Te Iteraa e te Faaturaraa i te Torutahi

Te Atua te Metua, Ta’na Tamaiti o Iesu Mesia, e te Varua Maitai, o te Torutahi ïa. Ua haapii te Peresideni Brigham Young e, e haamori te Feia Mo‘a i te Mau Mahana Hopea Nei i te Atua te Metua e te faahiti nei ratou i te mau pure Ia’na i roto i te i‘oa o Iesu Mesia. Ua haapii atoa oia e, o te Atua te Metua, e taata ïa Oia i nia i te hoê ao ê atu i te matamua ra, e “ua faaoroma‘i oia i te mau tamataraa atoa ta tatou e farerei nei; ua farii oia i te ite, ua mauiui oia e ua oaoa, e ua ite oia i te mau mea atoa ta tatou i ite no te mau ohipa, te mau mauiui, te ora e te pohe o teie tau tahuti nei” (DBY, 22).

Te Mau Haapiiraa a Brigham Young

Ua faanahonaho te Atua te Metua i te mau ao aore e hope ia tai‘o e te faatere nei Oia i taua mau ao ra, ua hamani Oia i te taata, e e taata tino Oia o te tia ia itehia e ia haamorihia.

Te tiaturi nei tatou i te hoê Atua, i te hoê Arai e i te hoê hoi Varua Maitai [a hi‘o i te Mau Hiro‘a Faaroo 1:1]. Eita roa’tu e nehenehe ia tatou ia tiaturi e, aita to te Atua e tino, aita e melo tino, aita e hiaai, aita hoi e huru. E faaitehia te mau huru na roto ana‘e i te tino taata i faanahonaho-mau-hia. No roto mai te mau huru atoa i te hoê oraraa i faanahonaho-mau-hia (DBY, 23).

Ua hinaaro vetahi ia tiaturi tatou e, tei te mau vahi atoa te Atua i te vairaa. Aita roa. Aita oia i te mau vahi atoa i te vairaa, aita hoi te Metua e te Tamaiti i roto i te tino hoê ra (DBY, 23–24).

Ua mana‘ohia e, tei te mau vahi atoa te Atua i te vairaa; e te na ô maira te taata papa‘i Salamo e, “E haere tia vau nei i hea e mo‘e ai i to varua?” [Salamo 139:7]. Tei roto oia i te mau mea ta’na i hamani na roto i to’na mana, na roto i to’na hau, to’na varua e to’na puai, o oia iho râ, e taata tiahapa tino oia, e ua hamanihia tatou ia au i to’na ra huru (DBY, 24).

Te tiaturi nei vetahi e aore ra te mana‘o nei e e, ia ite i te Atua, ua faaitihia ïa oia i to tatou nei hi‘oraa; e nehenehe râ ia’u ia parau e, ia ite au i te hoê parau tumu anei e i te hoê taata anei, i nia i te fenua e i nia i te ra‘i ra, eita ïa te reira e faaiti i to’na faufaa ia’u, aita roa, e faarahi râ; a rahi atu to’u iteraa i te Atua, a rahi atoa to’na here e to’na faufaa ia’u, a teitei atoa atu to’u nei mana‘o ia’na (DBY, 18).

Ia riro te taata atoa ra ei hoa no te Atua [a hi‘o Iakobo 2:23] (DBY, 18).

Te taata faanahonaho rahi, te raatira rahi, te tiaau rahi, te faatere rahi, e te tavana mana teitei o te arata‘i nei i teie ohipa, te hi‘o-ore-hia nei ïa oia e to tatou mata tahuti nei. Te parahi nei oia i te hoê ao ê atu; e oraraa huru ê atu to’na; ua faaoroma‘i oia i te mau tamataraa atoa ta tatou e farerei nei; ua farii oia i te ite, ua mauiui oia e ua oaoa, e ua ite oia i te mau mea atoa ta tatou i ite no te mau ohipa, te mau mauiui, te ora e te pohe o teie tau tahuti nei, inaha, ua oti te taatoaraa o te reira ia’na, e ua farii oia i ta’na korona e to’na faateiteiraa e te mau nei oia i te mau taviri e te mana o teie Basileia; te faatere arii nei oia, e te faatupu nei oia i to’na hinaaro i rotopu i te tamarii o te taata, i rotopu i te Feia Mo‘a e i rotopu i te feia hara; e te faaoti nei oia i te ohipa o tei au i ta’na opuaraa i rotopu i te mau basileia, te mau nunaa e te mau fenua, ei hanahana ana‘e ïa no’na e ei haamaitai-roaraa i ta’na ra ohipa (DBY, 22).

