Taula o Molimau
Ia faamalosia lou faatuatua e ala i le mulimuli i lenei mamanu o le tatalo, suesue, ma le usiusitai i poloaiga.
A o o’u nofo i Asia, sa ou vaai i le tele o vaito’a na lilofia i fugalaau mananaia o lili o le vai. Na faaopoopoina ai se toafilemu matagofie ma se manogi sasala manaia i vaito’a ma le palapala. O lau o lili o le vai e opeopea i luga o le vai, ae o lona umī ma le malo na te taulaina lona tulaga i totonu o le vaito’a. O le tuputupu pea o le ‘au e mautinoa ai le mautu o le fugalaau, e tusa lava pe siisii i luga le maualuga o le suavai i totonu o le vaito’a ona o ni timuga mamafa.
Ou uso talavou pele, e pei uma lava outou o lenei fugalaau matagofie. O lo outou felesi, mama, ma le matagofie ua faaopoopo ai le tele o le lelei i o matou olaga faapea ma olaga o o outou aiga. Ua outou ola i se lalolagi luitauina, ua faaleagaina i faaosoosoga ma faigata, ae peitai o a outou molimau ia Iesu Keriso e mafai ona avea ma o outou taula. O le a faamalolosia le faatuatua i le Alii o Iesu Keriso ma o le a fesoasoani e faatupuina ai a outou molimau, ma o le a mafai ai ona outou tutu maualuga ae i mea leaga o le lalolagi ma faatumauina lo outou tulaga o le amiotonu.
O le taula ua faauigaina o se “mea na te aumaia le mausali po o le to’a i se tulaga le mautonu.”1 O lau molimau o le a avea ma ou taula ma o le a tuuina atu ia te oe le to’a e te tu ai ma le “mausali ma le le mafaagaeetia”2 i le tausiga o poloaiga a le Alii i se lalolagi le mautonu.
O le taimi nei, o loo tuputupu ae lau molimau, e pei o le ‘au o le lili o le vai. O lou faatuatua o le a fesoasoani ai e tuputupu ae ma faatumau lona malosi, e tusa lava pe lua te fetaiai ma luitau ma faaosoosoga o se lalolagi ua faaleagaina i fualaau oona, ola le mama, ponokalafi, ma le tufanua.
“O le faatuatua o se meaalofa mai le Atua, ae e tatau ona faafailele lou faatuatua ina ia faamalosia ai pea… . E mafai ona e faafaileleina le meaalofa o le faatuatua e ala i le tatalo i le Tama Faalelagi i le suafa o Iesu Keriso… . E mafai ona e faamalosia lou faatuatua e ala i le tausia o poloaiga… . E mafai foi ona e atiina ae lou faatuatua e ala i le suesueina o tusitusiga paia ma saunoaga a perofeta o aso e gata ai.”3
Ou te iloaina nisi o tamaitai talavou sa i ai ni fesili e uiga i lavalava tauagafau. Ina ia sailia tali i a latou fesili, latou mulimuli tonu lava i le mamanu lenei: sa latou tatalo i le Tama Faalelagi, sa latou suesue i tusitusiga paia ma afioga a o tatou perofeta o aso e gata ai, ma sa latou usiusitai i le ola lea i faatulagaga tauagafau. A o latou mauaina tali i a latou fesili, na faateleina lo latou faatuatua ma faamalolosia a latou molimau. Ou te valaaulia outou taitoatasi ina ia mulimuli i lenei mamanu.
Muamua, tatalo i lou Tama Faalelagi. Ole atu ia te Ia mo se fesoasoani i le mauaina o tali i au fesili.
Na saunoa mai lo tatou perofeta o Peresitene Thomas S. Monson, i lana uluai saunoaga i talafou:
“O nisi taimi o tali e sili ona lelei e mafai ona [mauaina] e tupulaga talavou i fesili o le olaga, o loo maua lea i o latou tulivae i le valaau atu i lo tatou Tama Faalelagi.
“Afai latou te manatua o loo manatu mai le Alii ia i latou ma o le a tali mai i a latou talosaga, o le a mafai ona latou faafetaiaia luitau uma e oo atu ia i latou.”4 O le a fesoasoani le tatalo e faamalosia ai lou faatuatua ma taula ai lau molimau.
E faaopoopo atu i le tatalo, ia suesue mau e uiga i le faatuatua. O le Alema 32:27 o se vaega maoae lea e amata ai le aoaoina o le faagasologa o le faateleina o lou faatuatua: “Ae peitai, faauta, afai tou te ala mai ma fagua o outou mafaufau e oo i le tofotofo i a’u upu, ma faaaoga sina faatuatua itiiti lava, ioe, afai tou te le mafaia se mea e sili i le manao i le fia faatuatua, ina tuu ia lenei manao e galue i totonu ia te outou, seia lava lo outou faatuatua e talia ai nisi o a’u upu.”
