Ua Fiafia Lo’u Agaga i Mea a le Atua
Fiafia i mea a le Alii … e “siitia” ai o tatou loto ma aumaia ai ia i tatou le faapogai o le “olioli.”
I le Tusi a Mamona, e masani ona ta’ua soo ai e Nifae le fiafia. E fiafia o ia “i mea a le Atua,” “i tusitusiga paia,” ma le “ala sili ma le faavavau” a lo tatou Tama oi le Lagi (tagai 2 Nifae 4:15–16; 11:2–8). O le mea mataina, e masani ona manatua e Nifae ia punavai o lona fiafia i le lotolotoi o ona puapuaga, e fai ma mea e siitia ma taulai atu ai lona agaga i faamanuiaga e faavavau.
E tatau foi ona tatou fiafia i mea a le Alii aua e “siitia” ai o tatou loto ma aumaia ai ia i tatou le faapogai o le “olioli” (2 Nifae 11:18). Sei ou ta’uina atu ni nai mea ou te fiafia ai.
Ou te fiafia i lo tatou Faaola o Iesu Keriso. E pei o Nifae, “Ou te olioli i lo’u Iesu” (2 Nifae 33:6), i Ona tiute o le aoao atu ma le faaola i luga o le fogaelele. Ua Ia tuuina mai le malamalama ma le faamoemoe, ma tuuina mai le Agaga Paia e taialaina atili ma faamafanafanaina i tatou i le ala e tatau ona tatou ui ai. Ua na o le ui atu ia te Ia e mafai ai ona tatou toe foi atu i lo tatou Tama. “E leai se tasi igoa e foaiina mai, po o se tasi ala e oo mai ai le olataga i le fanauga a tagata, ua na o le suafa lava o Keriso” (Mosaea 3:17).
Ou te fiafia i le talalelei toefuataiina a Iesu Keriso ua fausia i luga o le faavae o aposetolo ma perofeta, ua faapea ona faamanuiaina au i le avanoa e auauna atu ai. Ou te molimau atu o Peresitene Thomas S. Monson o le perofeta a le Alii i luga o le fogaeleele i ona po nei. Ou te fiafia ona o ia o se auauna moni i tagata taitoatasi, e faapei o Keriso, e aapa atu i le agalelei ma le alofa i tagata taitoatasi.
Ou te fiafia i ki o le perisitua ma malumalu ua i ai i le lalolagi atoa, ua maua ai e i tatou taitoatasi ia sauniga ma feagaiga e faavavau. O nisi o o’u aso lata mai nei na sili ona faaselesitila, o faaipoipoga faalemalumalu a la’u lava fanau, faapea ai ma le faatinoina e lo’u tama o lena lava sauniga paia.
Ou te fiafia i le malosi o le autalavou a o ou vaaia i latou o tumutumu i malumalu e fai papatisoga mo e ua maliliu. Ou te fiafia i lo latou agavaa faamaoni i tulaga faatauaina e taitaiina atu ai i le malumalu, ma a latou sauniuniga e avea ma ni faifeautalai faamaoni ma ni tina ma tama amiotonu.
Ou te fiafia ona o au o se afafine o le Tama Faalelagi o le e alofa ia te au. Na ou aoao e uiga i lo’u faasinomaga paia a o ou laitiiti i autafa o lo’u tina. Lata mai nei lava na ou vaai ai i le tama teine a la’u tama i le tolu o ona tausaga o aoao i lona faasinomaga mai lona tina. Na alu Eliza e moe ma le le fiafia. Na pau lava le ala na mafai ona faamalieina ai o le toe faamatalaina lea e lona tina le tala moni e sili ona fiafia i ai Eliza, e uiga i se po faapitoa na musumusu atu ai le Tama Faalelagi ma le mautinoa ma le manino i le loto o lona tina e faapea, o Eliza o se agaga faapitoa ma e i ai sana misiona mamalu i le lumanai.
Ou te matua fiafia tele i lou tiute o se e faafailele, lea e mafai ai ona faailoa atu lo’u faasinomaga loloto o se tamaitai. E faagaeetia lava au i le ala e foliga mai e maua ai e tamaitai, tamaitai talavou, faapea foi ma teineiti laiti se lagona faalenatura ma gafatia i le faafaileleina. E le gata o se tiutetauave autu a se tina, ae o se vaega foi o lo tatou “muai olaga, olaga faitino, ma le faamoemoega e faavavau” (“O Le Aiga: O Se Folafolaga i le Lalolagi,” Liahona, Oke. 2004, 49). O le faafaileleina o le aoao, o le faateleina o le alualu i luma, o le faateleina o le tuputupu ae, o le fafaga, ma faafailele. O ai sē a le alaga i le olioli i le tuuina i ai o se tiute faamanuiaina faapena?
E na o le faalua lava ona faaaoga i tusitusiga paia le upu faafailele ma o ia tulaga uma o loo tautala ai e uiga i le tiutetauave a matua i le tausiga o a latou fanau i le “ma le aoaiga ma le apoapoaiga a le Atua” (Efeso 6:4; Enosa 1:1).
Na apoapoai atu foi Peresitene Hinckley i alii ma tamaitai ina ia avea i latou ma e faafaileleina [fanau]. Na saunoa o ia, “E maeu le matagofie o le a i ai … nuu uma o loo tatou nonofo ai pe afai e vaai uma atu ia tama … ma … tina uma i a [latou] fanau … o ni meaalofa mai le Atua o le lagi … ma tausia i latou i le alofa moni i le atamai ma le apoapoaiga a le Alii” (“O i Latou Nei, O a Tatou Fanau,” Liahona, Tes. 2007, 7).