Te faatere nei oia i te mau ao aore e hope ia tai‘o o te haamaramarama mai nei i teie nei ao iti, e te mau ao milioni e milioni tei hi‘o-ore-hia e tatou; e hi‘o râ oia i te tuhaa iti ha‘iha‘i roa o te mau mea ta’na i hamani; aita te hoê o taua mau mea ra tei ore i hi‘ohia e ana; aita te hoê o taua mau mea ra, maori râ, ua hamanihia na roto i to’na paari e to’na mana (DBY, 20).

Ua fanauhia i to tatou Metua i te Ra‘i te mau varua atoa o tei vai na, o te vai nei e o te vai a muri atu, i teie nei ao [a hi‘o Hebera 12:9]; ua fanauhia ratou ei varua i roto i te ao mure ore ra. I reira, na roto i to’na mana e to’na paari, ua hamani a‘era oia i te tiahapa tahuti o te taata. Ua hamani-varua-hia tatou i te matamua, e i muri a‘era, ua hamani-tahuti-hia.

Ua papa‘ihia e, e ite hope to te Atua, e e mana hope hoi to’na [a hi‘o 1 Nephi 9:6] (DBY, 20).

O oia Te Faatere Rahi o te mau ao atoa. Ua parau ana‘e oia ra, ua mărô te moana ia’na, e ua riro te mau anavai pape ei vahi pâpâmărô. Ua faito oia i te moana i to’na ra apu rima, e ua aa hoi i te ra‘i i te rima no’na, e ua faaô hoi i te repo fenua nei i roto i te faito; e ua faito i te mau mou‘a ra i te faito, e te mau aivi ra i te tapa‘o. E au te mau fenua nei mai te topata iti no roto i te patete, e te mau fenua rii nei, mai te hu‘a repo hoê ia rave oia ra; ua hope atoa ra te rouru o to tatou nei upoo i te tai‘ohia e ana, e ore hoi te hoê manu rii e mo‘e i to tatou Metua; e ua ite maite oia i te mau mana‘o atoa e te mau hinaaro hoi o te aau o te mau mea ora, inaha tei te mau vahi atoa oia i te vairaa na roto i te mana o to’na varua—to’na ïa tavini, te Varua Maitai. O oia te Metua no te mau mea atoa, te nia iho oia i te mau mea atoa, tei piha‘i iho i te mau mea atoa e tei roto ia outou atoa [a hi‘o Ephesia 4:6]; ua ite hoi oia i te mau mea atoa no teie nei ao, ua ite atoa oia i te mau mea atoa no te mau ao milioni e milioni mai teie nei ao (DBY, 19).

Ua horo‘a oia i te hoho‘a, te puai e te ora i teie nei ao tahuti; ua hamani oia i te mau tiarama rahi e te mau tiarama iti o te anaana i nia i te ra‘i; ua horo‘a oia ia ratou i to ratou mau taime e to ratou mau tau, e ua faataa i to ratou mau vahi. Ua faaî oia i te reva e te mau pape i te mau mea ora, e ua tapo‘i i te mau aivi e te mau vahi papu i te mau mea nee haere; e ua hamani i te taata ia riro oia ei fatu i nia i te mau mea ta’na i hamani (DBY, 18).

O te Atua te pû, te tumu o te mau maramarama atoa, noa’atu â tei ia vai te reira, e taata anei i nia i te fenua nei, te mau varua anei i roto i te ao varua, te mau melahi anei e parahi ra i roto te mau tau mure ore o te mau Atua, e te mau maramarama iti a‘e anei i rotopu i te mau diabolo i hade. Ua hope pauroa ïa i te farii i te ite, te maramarama, te mana e te ora no ŏ mai i te Atua—o te tumu hoi no reira mai to tatou. Te mau mea tia e te mau mea maitai roa, no ŏ mai ïa i te Atua ra [a hi‘o Iakobo 1:17]. Te mau ite atoa o i te mau ihi e te mau aravahi o te mau rima‘î o tei riro ei mea mau e ei tautururaa i te taata, ua horo‘a-ana‘ehia ïa na roto i te heheuraa no ŏ mai i te Atua, aita re‘a râ o tei fa‘i i te reira. Ua horo‘hia mai te reira ei faaineineraa i te e‘a no te upootiaraa hopea o te parau mau, e te faaoraraa o te fenua nei i te mana o te hara e Satane (DBY, 18).

