Te Ora na Roto ia Iesu Mesia

Ua ani te Peresideni Brigham Young e, “E mo‘e roa anei te tahi pae? Te vai ra anei te tahi o te farii i te riri o te Mana Hope? E nehenehe ia’u ia parau e, mai ta’u i parau mai te matamua mai â, i roto i ta’u mau a‘oraa, aita a‘enei au i tamata i te a‘o i te taata no hade e no te faahaparaa. Ua tamata pinepine au—ua tamata vau i te Sabati i mairi a‘enei, e ua tamata atoa vau i teie mahana i te parau no taua tumu parau ra—te mauiui o te feia ino. Mai te mea ra ia ratou e, e mauiui mau â ratou; aita râ to’u aau i tae i te a‘o, maori râ i te ora no te taata” (DBY, 388). Ua haapii te Peresideni Young e, “e hope te taata atoa i te tia faahou mai” (DBY, 391). Ua parau oia no te ora o te “tae i te mau tamarii atoa a Adamu” (DBY, 389). E ua parau atoa oia no te ora mure ore no te feia o te “haapa‘o maite i te mau titauraa o te mau [ture] a te Atua, e o te tamau maite â i roto i te faaroo” (DBY, 387).

Te Mau Haapiiraa a Brigham Young

Te ora e horo‘ahia e Iesu Mesia, e roaa ïa i te mau tamarii atoa a Adamu.

Inaha te maitai, te faaoroma‘i rahi, te aau mărû, e te here metua puai o to tatou Metua e to tatou Atua oia i faaineine i te e‘a e te rave‘a no te faaora i te mau tamarii a te taata—eiaha te Feia Mo‘a i te Mau Mahana Hopea Nei ana‘e—eiaha atoa te feia ana‘e o tei fana‘o i te mau parau tumu matamua o te ture tiretiera, maori râ, o te taata e hope roa a‘e. E ora ïa no te taatoaraa o te taata—te faaoraraa no te taatoaraa (DBY, 388).

E hia rahiraa taata o te faaorahia? Te feia atoa o tei tatarahapa e tei ore i pato‘i i te mana e te huru o te Tamaiti a te Atua—te feia atoa o tei ore i hara i te Varua Maitai (DBY, 387).

E farii te mau nunaa atoa i teie mau haamaitairaa; tei roto paatoa i te ora o te Faaora. Ua farii oia i te pohe no te taata atoa; tei raro a‘e ratou atoa i to’na mana. Te fenua iho nei, te taata i nia iho ra, te mau animala avae maha, te mau i‘a o te tai e te mau manu o te reva, te mau manumanu e te mau mea e nee haere i nia i te fenua, e te mau mea atoa e au i teie ao,—tei roto ana‘e ïa i te rima o te Faaora, e na’na ratou atoa i faaora (DBY, 388).

Ua oti te i‘oa o te mau tamarii tamaroa e te mau tamarii tamahine atoa a Adamu i te papa‘ihia i roto i te Buka Ora a te Arenio. E tae anei i te taime e iritihia ai taua mau i‘oa ra? Oia, ia riro ratou ei tamaiti o te pohe, o tera ana‘e ïa te taime. E tia atoa ia vai noa te i‘oa o te taata i roto ra e a muri e a muri noa‘’tu. Ia ore ratou e haapa‘o i taua haamaitairaa ra, ei reira to ratou i‘oa e iritihia ai, o tera ana‘e ïa te taime. Ua papa‘ihia te i‘oa o te taatoaraa o te mau tamarii a Adamu i reira, e tape‘a mai hoi te Fatu i te mau i‘oa i roto i taua buka ra e ia roaa ia ratou te ite i te parau mau, e tia ai ia ratou ia pato‘i atu ia’na, e ia hara i te Varua Maitai; ei reira ratou e hurihia ai i raro i hade, e iritihia ai hoi to ratou i‘oa i te Buka Ora a te Arenio (DBY, 387–88).

E mea oaoa ia ite e, ua faaora tatou i te taata atoa o ta te Metua i horo‘a i roto i to tatou mana [tiaauraa]. Ua parau mai Iesu e, aore roa te hoê i mo‘e, maori râ o te mau tamaiti o te pohe. Eita atoa e mo‘e ia’na te hoê i to’na mau taeae, maori râ o te mau tamaiti o te pohe. Ia faaora tatou i te taata atoa ta te Metua i tuu mai i roto i to tatou mana (DBY, 388).

