O Le Faamaloloina o Taunuuga Faataumaoi o le Sauaina po o le Faatautala
O le mana o le faamalologa e i ai lea i le Togiola a Iesu Keriso.
E tuuina atu lau molimau faamaoni i lou alofa tele i lo tatou perofeta fou, tagatavaai, ma talifaaaliga, o Peresitene Thomas S. Monson—ou te matuai faatuatuaina o ia, ma ou te naunau lava e fai soo se mea e finagalo ou te faia.
E i ai ni mataupu e matua maaleale lava ma e matuai patino a’ia’i, ma e mafai ona fagua ai ni lagona vevesi ma e seasea lava ona talanoaina faalauaitele. Ae, afai e talanoaina i le agavaivai ma le agaalofa i le malamalama o le upumoni, e mafai i talanoaga o nei mataupu ona aumaia se malamalama sili atu faatasi ai ma le lagomaluina o le tiga, le faamanuiaga o le faamalologa, e oo ai lava ina aloese ai mai i nisi mala.
Faatasi ai ma se naunautaiga loloto e faaali manino atu ai se ala i le mapusaga, o lea ou te tautala atu ai ia te outou o e o loo mafatia i taunuuga faataumaoi o le faatautala po o sauaga i le mafaufau, upu, o le tino, aemaise lava o feusuaiga. Ou te tautala atu foi ia i latou o loo matua’ia. O le a ou taulai atu i le faatautala faalefeusuai, e ui lava o le fautuaga o loo tuuina atu o le a fesoasoani ai ia i latou e aafia fua ai i isi faiga faatautala. O lo’u faamoemoega ia avea au o se faaata, ina ia mafai ai e le faamalologa faalelagi ona faamalamalamaina ao pogisa o le faanoanoa e afua ona o amioga le tonu a isi. Talosia ia ou maua le fesoasoani e talanoa atu ai ma le malamalama, e avatu se fesoasoani, ae le toe faafaigataina atili se olaga ua faatamaia. E ono avea foi se malamalama sili atu, silafia, ma le lagona mataalia e mafai ai e i tatou e le o aafia ai, ona fesoasoani e foia ma puipuia le mala o le faatautala i nisi e toe aafia ai.
O le tai fana’e o lenei agasala mataga ma le inosia, atonu e le’i pa’i atu i lou olaga. Ae ua lava lona salalau i le lalolagi e ono mafai ai ona pa’i atu i se tasi e te alofa i ai. Ua pogai soo ai mafatiaga ogaoga—lea e mafai ona faatoilaloina—ma ua ou manao ai e talanoa atu i le auala e mafai ai ona maua le faamalologa. O le a faia ma le migao, aua o lo’u faamoemoega o le fesoasoani lea ina ia faamalolo ae le o le toe faatupuina o manatua tiga.
Filifiliga Saoloto
O le filifiliga saoloto o se elemene taua tele i le fuafuaga o le fiafia a lo tatou Tama oi le Lagi. Sa malamalama o Ia o le a i ai nisi o Ana fanau agaga e faaaogaina ma le faaletatau lena filifiliga saoloto, ma mafua ai ni faafitauli matuia i isi. O nisi o le a solia le faatuatuaga paia, e pei o se tama po o se tagata o le aiga na te faatautalaina se tamaitiiti taumamaina. Talu ai o lo tatou Tama Faalelagi e tonu a’ia’i, o lea e tatau ai ona i ai se ala e faatoilalo ai taunuuga matautia o lena faaaogaina le lelei o le saolotoga mo le tagata ua aafia fua ma le tagata na faatinoina. O le faamalologa e maua ai le mapusaga, e maua mai i le mana o le Togiola a Lona Alo Pele, o Iesu Keriso, e toe faalelei ai le mea ua le tonu. O le faatuatua ia Iesu Keriso ma i Lona mana faamalolo e tuuina atu ai i le tagata na sauaina ia auala e foia ai taunuuga leaga o amioga le tonu a le isi tagata. A oo ina tuufaatasia ma le salamo atoatoa, o le a mafai foi e le Togiola ona avatu i le tagata na faatinoina le faatautala, se auala e aloese ai mai le faasalaga matautia ua poloaiina e le Alii mo ia ituaiga o amioga.