Pe ua e naunau ea e faataitai le aafiaga na oo ia Alema ina ia faateleina ai lou faatuatua? Pe mafai ona e faaaogaina sina vaega itiiti o le faatuatua? Pe o ia te oe ea se manao ia talitonu?
E pei ona e aoao mai i tusitusiga paia, ou te iloa o le a faamanuia oe e le Alii i Lona Agaga ma, e pei o tamaitai talavou na tatou faalogologo atu i ai i lenei afiafi, o le a faapupula ai lou malamalamaaga. O tusitusiga paia o le a faateleina ai lou faatuatua ma fesoasoani e taula ai lau molimau.
O le suesue i afioga a o tatou perofeta o aso e gata ai, o le a faateleina ai foi lou faatuatua. “E mafai lava ona e faatuatuaina i taimi uma perofeta soifua. O a latou aoaoga e faaalia ai le finagalo o le Alii”5 ma o le a fesoasoani e taula ai lau molimau.
Na fautuaina e Peresitene Spencer W. Kimball, o se tasi o o tatou perofeta o aso e gata ai, le autalavou ina ia tutui mau i lalo a latou pou e fesoasoani ia latou “tutumau ai ma le le mafaagaeetia” ina ua ia aoao mai: “E tatau lava i o tatou tagata talavou ona vave tutui mau i lalo a latou pou… . E lua ituaiga pou: ‘O mea nei o le a ou faia’ ma ‘O mea nei ou te le faia.’ … Mai lava i le amataga o le olaga o tagata talavou, e tatau ona taumafai e ola i se fuafuaga… . Afai e fuafua lelei se ala faapena ma ua faapea foi ona faataatia le sini, o le a faigofie lava ona tetee atu i faaosoosoga ma faapea atu e ‘leai’ i le sikaleti muamua, ‘leai’ i le ipu pia muamua, … ‘leai’ i taumafaiga le talafeagai lea e oo atu ai i amioga le mama.”6
O loo i ai sa tatou meafaigaluega maoae lava e fesoasoani i lo tatou tutuiina o na pou. O le Mo Le Malosi o le Autalavou. I totonu o lenei tamaitusi, o le a e maua ai saunoaga a o tatou perofeta o aso e gata ai. O “pou” na faamatalaina e Peresitene Kimball o loo i totonu o lenei tusi: O “mea o le a ou faia” ma “mea ou te le faia.”
Ae peitai, ua le lava le na o le faitau i afioga a perofeta. E ao lava ona e mulimuli i le laasaga faaiu o la tatou mamanu ma “tausia nei tulaga faatonuina ma ola ai i upumoni o loo i tusitusiga paia.”7 O le vaega faigata lenei, ae o le fuafua mamao o mea o le a e faia ma mea e te le faia, ona e ola ai lea i lena fuafuaga, e mafai ai ona faia!
O le faatuatua o se mataupu faavae o faatinoga. Sei ou faamatala atu e uiga i ni tamaitai talavou o e na suesue i saunoaga a perofeta i le Mo Le Malosi o le Autalavou, ona latou faatinoina loa lea. Sa latou faia se fuafuaga, na filifili i le mea o le a latou faia, ma mea latou te le faia, ona ola ai lea i lena fuafuaga.
O se tasi o taiala o loo i le Mo Le Malosi o le Autalavou o loo faapea mai: “O lou ofu ma ou foliga vaaia, e mafai ai ona e faaali atu i le Alii e te iloa le taua tele o lou tino. E mafai ona e faaali atu o oe o se soo o Iesu Keriso.“8
Ina ua uma ona suesue i nei upu, na iloa ai e se tasi o tamaitai talavou o le vasega na outou maimoa i ai i le afiafi nei, atonu sa le atoatoa le tauagafau o ona lavalava. E ala i le tatalo ma le suesueina o tusitusiga paia, na faamanatu atu ai ia te ia, o ia o se soo o Iesu Keriso, ma i le avea ai ma se tasi o Ona sui, e tatau ona ia faia nisi o suiga. Sa lei manao ia toe i ai lava se isi mea i lana pusa lavalava e fai ma faaosoosoga, o lea na faasolo ai i lana pusa lavalava ma pusatoso ma tiai uma lavalava sa le tauagafau. Fai mai o ia, “O le a ou poto pe afai ou te le faataitaia soo se ofu i le faleoloa ou te iloaina e le tatau ona ou ofuina. Aisea o le a faaosoosoina ai?” O lena tautinoga mausali ua faaali atu ai i le Alii e faaaloalo o ia i lona tino, ma na loloto lona tutuiina o le pou o le faia o lavalava tauagafau.
O le isi tamaitai talavou i le vasega na iloaina o ana filifiliga i lavalava na aafia ai le ala na fai ai lavalava o lona uso laitiiti. Fai mai se faaupuga i le Mo Le Malosi o le Autalavou: “O lou ofu ma au teuga e auina atu ai i isi tagata ni savali e uiga ia te oe, ma e faatosina ai au amioga faapea foi ma isi.”9 Na filifili o ia e faia nisi o suiga i ona lavalava, ma le iloaina na i ai sona tiutetauave o le avea ma se faataitaiga lelei i lona uso laitiiti. Sa ia tutuiina faamaulalo lana pou ma na aafia ai filifiliga o lavalava a lona uso.