Ua faaauhia ta tatou haapa‘oraa nei i te huru o te taatoaraa o te mau tamarii a Adamu. Eita te reira e haaparahi i te tahi pae i te vahi e auê ai ratou ma te mauiui rahi e a muri e a muri noa’tu, e rave mai râ ïa i te tamaiti e te tamahine hopea roa atoa a Adamu raua o Eva, e rave mai hoi ia ratou mai roto mai i te tape‘araa, e iriti mai i te uputa, e ofati i te mau ruuruuraa i ruuruuhia ai ratou e afa‘i mai i te taata atoa o te farii i te ora (DBY, 389).

Te onoono ra to te ra‘i atoa ia faaorahia te taata. E oto to te ra‘i i te taata, no te ‘eta‘eta o to ratou aau, no to ratou tiaturi ore, e to ratou taere no te tiaturi e no te rave (DBY, 388–89).

I te heheuraa te Atua ia Iosepha Semita raua o Sidney Rigdon e ua faaineinehia te vahi no te taata atoa, ia au i te maramarama ta ratou i farii e ia au i to ratou pato‘iraa i te ino e to ratou raveraa i te maitai, ua riro ïa te reira ei tamataraa rahi no te taata e rave rahi, e ua taiva roa atura te tahi pae no te mea e eita te Atua e faautu‘a i te feia etene e te mau tamarii rii i te faautu‘araa mure ore, ua faaineine râ oia i te vahi no te ora, ia tae i te tau mau, no te taata atoa, e e haamaitai hoi oia i te taata parau tia atoa, e te viivi ore, e te parau mau, noa’tu ua amui ratou i te tahi ekalesia e aore ra aita. E parau haapiiraa apî te reira i teie nei u‘i, e rave rahi tei topa no te reira. (DBY, 390–91)

E ere anei e mana‘o faahiahia ia ite e, te vai ra te mau basileia, te mau parahiraa hanahana e te mau faaearaa au maitai tei faaineinehia no te mau tamaiti e te mau tamahine atoa a Adamu, maori râ o te mau tamaiti o te pohe? Eita ratou e hope roa i te roaa te tia-faahou-raa matamua, e rave rahi atoa paha te ore e tia mai i roto i te piti o te tia-faahou-raa, e hope roa a‘e râ i te tia faahou mai (DBY, 391).

Na roto i te Tara‘ehara o te Mesia, e faaorahia i roto e te mau oro‘a o te evanelia.

E tia ia roaa [te faateiteiraa] i te taata o tei ora na e o te ora nei. Ua tae mai te Evanelia. Te faataehia atu nei te parau mau e te maramarama e te parau tia i to te ao nei, e te taata atoa o te farii i te reira, o oia ïa te faaorahia i roto i te basileia tiretiera o te Atua. E rave rahi atoa o te feia o tei ore i farii i te reira, na roto i te ite ore, na roto i te mau peu tumu, na roto i te mau tiaturiraa tahito, e na roto i te mau haapiiraa hape a to ratou mau metua, e farii â ïa ratou i te hoê basileia maitai e te hanahana, e farii hoi ratou i te faito tei ore â i ô i roto i te aau o te taata, maori râ o tei ite i te reira na roto i te heheuraa (DBY, 389).

Na teie mau parau [a hi‘o PH&PF 88:21–24] e faataa i ta Iesu i parau ra a na ô ai oia ra e, “E rave rahi te parahiraa mau i te fare o tau Metua” [a hi‘o Ioane 14:2; PH&PH 98:18]. E hia rahiraa, aita ïa ta’u e nehenehe ia parau; e toru râ tei parau-papu-hia: te tiretiera, oia te teitei atu; te teretetiera, oia to raro a‘e; e te telesia, oia te toru. Ia tai‘o maite tatou i ta te Fatu i parau i to’na mau taata i te mau mahana hopea nei, e ite tatou e, ua faaineine oia i te tahi no te mau taata atoa o te ao nei; te taata atoa e hope roa a‘e o tei hinaaro, e o tei faaitoito rii noa, ia haavi i te ino e ia faaore i te hara i roto ia’na, e ia ora i te oraraa e au ai i te hanahana, e roaa ïa ia’na te reira. O tatou o tei farii i te îraa o te Evanelia a te Tamaiti a te Atua, e aore ra te Basileia o te ra‘i ra o tei tae mai i nia i te fenua nei, ua farii ïa tatou i te mau ture, te mau oro‘a, te mau faaueraa e te mau heheuraa o te faaineine ia tatou, na roto i te haapa‘o-maite-raa, ia roaa te basileia tiretiera, ia tomo atu i mua i te aro o te Metua e te Tamaiti (DBY, 391).

