Toe Fanauina
O le toe fanauina faaleagaga e mafua mai i le faatuatua ia Iesu Keriso ma o Lona alofa tunoa lea e suia ai i tatou.
I le sefululima tausaga talu ai, sa ou tu ai mo le uluai taimi i le pulelaa o le Tapeneko, o se Fitugafulu faatoa lagolagoina. Sa 48 ou tausaga i lena taimi. Sa mafiafia, ma lanuenaena malosi lo’u lauulu. Sa ou manatu sa ou malamalama i le uiga o le lagonaina o le le agavaa. I le faaiuga o la’u tautalaga e lima minute, sa sisina mai lo’u afu i lo’u ofutino. Sa foliga mai o se suega le mea atoa. O le aso, i se toe tepa atu i ai, e foliga mai o se aafiaga e fai si malie.
Ina ua faatoa lagolagoina Peresitene Dieter F. Uchtdorf ma Elder David Bednar e avea ma uso o le Korama a Aposetolo e Toasefululua, na oo mai ia te au se molimau o le faapogai paia o o laua valaauga, i le taimi o le sauniga. Sa aumai foi ia te au i lena lava taimi, se malamalama o le paia a’ia’i o le valaauga ma le galuega a se Aposetolo a le Alii o Iesu Keriso. E leai ni au upu e faamatala ai lena malamalama aua na ta’u mai e le Agaga i le agaga e aunoa ma ni upu. A mafaufau i ai, ona ave ifo ai lea o au i le loloto o le lotomaulalo ou te lei oo i ai muamua, ma ou te ole atu i lo’u Tama Faalelagi ina ia lagolagoina au i le mea sili Na te mafaia, ina ia mafai ona fuatia au i se mea e sili mamao atu i lo’u lava malosi, ma mafai ai ona ou taulai atu i fafo, ma ofo atu ai a’u lava i lana galuega. Ou te faatuatua ia te Ia ma ou te iloa ua lava Lona alofa tunoa, ma o lea ou te tautino atu ai mea uma ua ia te au, ma a’u lava i le Atua ma Lona Alo Pele. Ou te tautino atu foi au lava, o lo’u lotonuu faamaoni, o la’u tautua, ma lo’u alofa i le Au Peresitene Sili ma o’u Uso o le Toasefululua.
O lo’u faamanuiaga faapeteriaka, na ou maua i le 13 o o’u tausaga mai lo’u tamamatua pele, o loo aofia ai le faamatalaga lenei: “Ua auina mai oe [e lou Tama Faalelagi] i lenei tisipenisione mulimuli ma le mamalu, ina ia mafai ona e fanau mai i le feagaiga fou ma le faavavau, e ni matua lelei ma le amiotonu.” Faatasi ai ma le agaga talisapaia loloto, ou te faailoa atu ai na avea lena ma faamanuiaga faavae sili o lo’u olaga. Ou te faamalo atu i o’u matua, ma faatasi ai ma lo’u alofa, ou te faailoa atu lonofo aitalafu ia te i laua ma o la’ua matua ma augatupulaga i luma atu. E lei leva ona valaauina au i le Au Fitugafulu, sa ou maua se taimi ou te tu ai i le tuugamau o se tasi o na tuaa, sa maliu ae ou te lei fanau mai. A o ou mafaufau loloto i osigataulaga na oo ia te ia ma lona aiga i lo latou taliaina o le talalelei toefuataiina a Iesu Keriso, sa faatumulia lo’u loto i se lagona o le lotofaafetai, ma sa tupu ae se faaiuga ia te au, ia faamamalu i lana taulaga ma taulaga a i latou sa sosoo atu ma ia e ala i lo latou faamaoni i le Atua ma feagaiga o le talalelei, e pei ona sa latou i ai.
I le faailoaina atu o o’u faamanuiaga, ou te faaaofia ai ma o’u uso pele ma o latou taitoalua, ia o loo faatasi mai i le aso. O ma’ua ma lo’u toalua e toafa o ma atalii ma se afafine, ua taufai faaipoipo uma i ni toalua lelei, a o lo’u atalii laitiiti, e le o toe mamao ona faaipoipo lea i se tamaitai talavou lalelei. Ma te alolofa tele ia te i latou ma a latou fanau, ma e talisapaia lo latou faamanuiaina o o ma’ua olaga ona o lo latou lotonuu faamaoni i le Faaola ma lana talalelei. O le faatumutumuga, o lo’u toalua, o Kathy, o le ma tausiaiga, o le sulu o lo’u olaga, o se soa mausali ma le atamai, e tumu i lagona faaleagaga, e agamalie, agalelei ma agaalofa. E le mafaamatalaina lo’u alofa ia te ia, ma ou te faamoemoe e faailoa atili atu i ai i aso ma tausaga o i luma.
