O le faaipoipoga e faavavau e taua mo le faaeaga i le tikeri aupito maualuga o le malo selesitila, ma e faatoa mafai ona ausia i le faamauina i le pule tatau i le malumalu ona ola ai lea e tusa ai ma feagaiga na osia i lena taimi. O lenei lesona o le a faamaonia ai i tamaiti aoga o le faaipoipo i le tagata sao i le nofoaga sao ma i le pule sao o le filifiliga e sili ona taua o le a latou faia.
Faamatala atu o le taua o le faaipoipoga na aoaoina mai talu mai lava aso popofou o le Ekalesia. O le aoaoga faavae o le faaipoipoga e faavavau, e ui i lea, e lei aoaoina faalauaitele e le Perofeta o Iosefa Samita seia oo i le vaitaimi o Navu. Faaali atu le saunoaga lenei a Elder Parley P. Pratt (1807-57) o le Korama a Aposetolo e Toasefululua, lea e faamatalaina ona lagona ina ua ia aoaoina i le taimi muamua lava faapea o le faaipoipoga e mafai ona faavavau. Valaaulia se tamaitiiti aoga e faitau leotele.
Ata
Elder Parley P. Pratt
“Na ou aoao mai ia [Iosefa Samita] faapea o lau ava peleina e mafai ona faamauina ia te au mo le taimi nei ma le faavavau atoa. … O ia na ou aoao mai ai faapea e mafai ona tatou atiina ae nei uiga alofa, ma faatupuina ma faateleina tutusa lava i le faavavau; ao avea o se taunuuga o lo tatou faatasia faavavau o ni fanau e toatele e pei o fetu o le lagi, po o oneone o le matafaga. … Na ou alofa muamua, ae ou te lei iloaina pe aisea. Ao lenei ua ou alofa—ma se mama aiai—o se lagona malosi ua faateleina ma faaeaina” (Autobiography of Parley P. Pratt, lol. Parley P. Pratt Jr. [1938], 297–98).
O le a le aafiaga o le malamalama fou o Elder Pratt i le faaipoipoga i ona lagona mo lana ava?
Faamatala atu faapea o le tele o aoaoga a le Alii e uiga i le faaipoipoga e faavavau e maua i le Mataupu Faavae ma Feagaiga 132 . Valaaulia se tamaitiiti aoga e faitau leotele le Mataupu Faavae ma Feagaiga 132:19. Fai i le vasega e mulimuli i le faitauga ma faailoa mai tulaga e tatau ona ausia ina ia faavavau ai se faaipoipoga.
O a tulaga e tatau ona ausia ina ia faavavau ai se faaipoipoga? (O tamaiti aoga e tatau ona malamalama i le vaega lenei: O le faaipoipoga e faavavau mo i latou o e faaipoipoina i le afioga a le Atua, o a latou faaipoipoga e faamauina e le Agaga Paia o le Folafolaga, ma o e ola ai i le feagaiga.
O le a le uiga o le “ola ai i le feagaiga”? (Ia tausia aiaiga ma tulaga o le feagaiga o le faaipoipoga. Ao ulu atu le alii ma le tamaitai i le faaipoipoga e faavavau, la te faia ni folafolaga paia i le tasi ma le isi ma i le Atua. I le toalua, la te folafola atu o le a laua tutumau i le alofa ma auauna atu ia te ia ma le faamaoni atoatoa. I le Atua, la te folafola atu ma le faamaoni e tausia aiaiga ma tulaga o feagaiga ua osia i le malumalu.)
O le a le uiga o se faaipoipoga e “faamauina ia i latou e le Agaga Paia o le folafolaga”? (Mafaufau e faasino atu faapea o le Agaga Paia o le Folafolaga o se tasi o faalagiga o le Agaga Paia. E tele faalagiga o le Agaga Paia, e aofia ai Le Faamafanafana po o le Talifaaaliga. O nei faalagiga taitasi e faatatau i se tasi o Ana tiutetauave po o galuega faapitoa.)
