Faatuatua o o Tatou Tama
O le lotu moni e le tatau ona faapogai mai i mea e fiafia i ai tagata po o tu masani a augatama, ae o mea e finagalo ai le Atua, lo tatou Tama Faavavau.
Ua matua faamanuiaina lava i tatou i musika matagofie a le Aufaipese o le Tapeneko.
Ou uso e ma tuafafine pele ma uo, ua ou fiafia lava tatou te tutu faatasi i le aso, ina ua ou maua le avanoa maoae o le valaauina o lo’u tagata o se tasi O Le Ekalesia a Iesu Keriso o le Au Paia o Aso e Gata Ai, ma ua faitaulia ai o se tasi o outou.
Ou te manatua la’u uluai tali atu ina ua ou mauaina lenei valaauga paia mai le Alii e avea o se uso aupito fou o le Au Peresitene Sili o lenei Ekalesia—sa ou lagonaina le matua olioli lofituina. Talu mai lena taimi ua ou aoaoina ai ni itu fou o upu lotomaulalo, lotofaafetai, ma le faatuatua.
E mafai ona ou faamautinoa atu ia te outou e leai se tasi na sili ona ofo i lo’u valaauga nai lo la’u fanau ma a latou fanau.
I le Ekalesia a Iesu Keriso o le Au Paia o Aso e Gata Ai, tatou te le sailia pe tatou te teena foi ni valaauga e aumai mai le Atua e ala i taitai perisitua musuia. Ou te tatalo ia aumai e le Atua ia te au le malosi ma se loto malamalama e faalautele ai lenei valaauga paia e tusa ai ma Lona finagalo ma le faamoemoega.
Ua tatou misia uma lava Peresitene Gordon B. Hinckley. O lona aafiaga i lenei galuega tele o le a faamanuiaina ai pea lava i tatou.
Ua ou lagonaina lava lo’u matua faamanuiaina e galulue vavalalata ma Peresitene Monson. Ua tele tausaga o ou iloaina o ia. O ia o se tamalii ua i ai meaalofa ma taleni ofoofogia. O ia o le perofeta a le Atua. O lona faatuatua ma lona finagalo alofa e oo atu i atunuu uma, o gagana, ma tagata.
Ou te faafetai i lo matou auauna faatasi ai ma Peresitene Eyring, o le ou te alofa ma faaaloalo i ai o se taitai ma se faiaoga maoae i le malo o le Atua.
Ina ua potopoto le Korama a le Toasefululua i le afeafe aupito a luga o le Malumalu o Sate Leki e lagolagoina Peresitene Monson e avea ma Peresitene lona 16 o le Ekalesia, sa ou maofa i tomai tulaga ese, o le tofa, ma le faaleagaga o i latou sa siomia ai au. Na atili ai ona ou iloaina o’u lava tulaga le atoatoa. Ou te alofa i nei tamalii lelei o le faatuatua maoae. Ou te faafetai mo le avanoa e sii ae ai lou lima e lagolago ma tautino atu la’u lagolago mo i latou. Ou te alofa ma lagolagoina Elder Christofferson, o le uso aupito fou o le Toasefululua.
Ina ua tofia e le Alii Frederick G. Williams e avea ma se fesoasoani i le Perofeta o Iosefa Samita, sa Ia poloaiina o ia ina “ia faamaoni”; ia tumau i le tofiga ua ou tofia ai oe; ia fesoasoani i e vaivai, ia sii ae lima o loo tautau i lalo, ma faamalosia tulivae vaivai.”1 Ou te talitonu e faatatau lenei apoapoaiga ia i latou ua talia valaauga e auauna i le malo o le Atua—ma e mautinoa foi e faatatau ia te au i lenei vaitau o lo’u olaga.
O Se Perofeta a le Atua ma Lo Tatou Peresitene
Ou te fia fai atu ni nai upu e uiga ia Peresitene Thomas S. Monson. I ni nai tausaga ua mavae, sa malaga atu ai Peresitene Monson i se konafesi faarisone i Hamburg, Siamani, ma o se faamamaluga mo au lo ma feoai faatasi ma ia. E i ai ia Peresitene Monson se manatua ofoofogia, ma sa ma talanoa e uiga i le toatele o le Au Paia i Siamani—sa ou maofa lava i lona manatuaina lelei o le anoanoai.
Sa fesili Peresitene Monson e uiga ia Uso Michael Panitsch, o se peresitene i aso ua mavae o se siteki, ona fesili lea i se peteriaka o se sa avea ma paionia toa o le Ekalesia i Siamani. Sa ou tau atu ia te ia o Uso Panitsch sa matua gasegase tigaina lava, ma ua faiesea, ma ua le mafai ona auai mai ia matou sauniga.
Sa fesili mai Peresitene Monson pe mafai ona ma asiasi atu ia te ia.