E rave rahi tei tamata i te imi i Te Tumu Rahi o te mau mea atoa; a au râ te reira i te rô o te tamata i te tai‘o i te hu‘a one i nia i te fenua nei. E ere na te taata, ma to’na maramarama iti, ia ite i te tau mure ore … .Te manumanu iti o te tamata i te tuatapapa i te aamu o te taata e tae roa’tu i te tumu matamua, e au ïa te reira i te taata o te tamata i te ite i te Tumu Matamua o te mau mea atoa, i te hi‘o na roto i te paruru o tei tapo‘i i te mau tau mure ore, e i te vauvau mai i te mau parau ‘aro o te titauhia e te mau aivanaa mai te matamua mai â. Eaha râ ïa te piiraa e te hopoi‘a o te tamarii o te taata ? Eiaha e titau i te tumu o te mau Atua—eiaha e tamata i te imi i te hohonuraa o te mau tau mure ore tei vai na, te vai nei e te vai a muri atu, eiaha e tautoo i te ite i te mau otia o te mau vahi taotia-ore-hia, ia titau râ ratou i te ite i te tumu o to ratou oraraa tahuti nei, e nahea ia faaohipa, ma te rave‘a papu a‘e, ei no to ratou atoa maitai e to ratou faaoraraa, i te maramarama te vai nei ia ratou. Ia titau ratou i te ite e i te taa maitai i te mau mea e roaa ia ratou ia ite, e ia mâtau maitai ratou i te tumu ratou i tae mai ai i ŏ nei, na roto i te aniraa i te hoê mana hope no te haamaramaramaraa e na roto i te tai‘o-maite-raa no roto mai i te mau buka maitatai (DBY, 25).

Ua riro Iesu Mesia, oia te Tamaiti Fanau Tahi o te Metua i te tino, ei tara‘ehara no te mau hara o te taata atoa ote tatarahapa.

Te tiaturi nei te Feia Mo‘a i te Mau Mahana Hopea Nei ia Iesu Mesia, te Tamaiti fanau tahi o te Metua [i te tino], o tei tae mai i te afa tia o te mau tau ra, o tei faaoti i ta’na ohipa, o te farii i te utu‘a e tei aufau i te tarahu no te hara matamua a te taata nei na roto i te pûpûraa ia’na iho, ua tia faahou maira mai te pohe maira, e ua reva atura i to’na Metua ra; e mai ia Iesu i pou i raro a‘e i te mau mea atoa, e na reira atoa oia i te reva i nia a‘e i te mau mea atoa ra. Te tiaturi nei tatou e e ho‘i mai Iesu Mesia, mai tei papa‘ihia no’na ra: “E tei to ratou tiatonu-maite-raa i nia i te ra‘i i te peeraa’tu oia i nia ra, inaha, te tia noa maira e toopiti pu‘e taata i piha‘i iho ia ratou ma te ahu teatea; o tei parau mai ïa ia ratou e, E te mau taata no Galilea nei, eaha outou i tia noa’i e i tiatonu mârô ai i nia i te ra‘i ra? o Iesu nei â, tei ravehia a‘enei i nia i te ra‘i, e ho‘i mai ïa mai te reira atoa ra, mai ta outou i ite atu ia’na i te revaraa’tu i nia i te ra‘i ra” [Te Mau Ohipa 1:10–11] (DBY, 26).

Ua tutonuhia to tatou faaroo i roto i te Tamaiti a te Atua, e na roto ia’na, i roto atoa i te Metua (DBY, 26).

Te Feia Mo‘a i te Mau Mahana Hopea Nei, e te mau taata atoa o tei au i te faaoraraa, e te taata atoa ra, maori râ o tei hara i te Varua Maitai, e tia ïa ia ratou atoa ia ite e, o Iesu te Mesia, ia au i to Petero iteraa i te reira [a hi‘o Mataio 16:13–19]. Eita taua ite ra e roaa i te taata na roto i te mau semeio, e tia râ i te semeio ia riro ei patururaa no te haapuai i te feia faaroo. Ua itehia te mau semeio a Iesu i te Ati Iuda, ua tuu râ ratou ia’na ia haapohehia ei taata haavare e ei taata demoni (DBY, 28).