Ina ia fesoasoani i tamaiti aoga ia malamalama i le faalagiga o le Agaga Paia o le Folafolaga, faaali atu le fuaitau lenei ma fai i se tamaitiiti aoga e faitau leotele:
“O le Agaga Paia o le Agaga Paia o le Folafolaina (Galuega 2:33). Na te faamaonia le talia e le Atua o galuega, sauniga, ma feagaiga amiotonu e faia e tagata. O le Agaga Paia o le Folafolaga e molimau atu i le Tamā sauniga e faaolaina ai ua saʼo ona faia ma feagaiga e o faatasi ma ia sauniga ua tausia.” (Taiala i Tusitusiga Paia, “Agaga Paia o le Folafolaga,”scriptures.lds.org).
E faapefea e lenei fuaitau ona fesoasoani e faamatalaina pe aisea e manaomia ai le sili atu nai lo le faamauina i le malumalu? O le a le isi mea e tatau ona tupu? (E tatau foi ona tatou ola i ni olaga amiotonu ma tumau i le faatuatua i sauniga faaola uma, e aofia ai le papatisoga, faamanatuga, faauuga i le perisitua, ma sauniga o le malumalu. E faatoa molimau le Agaga Paia i le Tama e faapea ua tausia feagaiga pe a tatou tumau i le faatuatua.)
Fesoasoani i tamaiti aoga ia malamalama atili i le faaipoipoga e faavavau e ala i le faatusatusaina ma tuufaafeagai ma le faaipoipoga faaletulafono i le faaaogaina o le ata lenei. Kopi le ata lenei i luga o le laupapa:
Ata
ata o le faaipoipoga
Vaevae le vasega i ni paga. Fai atu i se tamaitiiti aoga e toatasi o paga taitasi e suesue le Mataupu Faavae ma Feagaiga 132:15–18 ma le isi tamaitiiti aoga e suesue le Mataupu Faavae ma Feagaiga 132:19–24. Valaaulia tamaiti aoga e tusi upu ma fuaitau na e faamatalaina tulaga o loo faatalitali mai mo i latou o e faaipoipo faaletulafono ma faamanuiaga o loo faatalitali mai mo i latou o e faaipoipo mo le faavavau.
A maea se taimi talafeagai, fai i tamaiti aoga e faasoa mai mea na latou mauaina i le tasi ma le isi. Ona fesili atu lea:
A mavae le oti, e faapefea e tulaga o i latou o e faaipoipo faaletulafono ona ese mai ia i latou o e faaipoipo mo le faavavau? (Ao tali mai tamaiti aoga, atonu e te faaopoopoina a latou tali i le ata o loo i luga o le laupapa. Atonu e te manao e faasino atu faapea o tulaga ua faamatalaina i fuaiupu 20-24 e tutusa ma faamanuiaga ua folafolaina mai i le feagaiga FaaAperaamo [tagai i le Kenese 17:1–7; 22:17].)
Ina ia fesoasoani e taliina lenei fesili, mafaufau e faasoa atu le saunoaga lenei a Elder Cree‑L Kofford o le Fitugafulu:
Ata
Elder Cree-L Kofford
“O le pule mo folafolaga i se faaipoipoga faaselesitila e sau mai le Atua, ma o taunuuga o lou le faamamaluina o na folafolaga o le a sau mai le Atua. I se faaipoipoga faaletulafono, o le pule mo folafolaga i le va o le tamaitai faaipoipo ma le alii faaipoipo o le amiosao o tagata e toalua. E le mafai ona sili atu. E le mafai lava. O lona pule e sau mai le tagata ae le mai le Atua” (“Marriage in the Lord’s Way, Part One,” Ensign, Iuni 1998, 9).
O a manatu ua e mauaina ao e faatusatusa tulaga ua lisiina i le laupapa?