Sa ou iloaina e lei leva ona maea se taotoga o le aao o Peresitene Monson ae malaga atu loa i Hamburg, ma sa le mafai ona savali e aunoa ma le tiga. Sa ou faamatala atu i ai o Uso Panitsch e nofo i le fogafale lona lima o se fale e leai ni eleveita. O lona uiga ma te a’ea’e i faasitepu e vaai o ia.
Ae sa tauanau lava e Peresitene Monson. Ma o lea na ma o ai.
Ou te manatua le faigata ia Peresitene Monson ona ae i na faasitepu. E na o ni nai sitepu lava i se taimi sa mafai ona ia laasia ona fai ai lea o sina malologa. E leai sana upu faitio sa fai, ma sa le mafai foi ona toe foi. Ona o le fale e maualuluga tele ona taualuga, sa foliga mai ai e leai se gataaga o faasitepu, peitai sa sogasoga ma le fiafia Peresitene Monson seia iu ina ma taunuu i le potu o Uso Panitsch i le fogafale lona lima.
Ina ua ma taunuu iina, sa matagofie sa matou talanoaga. Sa faafetai atu Peresitene Monson ia te ia mo lona soifua auauna tuuto, ma sa faalototele atu ia te ia i se soisoi. Ae ma te lei tuua, sa ia tuuina atu ia te ia se faamanuiaga ofoofogia faaleperisitua.
E leai se tasi vagana ai Uso Panitsch, o lona aiga patino, ma au sa vaaia le faatinoga o le lototoa ma le agaalofa.
Sa tatau ona filifili Peresitene Monson e malolo i le va o a matou sauniga uumi sa tasoo. Sa tatau foi ona talosaga e matamata i ni vaaiga matagofie o Hamburg. Sa tele taimi ou te mafaufau ai i le matagofie o lenei mea, e ui lava i le tele o vaaiga uma o lena aai, a o le tasi sa sili atu ia te ia ona vaai i ai, o se uso ua vaivai auma’ia o le Ekalesia sa auauna atu ma le faamaoni ma le lotomaulalo i le Alii.
Na malaga atu Peresitene Monson i Hamburg e aoao ma faamanuia tagata o se atunuu, ma o le mea lena sa ia faia. Peitai, i lena lava taimi, sa taulai atu ai o ia i tagata taitoatasi, o lea igoa i lea igoa. E matuai lautele naua ma mamao lana silasila e malamalama i le lavelave o se Ekalesia ua salalau i le lalolagi atoa, ae e matuai tumu foi o ia i le alofa e taulai atu ai i tagata taitoatasi.
Ina ua tautala le Aposetolo o Peteru e uiga ia Iesu, o le sa avea ma ana uo ma faiaoga, sa ia faaaogaina le faamatalaga faigofie lenei: “Sa femaliuai [o Ia] ma agalelei.”2
Ua ou lagona foi o le mea lava lea e tasi e mafai ona tatou ta’ua ai lenei tamalii na tatou lagolagoina i le aso e avea ma perofeta a le Atua.
O Le Faatuatua o o Tatou Tama
Ou te maofa lava i tamaoaiga faaletomai o tagata o le Ekalesia. E eseese uma aga fesootai ma tulaga faaletamaoaiga o le olaga tou te o mai ai—e eseese aganuu, gagana, tulaga faaupufai, ma tu masani faaletapuaiga.
O lena anoanoai o poto masani o le olaga ua afua ai ona ou manatunatu i le savali a se tasi o a tatou viiga, “Faatuatua o o Tatou Tama.” I le tali, o loo toe fai mai ai foi upu lava nei: “Faatuatua o o tatou tama, faatuatua paia, tatou te faamaoni e oo i le oti!”3
O le faatuatua o o tatou tama—ou te fiafia lava i lena fasifuaitau.
O le toatele o tagata o le Ekalesia, o nei upu e faamanatu mai ai paionia totoa o e sa lafoai i le tulaga sololelei o o latou fale ae malaga i taavaletoso ma savavali seia iu ina latou taunuu i le vanu o le Vaituloto Masima Tele. Ou te alofa ma faamamalu i le faatuatua ma le lototetele o na paionia i le popofou o le Ekalesia. O le taimi lena sa va i vasa le mea sa nonofo ai o’u augatama. E leai se tasi o i latou sa nofo faatasi ma i latou sa aumau i Navu po o Uinita Kuota, e leai foi se tasi o i latou sa laasia laufanua valevalenoa i se faigamalaga. Peitai, i le avea ai o se tagata o le Ekalesia, ou te avea ma le lotofaafetai ma le mitamita lenei talatuu o paionia o sa’u lava talatuu.
