Ua lapatai mai Perofeta ma aposetolo e faapea “o tagata taitoatasi o ē ua solia feagaiga o le ola mama, o ē faasaunoa i taitoalua po o fanau, o ē ua faatalalē i le faataunuuina o tiutetauave faaleaiga, o le a i ai se aso tou te tutū atu ai e tali atu i luma o le Atua” (“O Le Aiga: O se Folafolaga i le Lalolagi,” Ensign po o le Liahona, Nov. 2010, 129). O lenei lesona ua auiliiliina pe faapefea e nei soliga matuia o tulafono a le Atua ona aumaia taunuuga i lenei olaga ma le olaga a sau. Ua faamamafaina ai foi faapea o le Togiola a Iesu Keriso ua saunia le faamoemoe ma le faamalologa i e salamo.
Faitauga Faaopoopo
Jeffrey R. Holland, “O Gagana a Agelu,”Ensign po o le Liahona, Me 2007, 16–18.
O le solia o feagaiga o le ola mama, sauaina, ma le le faataunuuina o tiutetauave faaleaiga
Faamanatu i tamaiti aoga faapea i lesona talu ai na latou aoao ai e uiga i le taua o tiutetauave faaleaiga, e aofia ai mea nei: (1) o tane ma ava e tatau ona alolofa ma tausia le tasi ma le isi, (2) o fanau e tatau ona tausia i le alofa ma le amiotonu, ma (3) o matua e tatau ona saunia mo manaoga o o latou aiga.
O le a le mea e ono tupu i se aiga pe afai o taitoalua ma matua e le faia nei tiutetauave?
Ina ia fesoasoani i tamaiti aoga ia iloa saunoaga a perofeta o aso nei e uiga i le taua o le faataunuuina e aiga o tiutetauave, fai i se tamaitiiti aoga e faitau leotele le palakalafa 8 o “O Le Aiga: O Se Folafolaga i le Lalolagi.” Faamamafa atu le mataupu faavae lenei: “O tagata taitoatasi o ē ua solia feagaiga o le ola mama, o ē faasaunoa i taitoalua po o fanau, o ē ua faatalalē i le faataunuuina o tiutetauave faaleaiga, o le a i ai se aso tou te tutū atu ai e tali atu i luma o le Atua.”
O le a le uiga o tagata taitoatasi o e faia nei soligatulafono o le a tutu e tali atu i luma o le Atua? (I le Aso Faamasino o le a tatou tutu i luma o le Atua ma tali atu ia te Ia mo agasala tatou te lei salamo ai; tagai Faaaliga 20:11–15; 2 Nifae 9:15–16.)
Faaali atu le saunoaga lenei a Elder Dennis B. Neuenschwander o le Fitugafulu:
Ata
Elder Dennis B. Neuenschwander
“O lo tatou tali atu i le Atua, o lo tatou Tama ma le Foafoa, o se tasi o lesona e sili ona faamuamua o le talalelei” (“The Path of Growth,” Ensign, Dec. 1999, 15).
E faapefea e le mataupu faavae o le tali atu i le Atua mo a tatou lava amioga ona fesoasoani ia i tatou ia tuputupu ae faaleagaga?
Tusi upu nei i le laupapa o ni autu i koluma e tolu:
Solia o Feagaiga o le Ola Mama
O le Sauaina o le Toalua po o le Fanau
O Le Le Faataunuuina o Tiutetauave Faaleaiga
Vaevae le vasega i ni vaega se tolu. Valaaulia le tasi vae-tolu o le vasega e faitau le Mataupu Faavae ma Feagaiga 42:22–25, le isi vaega e tolu e faitau le Mataio 18:1–6, ma le vaega e tolu mulimuli e faitau le Mataupu Faavae ma Feagaiga 93:39–44. Fai i tamaiti aoga e faatusatusa a latou fuaitau o mau i le autu sao i le laupapa. Fai ia i latou e vaai foi mo upu ma fuaitau na e aoao mai e uiga i le natura matuia o nei solitulafono. A maea se taimi talafeagai, fai atu i tamaiti aoga e faasoa mai mea na latou aoaoina. (Ao tali mai tamaiti aoga, tusi mau fesootai i lalo o autu talafeagai.)
O a upu ma fuaitau i nei fasi fuaitau ua aoao mai e uiga i le tulaga matuia o le solitulafono?
Mafaufau e faasino atu i autu taitasi i le laupapa ma fai atu fesili nei e fesootai ma soligatulafono taitasi. Ao tali mai tamaiti aoga, tusi a latou tali i lalo o ulutala taitasi.
O a nisi o uiga po o amioga na, afai e le puleaina, e mafai ona taitai atu ai se tagata e solia lenei agasala? (Mo se faataitaiga, o tali mo solitulafono o le saua i taitoalua po o fanau e mafai ona aofia ai le le onosai i isi, o se matele e faitioina isi, ma le talitonu i uiga tusia sese mo alii po o tamaitai.)