Ou te fiafia i aiga. Talu ai nei lava, na ou fiafia ai i le fanau mai o se pepe fou a la’u tama i totonu o se aiga ua malamalama ua i ai i matua le tiutetauave paia o le tausiaina o a latou fanau i le alofa ma le amiotonu. Na i ai se fiailoa masani a nai ona tei matutua e uiga i le oo mai o lo latou tei laitiiti i lenei lalolagi. O la latou lesona muamua e uiga i lenei mataupu paia na aoaoina i ai e ni matua agaalofa i se faatasiga paia faaleaiga, i le vaitaimi faaselesitila lea e o mai faatasi ma le fanau mai o se agaga fou i le olaga nei faapea ma le fuafuaga e faavavau a lo tatou Tama. O le eseesega, i le aso na sosoo ai ina ua foi mai o ia mai le aoga faataitai, sa ta’u atu e le tama teine a le ma tama e faapea, sa ia aoaoina i le aoga i lena aso “se upu fou umī e ta’u o le sauaina i feusuaiga.” Sa ou lagona le popole ona o lenei laitiiti o le matua ae ua tatau ona mataala ia tamaiti, ona o mafuaaga mo le saogalemu, i itu le lelei o le mataupu sa matagofie ona latou talanoaina i le po na sei muamua atu. Sa ou fiafia e pei o se taimi muamua lea i se aiga ua faafaileleina e faavae i aoaoga a Iesu Keriso.
Ua aoao mai Iakopo e faapea, e fiafia le Alii i le “lē gavia o fafine” (Iakopo 2:28). Ou te fiafia i le lē gavia ma le mama o tamaitai ma alii uma. E matuai faanoanoa lava le Alii i le silasila mai i le lē faamamaluina o le ola mama ma le faatausuai i le tausaafia ma le tauagafau i itu uma o lenei lalolagi amioleaga. Ua saunia e le Alii mo Lana fanau le olioli tele i mafutaga mafana ma le alofa, e pei ona sa aoaoina e le fanau a la’u tama. Ou te fiafia i le manino o le folafolaga i le lalolagi e uiga i le aiga, o loo faapea ona lapatai mai e faapea “o tagata taitoatasi o e ua solia feagaiga o le ola mama, o e faasaunoa i taitoalua po o fanau, o e ua faatalale i le faataunuuina o tiutetauave faaleaiga, o le a i ai se aso tou te tutu atu ai e tali atu i luma o le Atua.”
Ou te fiafia i faataitaiga a i latou o loo i tusitusiga paia o i latou o e na savavali i le faatuatua, a o soifua ai i le lalolagi. Soo se taimi lava ou te faitau ai e uiga ia Aperaamo ma Isaako i le ala e agai atu i le Mauga o Moria, ou te tagi, ma le iloa e le’i iloa e Aperaamo o le a faapea ona i ai se agelu ma se tamai mamoe po’a i le laau filifili i le faaiuga o le malaga. O loo tatou i ai uma i le ogatotonu o a tatou malaga faalelalolagi, ma tatou te le iloa le isi vaega atoa o a tatou lava tala. Ae o i tatou foi e pei o Aperaamo, ua faamanuiaina i vavega.
Ou te fiafia i le alofa ma vavega a le Alii (tagai “Bless Our Fast, We Pray,” Hymns, nu.138). Ou te iloa e moni Lona alofa mutimutivale ma Ana vavega tetele ma laiti. E oo mai i Lana lava ala ma i Lana lava taimi atofaina. O nisi taimi sei iloga lava tatou te oo i le mea e gata ai lo tatou gafatia. Sa galulue malosi soo o Iesu i le Sami i Kalilaia i le aloina o o latou vaa e faasaga atu i le matagi na agi mai luma i le po atoa, ona faatoa oo atu lea o Iesu e fesoasoani ia i latou. Na faatoa oo atu o Ia ia i latou “i le leoleoga e fa o le po,” o lona uiga na lata i le vaveao. Ae na afio mai lava o Ia (tagai Mareko 6:45–51). O la’u molimau e faapea, e oo mai lava vavega, e ui o nisi taimi seiiloga lava e oo i le leoleoga e fa o le po.
O le taimi nei o loo faaaoga lo’u faatuatua ma talosaga ma vaavaai mo vavega e fai ma sui o e pele o loo gasegase i le tino, lofituina faalelagona, ma o loo sē faaleagaga. Ou te fiafia i le alofa o le Alii mo Lana fanau taitoatasi ma Lona poto i le tuuina mai ia i tatou taitoatasi o ni aafiaga faalelalolagi e fetaui tonu ma i tatou.
Ma le vaega mulimuli, ou te fiafia, ma e sili atu i lo upu ou te faamatalaina ai, i le alofa e faavavau ma le fesoasoani faifaipea a lo’u toalua faapea ma talosaga ma le lagolago a la’u fanau ma matua i nei tausaga o la’u tautua o se peresitene aoao o Tamaitai Talavou.
“E fiafia lo’u agaga i mea a le Atua” (2 Nifae 4:16)—i Lana tulafono, Lona soifua, Lona alofa. O le fiafia ia te Ia o le faailoa atu lea o Lona aao i o tatou olaga. O lo tatou tiute faaletalalelei o le faia o le mea sa’o ma ia alofa ma fiafia i le mea sa’o. A tatou fiafia e auauna atu ia te Ia, e fiafia foi lo tatou Tama oi le Lagi e faamanuia mai i tatou. “O a’u le Alii, … ou te fiafia lava e faamamalu i e auauna mai ia te au i le amiotonu ma le upu moni e oo i le iuga” (MFF 76:5). Ou te manao ina ia ou agavaa i taimi uma mo Lona fiafia. “Ou te alofa i le Alii, e olioli lo’u agaga ia te Ia” (“I Love the Lord,” Jackman Music Corporation). I le suafa o Iesu Keriso, amene.