Elder Kent D. Watson
O Le Fitugafulu
I le toe tepa i tua i lona olaga, e lagona pea e Elder Kent Dee Watson o ia o se tagata talitonu ma sa i ai lava lana molimau ae sa i ai lava se mea se tasi na tupu na matuai loloto sona aafiaga ia te ia.
“O le faaiuga na ou faia o se alii talavou e alu i se misiona na aafia uma ai lava vaega o le olaga,” o le saunoaga lea a Elder Watson, lea faatoa valaauina i le Korama Lua a Fitugafulu.
Na ia maua se valaauga i le Misiona a Sasae Mamao i Saute ma sa galue i Taiuani. “O se taunuuga o la’u misiona sa suia ai mai se tamaitiiti aoga faaleogalua i se tamaitiiti aoga lelei,” na ia faaauau ai. “Aua o la’u misiona na ou feiloai ai i lo’u toalua. Sa faailoa atu au ia te ia e se soa sa i ai muamua i le misiona. O la’u misiona na ou suesueina ai le faaSaina. O la’u misiona na ou maua ai se galuega lea sa ou matuai fiafia i ai. O la’u misiona na maua ai e lo’u aiga le avanoa matou te nonofo ai i le tele o aai.”
Na maua e Elder Watson ia faailoga o le tagata malaga ma le matuaofaiva mai le Iunivesite o Polika Iaga ma sa faaaluina lona olaga faigaluega o se tausitusi faamaonia, seia oo ai lava ina ua avea ma taitaifono ma Pule Sili o se kamupani tausitusi faavaomalo.
Na maua foi e Elder Watson le avanoa e toe foi atu ai i le eria o lana misiona faatasi ma lona toalua e auauna atu o se peresitene o le Misiona a Taiuani Taichung ma se peresitene faavaitaimi o le Misiona a Taiuani Kaohsiung. O le galulue faatasi ma le toatele o faifeautalai talavou na maua ai e ia le lagona mautinoa i le malosi o le autalavou i le Ekalesia.
Sa auauna atu foi ia Elder Watson i le tele o isi valaauga o le Ekalesia, e aofia ai le avea ma se epikopo ma se fesoasoani i le au peresitene o le siteki.
Na soifua mai Elder Watson i Cedar City, Iuta, ISA, i ona matua o Lorenzo Dee Watson ma Joyce Watson i le aso 8 o Me, 1943. Sa ia faaipoipo atu ia Connie Lingmann i le aso 23 o Aokuso, 1967, i le Malumalu o Sate Leki, ma o i laua o ni matua o se fanau e toalima.