O se faamanuiaga mo au le avea ma faifeautalai faamisiona a o ou talavou i Atenitina, i lalo o le faatomatauga a peresitene maoae se toalua o misiona ma o la’ua faletua, o Patricia ma Jeanene. Ou te faafetai i le Atua mo la latou uunaiga tumau ia te au. Ina ua maea lo’u faauuga mai le aoga faaloia, sa manuia le atiina ae o lo matou aiga ma lo’u toalua o Kathy ma le ma fanau i setete o Maryland, Tennessee, Virginia, Karolaina i Matu, ma Iuta i le taimi nei. E tolu tausaga taua na matou i ai i Mekisiko. I nei nofoaga uma, sa faamanuiaina i matou i uo pele i totonu ma fafo atu o le Ekalesia, o e sa alolofa ma aoao ma faauo i ma’ua ma le ma fanau, ma o loo faaauau pea ona faia. Ou te faaaogaina lenei avanoa e faailoa faalauaitele atu ai lo matou agaga faafetai mo i latou uma.
O lo’u alofa ma lo’u manatu i o’u uso o le Au Fitugafulu ma le Au Epikopo Pulefaamalumalu, e leai se tuaoi. Ou te fiafia ona o la’u auaunaga faifai pea, o le a matou vavalalata ai pea ma i latou, ma o le a i ai avanoa faalausosoo matou te galulue faatasi ai. O faaaliga ua tuuina mai i o tatou taimi, ua faatulagaina ai le Au Fitugafulu i le Ekalesia, ua faaopoopo ai se tasi o vavega aupito maoae ma atonu e le o lava lona talisapaia i le talafaasolopito o le galuega a le Alii i aso e gata ai. O le Au Fitugafulu o le ki lea i le manuia o le galuega i le taimi nei ma tausaga o i luma, ma ou te lagona lava le faamamaluina e le mafaatusalia, ona sa aofia ai ma lo’u igoa ma i latou. Ia faamanuia atu le Atua ia te outou, o’u Uso e.
Ou te fia tuuina atu la’u molimau ia Iesu Keriso, o le Alo o le Atua, ma le mana o Lana taulaga togiola e le iu. I lo’u faia o lena mea, ou te faamatalaina ai se aafiaga mai tausaga sa ou i ai i Tennessee. I se tasi afiafi iina na ou maua ai se telefoni i le fale mai se tamalii ou te le iloa. Sa ia faailoa mai o ia o se faifeau o se tasi faatuatuaga e lei leva nei ona malolo, ma sa ia talosaga mai ma te feiloai na o maua i le Aso Sa e sosoo ai. Ina ua ma feiloai, na saunoa mai ma le faamaoni o ia e faapea na oo atu ona o lona popole mo le manuia o lo’u agaga. Sa ia aumaia mai lana ato taitai se lisi e fai si umi o mau mai le Feagaiga Tuai ma fai mai e manao ina ia ma iloiloina faatasi nei mau ma vaai pe mafai ona fesoasoani ina ia faasaoina ai au. Sa taufai si o’u ofo i lona tuusao mai, ae na mafai ona ou iloaina lona faamaoni, ma sa ootia au i lona naunautai faamaoni mo au.
E silia ma le itula o ma talanoa ma la’u malo, ma sa malie o ia e faalogo ia te au a o ou faamatalaina se mea e uiga i lo’u talitonuga e faapea foi ona ma faitauina faatasi nisi o aoaoga mai le Tusi a Mamona lea e le masani ai. Sa ma iloaina e tele mea e tutusa ai o ma talitonuga ae o nisi mea e leai. Sa ma lagonaina se sootaga o le faigauo ma tatalo faatasi ai ae lei tuumuli ese o ia. O le mea na tumau ia te au o le ma talanoaga lea e uiga i le toe fanauina. O le toefanauina faaleagaga e ala ia Iesu Keriso, o le aano lena o la’u molimau ia te Ia.
O Iesu na fetalai faapea o le ulufale atu i le malo o le Atua e moomia ai ona toe fanau se tasi—ia fanau i le vai ma le Agaga (tagai Ioane 3:3–5). O Lana aoaoga e uiga i se papatisoga faaletino ma le faaleagaga ua fesoasoani ai ia i tatou ina ia malamalama o la tatou faatinoga ma le faatasi mai o se puluvaga mai le lagi e moomia mo lenei toe fanauina—mo le suia mai le tagata o le lalolagi i se tagata paia. (tagai Mosaea 3:19). Na faamatalaina e Paulo le toe fanauina i lenei faamatalaga faigofie: “O lenei, afai o ia Keriso se tasi, o le tagata fou ia” (2 Korinito 5:17).