I le Tagata ua Aafia Fua
Ou te molimau atu ua ou iloaina tagata na aafia fua i faatautala po o sauaga matuia, ua faamanuiaina la latou malaga faigata sa faia e agai atu i le faamalologa atoatoa e ala i le mana o le Togiola. Ina ua uma ona foia ona lava popolega e ala i lona faatuatua i le mana faamalolo o le Togiola, sa talosagaina foi e se tasi tamaitai talavou sa sauaina matuia e lona tama se isi a ma faatalanoaga. Sa toe foi mai o ia ma se ulugalii e matutua atu. Sa mafai ona ou lagonaina e alofa tele o ia ia te i laua. Sa susulu mai i ona mata le fiafia. Sa amata lana tala, “Elder Scott, o lo’u tama lea. Ou te alofa ia te ia. O loo popole o ia i ni mea sa tutupu a o ou laitiiti. Ua le o toe avea na mea ma faafitauli ia te au. E mafai ona e fesoasoani ia te ia?” Oka se faamautinoaga mamana o le mana o le Faaola e faamalolo ai! Ua le o toe mafatia o ia i taunuuga o le faatautala aua ua lava lona malamalama i Lana Togiola, ua lava le faatuatua, ma sa usitai i Lana poloaiga. A e suesue ma le maelega i le Togiola ma faaaoga lou faatuatua o loo ia Iesu Keriso le mana e faamalolo ai, e mafai ona e mauaina lena lava mapusaga fiafia. I lau malaga o le faaleleia, ia talia Lana valaaulia e faataga o Ia e tausoa lau avega seia oo ina lava lou taimi ma lou malosi e te malolo ai.
Ina ia maua le mapusaga mai taunuuga o le sauaina, e aoga lava ona malamalama i lo latou faapogai. O Satani o le faapogai o taunuuga faatafuna o le faatautala po o le sauaina. Ua ia te ia le mana tulaga ese e taitai ai se tagata i auala ’alo e le mafai ona maua ai se vaifofo i faafitauli e matua ogaoga le faigata. O lana fuafuaga o le tuueseese mai lea o le loto mafatia mai le faamalologa e mafai ona maua mai i se Tama Faalelagi agaalofa ma se Togiola alofa.
Afai na sauaina pe faia faatautala oe, o le a taumafai Satani e faatalitonu oe faapea e leai se vaifofo. Ae ua ia iloa lelei lava, e i ai. Ua iloa e Satani e maua mai le faamalologa i le alofa e le mafeliuliuai o le Tama Faalelagi mo Lana fanau. Ua malamalama foi o ia, o le mana o le faamalologa e i ai lea i le Togiola a Iesu Keriso. O le mea lea, o lana fuafuaga o le faia lea o mea uma na te mafaia e tuueseese ai oe mai lou Tama ma Lona Alo. Aua nei faatagaina Satani e faatalitonu oe faapea e le toe mafai ona e maua se fesoasoani.
E faaaoga e Satani le sauaina o oe e faavaivaia ai lou mautinoaina o oe lava, faatamaia le faatuatuaga i e pulea, faatupu le fefe, ma amatalia lagona o le faanoanoa. E mafai e le faatautala ona faataumaoia lou tomai e faatulaga ni sootaga maloloina faaletagata soifua. E tatau ona i ai lou faatuatua o nei taunuuga le lelei uma e mafai ona foia; a leai, o le a taofia oe mai lou toe faaleleia atoatoa. E ui o nei taunuuga e i ai ni aafiaga mamana i lou olaga, ae e le faamatalaina ai lou tagata moni.
O le a taumafai Satani e faaesea mai oe mai lou Tama oi le Lagi i lou mafaufau, faapea a na alofa o Ia ia te oe semanu Na te puipuia pe taofia le mala. Aua nei taofia mai oe mai le punavai autu o le faamalologa moni e ala i faiga taufaasese a le aloalii o mea faatiapolo ma ana pepelo leaga. Ia e iloa afai e i ai ni ou lagona faapea ua le alofa lou Tama oi le Lagi ia te oe, ua feseuai oe e Satani. Tusa lava pe foliga mai ua matua faigata ona tatalo, ia e tootuli ma ole atu i le Tama oi le Lagi e avatu ia te oe le malosi e faatuatuaina ai o Ia ma e lagonaina Lona alofa mo oe. Ole atu ia e iloa e mafai e Lona Alo ona faamalolo oe e ala i Lana Togiola mutimutivale.
O Satani na manao ina ia faamalosi le fanau a le Tama ia usitai, ina ia leai se filifiliga saoloto ma faapea ai ona leai se tuputupu ae o le tagata lava ia. Ina ia tausisia le filifiliga saoloto, e le taofia e le Alii tagata taitoatasi mai le faaaogaina sese o lena saolotoga. Peitai, Na te faasalaina i latou ona o na faatinoga sei vagana ua i ai le salamo atoatoa. E ala i le Agaga Paia, Na te auina mai ai lapataiga i le tagata faatautala, ae o le tele o taimi, o le vaisu faataumaoi a lena tagata e matuai malosi lava e faapea ai ona poloka i fafo lena taitaiga faaleagaga. O le pogai lena ua saunia ai e lo tatou Tama se ala e faamalolo ai taunuuga o amioga, e ala i le fai faamalosi, faaaoga sese o le pule, po o le fefe i le isi tagata, e aveesea ai mo sina taimi lē tumau le saolotoga o le tagata ua sauaina.
