O E Iloaina O Ai Oe?
O le iloaina po o ai oe e te malosi ai, mausali, ma tumau faaleagaga i ou tiute faale-perisitua
A o avea au ma se alii talavou i le Perisitua Arona ou te manatua le sagisagi fiafia sa ou lagonaina o se tiakono faatoa faauuina. Sa ou tulitulimatagau ia mafai ona faataunuuina ou tofiga faaleperisitua. A o avea au ma se tamaitiiti o le Peraimeri, sa ou matauina ma le toto’a tiakono o lau uarota a o ou faatalitali atu i le aso o le a 12 ai ou tausaga, maua le perisitua, ma mafai ona tufa le faamanatuga. Na iu lava ina oo mai lena aso, ma e lei pine ona faauuina au e lo’u tama, o le sa avea ma epikopo o le uarota, ae ou lagonaina ua ou saunia, ae sa ou gatete, e amata o’u tiute o se tiakono fou.
Ua ou i ai nei i se korama o le Perisitua Arona. Sa avea uso o la’u korama ma au uo mamae. Sa tuputupu pea lena faigauo ma le usoga faale-korama i lo’u talavou a o matou aoaoina ma auauna atu faatasi i o matou tiute faale-perisitua. Sa avea i matou uma ma ni uo lelei, ma sa matou maua se taimi malie ma fiafia faatasi ai i a matou gaoioiga faale-korama.
I se tasi Aso Sa ina ua mavae se tasi o na sauniga uumi o le faamanatuga lea e uma ua ta le lava lava, sa valaau mai au e le fesoasoani muamua i le au epikopo e fia talanoa ia te au. O lenei faatalanoaga faale-perisitua e lei fuafuaina, sa avea ma se faamanuiaga i lo’u olaga ina ua ou mafaufau loloto i le fesili sa ia tuuina mai ia te au i le taimi o la ma’ua talanoaga puupuu ae taua tele. Sa tilotilo sa’o mai Uso Bateman i ou mata ma fesili mai, “Dean, o e iloaina o ai oe?” Sa matua sāō atoatoa lena taimi ona ia tuuina mai lea o se faamanatu faatopetope ma le mamana, “O oe o le atalii o Reid Burgess.”
Sa umi ona mumu le uiga ma le taua o lena fesili i lo’u loto, ma e tele taimi sa ou manatunatu ai i ai i tausaga o lo’u talavou. O lena fesili a lenei uso lelei—“O e iloaina o ai oe?”—na ou maua ai se tomatauga musuia i lo’u olaga atoa ma se tautinoga ou te aumaia le faaaloalo ma le mamalu i lo’u aiga faapea le perisitua.
O le po nei, ou te fia fesili atu ia te outou taitoatasi alii talavou o le Perisitua Arona i lena lava fesili e tasi na fesiligia ai au a o ou talavou, “O e iloaina o ai oe?”
O le iloaina po o ai oe e te malosi ai, mausali, ma tumau faaleagaga i ou tiute faale-perisitua. E te mautinoa ai ma le faatuatua ma le naunautai e faia faaiuga sa’o. E i ai ia te oe le lototoa e te tu atu ai mo le mea e te iloa ua tonu. E te iloa ai o se faamanuiaga le umia o le perisitua a le Atua ma maua ai le pule e galue ai i Lona suafa.
O Amona, se faifeautalai maoae o le Tusi a Mamona, o se auauna faamaoni ma le lototoa a le Tupu o Lamonae. Sa ia faasaoina faavavega le lafu a le Tupu o Lamonae, ma sa ia faia mea uma na te mafaia e tautuaina ai le tupu. Ina ua faalogo i galuega mamana a Amona, sa tuufesili Lamonae po o ai moni lava Amona. Sa tau atu e Amona:
“Faauta, o au o le tagata, o lau auauna foi; o lenei, soo se mea tonu e te finagalo i ai, o le mea lea ou te faia.
“O lenei, ina ua faalogo le tupu i nei upu, ua toe ofo o ia, aua ua iloa e ia ua mafai e Amona ona iloa ona manatu; a e ui i lenei mea, ua fai mai le tupu o Lamonae ia te ia: Po o ai ea oe? O oe ea o lena Agaga Sili ua silafia mea uma?”
“Ua tali atu Amona ia te ia, ua faapea atu: E leai, e le o au lea.”
Ona faamatala atu lea e Amona o ia ina ua fai atu, “O au o le tagata; … sa faia e foliga i le Atua, ma ua valaauina foi au e lona Agaga Paia e aoao atu … i lenei nuu” (Alema 18:17–19, 34). Na iloa e Amona ia lava, ma lana misiona moni.
O le iloaina pe o ai i tatou o se tasi o sailiga aupito sili o le olaga. I le avea ai o ni matua ma ni taitai, tatou te faia se taumafaiga ma le loto ma le faamaoni e fesoasoani ai ia i latou tatou te alolofa i ai, ina ia latou malamalama ma iloa le tali i lenei fesili faigofie ae loloto ma anoa, “O ai ea au?”
Ou te fesili atu ia te outou alii talavou o le Perisitua Arona, E faapefea ona outou mauaina se iloa ma se molimau pe o ai outou?
Faamolemole mafaufau i fesili nei e tolu ma mataupu faavae e fesootai i ai, ia e talafeauga e malamalama ai i lou faasinomaga moni.
Muamua, o e iloaina o oe o se atalii o le Atua?