Ua tautoo Iesu i te haamau i te Basileia o te Atua i nia i te fenua nei. Ua afa‘i mai oia i te mau ture e te mau oro‘a o te Basileia (DBY, 29).

Aita ta’na e peu i rave no’na iho. Ua rave oia i te mau semeio e ua rave hoi i te ohipa maitai i nia i te fenua nei; no’na iho râ, aita ta’na e peu i rave a‘e. Ua parau oia e, “O ta’u i ite i to’u Metua i te raveraa, o ta’u atoa ïa e rave” [a hi‘o Ioane 5:19]. “Aita hoi au i imi i to’u iho hinaaro, o te hinaaro râ o te Metua o tei tono mai ia’u nei ra” [a hi‘o Ioane 5:30]. E mea tia roa ia tatou ia mana‘o e, aita roa te Tamaiti a te Atua i mana‘o noa a‘e, i faaue noa a‘e, i rave noa a‘e e i faaite noa a‘e i to’na mana, to’na hanahana, e aore ra ta’na ohipa i nia i te fenua nei, maori râ o tei horo‘ahia ia’na no roto mai i te mana‘o e te hinaaro o to’na Metua (DBY, 26).

“O vau e te Metua ra, hoê â ïa,” [Ioane 10:30] te na reira maira Iesu; eaha ra, hoê â tino? Aita… . Aita to maua o ta’u mau tamaiti e tino hoê ra, aita atoa to raua e tino hoê ra. Ia farii ta’u tamaiti i ta’u nei haapiiraa, ia haere oia na te e‘a ta’u e faataa na’na ra, ia hoê â to’na faaroo e to’u ra, ia hoê to’na mau tumu e to’u, e ia rave oia i te ohipa a to’na metua mai ta Iesu i rave i te ohipa a to’na Metua ra, ua hoê â ïa maua ta’u tamaiti i reira, ia au i te papa‘iraa mo‘a (DBY, 28).

Ua heheu mai te Fatu ia tatou i te hoê opuaraa ia tia ia tatou ia faaorahia i ŏ nei e a muri atu hoi. Ua rave te Atua i te mau mea atoa o te tia ia anihia ia’na ia rave, oia mau, ua hau ê atu â ïa ta’na i rave. Ta Iesu ohipa i nia i te fenua nei, ia faaho‘i atu ïa i to’na mau taeae e to’na mau tuahine i mua i te aro o te Metua; ua oti ia’na ta’na tuhaa o te ohipa, te toe maira ia rave tatou ta tatou. Aore te hoê a‘e mea ta te Fatu e nehenehe ia rave no te faaoraraa i te mau tamarii a Adamu o tei ore i oti i te ravehia e ana; te toe maira ia farii te tamarii a te taata i te parau mau e aore ra ia pato‘i i te reira; te mau mea atoa o te nehenehe ia ravehia no to ratou faaoraraa, taa ê atu i ta ratou iho tuhaa, ua oti ïa i te ravehia e te Faaora e na roto i te Faaora… . I teie nei o oia te Arii o [a hi‘o Mosiah 27.31].te mau arii e te Fatu o te mau fatu ra, e e tae i te mahana e hope ai te mau turi atoa i te tuu i raro, e hope ai hoi te mau vaha atoa i te fa‘i, no te hanahana o te Atua, te Metua e, o Iesu te Mesia [a hi‘o Philipi 2:10–11]. O taua taata ra o tei ore i hi‘ohia ei Faaora, ei taata faaruehia râ, oia tei faasataurohia i ropu i na eiâ haru toopiti ra e o tei tâhitohitohia e tei vahavahahia, e fariihia ïa oia e te taata atoa o oia te Taata otahi e roaa ai ia ratou te ora (DBY, 27).

Te Varua Maitai, e tino varua ïa to’na, e e faaite oia i te parau mau.