O le a le fautuaga o le a e tuuina atu i se tasi e faaalia nei uiga po o amioga?
E mafai faapefea e se tagata o le Ekalesia ona manumalo i nei uiga po o amioga? (Ao faasoa mai e tamaiti aoga a latou tali, fesoasoani ia i latou ia malamalama faapea ao tatou ola i mataupu faavae o le talalelei e pei o le salamo, auaunaga faaKeriso, malamalama, onosai, ma le faamagalo atu, e mafai ona tatou faaaoga le mana gafatia o le Togiola.)
Molimau atu faapea o le talalelei a Iesu Keriso ua saunia mea uma mo tagata ma aiga ina ia manuia ma olioli i ni olaga e tumu i faamanuiaga. Ae ui i lea, tatou te faia uma lava ni filifiliga leaga, ma o nisi o i latou e mafai ona sili atu aafiaga ia i tatou lava po o isi foi. Ae o loo i ai le faamoemoe.
Faamatala atu faapea o nisi o tagata o le Ekalesia ua sauaina e isi—e pei o se toalua le faamaoni po o se toalua po o se matua saua—ma o e sauaina e mafaufau po o le a le mea e mafai ona latou faia e uiga i o latou tulaga. Fai atu i se tamaitiiti aoga e faitau le faamatalaga o loo i lalo a Elder Richard G. Scott o le Korama a Aposetolo e Toasefululua:
Ata
Elder Richard G. Scott
“Afai na sauaina pe faia faatautala oe, o le a taumafai Satani e faatalitonu oe faapea e leai se vaifofo. Ae ua ia iloa lelei lava, e i ai. Ua iloa e Satani e maua mai le faamalologa i le alofa e le mafeliuliuai o le Tama Faalelagi mo Lana fanau. Ua malamalama foi o ia, o le mana o le faamalologa e i ai lea i le Togiola a Iesu Keriso. O le mea lea, o lana fuafuaga o le faia lea o mea uma na te mafaia e tuueseese ai oe mai lou Tama ma Lona Alo. Aua nei faatagaina Satani e faatalitonu oe faapea e le toe mafai ona e maua se fesoasoani” (“O Le Faamaloloina o Taunuuga Faataumaoi o le Sauaina po o le Faatautala,” Ensign po o le Liahona, Me 2008, 41).
Aisea e taumafai ai Satani e tauanau i latou ua sauaina e talitonu faapea e leai se fofo i o latou faafitauli?
O a ni taunuuga pe a talitonu tagata e leai se faamoemoe po o se fofo i o latou faafitauli?
Faasoa atu le molimau lenei ma le fautuaga mai ia Elder Richard G. Scott:
Ata
Elder Richard G. Scott
“Ou te molimau atu ua ou iloaina tagata na aafia fua i faatautala po o sauaga matuia, ua faamanuiaina la latou malaga faigata sa faia e agai atu i le faamalologa atoatoa e ala i le mana o le Togiola. Ina ua uma ona foia ona lava popolega e ala i lona faatuatua i le mana faamalolo o le Togiola, sa talosagaina foi e se tasi tamaitai talavou sa sauaina matuia e lona tama se isi a ma faatalanoaga. Sa toe foi mai o ia ma se ulugalii e matutua atu. Sa mafai ona ou lagonaina e alofa tele o ia ia te i laua. Sa susulu mai i ona mata le fiafia. Sa amata lana tala, “Elder Scott, o lo’u tama lea. Ou te alofa ia te Ia. O loo popole o ia i ni mea sa tutupu a o ou laitiiti. Ua le o toe avea na mea ma faafitauli ia te au. E mafai ona e fesoasoani ia te ia?’ Oka se faamautinoaga mamana o le mana o le Faaola e faamalolo ai! Ua le o toe mafatia o ia i taunuuga o le faatautala aua ua lava lona malamalama i Lana Togiola, ua lava le faatuatua, ma sa usitai i Lana poloaiga. A e suesue ma le maelega i le Togiola ma faaaoga lou faatuatua o loo ia Iesu Keriso le mana e faamalolo ai, e mafai ona e mauaina lena lava mapusaga fiafia. …
“O le faamalologa e mafai ona amata i se epikopo faautauta po o se peresitene o le siteki, po o se faufautua faapolofesa atamai. Afai e gau lou vae, o le a e le filifili e fofo lava e oe. O faatautala po o le sauaina matuia, e mafai foi ona manuia mai se fesoasoani faapolofesa” (“O Le Faamaloloina o Taunuuga Faataumaoi o le Sauaina po o le Faatautala ,” 40–42).
E mafai faapefea e le fautuaga musuia a Elder Scott ona fesoasoani i se tasi ua puapuagatia i le sauaina?
