Lesona 20: Malupuipuia o le Faatuatua ma le Molimau
Lesona 20
Malupuipuia o le Faatuatua ma le Molimau
Folasaga
O aiga ma tagata ua i ai le tiute paia o le atiina ae o le faatuatua ia Iesu Keriso ma faatumauina ni molimau malolosi. Na lapatai mai le Faaola faapea i aso e gata ai, e oo lava i “e ua fiifilia” e mafai ona faaseseina (Iosefa Samita—Mataio 1:22). O lenei lesona e taulai atu i le faamalosia o le molimau ina ia puipuia mai au a le fili, lea e saili e faaumatia le faatuatua.
O molimau malolosi e saunia le puipuiga mai le fili
Faamatala atu na saunoa Elder Joseph B. Wirthlin (1917–2008) o le Korama a Aposetolo e Toasefululua i se taimi e uiga i le anoanoai o luko na feoai solo i nuu i tua i Ukraine i le tele o tausaga ua mavae. Na pau le mea na faafefeina i latou o le afi. Pe a malaga ese mai aai, o tagata e tatau ona fausiaina ni afi lapopoa ma faatumauina le mumu pea i le po atoa ina ia tetee atu ai i luko.
Valaaulia se tamaitiiti aoga e faitau le faamatalaga lenei:
Ata
Elder Joseph B Wirthlin
“Sa iloa e tagata malaga o le tutu ma le tafuina pea o le afi ia mumu tele, sa le na o se mea sa faamafanafana ai; ao se mea sa puipuia ai le ola. …
“Ua le manaomia ona tatou puipui i tatou mai ni lafu luko pe a tatou femalagaai i ala o le soifuaga i ona po nei ae i le itu faaleagaga, ua tatou feagai ma luko feai a Satani e ala mai faaosoosoga, mea leaga, ma le agasala. Ua tatou soifua nei i ni taimi faigata ua tataa ai ia luko feai i mauga faaleagaga e saili i latou o e ua vaivai le faatuatua pe ua latou vaivai i lo latou talitonu. … Ua maosofaia i tatou uma i fili. E ui i lea, e mafia ona tatou puipui i tatou lava i le puipuiga e maua ai e molimau mumu e pei o se afi tele, ua atinaeina ma mausali lelei” (“Afi Tetele Faaleagaga o le Molimau,” Liahona, Ian. 1993, 42).
Aisea e avea ai le faatumauina o se molimau malosi “o se mataupu o le olataga” i le lalolagi o le aso? (A maea sina talanoaga, tusi le faamatalaga lenei i le laupapa: Pe a tatou faamalosia a tatou molimau, ua faaitiitia lo tatou avanoa i osofaiga i lo tatou faatuatua.)
E mafai faapefea e le mauaina o se molimau malosi ona fesoasoani ia te oe e faamalosia tagata o le aiga ma isi agai i osofaiga i o latou faatuatua?
Faaali atu pe tusi le siata lenei i le laupapa. Aua le aofia ai mataupu faavae matatetele i puipui; o nei mataupu faavae ua saunia mo le manuia o le faiaoga. Fai i tamaiti aoga e faitau fuaiupu i se tasi o koluma, ma saili mo mataupu faavae na e fesoasoani e puipuia agai i au na e faavaivaia ai le faatuatua. Valaaulia tamaiti aoga e otooto mai mea na latou faitauina i se fuaitau manino o le aoaoga faavae po o le mataupu faavae ona faasoa mai le o a latou fuaitau.
(Pe a tatou faatumauina le faatuatua mausali ia Iesu Keriso, e mafai ona tatou fetuleni i luma i le ala sao ma le vaapiapi e taitai atu i le ola e faavavau.)
(Pe a tatou mulimuli i aposetolo a le Alii, perofeta, ma isi taitai o le Ekalesia, e mafai ona puipuia i tatou mai le faaseseina.)
(E ala mai le Agaga Paia, e mafai ai e le Alii ona auina mai le filemu ma le taitaiga pe a osofaia lo tatou faatuatua.)
(O le anapogi, tatalo, ma le suesueina o tusitusiga paia e faamalosia le faatuatua ma le molimau ma mafai ai ona tatou onosaia luitau.)
Ua faapefea e nei mataupu faavae ona faamalosia oe po o se tasi e te iloaina agai i osofaiga o le faatuatua?
E mafai faapefea ona e faaaogaina lenei faamatalaga e faamalosia ai se tasi e te iloaina o loo tauivi ma lona faatuatua?
