto i ai mo le faafaigofieina patino pe faaagafesootai e le tusa ai ma le finagalo ma poloaiga a le Atua. … O perofeta o Aso e Gata Ai ua faasaina le faapau pepe, e faatatau i le folafolaga a le Alii, ‘Aua e te … fasioti tagata, pe e te faia soo se mea faapena’ MF&F 59:6). O la latou fautuaga i lena mataupu e manino: O tagata o le Ekalesia a Iesu Keriso o le Au Paia o Aso e Gata Ai e le tatau ona taliaina, pe faia, uunaia, totogia, pe fuafuaina se faapau pepe. O tagata o le Ekalesia o e uunaia se faapau pepe i soo se auala e mafai ona faia se aoaiga faaleEkalesia.
“Ua saunoa mai taitai o le Ekalesia e i ai ni tulaga uiga ese e ono tatau ai le faapa’ū o se pepe, e pei o se maitaga na mafua mai i le matane po o le toe ui i fanau, po o le fai faamalosi, pe afai foi ua tusa ai ma fuafuaga a fomai popoto ua ogaoga le tulaga lamatia o le soifua po o le soifua maloloina o le tina, pe afai foi ua tusa ai ma fuafuaga a fomai popoto o le pepe o loo i ai ni faaletonu ogaoga o le a le mafai ai ona ola pe a fanau mai. Ae o ia lava foi tulaga e le faapea o le a matua tatau ai lava ona faapa’ū se pepe. O i latou ua feagai ma ia ituaiga o tulaga, e tatau ona faatoa manatu lava i le faapa’ū o se pepe pe a maea ona talanoa atu i o latou taitai faale-Ekalesia ma maea ona maua se faamaoniga e ala i le tatalo faatauanau” (Gospel Topics, “Abortion,” lds.org/topics).
I lalo o a ituaiga tulaga e mafai ai ona tauamiotonuina se faapau pepe?
E tusa lava pe ua i ai na tulaga, o le a le fautuaga e tatau ona sailia e i latou o mafaufauina se faapau pepe?
Faasoa atu le fuaitau lenei e fesoasoani i tamaiti aoga ia malamalama ai faapea o le vaetamaina o se isi auala le manatu faapito nai lo le faapau pepe:
“Matou … te faailoa atu la matou lagolago i matua e lei faaipoipo o e tuuina atu a latou fanau mo le vaetamaina i aiga mautu o i ai se tina ma se tama. Matou te faailoa atu foi la matou lagolago i tina ma tama faaipoipo o e vaetamaina nei fanau.
“… O le mauaina o se fesootaiga saogalemu, faafaileleina, ma faaauau pea ma se tama ma se tina e taua i le tulaga manuia o le tamaitiiti. Pe a filifilia se vaetamaina, o matua e lei faaipoipo ua tuuina atu ia latou fanau lenei faamanuiaga sili ona taua. O le vaetamaina o se filifiliga le manatu faapito, ma le alofa lea e faamanuiaina ai le tamaitiiti, matua moni, ma matua ua vaetamaina i lenei olaga ma le faavavau atoa” (First Presidency statement, Oke. 4, 2006, o loo maua i le Ensign, Oke. 2008, 37).
Ao e faaiuina le lesona, faasoa atu lau molimau i le olioli na aumaia e fanau i lou olaga. Uunaia tamaiti aoga ia saunia ma le agavaa mo le avanoa paia o le aumaia o fanau i lenei lalolagi.