Ua tuuina mai e le Atua i tagata le tiutetauave o le saunia mo o latou lava manaoga faaletino ma mea e manaomia e o latou aiga. Ua i ai i matua le tiute paia o le tuuina atu ia latou fanau o “mea e manaomia” faaletino “O le Aiga: O Se Folafolaga i le Lalolagi,” Ensign po o le Liahona, Nov. 2010, 129). I lenei lesona, o le a aoao tamaiti aoga i le ala e mafai ai e le mataupu faavae o le ola tutoatasi ona saofaga i lo latou manuia faaletino ma le faaleagaga i le taimi nei ma le lumanai.
Faitauga Faaopoopo
M. Russell Ballard, “Becoming Self-Reliant—Spiritually and Physically,” Ensign, Me. 2009, 50–55.
Robert D. Hales, “Ia Avea ma E Tuuina Atu ma le Faautauta Mea e Manaomia Faaletino ma le Faaleagaga,” Ensign po o le Liahona, Me 2009, 7-10.
Marvin J. Ashton, “One for the Money,” Ensign, Set. 2007, 37–39.
Tusi le fesili lenei i le laupapa: “O a ni auala na saunia ai e Iesu Keriso Ia lava mo Lana galuega i le lalolagi?” Valaaulia tamaiti aoga e faitau le Mareko 6:1–3 ma le Luka 2:51–52, ma vaavaai mo auala na saunia ai e le Faaola Ia lava i Ona tausaga talavou mo Lana galuega mulimuli ane. Ao tuuina mai e tamaiti aoga tali, lisi mea nei i le laupapa:
Na galulue ma lona tama o se kamuta (galuega)
Faateleina le atamai (faaleaoaoga)
Faateleina i le tino (faaletino)
Faateleina le alofagia e le Atua (faaleagaga)
Faateleina le alofagia e tagata (faaleagafesootai)
E mafai faapefea e le mulimuli i le faataitaiga a le Faaola i eria e lima ua faailoaina ona fesoasoani ia te oe e saunia ai e feagai ma ou lava manaoga ma na [manaoga] o lou aiga i le lumanai?
Faitau le saunoaga lenei a Peresitene Spencer W. Kimball (1895–1985), ma fai i tamaiti aoga e faalogo mo le mea ua faailoa mai e Peresitene Kimball o le tiute o tagata uma o le Au Paia o Aso e Gata Ai:
Ata
Peresitene Spencer W. Kimball
“Ua poloaiina le Ekalesia ma ona tagata e le Alii ina ia ola faalagolago le tagata ia te ia lava ma tutoatasi. (Tagai i le MF&F 78:13-14.)
“O le matafaioi a le tagata lava ia mo le soifua manuia i fegalegaleaiga, lagona, faaleagaga, faaletino, po o le tamaoaiga ua pau muamua atu lava lea i ona luga, lona lua o lona aiga, ma lona tolu o le Ekalesia pe afai o se tagata faamaoni o ia.
“E leai se tagata moni o le Au Paia o Aso e Gata Ai, o loo mautu le malosi faaletino ma le mafaufau, o le a na tuueseina atu lana avega po o le soifua manuia o lona aiga i se isi tagata. O le a lava le umi na te gafatia ai, e tusa ai ma musumusuga a le Alii faatasi ai ma ana lava galuega, o le a ia tuuina atu mo ia lava ma lona aiga ia mea faaleagaga ma le faaletino e moomia mo le olaga” (Aoaoga a Peresitene o le Ekalesia: Peresitene Spencer W. Kimball [2006], 116).
O le a le tiute na saunoa mai Peresitene Kimball ua ia i tatou taitoatasi?
Aisea e taua ai le avea ma tagata e “ola faalagolago ia te ia lava ma tutoatasi”? (O tamaiti aoga e tatau ona faailoa mai le mea lenei: Ao tatou ola tutoatasi, e mafai ona tatou tausia i tatou lava ma o tatou aiga i mea faaleagaga ma faaletino o le olaga.
Valaaulia tamaiti aoga e faasoa mai le uiga o le ola tutoatasi ia i latou. Ona faaali atu lea o le saunoaga lenei a Elder Robert D. Hales o le Korama a Aposetolo e Toasefululua, ma fai i se tamaitiiti aoga e faitau leotele:
Ata
Elder Robert D. Hales
“O le ola faalagolago o le tagata ia te ia lava, o le tauaveina lea o le tiutetauave mo o tatou lava uelefea faaleagaga ma le faaletino, ma mo i latou ua tuuina mai e le Tama Faalelagi i la tatou tausiga. Seiloga lava ua tatou faalagolago ia i tatou lava ona mafai lea ona tatou faaa’aoa’o i le Faaola i le auauna atu ma faamanuiaina isi.
