O Faaa’oa’o o le Amiotonu
O lo tatou tiute o le ola i o tatou olaga i se ala e mafai ai ona avea i tatou ma faaa’oa’o o le amiotonu.
O le po nei, ua ou iloa o outou o le usoga, o iinei i le Maota Autu mo Konafesi ma le fiaafe o isi nofoaga, o se potopotoga aupito toatele o le au perisitua ua mafai ona tauaofia. O i tatou o se vaega o se usoga aupito sili i le lalolagi atoa. E maeu ma amuia foi i tatou o ni e ua umia le perisitua a le Atua.
Ua maea ona aoaoina ma siitia i tatou a o tatou faalogologo atu i savali musuia. Ou te tatalo mo lo outou faatuatua ma talosaga a o ou faasoaina atu ia te outou na mafaufauga ma lagona na i ai talu ai nei i lo’u mafaufau a o ou sauniuni e talanoa atu ia te outou.
I le avea ai ma ni e tauaveina le perisitua, ua tuuina mai i tatou i le lalolagi i taimi faigata. Ua tatou ola i se lalolagi lavelave, o i ai auga o feeseeseaiga i soo se mea. O taupulepulega poto faaupufai ua faaleagaina ai le maopoopo o malo, taofiofimamau e taitai o le malosiaga, ma vaega o tagata ua foliga mai ua solipalaina e faavavau, ua faaogea i avanoa ma ua tuua ai ma se lagona o le toilalo.
O i tatou o e ua faauuina i le perisitua a le Atua e mafai ona faia se eseesega. A oo ina tatou agavaa mo le fesoasoani a le Alii, e mafai ona tatou galueaiina tamaiti, e mafai ona tatou faaleleia tamaloloa, e mafai ona tatou faataunuuina vavega i Lana galuega paia. E leai se mutaaga o o tatou avanoa.
O la tatou matafaioi o le avea lea ma faataitaiga lelei. E faamalolosia i tatou e le upumoni e faapea, o le malosiaga aupito sili i le lalolagi i ona po nei o le mana lea o le Atua a o galue ai e ala i alii. Afai ua tatou i ai i le feau a le Alii, uso e, ua ia te i tatou le aia tatau mo le fesoasoani a le Alii. Aua lava nei galo lena mea moni. O lena fesoasoani paia, ioe, e faavae i luga o lo tatou agavaa. E tatau ona tofu fesili ifo: Pe o mama ea o’u lima? Pe o mama ea lo’u loto? Pe o au ea o se auauna agavaa a le Alii?
Ua siomia i tatou i le anoanoai o mea ua mamanuina e tatai ese ai lo tatou gauai mai na mea e mama ma lelei, ma tofotofoina i tatou i mea e mafua ai ona tatou le agavaa e faaaoga le perisitua o loo tatou tauaveina. Ou te le o tautala atu na o alii o le Perisitua Arona, ae o tausaga uma. E oo mai tofotofoga i foliga eseese i aso uma o o tatou olaga.
Uso e, pe o tatou agavaa ea i taimi uma e faataunuu tiute paia e o faatasi ma le perisitua o loo tatou umia? Alii talavou—outou na o ositaulaga—pe o outou mama ea i le tino ma le agaga pe a outou nonofo i le laulau o le faamanatuga i Aso Sa ma faamanuia faatusa o le faamanatuga? Alii talavou o aoao, pe o outou agavaa ea e sauni ma tapena le faamanatuga? Tiakono, a outou tufatufaina le faamanatuga i tagata o le Ekalesia, pe o outou iloa ea ua outou agavaa faaleagaga e faia lena mea? Pe ua malamalama atoatoa ea outou taitoatasi i le taua o tiute paia uma o loo outou faataunuuina?
Au uo talavou e, ia outou malolosi. Ua siomia i tatou i filosofia o tagata. Ua avea lava le faapalepale i aso nei ma ‘alofaga o le faia o le agasala. Aua nei faaseseina outou; o tua atu o lena foliga taufaasese, o i ai le lotofaavauvau, faanoanoa ma le tiga. Ua e iloa le mea e sa’o ma le mea e sese, ma e leai se faafoligaese, po o le a lava le faatosina, e mafai ona suia lena mea. E tumau lava le natura leaga o le solitulafono. Afai e uunai oe e au uo e faia se mea ua e iloa e sese, ia avea oe ma tagata e faasa’oina tusa lava pe e te faia na o oe. Ia ia te oe le lototoa e avea ai o se malamalama mo isi e mulimuli ai. E leai se faigauo e sili atu ona taua nai lo lou lava mafaufau manino, lou lava amio mama—ma e maeu lava se lagona faamamaluina o le iloa, ua e tu i lou tulaga atofaina faatasi ai ma le mautinoa o loo e agavaa e faia.