O le tulaga faatonuina o “Faafiafiaga ma Ala o Faasalalauga” ua aoao mai ia i tatou ia “filifili na o faafiafiaga ma ala o faasalalauga e faagaeetia ai oe. O le a fesoasoani faafiafiaga lelei e te maua ai mafaufauga lelei ma faia ai filifiliga amiotonu.”10 Ou te iloa se tamaitai talavou ma lona uso o e na faalogologo i se CD ae o la iloa ai ni upu sa lei faagaeetia ma e lei fesoasoani foi la te maua ai ni mafaufauga lelei. Sa taufai tilotilo le tasi i le isi ma iloa e ala i le Agaga e le tatau ona la faalogologo i lenei ituaiga o musika. Na aumai e le uso matua se samala ma la tau fai nutililiiina ai le CD. I se tasi taimi muamua atu sa la tutui mau ai ni pou e faatatau i musika. Sa la iloaina musika la te faalogologo i ai ma musika o le a le faalogologo i ai, ma na mafai ona la ola i le la fuafuaga e ala i le mulimuli i uunaiga a le Agaga. O lenei galuega itiiti na faamalolosia ai i laua ma tuuina atu ai le to’a e usitai ai i tulaga e sili atu ona faigata.
O le isi tamaitai talavou na filifili o le tasi o pou i lona olaga o le tausia lea o le Sapati, e tusa lava pe o a tulaga o i ai. E tasi le tausaga talu ona papatisoina e avea ma tagata o le Ekalesia faatasi ma lona aiga, ae vaeluaina le latou uarota. Na tofia lona aiga i le uarota fou na faatoa faatulagaina, ma sa na o ia lava le tamaitai talavou na faatonuina e alu i le uarota fou. Na tetee ona matua i le suiga ma lē toe o ai i le lotu, ae na manao lava o ia e mulimuli i taiala o loo i le Mo Le Malosi o le Autalavou e uiga i le “Tausia o le Aso Sapati.” Sa filifili o ia e alu i le lotu i le uarota fou i soo se taimi na te mafai ai, e ui lava sa alu na o ia i ana sauniga.
I Aso Sa na te faitauina ana tusitusiga paia ma galue i lana tusi o le Alualu i Luma o le Tagata Lava Ia. O lana filifiliga e “tutumau ma le le mafaagaeetia” i le tausiaina o le Sapati na faamalosiauina ai lona tina ma lona uso laitiiti e amata ona toe o i le lotu. Na molimauina e lona tina e faapea, o faataitaiga mausali a lana tama teine e ola i le talalelei ma le vaaia o lona lelei, na fesoasoani ia te ia e toe toaga ai [i le lotu].
“E te faaalia lou faatuatua e ala i au mea e fai—i le ala e te ola ai.”11 O olaga o nei tamaitai talavou ua faaalia ai lo latou faatuatua. Ma ia manatua o lo latou faatuatua ma olaga o faataitaiga, na iu i ni galuega lelei. Sa faamanuiaina e ni uso ia nisi uso, ma na fesoasoani se tama teine i lona tina ia toe toaga mai i le Ekalesia.
O nisi o outou atonu ua manatu ifo e le mafai ona outou o ese mai vaito’a eleelea, ua faapea e faigata tele o outou tulaga, ma faigata tele o outou tofotofoga, ua maoae naua o outou faaosoosoga. Ae ia manatua le folafolaga a Alema: “O i latou uma o e faalagolago i le Atua, e lagolagoina i latou i o latou tofotofoga, ma o latou tiga, ma o latou puapuaga, e faaeaina foi i latou i le aso gataaga.”12 Ia manatua, o le au o le lili vai e ola i faigata, ma e pei ona siitia e le ‘au ia le lili o le vai, e faapena foi ona lagolagoina ma siitia oe e lou faatuatua.
Ou uso talavou pele, o lau molimau ia Iesu Keriso o lo’u taula lea. Ia faamalosia lou faatuatua e ala i le mulimuli i lenei mamanu o le tatalo, suesue, ma le usiusitai i poloaiga. Ia tutui faamaulalo ia pou e ala i le filifili nei loa po o a mea o le a e faia ma mea e te le faia, ona e galue loa lea i lau fuafuaga.
Ou te molimau atu e alofa le Alii ia te outou taitoatasi ma o le a faamanuiaina outou i a outou taumafaiga ina ia “tutumau ma le le mafaagaeetia.” E moni le talalelei a Iesu Keriso, ma o lou malamalama ma le molimau ia Iesu Keriso o le a matuai taula lelei ai oe, ma o le a mafai ona e faatumauina lou tulaga a o e tu atu mo le upumoni ma le amiotonu. O nei mea ou te molimau atu ai ma le lotomaulalo, i le suafa o Iesu Keriso, amene.