Lesona 18: Faafaileleina o le Sootaga o le Faaipoipoga
Lesona 18
Faafaileleina o le Sootaga o le Faaipoipoga
Folasaga
“O le tane ma le ava ua i ai se tiutetauave paia e alofa ma tausi e le tasi le isi”(“O Le Aiga: O se Folafolaga i le Lalolagi,” Ensign po o le Liahona, Nov. 2010, 129). E ala i le faaaofia o le Tama Faalelagi ma Iesu Keriso i a tatou sootaga ma ola faatasi i mataupu faavae o le talalelei a Iesu Keriso, o tane ma ava e mafai ona ausia le fiafia faaiu o le faamoemoega lena o le fuafuaga a le Atua.
Faaali atu le saunoaga lenei a Elder Russell M. Nelson o le Korama a Aposetolo e Toasefululua, ma valaaulia se tamaitiiti aoga e faitau leotele:
Ata
Elder Russell M. Nelson
“O le faaipoipoga e maua ai avanoa sili atu mo le fiafia, nai lo se isi lava sootaga faaletagata soifua. Ae e i ai nisi ulugalii faaipoipo, e le taunuu i le tulaga atoatoa latou te gafatia. Ua tuu lava le alofa logoitino ia elea, ua leai lava ano le tasi i le isi, ua faataga isi mea e fiafia i ai po o ao valevale o le le amanaia e faapogisa ai le vaaiga i le mea moni e mafai ona oo i ai a latou faaipoipoga. E mafai ona sili atu le fiafia o faaipoipoga, pe afai e faafaileleina ma le matua faautauta” (“Faafaileleina o Faaipoipoga,” Ensign po o le Liahona, Me 2006, 36).
O a uiga masani po o uiga faaalia e te manatu e ono mafua ai ona “elea” le faaipoipoga?
Faamatala atu o ulugalii o e faatagaina a latou faaipoipoga ia elea o nisi taimi e iu a latou faaipoipoga i le tatalaina. Tau atu i tamaiti aoga faapea i le taimi o le galuega a le Faaola i le lalolagi, na finau mai nisi Faresaio faapea o le tatala o le faaipoipoga na tauamiotonuina e oo lava i mafuaaga matuia, ma na latou saili e faaaofia ai Iesu i le feteenaiga e ala i le fesili atu mo Lona finagalo e uiga i le tatalaina o faaipoipoga. Fai i se tamaitiiti aoga e faitau leotele le Mataio 19:3-8, ma valaaulia tamaiti aoga e vaavaai mo eseesega i le va o uiga o le Faaola ma Faresaio e agai i le faaipoipoga. Afai e manaomia, faamatala atu faapea o se tusiga o le tatalaina o se faaipoipoga sa avea o se faamatalaga aloaia faapea o se alii e tatau ona tuuina atu i lana ava ae lei auina ese atu o ia.
O a upu i le fuaiupu 3 ua faaalia ai le uiga o Faresaio agai i le faaipoipoga ma le tatalaina o se faaipoipoga? (Sa faatagaina le “faatea,” po o le tatalaina o se faaipoipoga, “ona o mea uma.”)
O le a le aoaoga a Iesu i le fuaiupu e 8 e feteenai ma lenei manatu ae faamaonia ai le natura paia o le faaipoipoga? (Mai lava i le taimi o Atamu ma Eva, na fuafuaina e le Atua faaipoipoga ina ia faavavau. Ina ia faamamafaina lenei aoaoga faavae, mafaufau e fai i tamaiti aoga e fesootai fuaiupu 8 ma le Failauga 3:14 ma le Mose 4:18.)
Faasoa atu le saunoaga lenei mai ia Elder Dallin H. Oaks o le Korama a Aposetolo e Toasefululua:
Ata
Elder Dallin H. Oaks
“O le ituaiga faaipoipoga e manaomia mo le faaeaga—e faavavau le umi ma e uiga faaleatua—e le mafaufau i le tetea. I malumalu sa o le Alii, e faaipoipo ai ulugalii mo le faavavau atoa. Ae o nisi faaipoipoga e le agai i luma i lena tulaga. Talu ai ‘le maaa o o [tatou] loto’ [Mataio 19:8], e le o faamalosia ai e le Alii i le taimi nei ia taunuuga o le tulaga faaselesitila. Na te faatagaina tagata ua tatala faaipoipoga e toe faaipoipo e aunoa ma le pisipisia i le le mama o loo faapatino mai i le tulafono maualuga atu” (“Tatalaina o Faaipoipoga,” Ensign po o le Liahona, Me 2007, 70).