Uso e o le Perisitua Mekisateko, pe o outou taumafai ea ma le maelega i aso taitasi e ola e pei ona tatau ai? Pe o e agalelei ea ma e alofa i lou toalua ma lau fanau? Pe o e faamaoni ea i au fegalegaleaiga ma i latou o loo siomia ai oe—i taimi uma ma tulaga uma?
Afai e i ai se tasi o outou ua se’e i le ala, o loo i ai i latou o le a fesoasoani ina ia e toe mama ma agavaa. Ua naunau lou epikopo po o le peresitene o le paranesi e fesoasoani atu, ma o le a faia mea uma ma le malamalama ma le alofa, i lona malosi e fesoasoani atu ai ia te oe i le faagasologa o le salamo, ina ia toe mafai ai ona e tu atu i le amiotonu i luma o le Alii.
E toatele outou o le a manatuaina Peresitene N. Eldon Tanner, o le sa avea ma fesoasoani i Peresitene e toafa o le Ekalesia. Sa ia tuuina atu se faataitaiga iloga o le amiotonu i le taimi atoa sa faigaluega ai i se kamupani, o lana tautua i le malo i Kanata, ma taimi uma o lona soifua patino. Na ia tuuina mai le fautuaga musuia lenei mo i tatou:
“E leai lava se mea na te aumaia le olioli tele ma le manuia nai lo le ola ai e tusa ma aoaoga o le talalelei. Ia avea ma faataitaiga; ia avea ma se uunaiga mo le lelei… .
O i tatou uma lava taitoatasi na muai faauuina mo se galuega e avea ma se auauna filifilia [a le Atua], ua ia silafia ua tatau ona faaee i ai le perisitua ma le mana e galue ai i lona suafa. Ia manatua e le aunoa o loo vaavaai atu tagata ia te oe mo le taitaiga ma o loo e uunaia olaga o tagata taitoatasi mo le lelei po o le leaga, ma o lena uunaiga o le a lagonaina i augatupulaga o le a oo mai.”1
Ou uso e, ou te toe faamamafa atu o le avea ai ma e o loo umia le perisitua a le Atua, o lo tatou tiute o le ola i o tatou olaga i se ala e mafai ai ona avea i tatou ma faaa’oa’o o le amiotonu mo isi e mulimuli ai. A o ou manatunatu loloto po o le a se auala sili e mafai ai ona tatou avatu na faataitaiga, sa ou mafaufau ai i se aafiaga sa ou oo i ai i ni nai tausaga ua mavae a o ou auai i se konafesi faalesiteki. I le taimi o le sauniga masani, sa ou vaaia se alii talavou o nonofo faatasi ma lona aiga i le laina pito i luma o le fale autu o le siteki. Sa ou nofo i le tulaga. A o faagasolo le sauniga, sa amata ona ou vaaia a tuu le tasi o’u vae i luga o le isi, ona faia foi lea o lena lava mea e le tamaitiiti. Afai e sui le isi o’u vae, ona mulimuli ai foi lea. A tuu ou lima i luga o ou vae, ona ia faia foi lea o lena lava mea e tasi. Sa tee lou auvae, ona ia faia foi lea. Po o le a lava le mea sa ou faia, na te faataitaia uma lava a’u taga. Sa faia pea lava lea mea seia oo i le taimi ou te lauga ai i le potopotoga. Sa tonu ia te au se’i tofotofo o ia. Sa ou pulatoa atu ia te ia, na mautinoa lava na gauai mai, ona ou tago lea faaminoi o’u taliga. Sa ia faia sina taumafaiga e lei manuia e faia ai foi, peitai na ou maua o ia! Sa le mafai ona ia faaminoia ona taliga. Sa liliu atu i lona tama, sa nofo i ona tafatafa, ma musumusu atu i ai se mea. Sa tusi i ona taliga ona tusi mai lea ia te au. Ina ua tilotilo mai lona tama ia te au, e faamaonia pe o minoi o’u taliga, sa ou tu filemu ma piilima ou lima, leai ma sina minoi. Sa toe tilotilo atu ma le le talitonu le tama i lona atalii, o le sa foliga ua fai lava si ona faiaina. Na iu ina tilotilo mai ma le matamuli ia te au ma faamimigi ona tauau.