Manatunatu i faataitaiga e lua mai le Tusi a Mamona. Pe tusa ma se seneturi a o lumanai le soifua mai o Keriso, sa aoao ai e le Tupu o Peniamina lona nuu i le afio mai ma le Togiola a le Faaola. O le Agaga o le Alii e aumaia sea suiga tele i tagata lea na “le toe i ai so latou manatu e fai amio leaga, ae fia fai pea lava le amio lelei” (Mosaea 5:2). Ona o lo latou faatuatua ia Keriso, na latou fai mai ai, “Ua matou fia osi le feagaiga ma lo tatou Atua e fai lona finagalo, ma usiusitai i ana poloaiga … i o matou aso uma ua totoe” (Mosaea 5:5; ua faatusilima mea e faamamafa). Na tali atu le tupu, “Ona o le feagaiga ua outou faia e ta’ua outou o le fanau a Keriso, o ona atalii ma ona afafine, aua faauta, o le aso nei ua fanaua ai outou e ia i le faaleagaga; aua ua outou fai mai ua liua o outou loto ona o le faatuatua i lona suafa” (Mosaea 5:7; tagai foi MFF 76:24).
E aoga foi le tulaga na oo ia Alema. A o latou o atu ma ana soa e saili e faaumatia le Ekalesia a Keriso, sa aoaiina i latou e se agelu. Ona sosoo ai lea ma ao e tolu ma po e tolu lea na faamatalaina e Alema e faapea sa ia “tigaina ai i le puapuaga faavavau… . Ioe, sa ou manatua au agasala uma, ma au amioletonu, e i ai ona tigaina au i puapuaga o seoli” (Alema 36:12–13). I le faaiuga, ina ua uma ona “salamo e tali oo i le oti” (Mosaea 27:28), e pei ona ia faaupuina ai, ona oo mai ai lea i lona mafaufau le savali matagofie a Iesu Keriso ma Lana Togiola. Sa aioi Alema, “Iesu e, le Alo o le Atua, ia e alofa mai ia te au, o loo i le au oona ma ua noanoatia i filifili o le oti faavavau” (Alema 36:18). Na oo mai le faamagaloga ia te ia, ma sa ia tulai ma tautino atu faalauaitele:
“Ua ou salamo i au agasala, ma ua togiolaina au e le Atua; faauta, ua fanauina au i la le Agaga.
“Na fetalai mai foi le Atua ia te au: Aua e te ofo, aua e ao ina toe fanauina tagata uma lava, ioe, o tane atoa ma fafine, o atunuu uma, ituaiga, ma gagana eseese, ma nuu; ioe, ia fanauina i la le Atua, ma ia liua mai le faaletino ma le pau i le amiotonu, ona ua togiolaina e le Atua, ma ua avea mona atalii ma afafine;
“Ua faapea foi ona avea i latou ma tagata fou” (Mosaea 27:24–26).
A o tatou manatunatu i nei faataitaiga ma isi mau, e matuai manino mai ai lava o le toe fanauina faaleagaga e mafua mai i le faatuatua ia Iesu Keriso ma o Lona alofa tunoa lea e suia ai i tatou. Ae matuai patino lava foi, o le faatuatua ia Keriso o Lē Togiola, o le Faaola o le e mafai ona faamamaina agasala ma faapaiaina ai (tagai Mosaea 4:2–3).
A mauaa lenei faatuatua moni i totonu o se tagata, e mautinoa lava le tau atu i le salamo. Na aoao mai e Amoleka e faapea o le taulaga a le Faaola o le a “faataunuuina ai le faaolataga ia te i latou uma o e faatuatua i lona suafa; o le uiga lea o lenei taulaga faaiu e faataunuu mai alo alofa, e manumalo i le faamasinoga, e faaoo mai ai i tagata le ala latou te faatuatua ai e oo i le salamo” (Alema 34:15, ua faatusilima mea e faamamafa).
Ae peitai, ina ia faaatoatoaina, e moomia e le salamo se feagaiga o le usiusitai. O le feagaiga lenei na faamatalaina e le nuu o Peniamina “e fai le finagalo o le [Atua], ma usiusitai i ana poloaiga” (Mosaea 5:5). O le feagaiga lenei e molimauina i le vai o le papatisoga (tagai Mosaea 18:10) o nisi taimi e faatatau i ai tusitusiga paia o le “papatisoga o le salamo” po o le “papatisoga e tau atu i le salamo” ona o le laasaga faaiu lea ma le maa auau o lo tatou salamo. (tagai, mo se faataitaiga, Galuega 19:4; Alema 7:14; 9:27; MFF 107:20).