Taa ê noa’tu te hoho‘a o rapae—mai te mea e ua papu roa ia’u e ua tae te aau o te taata i te rave i te hinaaro o to ratou Metua i te Ra‘i, turorirori noa’tu â ratou e rave hoi i te mau mea e rave rahi na roto i te huru paruparu o te taata nei, e faaorahia râ ratou (DBY, 389).

E ia farii tatou i te ora mai te au i tei horo‘ahia mai ia tatou, e mea tia roa ia tatou ia vai parau tia noa i roto i te mana‘o atoa, i roto i te feruriraa atoa, i roto i to tatou mau taatiraa hoa, i ta tatou mau faaauraa parau, i ta tatou mau parau faaiteraa, e i roto i te mau ohipa atoa o to tatou nei oraraa, ma te măta‘u ore e te tau‘a ore i te mau parau tumu hape e te mau parau tumu haavare atoa o te tuuhia mai i mua ia tatou (DBY, 389).

Noa’tu â e opuaraa hoê ta tatou ei nunaa, a haamana‘o râ outou e, te ora, e ohipa ïa na te taata iho; na te taata tataitahi e haapa‘o i to’na iho ora. Aita to’u e taime no te vauvau i te taatoaraa o to’u nei mana‘o i teie vahi, e faaite râ vau i te tahi tuhaa. Te vai ra te tahi i roto i teie Ekalesia o tei mana‘o e e faaorahia ratou na roto i te parau tia a vetahi ê. Eita ïa ratou e tae. O ratou teie o te tae atu a opanihia ai te uputa, a tia noa ai i rapae‘au; ei reira outou e pii atu ai i te tahi taata, e teie taata, na roto i to’na iho haapa‘o maitai, na roto i te aroha o Iesu Mesia, ua tomo atu ïa i te uputa tiretiera, o oia ïa tei piihia ia iriti mai i te uputa ia outou; eita râ e tia ia’na. O te hopea ïa te reira o te feia o tei tiaturi faufaa ore noa ia faaorahia na roto i te parau tia e na roto i te mana o te Taeae ra o Mea [e aore ra te Tuahine] o Mea. Te faaara atu nei au ia outou ia faatupu i te parau tia e te haapa‘o maitai i roto ia outou iho, o te rave‘a hoê roa ïa ia tomo i roto i te oaoa tiretiera (DBY, 390).

Mai te mea e e hahi ê te Taeae Brigham, a opanihia atu ai i te Basileia o te ra‘i ia’na, na te Taeae Brigham ana‘e ïa te hape e aita atu â. O vau ana‘e te taata i nia i te ra‘i, i nia i te fenua, e aore ra i hade, o te tia ia faahapahia no te reira (DBY, 390).

E au te reira no te Feia Mo‘a atoa i te Mau Mahana Hopea Nei. Te ora, e ohipa ïa na te taata iho. O vau ana‘e te taata te tia ia faaora ia’u. Ia faataehia mai te ora ia’u, e tia ia’u ia pato‘i e aore ra ia farii. Ia farii au i te reira, e auraro ïa vau ma te haapa‘o-maite-raa i te Tumu no te reira e hope noa’tu to’u oraraa, e ia ratou atoa ta’na e faataa ei haapii mai ia’u; ia pato‘i au i te reira, e haapa‘o noa ïa vau i to’u iho nei hinaaro, eiaha i te hinaaro o Tei Hamani ia’u (DBY, 390).

Aore roa e taata o tei hau atu ta’na parau tia i te parau tia e titauhia no te faaora ia’na; te taata atoa o tei faaorahia na, e o te faaorahia a muri atu, e titauhia ïa te taatoaraa o ta ratou parau tia no te faaora noa ia ratou, e ia faaorahia ratou, e na roto ana‘e ïa i te faaitoito-roa-raa no te haavi, o tei titau i te puai hope roa o te aau (DBY, 387).