“E taua ona malamalama o le faalagolago o le tagata ia te ia lava, o se meafaigaluega e ausia ai se sini. O la tatou sini laualuga lava o le avea e faapei o le Faaola, ma e faalauteleina lena sini e ala i la tatou auaunaga lē manatu faapito i isi. E faateleina pe faaitiitia lo tatou tomai e auauna atu ai e ala i le maualuga o i ai lo tatou faalagolago ia i tatou lava” (“O Se Vaaiga a le Talalelei i le Uelefea: Faatuatua i Lona Faatinoga,” Mataupu Faavae Autu o le Uelefea ma le Ola Faalagolago o le Tagata ia te Ia Lava [tamaitusi, 2009], 1–2).
O le a le faamoemoega autu o le ola tutoatasi?
E faapefea ona faaitiitia lo tatou mafaia ona auauna atu i isi pe a tatou le ola tutoatasi?
Ina ia fesoasoani i tamaiti aoga ia malamalama atili i le ola tutoatasi, faaali atu le saunoaga lenei a Sister Julie B. Beck, o le peresitene aoao muamua o le Aualofa:
“E faapefea ona tatou ola faalagolago ia i tatou lava? Tatou te ola faalagolago ia i tatou lava i le lava o le malamalama tatou te maua, aoga, ma iloa faitau ma tusitusi, ola maloloina faaletino, puleaina ma le atamai o tupe ma punaoa, o le malosi faaleagaga, saunia mo faalavelave faafuasei ma mea e faafuasei ona tulai mai, ma le maua o le manuia faalevafealoai ma faalelagona” (“O Tiutetauave o le Peresitene o le Aualofa i le Uelefea,” Mataupu Faavae Autu o le Uelefea ma le Ola Faalagolago o le Tagata ia te Ia Lava,5).
Tusi upu nei i le pito i luga o le laupapa: aoaoga, tupe, malosi faaleagaga, gaosia ma le teuina o meaai a le aiga, soifua maloloina ma le galuega. Faatonu tamaiti aoga o le ola tutoatasi e aofia ai nei eria e ono o se olaga paleni (tagai Faia i le Ala a le Alii: O le Otootoga o le Taiala a se Taitai i le Uelefea [tamaitusi, 2009], 1–2). Faaalu se taimi i le vasega e talanoa ai mea e ono fai e talavou nofofua ia ola tutoatasi ai i nei eria uma ina ia sili atu ona latou saunia mo manaoga faaletino ma faaleagaga o o latou aiga i le lumanai ma auauna atu i le Ekalesia. Tusi tali a tamaiti aoga i le laupapa. O manatu e ono aofia ai mea nei:
Aoga: Ia maua se tikeri po o se tusi faamaonia mai se iunivesite po o se aoga matata, faaleleia tomai faalesuesuega, aoao nisi tomai taugaluega, aoao e faia lipea faigofie i le fale ma taavale.
Tupe: Totogi se sefuluai faamaoni ma se taulaga anapogi, aoao e fatu se paketi ma mulimuli i ai, aoao le loto pulea, aloese mai aitalafu e le manaomia, totogi aitalafu, teu se tupe mai totogi uma.
Malosi faaleagaga: Tatalo, suesue i tusitusiga paia, anapogi ma se faamoemoega, auai soo i le malumalu.
Gaosiga ma le teuina o meaai a le aiga: Aoao pe faapefea ona tuu umi ma teu meaai, toto se togalaau (tusa lava pe na o ni nai laau).
Soifua Maloloina: Usiusitai i le Upu o le Poto, faamalositino soo, taumafa paleni, ia lava le moe, ia maua se inisiua o le soifua maloloina.
Galuega: Atiina ae ni tomai fou, maua se faavae o le galue malosi, ausia ni tusifaamaonia sili atu.
O a ni mea ua e faia e faateleina ai lou ola tutoatasi i se tasi o nei eria? Na faapefea e lenei taumafaiga ona faateleina ou lagona o le ola tutoatasi ma le taua-faaletagata lava ia? Na faapefea ona ia faateleina lou mafaia ona saunia mo oe lava ia ma sili atu ai le atoatoa o le auauna atu i le Ekalesia?
Valaaulia tamaiti aoga e faatu se sini e faaleleia ai i se tasi o eria nei.
Faamanatu i tamaiti aoga afai e le o saunia i latou, o le a ia i latou le tiutetauave o le tausia o i latou lava ma masalo mo se aiga foi. O le mea lea, e tatau ona latou aoao ia atamamai ia latou punaoa faaletino.
Tofi tamaiti aoga taitasi e faitau nisi o fuaitau nei ma faailoa mai mataupu faavae e fesootai i le pulea lelei o tupe.