O le amataga o le faamalologa e manaomia ai le faatuatua e pei o se tamaitiiti i le mea moni e le masuia, e alofa le Tama oi le Lagi ia te oe ma ua saunia se ala e faamalolo ai. Na ofoina mai e Lona Alo Pele, o Iesu Keriso Lona soifua e saunia ai lena faamalologa. Peitai e leai se vaifofo faamaneta, leai se pulu pasama faigofie e maua ai le faamalologa, e leai foi se auala faigofie i togafitiga atoatoa. O le fofo e manaomia ai le faatuatua loloto ia Iesu Keriso i Lona mana e le iu e faamalolo ai. E faamausaliina i se malamalama i aoaoga faavae ma se naunautaiga maua’i e mulimuli ai.
O le faamalologa e mafai ona amata i se epikopo faautauta po o se peresitene o le siteki, po o se faufautua faapolofesa atamai. Afai e gau lou vae, o le a e le filifili e fofo lava e oe. O faatautala po o le sauaina matuia, e mafai foi ona manuia mai se fesoasoani faapolofesa. E tele auala e amata ai le faamalologa, ae ia e manatua o se fofo atoa lava e maua mai i le Faaola, le Alii o Iesu Keriso, lo tatou Matai ma le Togiola. Ia faatuatua, faatasi ai ma galuega o le a mafai ai e Lana Togiola atoatoa, faavavau, ma le le iu ona faamalolo lou mafatia mai taunuuga o le faatautala po o le sauaina.
E ui lava ina foliga mai i le taimi nei e te le mafaia, e oo mai le taimi o le faamalologa e mafai ona e maua mai i le Faaola, o le a mafai ai e oe ona faamagalo moni le tagata na faia le faatautala, ma e oo lava ina i ai ou lagona o le tigaalofa mo ia. A oo ina mafai ona e faamagaloina le sauaga, o le a e mapu mai le tiga ma le loto tiga lea e manao ai Satani i lou olaga, e ala lea i le uunaia o oe ina ia e inoino i le tagata na faia le faatautala. O le taunuuga, o le a e olioli i se filemu e sili atu. E ui lava o se vaega taua o le faamalologa, afai o le mafaufau i le faamagalo e atili ai ona e tiga, ia faapafala ese le vaega lena seia e maua nisi aafiaga o le mana faamalolo o le Faaola i lou lava olaga.1
Afai na sauaina nei oe po o le taimi foi ua tuanai, ia e maua le lototoa e saili ai se fesoasoani. Atonu na matua faamatauina lava oe pe faamatua’ia lou fefe ina ia aua ai nei e faaalia le sauaina po o le faatautala. Ia e maua le lototele e gaoioi ai nei loa. Saili le lagolago a se tasi e mafai ona e faatuatuaina. E mafai e lou epikopo po o le peresitene o le siteki ona avatu ia te oe se fautuaga taua ma fesoasoani ia te oe i taitai faalemalo. Faamatala i ai pe na faapefea ona sauaina oe ma ta’u po o ai na faia. Fesili atu i ai mo se puipuiga. E ono fesoasoani au taga i isi e taofia ai mai le avea ma nisi e aafia fua, i mafatiaga e tulai mai ai. Vaai se fesoasoani i le taimi nei. Aua e te fefe—aua o le fefe o se meafaigaluega o le a faaaoga e Satani e faamafatia ai oe. O le a fesoasoani le Alii ia te oe, ae e tatau ona e aapa atu mo lena fesoasoani.
Aua e te lotovaivai pe afai o le taimi muamua e le mau manatu ai se epikopo pe a e tauina atu se tagata faatautala. Ia manatua e atamamai tele tagata faatautala, i le fatuina o foliga i nofoaga faitele e nana ai a latou amioga inosia. Tatalo ina ia tomatauina oe i au taumafaiga ia maua se fesoasoani. O le a oo mai lava lena fesoasoani. Ia e mautinoa, o le Faamasino Atoatoa, o Iesu le Keriso, ua i ai se silafia atoatoa i auiliiliga, o le a faamasinoina tagata e faia faiga faatautala mo faiga le tonu uma. E oo mai le taimi, o le a Ia faaaoga atoatoa ai le poloaiga o le faamasinoga tonu sei vagana ua i ai se salamo atoatoa. O lou popole i le manaomia o se faamasinoga tonu, e na o le faatuai ai o lou faamalologa ma faatagaina ai le tagata solitulafono e faaauau lana pule faatautala. O le mea lea, e ao ai ia te oe ona tuu ai pea le faasalaga mo faiga faatiapolo i taitai faalemalo ma le Ekalesia.