Te parahiraa no te Atua e no te Mesia, e basileia taa ê ïa—te basileia tiretiera (DBY, 388).

Te tane e te vahine atoa o tei hinaaro ia roaa ia ratou i te parahiraa i roto i te basileia tiretiera, e ite ïa ratou e, ia tautoo ratou i te mau mahana atoa e tia ai (DBY, 392).

Te parau no te taata e faaorahia i roto i te basileia tiretiera o te Atua ma te ore i faaineinehia no te parahi i te vahi viivii ore e te mo‘a, e parau maamaa ïa e te faufaa ore; e mai te mea e te vai ra vetahi o tei mana‘o e e tia ia ratou ia tomo atu i mua i te aro o te Metua e te Tamaiti eiaha na roto i te oraraa i ta ratou haapa‘oraa, na roto râ i te aroraa no te reira, ua hape ïa ratou, e no reira ia haapapu oioi tatou i to tatou mana‘o ia ora tatou i ta tatou haapa‘oraa, e huru maitai a◊e ïa no tatou (DBY, 392).

Te faanahoraa o te ra‘i, ia haaputuputu ïa i te taatoaraa, e ia faaora i te taata atoa o te tia ia faaorahia (DBY, 387).

E mea tia i te taata ia maramarama e, aore e tane [e aore ra e vahine] e fanauhia i nia i te fenua nei, maori râ o te tia ia faaorahia i roto i te basileia o te Atua, mai te mea e ua hinaaro oia i te reira (DBY, 387).

Te taata atoa o tei ora na e o te ora a muri atu i nia i teie nei fenua, e fana‘o ïa ratou i te fariiraa i te Evanelia. E Aposetolo to ratou e te Peropheta, e te feia tavini i ŏ ra, mai i ŏ nei i ŏ tatou nei atoa, no te arata‘i ia ratou i nia i te e‘a o te parau mau e te parau tia, e no te faaho‘i ia ratou i te Atua. E farii te taata atoa i te rave‘a no te ora e te ora mure ore (DBY, 387).

Mai te mea e, ua hoê tatou i roto i te faaroo, e ua hoê hoi tatou i te opuaraa rahi, e e tia ia’u, te taata hoê ra, ia ô i te basileia tiretiera, o outou e te taata ê atu atoa, ia au atoa i taua ture ra, e ô atoa ïa outou i reira (DBY, 387).

E faateitei te Metua i te Ra‘i i Ta’na mau tamarii itoito roa ia ora ratou i mua i To’na aro i roto i te mana e te hanahana e a muri noa’tu.

Hoê â taleni anei e hoê â hoi aravihi to te mau varua atoa? Aita roa. E aifaito anei ratou i roto i te basileia tiretiera? Aita. [A hi‘o PH&PF 131:1–4.] E mea maitai a‘e te tahi mau varua i te tahi ê ra; e tia ia vetahi ia farii hau ê i te tahi ê. Te taa-ê-raa te tahi taata i te tahi ta outou e ite i ŏ nei, te vai atoa ra ïa i roto i te ao varua, teie râ, hoê â to ratou metua, no ŏ mai ïa i te hoê Metua e te hoê Atua (DBY, 391).

O te opuaraa, te feruriraa, te hinaaro e te mana‘o o te Fatu ia faateiteihia ïa te mau taata atoa i te ao nei i te mau terono, te mau basileia, te mau hau e te mau mana, ia au i to ratou ite. … I te matamua, e mea tia ia ratou ia faahemahia e te hara e ia roohia i te mau ati o te tino tahuti nei, ia tia ia ratou ia faaite i to ratou auraa; ei reira e tia ai i te Evanelia ia ô i roto ia ratou e ia afa‘i mai ia ratou i nia, ia tahoê mai ia ratou, ia haamaramarama i to ratou feruriraa, e ia faariro ia ratou ei hoê i roto i te Fatu ia Iesu, ia vai hoê noa to ratou faaroo, ta ratou mau pure, to ratou tiaturiraa, to ratou aau, e to ratou mau hinaaro atoa (DBY, 391–92).