Malaki 3:8-12 (usitai i le tulafono o sefuluai ma taulaga)
Mataio 6:19-21 (aloese mai le pupu o o tatou loto i mea o le lalolagi)
1 Timoteo 6:7–10 (ia faafetai mo mea ua tatou maua—“o le manao o le tupe o le [pogai lea o mea leaga uma”)
2 Nifae 9:51 (aua le faaaluina tupe po o le galuega i mea e le aoga)
A uma se taimi talafeagai, valaaulia tamaiti aoga e faasoa mai mea na latou maua i le vasega. Ia mautinoa ua malamalama tamaiti aoga i le mataupu faavae lenei: E ala i le faaaogaina ma le atamai o le mataupu faavae tautupe, e mafai e tagata ma aiga ona faateleina lo latou lava manuia faaletupe ma saunia e fesoasoani i isi. (E mafai ona e faasino atu faapea i totonu o tusitusiga paia, e faia e le Alii se fesootaiga i le va o le mauaina o oa ma le tiute o le fesoasoani i e matitiva ma le tagolima. Mo se faataitaiga, tagai i le Iakopo 2:18–19 ma le MF&F 104:18.)
O a faamanuiaga ua e maua mai le faaaogaina ma le atamai o mataupu faavae o tupe i lou olaga?
Faitau le Mataupu Faavae ma Feagaiga 104:78. Faaali atu le saunoaga lenei a Elder Joseph B. Wirthlin (1917–2008) o le Korama a Aposetolo e Toasefululua, ma fai i se tamaitiiti aoga e faitau leotele:
Ata
Elder Joseph B. Wirthlin
“Ia manatua le mea lenei: o le aitalafu o se ituaiga nofo pologa. O se manu ninii faalafua lea o mea tautupe. A tatou faia ni faatauga faaaitalafu, latou te aumaia ia i tatou na o ni mafaufauga faivavale o le tamaoaiga. Tatou te manatu ua tatou pulea ia mea, ae o le mea moni, o mea ia ua pulea i tatou.
“O nisi aitalafu—e pei o se fale manaia, tupe faaalu aogā mo aoga, atonu mo se taavale muamua o loo manaomia—atonu e talafeagai. Ae e le tatau ona tatou oo atu i le pologa i mea tautupe e ala i le faia o aitalafu e totogi auaua’i e aunoa ma le iloiloina toto’a o le tau” (“Aitalafu Faalelalolagi, Aitalafu Faalelagi,” Ensign po o le Liahona, Me 2004, 40–41).
Aisea e avea ai le aitalafu o se ituaiga o nofopologa? (Ao tali mai tamaiti aoga, fesoasoani ia i latou ia malamalama i le mataupu faavae lenei: O le aloese mai aitalafu e le manaomia e fesoasoani e faatumauina le saolotoga o tagata ma aiga mai le nofopologa faaletupe. Na aoao mai Peresitene Gordon B. Hinckley (1910–2008), “E le mafai ona tatou maua le faalagolago o le tagata ia te ia lava, pe afai o loo i ai se aitalafu matautia o loo faamalumalu ma i luga o le aiga. E le maua e se tagata le tutoatasi po o le saolotoga mai le pologa pe afai e nofo aitalafu i isi tagata” (“Mo Tama Talavou ma Tama,” Liahona, Ian. 1999, 63).
Valaaulia se tamaitiiti aoga e faitau le apoapoaiga lea mai ia Peresitene Thomas S. Monson:
Ata
Peresitene Thomas S. Monson
“Ia aloese mai le filosofia ma le ‘alofaga e faapea, o mea sa faigata ona maua i aso la, ua avea ma mea ua manaomia i aso nei. E le o ni mea lava e manaomia, sei vagana ua tatou faia lava na mea ma mea tatou te manaomia. O le toatele o o tatou ulugalii talavou i aso nei, ua mananao e amata [o latou aiga] i ni taavale se tele ma le ituaiga fale lea sa galulue ai Tina ma Tama i le olaga atoa ina ia maua. O lea, latou te faia ai ni aitalafu e umi se taimi e totogi ai, ae faavae i luga o totogi o ni tagata faigaluega se toalua. Ae atonu e fai si tuai ona la iloa mulimuli ane, e oo mai suiga, e fananau tamaiti, e femulimulitai ma’i i nisi o aiga, e aveesea galuega, e tutupu faalavelave o le natura ma isi tulaga, ma ua le mafai ai ona totogi ia mokesi o fale, e faavae i se tupe maua mai totogi o ni tagata se toalua. E taua ona tatou ola i mea ua tatou maua” (“Upumoni Tumau mo Taimi Fesuisuiai,” Ensign po o le Liahona, Me 2005, 20).
O a nisi o taunuuga e mafai ona oo i tagata ma aiga e toilalo e faailoa le eseesega i le va o le manao ma le manaomia?
O a nisi o auala e iloa ai le eseesega i le va o le manao ma le manaomia?
Uunaia tamaiti aoga e mafaufau e uiga i fesili nei ma tusi a latou tali i a latou api talaaga:
O a eria o le olaga e mafai ona sili atu ai lou ola tutoatasi?
E mafai faapefea ona sili atu lou pulea lelei o au punaoa faaletino?