O oe moni lava o se atalii o le Atua, “na fanauina faaleagaga i le muai olaga. I le avea ai ma Ona atalii, e mafai ona faamautinoaina oe o loo ia te oe ni agavaa paia e faavavau ma o le a fesoasoani atu [lou Tama Faalelagi] ia te oe i au taumafaiga faamaoni e ausia na agavaa” (Faamaoni i le Faatuatua: O Se Tusitaiala o le Talalelei [2004], 86).
O le iloa e alofa le Tama Faalelagi ia i tatou ma o i tatou foi o Ana fanau, tatou te maua ai le malosi, mafanafana, ma le faamoemoe e ola ai i lenei olaga faitino. I le Tusi Muamua a Ioane ua tatou faitau ai:
“Faauta, i le silisili o le alofa ua foaiina mai e le Tama ia te i tatou, ina ua ta’ua i tatou o le fanau a le Atua: o le mea lea e le iloa ai i tatou e le lalolagi, aua na le iloa o ia.
“Le au pele, o le fanau i tatou a le Atua i nei ona po” (1 Ioane 3:1–2).
E taua outou i se Tama alofa oi le Lagi! Alii talavou, ia tatalo e le aunoa! O au tatalo i le taeao ma le afiafi, o le a fesoasoani e te iloa ai o oe lava o se atalii o le Atua.
Lona lua, o e iloaina o ai oe i le fuafuaga a le Atua?
Sa faaigoaina e Alema o le “ala sili o le fiafia” (Alema 42:8), o se fuafuaga sa saunia e le Atua mo oe ma i tatou uma taitoatasi. O le mulimuli ai i lenei fuafuaga e mafai ai e i tatou taitoatasi ona olioli i le fiafia i le taimi nei ma toe foi atu ai i Lona afioaga pe a tatou oti. Na auina mai e le Tama Faalelagi Lona Alo Pele, o Iesu Keirso, e “tatala noanoaga o le oti” (Alema 7:12) ma togiolaina a tatou agasala ma agasala a le lalolagi. O le tuuina mai o le Faaola e togiola a tatou agasala, o le faaaliga aupito sili lea o le alofa o le Tama Faalelagi mo i tatou taitoatasi. “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau” (Ioane 3:16). O le iloa, talitonu, ma le malamalama i le misiona a le Faaola e fesoasoani tatou te iloa ai po o ai i tatou.
O se vaega o le fuafuaga a le Tama Faalelagi, ua auina mai oe i se aiga faalelalolagi ma se auaiga. O feagaiga na e osia i le fuafuaga a le Atua, o lou lava tagata ma se vaega o se auaiga, o le a fusia ai oe e faavavau i lou aiga ma le aiga o le Atua, mo le faavavau atoa. Ia faamamalu ma faaaloalo i na igoa e te tauaveina. Ola i tulaga faatonuina ma poloaiga a le Atua. Tuu atu i isi ia latou iloa po o ai oe e ala i lou ola ai i tulaga faatonuina, o loo maua i le tamaitusi Mo Le Malosi o le Autalavou. Suesue, manatunatu loloto, ma ola ai i nei tulaga faatonuina paia. E mo outou!
Lona tolu, o e iloaina o ai oe i le avea ai ma tagata O Le Ekalesia a Iesu Keriso o le Au Paia o Aso e Gata Ai?
Ua uma ona papatisoina oe ma ua mauaina foi le Agaga Paia. O oe o se tasi o le Ekalesia toefuataiina a Iesu Keriso. O Lana Ekalesia, ma ua Ia tuuina mai se perofeta a le Atua e aoao, tomatau ma taiala i tatou, ma faatonutonu Lana galuega i le lalolagi. Ou te molimau atu o Peresitene Thomas S. Monson o lo tatou perofeta i nei “aso faigata” (2 Timoteo 3:1). Faalogo ia te ia. O le a aoaoina oe e ia ma isi perofeta o nei aso, po o ai oe ma pe faapefea ona avea e faapei o le Faaola.
O oe o se tasi O Le Ekalesia a Iesu Keriso o le Au Paia o Aso e Gata Ai, ma ua faauuina e umia le perisitua a le Atua. Na saunoa mai Peresitene Monson, “Ua faatuatuaina i tatou e umia le perisitua ma galulue i le suafa o le Atua. O i tatou ia ua tuuina mai i ai se faatuatuaga paia. E tele naua mea ua faamoemoe mai tatou te faia” (O Se Perisitua Tau Tupu” Liahona, Nov. 2007, 59).
O oe o se tasi o le korama faale- perisitua a alii talavou, lea e mafai ai ona e lagonaina le [alofa] faaleusoga ma le faauoga a isi o loo umia le perisitua. O le korama o se puipuiga mo oe mai faatosinaga faalelalolagi. Ua mafai ona outou feauaunaai ma auai i le faatinoga o sauniga o le perisitua. I totonu o a outou korama, ua aoaoina ai foi outou i mataupu faavae o le talalelei a Iesu Keriso, lea e fesoasoani ai ia te oe ia e malamalama po o ai oe. Alii talavou, ia faamamalu i le perisitua a le Atua.
Ou te molimau atu o le iloaina po o ai oe ma tausia au folafolaga ma feagaiga ma le Alii, o le a e aumaia ai le fiafia i lou olaga.
Talosia ia mafai e i tatou uma ona iloa ma malamalama po o ai moni lava i tatou. Talosia le Agaga ua tatou lagonaina i le po nei ia tuuina mai le “molimau i o tatou agaga, o fanau i tatou a le Atua” (Roma 8:16). I le suafa o Iesu Keriso, amene.