O a faamanuiaga ua e matauina i aiga o i latou na faaipoipo i le malumalu ma tauivi e ola faamaoni i a latou feagaiga? O a mea ua e vaaia i nei ulugalii o fai e faamamaluina ai a latou feagaiga? (O se vaega o lenei talanoaga, e mafai ona e faasoa atu lenei saunoaga a Elder L. Whitney Clayton o le Fitugafulu: “E leai lava se isi sootaga o soo se ituaiga e mafai ona maua ai le fiafiaga tele, e fua mai ai mea lelei e tele, pe aumaia ai le faaleleia tele faaletagata” [“Faaipoipoga: Matau ma Aoao,” Ensign po o le Liahona, Me 2013, 83].)
Faamatala i le vasega o le Mataupu Faavae ma Feagaiga 132 o loo i ai foi nisi o faatonuga a le Alii i le faatinoina o le faaipoipoga faaautaunonofo. Na poloai mai le Alii i le Au Paia e faatinoina le tulafono o le faaipoipoga faaautaunonofo o se vaega o le toefuataiga o mea uma (tagai Galuega 3:21; MF&F 132:45). Na faatinoina e tagata o le Ekalesia lenei tulafono seia oo i le 1890, ina ua faaali mai e le Alii ia Peresitene Wilford Woodruff faapea ua Ia le toe finagalo e toe faia e le Ekalesia lenei mea. Ina ia faamaninoina le tulaga o le Ekalesia i autaunonofo o aso nei, valaaulia se tamaitiiti aoga e faitau leotele le saunoaga lenei a Peresitene Gordon B. Hinckley (1910–2008):
Ata
Peresitene Gordon B. Hinckley
“Afai e i ai nisi o o matou tagata e maua o faatino ni autaunonofo, ua tape o latou igoa mai le Ekalesia, o le faasalaga aupito matuia lea e mafai ona faia e le Ekalesia. … E silia ma le seneturi talu ai na faaali manino mai ai e le Atua i Lana perofeta o Uilifoti Uitilafi o le faatinoina o autaunonofo, ua tatau ona faamutaina, o lona uiga ua le tusa ai ma le tulafono a le Atua. E oo lava i atunuu e faatagaina ai i tulafono faalemalo pe faale-lotu ua aoaoina e le EKalesia o faaipoipoga e tatau ona tasi le tane tasi le ava, ma e le taliaina e avea ma tagata o le Ekalesia i latou e faatino le autaunonofo” (“O a Mea o Tuufesili ai Tagata e Uiga ia i Tatou?” Liahona, Ian. 1999, 82-85).
Afai e i ai ni fesili a tamaiti aoga e uiga i autaunonofo, faasino i latou i le Gospel Topics, “Plural Marriage in The Church of Jesus Christ of Latter-day Saints,” lds.org/topics.
O le taua o le filifilia o le faaipoipoga e faavavau
Valaaulia se tamaitiiti aoga e faitau leotele le Mataupu Faavae ma Feagaiga 131:1-4. Fai i le vasega e vaai mo mafuaaga e taua ai mo i tatou le faaipoipo i le auala ua faatulagaina e le Alii.
O le a le faamanuiaga o loo faatalitali mai mo i latou o e filifili e ulu atu i le feagaiga fou ma tumau faavavau o le faaipoipoga? (Ia mautinoa ua malamalama tamaiti aoga i lenei mataupu faavae: Pe a tatou ulu atu i le feagaiga fou ma tumau faavavau o le faaipoipoga, e mafai ona faaeaina i tatou i le tikeri aupito sili ona maualuga i le malo selesitila. Faamatala atu e faapea i lenei tusiga o le upu fou o lona uiga, o lenei feagaiga na faatoa uma ona toefuatai mai i lo tatou tisipenisione. O le upu faavavau o lona uiga o lenei feagaiga o le a tumau i le faavavau ma na faauuina i le muai lalolagi o agaga o se vaega o le fuafuaga o le faaolataga. Na avea lava o se vaega o le talalelei a Iesu Keriso mai le taimi o Atamu. E uiga i le upu faateleina, na aoao mai le Perofeta o Iosefa Samita o i latou o e mautofi i le tikeri e aupito maualuga o le malo selesitia “o le a faaauau ona faateleina ma maua fanau i le mamalu selesitila” [i le History of the Church, 5:391].)