Faamanatu i tamaiti aoga le mea lenei: “O le faatuatua o se meaalofa e faaeeina mai o se taui mo le amiotonu patino. E masani lava ona tuuina mai pe a i ai le amiotonu, ma o le tele lava o le maualuga o le usiusitai i tulafono a le Atua o le tele foi lea o le faaeeina mai o le faatuatua” (Bruce R. McConkie, Mormon Doctrine, lom. lona 2. [1966], 264). Molimau atu faapea o le mauaina o le faatuatua ia Iesu Keriso, mulimuli i perofeta, saili le Agaga, ma le suesueina o tusitusiga paia o le a puipuia ma faamalosia ai molimau. Pe a tatou le faia nei mea, o le a faavaivaia le faatuatua ma le toe maua ai ni molimau.
Valaaulia se tamaitiiti aoga e faitau leotele le saunoaga lenei mai ia Elder M. Russell Ballard o le Korama a Aposetolo e Toasefululua e faamalamalama ai lenei manatu.
Ata
Elder M. Russell Ballard
“O se tasi o a’u faifeautalai lelei, sa ma galulue a o ou peresitene i le misiona i Toronto, na sau e vaai a’u i ni nai tausaga mulimuli ane. Sa ou fesili ia te ia, ‘Lau susuga, pe mafai faapefea ona ou fesoasoani atu ia te oe?’
“‘Peresitene,’ na ia fai mai ai, ‘Ou te manatu ua le toe i ai sa’u molimau.’
“Sa ou le talitonu i ai. Sa ou fesili atu pe mafai faapefea lena mea.
“‘Mo le uluai taimi ua ou faitauina ai ni tusi e faasagatau i Mamona,’ na ia fai mai ai. ‘E i ai ni a’u fesili, ma e leai se tasi e taliina mo au. Ua ou fenumiai ma ou te manatu ua leai sa’u molimau.
“Sa ou fesili atu ia te ia po o a ana fesili, ma sa ia ta’uina mai ia te au. O ni faafitauli masani e faasagatau i le Ekalesia, ae sa ou manao mo sina taimi e ao mai ai ni mea ina ia mafai ai ona ou tuuina atu ni tali anoa. O lea sa ma faatulaga ai se taimi i le 10 aso mulimuli ane, ma o le taimi lea sa ou ta’u atu ai ia te ia o le a ou taliina ai ana fesili taitasi. Ina ua amata ona savali ese atu, sa ou taofia o ia.
“‘Lau susuga, e tele au fesili na tuu mai ia te au i le aso,’ sa ou fai atu ai. ‘Ia e tasi la’u fesili mo oe.’
“‘O le a Peresitene?’
“‘O le a le umi e te lei toe faitauina ai le Tusi a Mamona? Sa ou fesili ai.
“Sa sui lana pupula. Sa tilotilo ifo o ia i le fola mo sina taimi. Ona ia tilotilo mai lea ia te au. ‘Ua leva tele, Peresitene,’ sa ia ta’u sao mai ai.
“‘Ua lelei,’ na ou fai atu ai. ‘Ua uma ona e tuuina mai ia te au la’u galuega e fai. Ua fetaui lelei foi lou tuuina atu o lau galuega. Ou te manao ia e folafola mai ia te au o le a e faitauina le Tusi a Mamona ia le itiiti ifo i le tasi le itula i aso uma amata atu nei seia oo i le isi a ta feiloaiga.’ Sa malie o ia o le a ia faia lena mea.
“Sefulu aso mulimuli ane, sa ia toe foi mai ai i lo’u ofisa, a ua ou saunia foi. Sa ou aumaia a’u pepa e amata ai ona tali ana fesili, peitai sa ia taofia au.
“‘Peresitene,’ sa ia fai mai, ‘o le a le manaomia lena mea.’ Ona ia faamatalaina lea: ‘Ou te iloa e moni le Tusi a Mamona. Ou te iloa o Iosefa Samita o se perofeta a le Atua.’
“‘Ia, lelei tele,’ sa ou fai atu ai. ‘Ae o le a avatu pea tali o au fesili. Sa ou galue mo se taimi umi i lenei mea, o lea la tau lava o lou saofai mai iina ma faalogo.’
“Ma o lea sa ou taliina uma ai ana fesili ona fesili atu lea, ‘Elder, o le a se mea ua e aoaoina mai lenei mea?’
“Ma sa ia faapea mai, ‘Tuu atu se taimi tutusa i le Alii.’
“Sei o tatou tusilolomiina lena manatu i o tatou mafaufau, ma tatou tauaveina a o tatou savavali ai i lenei faagasologa o le olaga nei. Ia tatou tuu atu taimi tutusa i le Alii” (“When Shall These Things Be?” Ensign, Dec. 1996, 60).