Ina ia fesoasoani i tamaiti aoga ia malamalama i mea e mafai e tane ma ava ona fai ina ia ausia ai le ituaiga faaipoipoga e manaomia mo le faaeaga, fai i tamaiti aoga e faitau le fuaiupu muamua o le palakalafa lona ono i le folafolaga i le aiga.
O a tiute a tane ma ava i le tasi ma le isi? (Ao tali mai tamaiti aoga, tusi i le laupapa lenei fuaitau mai le folafolaga i le aiga: “O le tane ma le ava ua i ai se tiutetauave paia e alofa ma tausi e le tasi le isi.”)
O le a le uiga ia te oe faapea o ulugalii ua faaipoipo ua i ai se “tiutetauave paia e alofa ma tausi e le tasi le isi”?
Ina ia fesoasoani i tamaiti aoga ia malamalama atili i lenei tiutetauave, valaaulia le afa o le vasega e faitau le Mataupu Faavae ma Feagaiga 25:5, 13-15, ma le isi afa e faitau le Mataupu Faavae ma Feagaiga 42:22 ma le Efeso 5:25, 28-31. Fai i tamaiti aoga e vaavaai mo mataupu faavae ua aoao mai ai pe faapefea ona faafaileleina se faaipoipoga ona tusi lea o mea ua latou maua i le laupapa. A maea se taimi talafeagai, fai i tamaiti aoga e filifili se tasi o aitema ua tusia i le laupapa ma faamatala mai le uiga ia i latou.
Faasoa atu le saunoga lenei a Elder L. Whitney Clayton o le Au Peresitene o le Fitugafulu ma fai i le vasega e faalogo mo manatu faapitoa i upu pipii ma le tuua:
Ata
Elder L. Whitney Clayton
“O faaipoipoga e aupito fiafia ua ou vaai i ai, e suluia mai ai le usiusitai i se tasi o poloaiga aupito fiafia—ia tatou ‘nonofo faatasi i le alofa’ [MF&F 42:45]. I le fetalaiga i tane, na poloai mai ai le Alii, ‘Ia e alofa i lau ava ma lou loto atoa, ma ia e pipii atu ia te ia ae le o se isi’ [MF&F 42:22]. Ua aoao mai e se tusitaulima a le Ekalesia: ‘O le upu pipii o lona uiga ia matua tuuto atoatoa atu ma faamaoni i se tasi. O ulugalii faaipoipo e pipii atu i le Atua ma le tasi i le isi e ala i le tautua ma le alofa o le tasi i le isi e ala i le tausia o feagaiga i le faamaoni atoatoa o le tasi i le isi faapea foi i le Atua O le tane ma le ava e ‘tuua o latou olaga nofofua ae amatalia a latou faaipoipoga e avea ma [a latou] uluai faamuamua. … Latou te le faatagaina lava se isi tagata po o se mea e fiafia i ai, ia sili a’e se faamuamua i o latou olaga nai lo le tausia o feagaiga ua latou osia ma le Atua faapea foi le tasi i le isi’ [Tusitaulima 2: Taitaiina o le Ekalesia, (2010), 1.3.1]. Matau ma aoao: o ulugalii faamanuiaina e alofa le tasi i le isi i le tuuto atoatoa” “Faaipoipoga: Matau ma Aoao,” Ensign po o le Liahona, Me 2013, 85).
O a nisi o mea atonu e “tuua” e tane po o ava ina ia “pipii” atu le tasi i le isi?
E faapefea e ulugalii faaipoipo ua e iloa ona faaalia le alofa ma tausia a latou ava?
O a mea o loo e faia nei o le a fesoasoani e saunia ai oe ina ia alofa ma tausia ma le le manatu faapito lou toalua i le lumanai?
Valaaulia se tamaitiiti aoga e faitau leotele le Aperaamo 5:15-18. Fai i le vasega e mulimuli i le faitauga, ma vaavaai mo mea ua aoao mai e nei fuaiupu e uiga i le sootaga i le va o tane ma ava.