Faatasi ai ma lena lava olioli, ou te aveina foi mo’u ia talatuu o paionia o le Ekalesia i ona po nei, o e o loo aumau i atunuu uma, o a latou tala foi o le tutumau, faatuatua, ma taulaga ua faaopoopo atu ai fuaiupu viia fou i le tali o le vii o le malo o le Atua i aso e gata ai.
A mafaufau loloto lo’u aiga i le fasifuaitau “o le faatuatua o o tatou tama,” e tele taimi e oo mai ai le lotu Luteru i le mafaufau. E tele augatupulaga sa auai o matou augatama i lena lotu. O le mea moni, sa maua talu ai nei e lo’u atalii, e i ai se tasi itu o le gafa o lo matou aiga e tau i tua ia Matini Luteru lava ia.
Tatou te faamamalu ma faaaloalo i agaga faamaoni mai lotu uma, e le afaina po o fea a o le a foi le taimi sa soifua ai, o e sa alolofa i le Atua, tusa lava pe lei i ai le atoaga o le talalelei. Tatou te sii ae o tatou leo i le faafetai mo lo latou lototetele ma le le manatu faapito. Tatou te taliaina i latou o ni uso ma ni tuafafine, o fanau a lo tatou Tama Faalelagi.
Matou te tautino atu e a matou le aia tatau matou te tapuai atu ai i le “Atua mamana e tusa ai ma o matou lava loto fuatiaifo, ma matou te tuuina atu foi lea lava aia tatau i tagata uma lava e faitalia i latou, pe faapefea, po o fea, po o le a foi latou te tapuai atu i ai.”4
E Tele ni Faatuatuaga ma Tu Masani a o Tatou Tama
A o fuga taufuifui mai le Ekalesia toefuataiina a Iesu Keriso i le salafa o le kelope—lea ua silia ma le 13 miliona tagata—“o le faatuatua o o tatou tama” ua i ai le uiga faalauteleina. Mo nisi, e mafai ona faasino i lo latou tupuaga faaleaiga i se tasi o le fiaselau o faatuatuaga Kerisiano; mo isi, e mafai ona faasino i tu masani ma faatuatuaga o Sasae Tutotonu, Asia, po o Aferika.
O le tele o lo’u olaga sa faaalu i vaega o le lalolagi e aupito toaitiiti ai tagata o le Ekalesia. I lena taimi, sa ou aoaoina ai o le tele o taimi, a aoao e tagata e uiga i le talalelei toefuataiina, e uunaia ai lava i latou—o le toatele e mananao ai e auai i le Ekalesia. Peitai e mumusu ne’i le fiafia o latou augatuaa; latou te manatu e ao ona latou faamaoni i le faatuatuaga po o lotu a o latou tama.
Ou te manatua a o ou laitiiti, i se tasi Aso Sa sa ou matauina ai se aiga fou i lo matou falelotu—o se tina talavou ma lana fanau teine e toalua. E lei leva ae papatisoina loa le toatolu lea ma avea o ni tagata o le Ekalesia.
Na ou iloa lelei le tala o lo latou liua, aua o le igoa o le teineitiiti matua o Harriet, ma i se taimi mulimuli ane o le a avea ma o’u toalua.
O le tina o Harriet, o Carmen, e lei leva ona maliu lona toalua, i le taimi o le suesueina o ona mafaufauga ma lagona, na fia iloa ai e ia le Ekalesia a Iesu Keriso o le Au Paia o Aso e Gata Ai. Ina ua mavae ona suesue i aoaoga faavae, sa iloa e Carmen ma lana fanau teine e moni le Ekalesia ma sa faia ai loa fuafuaga mo le papatisoga.
E ui i lea, ina ua ta’u atu e Carmen lenei faaiuga i lona tina, sa matua le fiafia lona tina. “E mafai faapefea ona e faatuatuanai i le faatuatuaga o ou tama?” sa ia fesili ai.
E le na o le tina o Carmen na tetee. O le uso loto maaa o Carmen, o Lisa, sa matuai faaletonu i le tala. Atonu o le faaletonu o se upu ua mama tele. Sa matuai ita lava o ia.
Fai mai Lisa o le a alu e sue na faifeautalai ma ta’u atu i ai lo latou sese. Sa matele atu o ia i le falelotu ma maua ai faifeautalai, ma o lena ua outou mateia, na papatiso foi ma Lisa ia.
Na mavae le tele o tausaga, sa maua foi e le tina o Carmen se molimau na toefuatai mai le talalelei a Iesu Keriso i le fogaeleele. I se tasi aso na ia fai atu ai i lana fanau teine ma fanau a lana fanau, “Ou te fia i ai faatasi ma outou i le lagi e tasi.” I le 70 ma ona tupu o ona tausaga, sa ulu ifo ai foi o ia i le vai o le papatisoga ma avea ai o se tasi o le Ekalesia.