Te taa-ê-raa i te taata parau tia e te taata hara, i te ora mure ore e te pohe, i te oaoa e te oto rahi, o teie ïa, i te taata atoa o tei faateiteihia, e ore ïa to ratou mau haamaitairaa e taotiahia, e tupu noa â ïa, e to ratou mau basileia, to ratou mau terono, e to ratou mau hau, to ratou mau hui arii e to ratou mau mana, aore ïa e hope, e tupu noa ïa e a muri e a muri noa’tu (DBY, 63).

O vai te taata e tia ia faataa i te huru atua o te taata nei? O te taata ana‘e ïa o tei maramarama i te mau parau tumu mau no te tau mure ore—te mau parau tumu o tei au i te ora e te faaoraraa. Ia faateiteihia te taata, eita ïa oia e faaerehia i te mana e te aravihi i horo‘ahia ia’na; aita roa, ia tamau râ oia i nia i te e‘a e tae atu i te ora, e farii faahou â oia i te mana e te aravihi i te mau taahiraa atoa a haere noa ai oia i mua (DBY, 392).

Te basileia i tomohia e teie nei feia, e au ïa i te basileia Tiretiera; o te hoê ïa basileia i reira tatou e tia ai ia faaineine no te tomo i mua i te aro o te Metua e te Tamaiti. Ia ora tatou i te oraraa e tia ai ia tatou ia farii i taua hanahana ra. Ua fafau mai te Atua ia outou, ua fafau mai Iesu ia outou, e ua fafau atoa mai te mau aposetolo e te mau peropheta i mutaa ihora e i to tatou anotau e e farii outou i te utu‘a ia au i to outou mau hinaaro parau tia i mua i te Fatu, mai te mea e e ora outou i te oraraa e au ai i taua utu‘a ra(DNW, 31 Oct. 1860, 1).

Te ora, o te îraa o te oraraa o te taata, o te mau melahi, e o te mau Atua; o te ora mure ore ïa—te oraraa i vai na, te oraraa e vai nei, e te oraraa e vai â a muri atu. E tatou, ei taata, e taata farii ai‘a i taua oraraa ra, mai te mea e e faaitoito tatou ia haapa‘o maite i te mau titauraa o te mau ture a te Atua, e o te tamau maite â i roto i te faaroo” (DBY, 387).

Mai te mea e e auro e te ario ta outou, eiaha ia vaiiho i te reira ia faataa ê ia outou i ta outou hopoi‘a. E faaite atu vau ia outou eaha ta outou ohipa e rave ia roaa mai to outou faateiteiraa, e ore hoi te reira e roaa ia outou, maori râ ia na ô outou i te haere. Ia haamauhia to outou aau i nia i te tahi noa’tu mea e taupŭpû ai outou i te pûpûraa i te reira i te Fatu, a pûpû atu i te reira mea i te matamua, ia tia roa ta outou pûpûraa. . … Ia ore to’u aau atoa ia pûpûhia i teie nei ohipa, e horo‘a ïa vau i to’u taime, i ta’u mau taleni, i te ohipa a to’u nei rima e i ta’u mau faufaa atoa, e ia auraro to’u aau; e faaohipa vau i to’u nei rima i roto i te ohipa a te Atua e ia auraro to’u nei aau i te reira . . … Ua faaite atu vau ia outou i teie nei i te e‘a ia haerehia no te farii i te faateiteiraa. E mea tia roa ia riro te Fatu ei mea matamua i roto i to tatou nei aau; e titau roa ino te paturaa i ta’na ohipa e to’na basileia i to tatou mana‘o matamua (DNW, 5 Jan. 1854, 2).

Aore roa e taata e faaorahia e tomo i mua i te aro o te Metua, maori râ o te na roto i te Evanelia a Iesu Mesia—hoê â titauraa no te taata atoa. Te vai nei ta te Fatu ohipa, ta’na mau rave‘a, ta’na hopoi‘a; na’na ïa e faaoti i te reira. Te faaitoito nei Iesu ma to’na puai atoa ia haamo‘a e ia faaora i te ao nei e ia faaho‘i i to’na mau taeae e to’na mau tuahine i mua i te aro o te Metua. Te faaitoito nei tatou i piha‘i iho ia’na no te tamâraa i te taatoaraa o te mau tamarii a Adamu, ia ineine tatou e ratou atoa no te parahi i piha‘i iho i te Atua i roto i to’na Basileia (DBY, 389).