Faaali atu le saunoaga lenei a Elder Dallin H. Oaks o le Korama a Aposetolo e Toasefululua, ma fai i se tamaitiiti aoga e faitau leotele:
Ata
Peresitene Boyd K. Packer
“O le alofa mutimutivale ma le alofa tunoa o Iesu Keriso e le faatapulaaina na o i latou o e faia le agasala, a le o le faia o se mea sese po o le le faia o se mea sa’o, ae e aofia ai le folafolaga o le filemu e faavavau ia i latou uma o e o le a talia ma mulimuli ia te Ia ma Ana aoaoga. O Lona alofa mutimutivale o se faamalologa sili lea, e oo lava i se tagata le sala sa faamanualia” (“O le Mafuaaga mo lo Tatou Faamoemoe,” Ensign po o le Liahona, Nov. 2014, 7).
E faapefea e le Togiola a Iesu Keriso ona saunia le faamoemoe ma le faamalologa? (Ao faasoa mai e tamaiti aoga a latou tali, fesoasoani ia i latou ia malamalama i le mataupu faavae lenei: O i latou uma o e mulimuli ia Iesu Keriso ma Ana aoaoga e mafai ona maua le faamalologa ma le filemu faavavau e ala i Lona alofa mutimutivale ma le alofa tunoa.
Ina ia aoaoina tamaiti aoga pe faapefea e le Togiola a Iesu Keriso ona fesoasoani i tagata o e sauaina isi pe faaleagaina i latou i nisi auala, faitau le 2 Korinito 5:17–21 faatasi o se vasega.
O le a le uiga o le avea ma “tagata fou” ia Keriso? (O tali e mafai ona aofia ai manatu faapea i le tali atu i lo tatou usiusitai ma le filiga i poloaiga a le Alii, ua Ia faamanuiaina i tatou i meaalofa o le Agaga, o uiga paia ia. O nei meaalofa e maua mai ai suiga faavae ia i tatou, ma avea ai i tatou ma tagata fou o e ua sili atu ona faapei o le Atua.)
E tusa ai ma le fuaiupu 21, e faapefea ona tupu lenei mea? (O Iesu na atoatoa le leai o se agasala, ae na Ia tauaveina i Ona luga a tatou agasala ina ia i luga o le tulaga o lo tatou salamo, e mafai ai ona tatou amiotonu e ala ia te Ia. Sa avea o Ia ma taulaga e sui mo i tatou. Ao tatou salamo ma saili e mulimuli i Ana faataitaiga, e mafai ona tatou faaaogaina Lona mana e fesoasoani ia i tatou ia avea ma tagata fou.)
O le a le uiga o le upu faaleleia i le fuaiupu 18? (“O le faaleleia o le faagasologa o le faaolaina o le tagata mai lona tulaga o le agasala ma le pogisa faaleagaga ma le toefuataiga o ia i se tulaga o le ogatusa ma le lotogatasi ma le Atua. E ala mai lena mea ona le toe avea o ni fili le Atua ma le tagata” (Bruce R. McConkie, Doctrinal New Testament Commentary, 3 vol. [1965–73], 2:422).
Fesili i tamaiti aoga pe latou te iloaina ni tagata na aafia i le faamoemoe ma le faamalologa na mafai ai ona o le Togiola a Iesu Keriso. Valaaulia ni nai tamaiti aoga e faasoa mai a latou faataitaiga pe a latou mananao i ai ma pe afai o faataitaiga e le patino tele.
Faasoa atu le saunoaga lenei a Elder Jeffrey R. Holland o le Korama a Aposetolo e Toasefululua:
Ata
Elder Jeffrey R. Holland
“Ou te le o iloaina pe o ai o loo i ai i lenei aofia toatele i le asō o manaomia e faalogo i le savali o le faamagaloga lea o loo i ai i [le faataoto i le aufaigaluega i le tovine; tagai Mataio 20:1–15], ae pe o le a lava le tuai ua e mafaufau i ai, pe o le a foi le tele o avanoa e te manatu ua e misia, pe o le a foi le tele o mea sese e te lagona sa e faia, po o ni taleni e te manatu e te le o mauaina, po o le a foi le mamao ese mai le aiga ma le Atua e te lagona ua oo i ai lau malaga, ou te molimau atu e te lei malaga lava i se mamao e le mafai ona aapa atu i ai le alofa faalelagi. E le mafai ona e magoto ia maualalo ifo nai lo le malamalama le gata o le Togiola a Keriso e aapa atu ai ia te oe. …
“Afai la sa e osia ni feagaiga, tausi i ai. Afai e te lei osia lava, ia osi nei. Afai sa e osia ma e toe solia, ia salamo ma toe faaleleia. E le tuai lava pe afai o loo fetalai mai le Matai o le Tovine o loo i ai pea le taimi. Faamolemole ia faalogo i le uunaiga a le Agaga Paia o loo ta’u atu ia te oe i le taimi nei, i le taimi nei lava, e tatau ona e taliaina le meaalofa togiola a le Alii o Iesu Keriso ma olioli i le faaaumeaina e Lana galuega” (“O le Au Faigaluega I le Tovine,” Ensign po o le Liahona, Me 2012, 33).
Valaaulia tamaiti aoga e faamaumau mea na faamaonia e le Agaga Paia ia i latou i le aso.