Te tiaturi nei tatou e, te Varua Maitai, o te hoê ïa o na taata i roto… te Atuaraa. E ere ïa te hoê taata i roto i na taata e toru, e ere atoa ïa e toru taata i roto i te hoê taata; te Metua râ, te Tamaiti e te Varua Maitai, hoê â to ratou huru, ia au i te aau o na taata tootoru tei tahoê i roto i te mau mea atoa ra. O oia te hoê o na taata ta tatou e tiaturi, no’na te toro‘a no te tauturu atu i te mau tamarii a Adamu o tei ati atu i te parau mau. Ua parau vau e, ua hoê ratou, ia au i te aau o taua na taata tootoru ra. Ia ore to outou mana‘o ia hape, e parau atu vau e, eiaha outou e mana‘o e e tino i‘o e te ivi to te Varua Maitai, mai to te Metua e to te Tamaiti ra; teie râ o oia te ve‘a o te Atua ra o te haaparare i to’na mana na roto i te mau ohipa atoa a te Mana Hope (DBY, 30).

Te Varua Maitai, o oia te ve‘a [o te Metua e te Tamaiti] o te faaite faahou mai ia tatou i te parau mau, o te heheu mai ia tatou i te parau mau apî, e o te haapii, o te arata‘i, e o te faatere i te feruriraa o te mau aau atoa, e tae noa’tu ua maitai roa tatou e ua ineine atoa no te ho‘i i nia i te ra‘i ra, ei reira e tia ai ia tatou ia ite e ia paraparau atu i to tatou Metua i te Ra‘i (DBY, 26).

Ua papu roa ia’u, ia au i te ite hau atu tei roaa ia’u e, e nehenehe i te taata ia vare i te mea e hi‘ohia e te mata, e nehenehe ia’na ia vare i te mea e faaroohia e te tari‘a, e te fâfâhia e te rima; e nehenehe ia’na ia vare na roto i te mau mea atoa o te parauhia te ite o te tino. Area râ, te vai ra te hoê mea e ore ai oia e vare. Eaha ra ïa? O te mau ohiparaa a te Varua Maitai, te Varua e te mana o te Atua i nia i te taata nei. E haapii te reira ia’na i te mau mea o te ra‘i ra; e arata‘i te reira ia’na i te e‘a ora; e horo‘a te reira ia’na i te taviri e tamata ai oia i te mau opuaraa a te taata, e o te faaite i te mau mea o te Atua ra. E ere ana‘e te Feia Mo‘a i ŏ nei ra, e o tei putuputu mai i Ziona, o te feia atoa ra o te mau nunaa, te mau fenua, e te mau fenua moana ra o tei haapa‘o i te haapa‘oraa i haapiihia e to tatou Faaora e ta’na mau Aposetolo, e tei haapii-atoa-hia e Iosepha Semita; hoê â to ratou iteraa papu, inaha ua faaorahia to ratou mata e te Varua o te Atua, e ua hoê to ratou aau, ua faaorahia to ratou aau e ua hoê to ratou mana‘o e to ratou feruriraa, e aore roa e mârôraa i rotopu ia ratou ra no te mau parau haapiiraa a te Faaora (DBY, 31).

Ia ore te mana o te Varua Maitai, e riro te taata i te faarue i te e‘a afaro o te mau faaueraa a hahi ê atu ai na te pae atau anei e na te pae aui anei; e riro ratou i te rave i te mau mea e oto ai ratou a muri a‘e; e riro ratou i te hape haere; e ia tamata ratou i te rave i te maitai, inaha, e rave ïa ratou i te mea te au-ore-hia e ratou ra (DBY, 31).

Ua hinaaro vau i te ite i te mau tane e te mau vahine ia huti i te aho o te Varua Maitai i te mau hutiraa aho atoa o to ratou oraraa, ma te ora tamau noa i te maramarama o te aro o te Atua (DBY, 31).

Te Mau Mana‘o no te Haapiiraa

Ua faanahonaho te Atua te Metua i te mau ao aore e hope ia tai‘o e te faatere nei Oia i taua mau ao ra, ua hamani Oia i te taata, e e taata tino Oia o te tia ia itehia e ia haamorihia.