Na mavae ni tausaga ma sa ou mafaufau i lena aafiaga, a o ou mafaufau loloto pe faapefea, aemaise lava a o tatou laiti, tatou te taumafai ai e faaa’oa’o i le faaa’oa’oga a o tatou matua, o o tatou taitai, o a tatou uo. Na saunoa le perofeta o Polika Iaga, “E le tatau ona tatou faatagaina i tatou lava e faia se mea tatou te le mananao e vaai o fai e a tatou fanau. E ao ona tatou faia se faaa’oa’oga tatou te mananao latou te faataitaia.”2
Ia te outou na o tamā o tamaiti po o e foi o taitai i tamaiti, ou te fai atu, taumafai ia avea o ituaiga o faaa’oa’oga e manaomia e tamaiti. Ioe, o le tama, o le faaa’oa’o autu, ma amuia lava le tamaitiiti ua faamanuiaina i le i ai o se tama agavaa. Peitai, e oo lava i se aiga o faaa’oa’oga, e i ai se tama ma se tina filiga ma le faamaoni, e mafai ona faaaogaina le fesoasoani lagolago uma e mafai ona latou maua mai alii lelei o ē taunapanapa mai ma le faamaoni. O loo i ai foi le tamaitiiti e leai se tama, pe o lona tama e le o avatua le ituaiga o faataitaiga o loo ia manaomia. Mo lena tamaitiiti, ua saunia e le Alii se upega o fesoasoani i totonu o le Ekalesia—o epikopo, faufautua, faiaoga, taitai o Sikauti, o faiaoga o aiga. A faaaoga le polokalama a le Alii ma a lelei ona faagaoioi, e le tatau ona i ai se alii talavou o le Ekalesia e aunoa ma se uunaiga a alii lelei i lona olaga.
O le tauaogaina o se epikopo musuia, faufautua, po o se faiaoga e le faapea o foliga vaaia o lona malosi, po o oa e tele faalelalolagi. O taitai e tele la latou uunaiga, e masani lava o i latou na e tutuina le afi faaleagaga e musuia ai isi ina ia tuuto faamaoni i le upumoni, latou te avea le usitai i tiute e foliga mai o le auga lena o le faatamatane, latou te faaliliuina nisi o faiga masani faifai pea ina ia avea ma vaaiga o se tagata tatou te moomoo e soo i ai.
Ia le galo lava—ma o le mea moni, o lo tatou uluai faaa’oa’o—o lo tatou Faaola, o Iesu Keriso. O lona soifua mai na valoia e perofeta; na aumaia e agelu le faasilasilaga o Lana galuega i le lalolagi. Sa “tupu o Ia, ma ua malosi lona loto, ua tumu i le poto; ua ia te ia foi le alofa o le Atua.”3 Na papatisoina e Ioane i le vaitafe o Ioritana, ma sa amata e Ia Lana galuega mo tagata. O tofotofoga poto a Satani, na fulitua i ai Iesu. O tiute na atofa atu i ai e Lona Tama, sa Ia alo atu i ai, tautino atu i ai Lona loto, ma ofo atu i ai Lona soifua. Ma e maeu lava le leai o se agasala, e le manatu faapito, e tamalii ma paia lona soifua. Sa galue punouai Iesu. Sa alofa Iesu. Sa auauna atu Iesu. Sa molimau atu Iesu. O le a se isi faaa’oa’oga e sili atu e mafai ona tatou taumafai e faataitai i ai. Tatou amata nei, i le po lava lenei, e faia faapea. Lafoai ese e faavavau o tatou tagata tuai, aveese atu ai ma le toilalo, faavauvau, masalosalo ma le le talitonu. Tatou savavali i se ola toefuataiina—se ola o le faatuatua, faamoemoe, lototoa ma le olioli. E leai se galuega e foliga ua telē tele; e leai se tiutetauave faapea ua mamafatu naua; e leai se tiute faapea o se avega. E mafaia mea uma e le Atua.
E tele tausaga ua mavae, sa ou ta’ua ai se tasi na faaaogaina le faaa’oa’oga a le Faaola, o le sa tu mausali ma faamaoni, malosi ma agavaa i matagi malolosi o le olaga. Sa ia faalauteleina ma le lototoa ona valaauga i le perisitua. Sa ia saunia se faaa’oa’oga mo i tatou taitoatasi. O lona igoa o Thomas Michael Wilson, o le atalii o Willie ma Julia Wilson o Lafaiete, Alapama.
A o talavou o ia, a o lei avea o ia ma lona aiga ma tagata o le Ekalesia, sa maua o ia i le kanesa, sosoo atu ai ma le togafitiga tiga o le ma’i, ona manuia ai lea. O lenei ma’i na iloa ai e le aiga o lenei olaga e le gata ina taua ae e mafai foi ona puupuu. Sa amata ona latou sailia se tapuaiga e fesoasoani ai ia i latou i lenei taimi o mafatiaga. Na sosoo ai ma le faailoa atu ia i latou o le Ekalesia, ma sa iu ai ina papatisoina i latou uma vagana ai le tama. Ina ua uma ona latou talia le talalelei, sa faananau Uso Wilson laitiiti mo le avanoa e avea ai o se faifeautalai, e ui lava ina e matua tele atu o ia nai lo le toatele o alii talavou ina ua amata la latou galuega faafaifeautalai. Ina ua 23 ona tausaga, na ia maua lona valaauga faamisiona e galue ai i le Misiona a le Aai o Sate Leki Iuta.