E tusa ai ma nei fuaiupu, o a sini e tatau ona galulue agai i ai se tane ma se ava? (Ina ia “tino e tasi.”)
Tusi le ata lenei i luga o le laupapa:
Ata
tafatolu o le faaipoipoga
Saunia mo tamaiti aoga taitasi se kopi o le saunoaga lenei a Elder David A. Bednar o le Korama a Aposetolo e Toasefululua, ma fai i se tamaitiiti aoga e faitau leotele le palakalafa muamua ao vaavaai le vasega mo le mea o loo suitulaga ai le ata:
Ata
Elder David A. Bednar
“O le Alii o Iesu Keriso o le totonugalemu lea o se sootaga o se feagaiga i le faaipoipoga. Faamolemole ia matau le Faaola o loo tuu i le tumutumu o lenei tafatolu, ma se tamaitai i le tasi tulimanu o le faavae ma se alii i le isi tulimanu o le faavae. Manatu la i le mea e tupu i le va o le sootaga i le va o le tane ma le fafine ao taitasi i laua ona ‘o mai ia Keriso’ ma taumafai ina ia ‘faaatoatoaina ia te Ia’ Moronae 10:32). O le Togiola ma e ala mai foi ia te Ia, e tuufaatasia le tane ma le fafine.
“Ao tofu faalatalata atu le tane ma le ava (tagai i le 3 Nifae 27:14) i le Alii, a o aoao e i laua e auauna atu ma faapelepele e le tasi le isi, a o taufai fefaasoaai o laua aafiaga o le olaga ma tuputupu ae faatasi ma avea ma tino e tasi, ma a o faamanuiaina i laua e ala i le tuufaatasia o o laua natura tulaga ese, e le pine ae o laua iloaina le fiafia lea e finagalo ai le Tama Faalelagi mo Lana fanau. O le fiafia tupito, o le faamoemoega tonu lava lea o le fuafuaga a le Tama, e maua e ala i le osia ma faamamaluina o feagaiga o le faaipoipoga e faavavau” “E Taua le Faaipoipoga i Lana Fuafuaga Faavavau,” Liahona, Iuni 2006, 50).
E tusa ai ma le saunoaga a Elder Bednar, o le a se mea e mafai ai e se tane ma se ava ona vavalalata atili? (A o tali mai tamaiti aoga, faamamafa atu le mataupu faavae lenei: A o taumafai tane ma ava e o mai ia Keriso, e mafai ona tasi i latou ia latou faaipoipoga.
E mafai faapefea i lou manatu ona fesoasoani le o mai ia Keriso o se tane ma se ava ina ia vavalalata atili ai?
Fai i se tamaitiiti aoga e faitau leotele le palakalafa lona lua o le saunoaga a Elder Bednar. Ona fesili atu lea:
E tusa ai ma le saunoaga a Elder Bednar, o a mea e tatau ona fai e ulugalii ina ia maua ai le “fiafia tupito” lena e finagalo i ai le Atua mo i latou?
O a ituaiga o mea ua e vaaia i ulugalii o fai e ausia ai le lotogatasi ma le olioli i le faaipoipoga?
Faitau ona molimau atu lea i le moni o lenei saunoaga a Ezra Taft Benson (1899–1994):
Ata
Peresitene Ezra Taft Benson
“O le faaipoipoga lava ia e tatau ona manatu i ai o se feagaiga paia i luma o le Atua. Ua i ai i se ulugalii ua faaipoipoina se matafaioi e le gata i le tasi ma le isi, ae i le Atua foi. Ua Ia folafola mai faamanuiaga ia i latou o e e faamamaluina lena feagaiga” Aoaoga a Peresitene o le Ekalesia: Ezra Taft Benson [2014], 183).
E mafai faapefea e taitoalua ona ese a latou amioga pe afai latou te vaai i le faaipoipoga o se feagaiga paia ua faia e le gata o le tasi i le isi ae faapena foi i le Atua?
O le a se mea e mafai ona e faia i le taimi nei e sauniuni ai mo se faaipoipoga i le malumalu?
Luitauina tamaiti aoga e tusi i a latou api talaaga mea o loo latou faia nei ma mea e mafai ona latou faia i le lumanai e saunia ai mo le faaipoipoga e faavavau.