Ma e pei ona folafola mai, e papatisoina i tatou e le Alii “i le afi ma le Agaga Paia” (tagai 3 Nifae 9:20). Na toe faaupuina faapenei e Nifae: “Aua o le faitotoa tou te ulu atu ai, o le salamo lea ma le papatisoga i le vai; ona oo mai ai lea o le faamagaloina o a outou agasala i le afi ma le Agaga Paia” (2 Nifae 31:17).1 O le faalagolago la “i le galuega a lē malosi i faaola” (2 Nifae 31:19), e “faaolaolaina [ai i tatou] i le agaga” (Mose 6:65) ma, tusa pe lei atoatoa ona toe fanaufouina, a o la ua tatou i ai i le ala o le toe fanaufouina faaleagaga.
O lenei, ua lapataia i tatou e le Alii ina ia gauai atu aua “e mafai lava le tagata ona pau ese mai le alofa tunoa” (MFF 20:32), e oo lava ia i latou ua faapaiaina (tagai f. 32–34).E pei ona apoapoai mai Nifae: “E tatau ona outou fetaomi atu i luma ma le faamaoni ia Keriso, ina ua i ai le faamoemoe atoatoa lelei, i le ma le alofa atu i le Atua atoa ma tagata uma. O lea, afai tou te fetaomi atu i luma, o fiafia i le afioga a Keriso, ma tumau lava e oo i le iuga, faauta, o loo faapea ona fetalai mai le Tama: Tou te maua le ola faavavau” (2 Nifae 31:20).
Atonu tou te fesili, Aisea e le vave ai ona tupu lenei suiga tele ia te au? E tatau ona e manatua ia faataitaiga ofoofogia a le nuu o le Tupu o Peniamina, Alema, ma isi i tusitusiga paia e—matua ofoofogia ae e le o se mea e masani ai.2 O le toatele lava o i tatou, e faifai malie suiga ma e umi se taimi e tulai mai ai. O le toefanaufouina, e le pei o lo tatou fananau mai i la le tino, o se faasologa ae le o se mea ua fuafua e tupu. Ma o le galue ai i lena faasologa, o le faamoemoega tutotonu lea o le olaga nei.
O le taimi foi lea, aua ne’i o tatou tauamiotonuina i tatou lava i a tatou taumafaiga faasamasamanoa. Aua ne’i faamalieina i tatou e taofiofi ni lagona e faia le leaga. Ia tatou aai ma feinu ma le agavaa i le faamanatuga i vaiaso taitasi ma faaauau pea ona pipiimau i le Agaga Paia ina ia veleeseina ia muiaa o mea eleelea o loo totoe i totonu ia i tatou. Ou te molimau atu a o outou faaauau ai i le ala o le toe fanauina faaleagaga, o le a aveeseina e le alofa togiola o Keriso a outou agasala ma pisipisia o na agasala o loo ia te outou, o le a mou ese atu faaosoosoga, ma o Keriso o le a faapaiaina ai outou, e pei ona paia o Ia ma lo tatou Tama.
Ou te iloa o Iesu Keriso o le Alo toetu, ma soifua o le Atua.
“[Ou te] iloa o le faamaoniga e ala i le alofa tunoa o lo tatou Alii ma le Faaola o Iesu Keriso e tonu ia ma faamaoni;
Ma [ou te] iloa foi, o le faapaiaga e ala i le alofa tunoa o lo tatou Alii ma le Faaola o Iesu Keriso e tonu ia ma faamaoni, ia i latou uma e alolofa ma auauna atu i le Atua ma o latou loto atoa, mafaufau atoa, ma le malosi atoa” (MFF 20:30–31; tagai foi Moronae 10: 32–33).
Ou te olioli ona o aso o totoe o lo’u ola o le a mafai pea lava pea ona ofo atu ia Keriso, ia ofo atu le tala fiafia e uiga ia Keriso i le lalolagi atoa. Ou te molimau atu i le moni ma le alofa o le Atua, lo tatou Tama Faalelagi, o le na avatu i ai e Iesu le mamalu uma. Ou te alofa ma molimau atu i le Perofeta o Iosefa Samita. O lana aleaga patino ma le Alii, o lana faaliliuga ma le lomiga o le Tusi a Mamona, ma le faamaufaailogaina o lana molimau i lona toto na faamaturoina, na avea ai Iosefa ma talifaaaliga aupito silisili ese a Iesu Keriso i Lona uiga moni o le Togiola paia. E leai se isi molimau sili atu a Iesu po o se uo e sili atu nai lo Iosefa Samita. Ou te tautino atu la’u molimau i le valaauga o Peresitene Thomas S. Monson o le perofeta ma Peresitene o le Ekalesia a Iesu Keriso i le taimi nei, ma tautino atu lo’u lotonuu faamaoni ia te ia i lena matafaioi paia. Ou te tatalo mo faamanuiaga a le Atua ia i luga o i tatou uma. I le suafa o Iesu Keriso, amene.