Sa faamatala e soa faifeautalai a Elder Wilson lona faatuatua, e le fesiligia, e le mafaaseseina, ma e le maluelueina. O ia o se faaa’oa’o i tagata uma. Peitai, ina ua mavae masina e 11 o le galuega faafaifeautalai, sa toe foi mai le ma’i. Ua manaomia nei ona aveese lona lima ma le tauau, ona o le kanesa o ponaivi. Ae na vilitai pea i lana galuega faafaifeautalai.
O le lototele ma le naunautai tele o Elder Wilson e tumau ai pea i lana misiona, sa matua ootia ai lona tama e le lotu, ma o lea sa ia sailiili ai loa i aoaoga a le Ekalesia ma avea ai foi o ia ma tagata auai.
Sa ou maua le tala sa i ai se tagata sailiili na aoaoina e Elder Wilson ma sa papatiso, ae na manao e faamau lona papatisoga e Elder Wilson, o le sa ia matua faaaloalogia lava. Sa malaga atu o ia, ma nisi, i le falemai i le mea na taoto ai Elder Wilson. O iina, na faaee atu ai lona lima sa totoe i luga o lona ulu, ma faamauina ai e Elder Wilson [lea tuafafine] e avea ma tagata O Le Ekalesia a Iesu Keriso o le Au Paia o Aso e Gata Ai.
Sa faaauau pea e Elder Wilson mai lea masina i lea masina lana auaunaga taua ae tumu i le tiga, o se faifeautalai. Sa tuuina atu faamanuiaga; sa ofoina foi tatalo. Ona o lana faaa’oa’oga o le tuuto faamaoni, o lea na latalata atili ai ana paaga faifeautalai i le Atua.
Na faasolosolo ina fai ifo le tulaga faaletino o Elder Wilson. Na latalata mai le iuga ma ua tatau ona toe foi i lona aiga. Na talosaga o ia e toe galue mo se isi masina, ma sa talia lana talosaga. Sa ia tuu atu lona faatuatuaga i le Atua, ma na toina mai e Lē na tuu atu le leoa i ai e Thomas Michael Wilson lona faatuatuaga, pupuni o le lagi ma matua faamanuiaina o ia. Na malaga mai ona matua, o Willie ma Julia Wilson, ma lona uso o Tony i le Aai o Sate Leki e fesoasoani e avatu lo la atalii ma le uso i lo latou aiga i Alapama. Peitai, sa i ai se faamanuiaga sa talosia, ma moomoo i ai, e ao ona faaeeina atu. Sa valaaulia au e le aiga matou te o i le malumalu o Jordan River, lea na faataunuu ai na sauniga paia e fusia faatasi ai aiga mo le faavavau, faapea foi i le olaga nei.
Sa ou faatofa atu i le aiga o Wilson. E mafai ona ou vaai atu ia Elder Wilson e oo lava i le taimi nei, a o faafetai mai ia te au ina ua matou faatasi ma lona aiga pele. Fai mai a ia, “E le afaina po o le a le mea e tupu ia i tatou i lenei olaga, pau lava le mea ua ia i tatou le talalelei a Iesu Keriso ma ia ola ai. E le afaina pe sa ou aoao atu le talalelei i lenei itu po le isi itu o le veli, pau lava le mea ia mafai ona ou aoao atu.” Oka se lototele. Oka se talitonuga mautu. Oka se alofa. Sa asaina e le aiga o Wilson le malaga umi i Lafaiete, i le mea na seesee malie atu ai Elder Thomas Michael Wilson mai le olaga nei i le faavavau. Sa falelauasi ai o ia iina ma o loo fai lava lana pine o lona igoa faifeautalai.
Ou uso e, a o tatou tuua lenei sauniga aoao a le au perisitua, ia tatou taumafai malosi e sauniuni mo o tatou taimi ma avanoa ma ia faamamalu i le perisitua o loo tatou tauaveina e ala i auaunaga tatou te tuuina atu, o ola tatou te faamanuiaina, ma agaga ua tatou maua le avanoa e fesoasoani ai e laveai. O outou o se “tupulaga ua filifilia, o se perisitua tau tupu, ma se nuu paia”4 ma e mafai ona outou faia se eseesega. Ou te molimau atu i nei upumoni i le suafa o Iesu Keriso, lo tatou Faaola, amene.