Faaali atu le saunoaga lenei a Dieter F. Uchtdorf, ma fai i se tamaitiiti aoga e faitau leotele:
Ata
Elder Russell M. Nelson
“[Faaolataga] o lona uiga ia faasaoina mai le oti faaletino ma le oti faaleagaga. … [Faaeaga] e faatatau lea i le tulaga aupito maualuga o le fiafia ma le mamalu i le malo selesitila” (“Faaolataga ma le Faaeaga,” Ensign po o le Liahona, Me 2008, 8).
“E ui o le faaolataga o se mataupu e patino i le tagata, ae o le faaeaga o se mataupu faaleaiga. E na o i latou ua faaipoipo i le malumalu ma ua faamauina a latou faaipoipoga e le Agaga Paia o Folafolaga, o le a faaauau ona avea ma taitoalua pe a mavae le oti ma mauaina le vaega aupito maualuga o le mamalu faaselesitila, po o le faaeaga” (“Faaipoipoga Selesitila,” Ensign po o le Liahona, Nov. 2008, 92).
Aisea e taua tele ai le faaipoipoga e faavavau? (Ao tali mai tamaiti aoga, ma pe a taitaiina ai e le Agaga, atonu e te manao e faamamafa atu le matautia o le masani i aso nei i tagata o le lalolagi ua filifili e aua le faaipoipo ona latou te faatauaina na mea e pei o galuega e sili atu nai lo le faataunuuina o le fuafuaga a le Atua mo i latou. E ala atu i le teenaina o le faaipoipoga, ua latou teena faamanuiaga e finagalo le Atua e tuuina atu ia te i latou i le taimi nei ma le faavavau.)
Aisea i lou manatu e tuuina atu ai e le faaipoipoga i le malumalu i se ulugalii avanoa e sili atu mo le fiafia nai lo le faaipoipoga faaletulafono po o le nonofo faatasi e aunoa ma le faaipoipoina?
Ina ia fesoasoani i tamaiti aoga ia malamalama faapea o le Au Paia uma lava o le a iu lava ina mauaina faamanuiaga o se faaipoipoga e faavavau pe afai latou te le suia a latou tulaga faatonuina i soo se auala, fai i se tamaitiiti aoga e faitau leotele le saunoaga lenei a Peresitene Howard W. Hunter (1907–95):
Ata
Peresitene Howard W. Hunter
“E leai se faamanuiaga, e aofia ai le faaipoipoga e faavavau ma se aiga e faavavau, o le a taofia mai soo se tagata agavaa. Atonu o le a umi ona faatali—atonu foi faatoa maua e nisi lenei faamanuiaga pe a mavae lenei olaga—ae peitai o le a le faafitia ia i latou” (“O le Ekalesia ua mo Tagata Uma,” Liahona, Aok. 1990, 43).
E toafia outou e iloaina ni tagata o e naunau e faaipoipo i le malumalu ae lei mauaina lenei avanoa? E mafai faapefea e le folafolaga i le saunoaga a Peresitene Hunter ona fesoasoani i nei tagata?
Faaiu i le valaaulia o tamaiti aoga e tali se tasi po o fesili uma nei i le tusiaina i lalo:
O a filifiliga ua ou faia na o le a taitaia atu au agai i le faamauina i le malumalu?
O a vaega i lou olaga e manaomia le suia pe faatupulaia ina ia ou saunia e faamauina i le malumalu?
Valaaulia ni nai tamaiti aoga e faasoa mai mea o loo latou faia e saunia ai mo le faaipoipoga i le malumalu. Faasoa atu lau molimau faapea a tausia e se tane ma se ava feagaiga na la osia ina ua faamauina i laua i le malumalu, o le a faatasia i laua e faavavau. Faasoa atu pe na faapefea ona avea lenei malamalama o se faamanuiaga i lou olaga.