O Le Faatuatua o Lo Tatou Tama
O le a la, le faatuatua o o tatou tama? Pe o le lotu ea a o tatou matua, matua o matua, ma matua o matua matutua?
Ae faapefea le faatuatua o i latou anamua i luma atu o i latou? E faapefea Aperaamo, Isaako, ma Iakopo? Pe le o i latou ea o o tatou tama? Pe le o i tatou ea o nisi o le aiga o Isaraelu? E faapefea Noa ma Enoka ma o tatou uluai matua, o Atamu ma Eva?
E faapefea le Faaola ma na soo sa mulimuli ia te Ia?
O le faatuatua o lo tatou Tama oi le Lagi e lei suia lava talu le amataga o taimi, mai lava a o lei faavaeina lenei lalolagi. Sa faamatalaina e Ioane le Talifaaaliga se taua tele i le lagi.5 O le mataupu o le filifiliga saoloto. O i latou uma e soifua ai i luga o lenei fogaeleele, o i latou o nisi sa tau faasagatau atu ia Satani ma sa latou tutu faatasi ma le Alo ma le Tama. O le mea lea, pe ua le tatau ea ona matuai avatu uma lo tatou lotonuu i le Atua lo tatou Tama Faalelagi?
I le avea ai o i tatou ma tagata o le Ekalesia a Iesu Keriso, “tatou te talitonu i le Atua, le Tama e Faavavau, ma i Lona Alo, o Iesu Keriso, ma le Agaga Paia.”6 Ma “tatou te talitonu e faaolaina tagata uma i le Togiola a Keriso, e ala i le usiusitai i poloaiga ma sauniga o le Talalelei.”7 Tatou te talitonu i le fuafuaga sili o le fiafia, le fuafuaga o le togiola, le ata o le faaolataga, lea e mafai ai e fanau a le Atua ona maua le poto masani i le olaga faitino ma toe foi atu i le afioaga o le Tama—o se fuafuaga o le alofa mutimutivale na faatuina a o lei faavaeina le lalolagi.
O le fuafuaga lena ma le faatuatua o lo tatou Tama!
Ou te molimau atu o aoaoga faavae o le talalelei toefuataiina a Iesu Keriso o le faatuatuaga lea o le Tama Faalelagi. O Lana upumoni na toe faaalia i Ana auauna perofeta mai le vaitaimi o le Tama o Atamu seia oo mai i o tatou aso. Sa toe faaali mai le Tama ma le Alo ia Iosefa Samita e toefuatai mai le faatuatuaga o lo tatou Tama i lenei lalolagi, ma ia le toe aveesea lava. E finagalo le Atua mo Ana fanau ina ia latou mauaina uma, tusa lava pe o a latou aga fesootai ma tulaga faaletamaoaiga, aganuu, po o tu masani. O le lotu moni e le tatau ona faapogai mai i mea e fiafia i ai tagata po o tu masani a augatama, ae o mea e finagalo ai le Atua, lo tatou Tama Faavavau.
O faaaliga faifai pea o se vaega taua o lenei faatuatuaga. O le uluai tatalo a Iosefa Samita o se molimau mamana lea o lena mea. O faaaliga o se tapasa faifai pea lea e tausisia ai lo tatou faamaoni i taimi uma i le finagalo ma le faatuatuaga o lo tatou Tama Faalelagi.
E alofa lo tatou Tama Faalelagi i Ana fanau. E faafofogaina e Ia tatalo a ē faamaulalo ma le faamaoni a atunuu taitasi, gagana, ma tagata. Na te tuuina atu le malamalama ia i latou e sailia ma faamamaluina o Ia, ma ua naunau e usitai i Ana poloaiga. Tatou te folafola atu ma le fiafia ua i ai le faatuatuaga o lo tatou Tama i le fogaeleele i le taimi nei.
Tatou te valaaulia tagata uma o i lenei paneta matagofie, ina ia tofo i Ana aoaoga faavae ma iloa ai pe ua le suamalie ea, lelei, ma matagofie. Matou te valaau atu ia i latou e faamaoni o latou loto ina ia aoao i lenei aoaoga faavae ma ole atu i lo latou Tama i le Lagi pe ua le moni ea. O le faia o lena mea, o le a mafai ai ona iloa e tagata uma, talia, ma savavali i le faatuatuaga moni o lo latou Tama, aua o lea faatuatuaga o le a faaatoatoaina ai i latou.8
O la tatou savali lena i le lalolagi.
Ou te tuuina atu se molimau paia i le moni o le Atua le Tama; o Lona Alo, o Iesu Keriso; o le Agaga Paia; ma perofeta soifua o loo umia ki, lea e lei motusia lava lona faasologa mai ia Iosefa Samita seia oo mai ia Thomas S. Monson i le taimi nei. I le suafa o Iesu Keriso, amene.