I le Tagata Solitulafono
O lenei, ia te oe lena le tagata solitulafono sa faataumaoiina le ola o se tasi e ala i le faatautala po o le sauaina: ia e iloa ua e manaomia le fesoasoani i lau vaisu a leai o le a ia faataumaoia oe. O le a e le faatoilaloina e oe lava ia. E te ono manaomia se fesoasoani faapitoa faapolofesa. Ou te aioi atu ia te oe, e saili ina ia laveaiina nei oe. Atonu sa e faaseseina oe lava i le puipuiga malu sese, mo na o sina taimi faapea na faamanuiaina ai lou nanaina o lau solitulafono mai taitai faalemalo po o le Ekalesia. Peitai, ia e iloa o loo silafia atoatoa e le Alii o Iesu Keriso au agasala. Ua Ia lapatai mai: “Ai se na te faatausuai se tasi o i latou nei e faatauvaa … , e lelei i lea tagata pe ana nonoa se maaolo tele i lona ua, ma faagotoina o ia i le moana loloto.”2 Ia e iloa e tusa lava pe leai se gaoioiga e faia e le tagata na aafia fua, o lau aga o le faatautala o le a iloa faalauaitele, aua o le a faailoa oe e Satani, ona lafoai lea o oe.
Faafaigofie lou olaga i le faia o laasaga i le taimi nei e faamama ai lou agaga mai na agasala ma foia faasalaga e tulai mai ai. Ia faaalia lou naunau e faamalolo le mafatiaga o isi na mafua ona o oe. Talanoa i lou epikopo po o le peresitene o le siteki. O le matuia o au aga e ono manaomia ai lou faamasinoga faalemalo ma faale-Ekalesia. Peitai, o le salamo atoatoa o le a aumaia ai le mapusaga matagofie o le faamagaloga, filemu o le mafaufau, ma se ola toefaafouina. O le a aumaia ai foi le mapusaga i tagata na sauaina ma o latou aiga. O le a e saoloto mai le mamafa o le faanoanoa ma mafaufauga o le tuua’ia i mea sa e faamatua’ia ai le faavauvau ma le lototiga i le olaga o se tasi. Ia e silafia, e sili atu le faigofie o le salamo i le olaga lenei nai lo le tulaga o le a i ai i le olaga a sau, o lea, ia salamo nei loa. O le a e maua le fesoasoani pe a e filifili nei loa e faasaoloto mai oe mai mea ua fai ma au vaisu e ala lea i le salamo ma le fesoasoani a isi. Faafetai e te le’i ola i aso anamua lea na fetogi ai i maa ia tagata faatautala seia oo ina maliliu e aunoa ma le avanoa mo le salamo.3
I Matua
Matua, i ni auala talafeagai, ma le maaleale, aoao a outou fanau i le tulaga lamatia e ono i ai, ma le auala e aloese mai ai. Ia mataala i faailoga lapatai, e pei o se suiga faafuasei i le amio a se tamaitiiti lea e ono faailoilo mai ai se faafitauli. Ia nofouta i lagona faaletonu o se tamaitiiti ma saili ia iloa le pogai.
I Faamasino o Isaraelu
Ia te oe o lē o loo umia ki o se faamasino o Isaraelu, ia mautinoa ma le mataalia o tagata taitoatasi uma lava e mafatia mai faiga faatautala, ua tuu atu i ai le fesoasoani talafeagai. O le tusitaulima a le Ekalesia ma laina fesoasoani o loo lisi atu ai, o punaoa taua na e taialaina ai lau faaiuga faaletaitai o le ekalesia ma feutagaiga ma taitai o le malo.4 Ia vaaia ma le faautauta le auai o soo se tagata sa i ai ni solitulafono ua mavae. Ia silafia o se tagata solitulafono atonu na te le ta’u maia ana amioga faatiapolo. Saili i le taitaiga a le Agaga pe a e lagonaina e i ai se mea o faaletonu. Talosagaina le fesoasoani a taitai o le uarota ma le siteki e taofia ai ni tulaga matautia e ono tulai mai.
Ou te tatalo o oe lena sa sauaina pe faia faatautala, po o se tasi na faapogai ai, o le a gaoioi nei loa e faaavanoa oe lava mo le mana faamalolo o le Togiola a Iesu Keriso. Ou te molimau atu o lou faatuatua ma le usiusitai o le a mautinoa ai o le a fesoasoani mai o Ia ia te oe. I le suafa o Iesu Keriso, amene.