Toefuataiina o le Faatuatua i le Aiga
O aiga mautu e saunia le faavae lena e taofiofia faatasi uma ai le lalolagi ina ia manuia ai tagata uma.
O le malamalama i le “fuafuaga sili o le fiafia,”1 ua tatou maua ai le avanoa ma le matafaioi e fesoasoani atu ai ina ia toefuataiina le faatuatua i le aiga.
I le tele o auala e faatusatusa ai la tatou galuega ia i latou o loo galulue faafomai ma sailiga faasaienitisi. I le faaaogaina o tulafono ua faavaeina, latou te fuafuaina ai pe mafai faapefea ona aveesea le mafatia ae faaleleia le tulaga o le olaga.
I le vaega o talitonuga faalelotu, e mafai e alii ma tamaitai faatuatua, i le faaaogaina o mataupu faavae ua faamaonia,2 ona fesoasoani e faamaloloina se loto mafatia, toefuatai le faamoemoe ma le mautinoa i se mafaufau fesouaiina.
O le tulaga faamanuiaina o le saienitisi, e ausia ona o le usitaia o le vaega lea e masani ona faatatau i ai o tulafono faalenatura. E lei fatuina e saienitisi maoae o le taimi ua mavae ma le taimi nei ia ni tulafono e o faatasi ma nei mea e tutupu faalenatura, sa latou mauaina.
I se tusi i tagata i Korinito, na tuu atu ai e le Aposetolo o Paulo se fesili faatupu manatu e faatatau i le puna o le atamai o le tagata: “Po o ai foi se tagata ua iloa mea a le tagata, ua na o le agaga o le tagata o loo i totonu ia te ia?”3
O le poto masani ma le aoaoina, e faatupulaia ai le iloa ma faalauteleina ai le malamalama. O le faaaogaina o lenei faiga, e iloa ai teori ma tulafono ma taliaina ai o ni mea moni.
O le mea e tasi ua manino mai i le mafaufau malamalama, o loo i ai tulafono e faapaleniina ai le olaga ma meaola o loo i ai. I le mauaina o tulafono o le fisiki ma lo latou usitaia ua maua ai le alualu i luma, ua mafai ai e le tagata ona siisii i luga i tulaga maualuluga o le ausiaina lea semanu e le mafaia.
Ou te talitonu o lenei manatu e faatatau foi i faatulagaga talafeagai ma tulaga faatauaina o amioga. O lea la, o lo tatou tiutetauave le puipuia o le aiga i le avea ai ma nofoaga autu e mafai ona faamautuina ai nei tulaga taua i se siosiomaga o le alofa ma e auala mai i le mana o faataitaiga.4
Na aoao mai Peresitene Thomas S. Monson, “E moomia e le autalavou le toalaiti o ni tagata faitio ae ia toatele atu ni faataitaiga e mulimuli ai.”5
I lo’u toe tomanatu i lo’u lava olaga ua ou iloa ai le auala sa ou maua ai se agaga talisapaia mo tulaga faatauaina autu ia e talafeagai mo le atiina ae o se tagata lelei. O fea sa ou aoaoina ai le faamaoni, amio sao ma le faatuatuaina? Sa ou aoaoina nei uiga lelei i le aiga mai faataitaiga a o’u matua. Na faapefea ona ou maua se agaga talisapaia mo le taua o le auaunaga e le manatu faapito? Sa ou mauaina e ala lea i le matauina ma le fiafia o le tuuto atu o lo’u tina i lona aiga. O fea na ou aoaoina ai le ava ma le faamamalu i afafine o le Atua? Sa ou aoaoina mai faataitaiga a lo’u tama.
O totonu o le aiga lea sa ou aoaoina ai mataupu faavae o le ola magafagafa ma le taua o le galue. O loo mafai pea ona ou vaaia faalemafaufau le faaaluina e lo’u tina o le tele o po i le fale, a o faaaoga lana laau suisui e sosoli i vae, e sui ai seevae o se fale seevae i le taulaga. Sa le faia lenei mea ina ia mafai ai ona faatau se mea mo ia lava ae sa fesoasoani e maua mai ai le lagolago tau tupe ina ia mafai e ma’ua ma lo’u uso ona ma aooga i le kolisi. Sa ia faailoa mai mulimuli ane faapea o lenei auaunaga sa avea ma se puna o le lotomalie mo ia.
O lo’u tama o se tagata e limalima ma atamai. Sa ia aoaoina au i le auala e tipi ai laupapa e faaaoga ai le ili lima, o le auala e sui ai pe faapipii ai se palaka i le uaea o le eletise o se masini i le fale, ma le tele o isi tomai faatino.
O nei lesona uma o loo momoli mai ai se autu e tasi: aua ne’i faamalieina i se mea e i lalo ifo o au taumafaiga silisili.
Sa ou atiina ae le mafaia ona fai ni faaiuga taua e ala lea i le talanoa i o’u matua ma aoao mai i a laua fautuaga. I le faaopoopo atu i mea na taua muamua: o le tali atu mo oe lava, o le manatu mo isi, o le uunaia o le sailia o avanoa faaleaoaoga, ma o le a le uma lava le lisi.