Te Mau Mana‘o no te Haapiiraa

Te ora e horo‘ahia e Iesu Mesia, e roaa ïa i te mau tamarii atoa a Adamu.

E mea nahea te ora ta Iesu Mesia i pûpû nei i riro ai ei “ora … no te taatoaraa o te taata—te faaoraraa no te taatoaraa”? Nahea taua ora no te taatoaraa o te taata e faaite ai i te “here metua puai” o to tatou Metua i te Ra‘i i Ta’na mau tamarii? E mea nahea taua ite ra e faatupu ai i to outou oaoa?
Ua parau mai te Peresideni Young e, e rave rahi te taata tei taiva i te heheuraa mai te Atua ia Iosepha Semita raua o Sidney Rigdon e e tia i te taata atoa ia farii i te ora. I to outou mana‘o, no te aha taua haapiiraa ra i riro ai ei mea fifi no te tahi mau melo ia farii? Nahea tatou ia ‘ape i te mau fifi mai te reira te huru i te mau haapiiraa a te mau peropheta e te mau aposetolo i teie mahana?

Na roto i te Tara‘ehara o te Mesia, e faaorahia i roto i te basileia tiretiera te taata atoa o tei haapa‘o maitai i te mau ture e te mau oro‘a o te evanelia.

I to outou mana‘o, eaha te auraa o te parau a te Peresideni Young, a na ô ai oia ra e “e ohipa [te ora] na te taata iho”? No te aha te ora e titau ai “i te puai hope roa o te aau”? (A hi‘o atoa 2 Nephi 25:23.)
A faaau na i te parau a te Peresideni Young no te feia “o tei mana‘o e e faaorahia ratou na roto i te parau tia a vetahi ê” i te parabole a te Faaora no na paratenia paari e na paratenia maamaa. (A hi‘o atoa Mataio 25:1–13; PH&PF 33:17; 45:56–57.) Ua parau atoa te Peresideni Young e, “te faaitoito nei tatou i piha‘i iho ia [Iesu] no te tamâraa i te taatoaraa o te mau tamarii a Adamu.” Ma te iteraa e, “e ohipa [te ora] na te taata iho,” nahea tatou ia tauturu ia vetahi ê a faaitoito ai ratou ia haere mai ia Iesu Mesia e ia farii i te ora mure ore?
No te aha e te Feia Mo‘a haapa‘o maite roa a‘e, e titau atoa ai ïa ratou i te aroha no Iesu Mesia ia ô i roto i te basileia tiretiera?
Ia au i te parau a te Peresideni Young, eaha te auraa o te parau ia farii i te ora o tei pûpûhia mai ia tatou? Eaha te auraa o te parau ia pato‘i i te ora? Eaha te mau mea ta outou i ora mai o tei tauturu ia outou i te ite i te faufaa o te auraroraa i te hinaaro o te Atua?
No te aha te mana‘o e tia ia tatou ia parahi i mua i te aro o te Atua ma te ore i faaineinehia i riro ai ei “parau maamaa ïa e te faufaa ore”? (A hi‘o atoa Moromona 9:4.) Nahea te tavini-maite-raa i roto i Te Ekalesia a Iesu Mesia i te Feia Mo‘a i te Mau Mahana Hopea Nei e faaineine ai ia tatou no te tomo atu i roto i te basileia tiretiera? No te aha taua faaineineraa ra i titau ai ia tatou ia “ia tautoo … i te mau mahana atoa”?

E faateitei te Metua i te Ra‘i i Ta’na mau tamarii itoito roa ia ora ratou i mua i To’na aro i roto i te mana e te hanahana e a muri noa’tu.

Eaha te auraa o te parau a te Peresideni Young a parau ai oia e e tia i te evanelia “ia faariro ia ratou ei hoê i roto i te Fatu ia Iesu”? (A hi‘o atoa Ioane 17; 4 Nephi 1:15–17; PH&PF 38:27.)
Ua haapii te Peresideni Young e, “te faaitoito nei Iesu ma to’na puai atoa … ia faaho‘i i to’na mau taeae e to’na mau tuahine i mua i te aro o te Metua. Te faaitoito nei tatou i piha‘i iho ia’na.” Eaha te mau rave‘a e tia