O a mea na e aoaoina mai le aafiaga na faasoa mai e Elder Ballard?
E mafai faapefea e le tuuina atu i le Alii “le taimi tutusa” i lou olaga patino ma aiga e faamalosia ai oe ma lou aiga agai ia Satani?
E mafai faapefea e le faataitaiina o nei mataupu faavae ona saunia nei oe ia avea ma toalua ma se matua e sili atu ona lelei?
Faaiu lenei vaega i le fai atu i se tamaitiiti aoga e faitau le faamatalaga lenei a Elder Richard G. Scott o le Korama a Aposetolo e Toasefululua:
Ata
Elder Richard G. Scott
“Pe a tatou tatalo e le aunoa i le taeao ma le po, suesue a tatou tusitusiga paia i aso uma, fai afiafi faaleaiga faalevaiaso, ma auai soo i le malumalu, o loo tatou tali atu ma le naunautai i le valaaulia [a Iesu Keriso] ia “o mai ia te Ia.” O le tele lava o lo tatou atiaeina o nei mausa, o le faatele foi lea ona naunau Satani e faatiga i tatou, ae o le faaitiitia lena o lona tomai e faia ai. E ala i le faaaogaina o nei meafaigaluega, tatou te faaaoga ai lo tatou faitalia e talia ai meaalofa atoatoa o Lana taulaga togiola.
“… Ou te molimau atu pe a tatou o mai ma le naunautai ia te Ia, o le a mafai ona tatou onosaia faaosoosoga uma, lototiga uma, luitau uma e fetaiai ma i tatou” (“Ia Avea le Faaaogaina o le Faatuatua ma Mea E te Faamuamuaina,” Ensign po o le Liahona, Nov. 2014, 94).
Fai i tamaiti aoga pe i ai nisi o i latou e fia faasoa mai se aafiaga e le patino tele lea na latou manumalo ai i luitau i lona faatuatua.
Fai i tamaiti aoga e sii o latou lima pe afai latou te iloa se tasi o loo tauivi e faatumauina sana molimau.
Fai i tamaiti aoga e suesue ma faatusatusa le Luka 22:31–32; 3 Nifae 18:32; ma le Mataupu Faavae ma Feagaiga 108:7–8 e aoao ai le tiute ua ia i tatou o tagata faamaoni o le Ekalesia, ae maise lava agai i tagata o le aiga. A maea se taimi talafeagai, fai atu i tamaiti aoga e faasoa mai mea na latou aoaoina. E tatau ona malamalama tamaiti aoga i le mataupu faavae lenei: Pe a tatou liliu mai i le talalelei a Iesu Keriso, ua ia i tatou le tiute e faamalosia le faatuatua o isi.
Faasoa atu le faamatalaga lenei mai ia Peresitene Thomas S. Monson:
Ata
Peresitene Thomas S. Monson
“Ua ou iloa ni mafuaaga autu se lua e mafua ai se toe toaga mai ma, mo suiga i uiga faaalia, mausa, ma faatinoga. Muamua, ua toe foi mai tagata ona na faaalia e se tagata ia i latou o latou avanoa i le faavavau ma na fesoasoani ia i latou e filifili ia ausia. O tagata e le toaaga e le mafai ona faamalieina i le malolo umi i le tulaga vaivai pe a latou iloa e mafai ona latou aapa atu i mea e sili ona mataina.
Lona lua, e toe foi mai isi ona o e pele ia i latou po o le “nuu faatasi ma le au paia” Efeso 2:19 ua mulimuli i le apoapoaiga a le Faaola, ua alolofa i o latou tuaoi e pei o i latou lava ma ua fesoasoani i isi ina ia ausia a latou miti ma faataunuu a latou sini.
O le metotia i lenei faagasologa sa avea—ma o le a faaauau pea ona avea ma—o le mataupu faavae o le alofa (“O Lo Tatou Tiutetauave le Laveai,” Liahona, Oke. 2013, 5).
Aisea i lou manatu e taua ai le alofa o se malosiaga i le faamalosia o le faatuatua o isi?
O a ni mea na e faia po o se tasi e te iloaina e fesoasoani ai e faamalosia le faatuatua o se tasi o loo tauivi faaleagaga?
O a laasaga e mafai ona e faia ia sili atu ai le aoga i le faamalosia o le faatuatua o isi?
Faaiu i le tuuina atu o lau molimau faapea e mafai e tamaiti aoga ona fesoasoani e toefuatai ma faamalosia le faatuatua o a latou uo ma aiga ao latou faaalia le alofa ma mulimuli i mataupu faavae na talanoaina i lenei lesona.