I le faaopoopo atu i mea na taua muamua: o le tali atu mo oe lava, o le manatu mo isi, o le uunaia o le sailia o avanoa faaleaoaoga, ma o le a le uma lava le lisi.
Sa faailoa mai ia te au le Talalelei Toefuataiina a Iesu Keriso i tausaga o lo’u talavou e Pamela, o le na avea mulimuli ane ma o’u toalua. Sa ia fesoasoani e avea lo’u olaga o se olaga sili ona lelei mai se amataga faatauvaa.6
Ua ou aeae i tausaga e 67 o se mafutaga fiafia i le faaipoipoga ma se olaga faaleaiga—e 21 tausaga sa avea ai ma se atalii i le fale o o’u matua ma le 46 tausaga o le avea ai ma se tane, ua faatumutumuina i le olioli i le avea ai ma se tama ma se tamamatua. O le a se isi mea e sili atu e faamoemoe i ai se tasi? E faigofie lava lona faaupuga, o nei avanoa foi o le a olioli ai tagata taitoatasi.
I le toe foi atu i aoaoga a Paulo o loo tusia i le Korinito tatou te maua ai upu nei:
“E faapea foi ona le iloa e se tasi mea a le Atua [sei vagana ua ia te ia] le Agaga o le Atua …
“Ae le talia e le tagata faaletino o mea a le … Atua: aua o mea valea ia ia te ia: na te le mafai foi ona iloa, aua e faamasinoina faaleagaga.”7
E tele lava ina maua e saienitisi lo latou malamalama mai sailiiliga, o le faia o faataitaiga ma le faaaogaina o le atamai.
O soo o Keriso e maua mai la latou molimau e ala i le suesueina o Ana afioga, matauina o Ana galuega, faataitaia o mataupu faavae, faapea ma le agaga o musumusuga.8
“O i ai lava le agaga i totonu o le tagata: o le manava foi a Le e ona le malosi uma lava e faapopotoina ai i latou.”9
E ui e foliga mai o upumoni faaleagaga e tau le tino mai, ae i le loto faamaualalo e le mafai ona teena lona aafiaga. E taua ona malamalama, o tulafono faaletino sa lei fuafuaina i le tulaga o le lauiloa. Sa faavaeina ma faamautuina i le mausali o le moni.
E i ai foi tulafono e le’i tutupu mai ma tagata.10 E tutotonu i se fuafuaga paia, lea afai e maua ma faaaoga, o le a aumaia ai le fiafia tele ma le faamoemoe i la tatou faigamalaga i le olaga nei.11
Mo se faataitaiga, ou te talitonu, e pei ona taua i le “O Le Aiga: O Se Folafolaga i le Lalolagi”12 ma o loo faauigaina mai i faaaliga paia, o le faaipoipoga ma le aiga na faauuina e le Atua. O loo faailoa mai e tusitusiga paia, “O le mea lea e tuua ai e le tane lona tama ma lona tina, ae faatasi ma lana ava: ona avea ai lea o i laua ma tino e tasi.”13
Ua saunia e alii popoto se talatuu o le aoaoina mai aso ua tuanai. E tatau ona tatou tuufaasoloina atu i tupulaga o le lumanai se faavae o le faatuatua i le aiga, e pei ona faauigaina mai e le Silisiliese.14
E le tatau lava ona galo ia i tatou o le saolotoga ma le fiafia i vaega uma o le olaga e oo mai i le malamalama ma ola ai e tusa ma mataupu faavae e faavavau. Latou te saunia se faavae mautinoa e atiina ae ai i luga se olaga fiafia ma le faamanuiaina atoatoa.15
I le mulimuli ai i le mamanu o loo faamatalaina i le fuafuaga a le Tama ua mafai ai ona ou iloa le uiga o le “nonofo ma le fiafia”16 ma le “utu vai ma le olioli i vaipuna o le faaolataga.”17
Na aoao mai le Faaola, “Ua ou sau ina ia latou maua le ola, ia maua atili ai lava.”18
O o tatou foliga vaaia po o amioga e mafai i nisi taimi ona taofiofia ai lo tatou mafaia ona ‘ae‘ae i avanoa silisili o le olaga.
E mafai ona tuuina mai le fesili, “Ae faapefea i latou o e latou te lei mauaina lava se siosiomaga lelei faaleaiga?”
O aiga mautu e saunia le faavae lena e taofiofia faatasi uma ai le lalolagi ina ia manuia ai tagata uma, e oo lava ia i latou o e ono lagonaina o loo latou ola i ni tulaga e le lelei.
Mo i latou o e ola faamaoni19 ma tatalo ma le onosai mo ni mafutaga faapea,20 ou te fia faasoa atu i ai ni upu faamafanafana a Helen Steiner Rice:
Afai e faia e le Atua se folafolaga,
E tumau pea le moni e faavavau,
O mea uma lava ua folafola mai e le Atua
Na te le toe suia lava.
Afai e te tautevateva
Ma ua lofituina faamoemoega uma,
Ia toe manatua folafolaga a le Atua
Ma o le a toe faamalosia lou faatuatua.21
Ou te tatalo ina ia mafai ona tatou tutu faatasi, ma le lototetele ma le talitonuga maumaututu, e avea ma leoleo o le meaalofa ua tuuina mai e le Atua, o le aiga. I le suafa o Iesu Keriso, amene.