Eaha ta te Peresideni Young i haapii no te faufaa o te iteraa i te Atua te Metua? (A hi‘o atoa Ioane 17:3.) E mea nahea te iteraa i te hoê taata e au ai ei tautururaa i to tatou taatiraa i taua taata ra? Eaha te mau mea o tei tauturu ia outou i te ite i te Atua te Metua?
E mea nahea te mana o te Atua ia “mana‘ohia e, tei te mau vahi atoa … i te vairaa”? Eaha te tahi mau hi‘oraa o te aroha o te Metua i te Ra‘i ra no “te tuhaa iti ha‘iha‘i roa o te mau mea ta’na i hamani”?
Te parau haapiiraa e, e taata te Atua i te matamua ra, e ua tae roa Oia i te riro ei Atua, e parau haapiiraa taa ê roa ïa na teie Ekalesia ana‘e. Eaha to outou mana‘o ia feruri outou e, o te Atua, na roto i Ta’na iho ohipa i rave, “ua ite [ïa] oia i te mau mea atoa ta tatou i ite no te mau ohipa [e] te mau mauiui” o te oraraa tahuti?
Ua haapii te Peresideni Young e, te mau ite atoa o i te mau ihi e te mau aravahi o te mau rima‘î o tei riro ei mea mau e ei tautururaa i te taata, “ua horo‘a-ana‘ehia ïa na roto i te heheuraa no ŏ mai i te Atua.” E mea nahea te mau ite i heheuhia mai i taua mau vahi ra i faahaere ai i te ohipa a te Atua i mua?
Ia au i te parau a te Peresideni Young, eaha “te piiraa e te hopoi‘a o te tamarii o te taata”? Nahea tatou ia faarahi i to tatou maramarama i te mau mea te tia ia tatou ia haapii e ia faarahi hoi i to tatou iteraa i te tumu tatou i tae mai ai i nia i te fenua nei? Ei hea tatou e imi ai i taua ite ra?

Ua riro Iesu Mesia, oia te Tamaiti Fanau Tahi o te Metua i te tino, ei tara‘ehara no te mau hara o te taata atoa ote tatarahapa.

Eaha ta te Peresideni Young i haapii no Iesu Mesia e Ta’na misioni i nia i te fenua nei?
Te parau tumu matamua o te evanelia o te faaroo ïa i te Fatu ia Iesu Mesia. E mea nahea te faaroo i te Tamaiti a te Atua e faataui ai i to tatou nei oraraa? (A hi‘o atoa Iakoba 4:10–11 e Moroni 7:41–42.)
Ua haapii te Peresideni Young e, e tia i te Feia Mo‘a atoa i te Mau Mahana Hopea Nei ia ite e o Iesu te Mesia, mai te au i to te Aposetolo Petero iteraa (a hi‘o atoa Mataio 16:13–19). E mea nahea te taata ia ite e o Iesu te Mesia? No te aha eita e rava‘i te ite ta te mau semeio e hopoi mai ia ite te taata e o Iesu te Mesia? No te aha te reira ite i riro ai ei mea faufaa rahi roa no to tatou ora?
Na vai te ohipa ta Iesu i faaoti i To’na taviniraa i te mau taata o te fenua nei? Eaha ta tatou e haapii no roto mai i te hi‘oraa o Iesu e eaha hoi ta tatou e faaohipa i roto i to tatou nei oraraa? E mea nahea tatou ia ite e ia farii i te mau ohipa i faataahia e te Fatu na tatou tataitahi?
Ua haamana‘o mai te Peresideni Young ia tatou e, e tae i te mahana “e tuu ai te mau turi atoa i raro e e fa‘i te mau vaha atoa e” o Iesu te Mesia (Mosiah 27:31; a hi‘o atoa Philipi 2:9–11). Te oraraa ei pĭpĭ mau a Iesu Mesia, e mea fifi atu ïa i te parau-noa-raa e o Iesu te Mesia. Eaha te mea te horo‘a ia outou i te puai no te haapa‘o i te evanelia ei pĭpĭ aau tae?

Te Varua Maitai, e tino varua ïa to’na, e e faaite oia i te parau mau.

Eaha te misioni a te Varua Maitai? E mea nahea Oia i te ohiparaa i roto i te oraraa o te mau tamarii a te Atua?
E mea nahea te tino o te Varua Maitai i te taa-ê-raa i to te Atua te Metua e to Ta’na Tamaiti o Iesu Mesia? (A hi‘o atoa PH&PF 130:22.) E mea nahea na melo e toru o te Atuaraa i te riroraa “ei hoê?
E mea nahea te Varua Maitai i te riroraa ei ve‘a no te Metua e no te Tamaiti?
Eaha te mau ohipa tei tupu ia outou o tei faaite i te mana o te Varua Maitai no te haapii e no te arata‘i ia outou?