Pagbansay sa Kahanas 10

Pagpalambo og mga Sumbanan sa Himsog nga Panghunahuna

Ang atong mga hunahuna adunay dakong epekto kanato, sa maayo man o sa daotan. Ang pagpalambo og himsog nga mga sumbanan sa panghunahuna makapauswag sa atong panglantaw sa kinabuhi ug sa atong abilidad sa pagbuhat sa buluhaton sa Ginoo.

Lider sa diskusyon: Paningkamoti nga mahuman dayon ang mga seksiyon nga “Hatagi og kahulogan” ug ang “Ipakita” aron ang mga tigkat-on adunay daghang panahon sa pagpraktis.

Hatagi og kahulogan

Lider sa panaghisgot: Ipaila ang hilisgotan alang niini nga pagbansay sa kahanas pinaagi sa pagpakigbahin sa mosunod. Mahimo usab nimong ikonsiderar ang pagtuon sa Doktrina ug mga Pakigsaad 6:36 sa samang higayon. Dapita ang mga estudyante sa pagpakigbahin kon sa unsang paagi nga ang pagsunod sa tambag sa Ginoo niini nga bersikulo makaapekto sa ilang kinabuhi.

Ang atong mga hunahuna makaimpluwensiya sa atong pagbati ug lihok (tan-awa sa Mga Proverbio 23:7). Ang negatibo nga mga hunahuna posibling mosangpot sa pagkawala sa kadasig, pagduhaduha sa kaugalingon, kahadlok, kasuko, ug mga pagbati sa pagkawalay paglaom. Ang positibo nga mga hunahuna posibling mosangpot sa pagkamadasigon, pagsalig, ug paglaom.

Usa ka paagi nga makapalambo kita og himsog nga mga sumbanan sa panghunahuna mao ang pagrekord sa atong negatibo nga mga hunahuna ug usbon kini sa pagsulat aron sila mahimong:

Mas malaomon.
Mas matinud-anon.
Magpakita og pagtuo ni Jesukristo.

Lider sa diskusyon: Ikonsiderar ang pagsulat niining tulo ka mga sumbanan diha sa pisara.

Ipakita

Lider sa diskusyon: Ipakita kini nga kahanas pinaagi sa pagpakita ug paghisgot sa pipila sa mosunod nga mga sanglitanan nga gipahaom gikan sa “Ilisi ang negatibong panghunahuna.” sa Pag-adjust ngadto sa Misyonaryo nga Kinabuhi ([2013], 20). Mahimo nimong dapiton ang lain-laing mga sakop sa klase sa pagbasa og kusog sa matag sanglitanan ngadto sa klase.

Ang akong negatibo nga mga hunahuna	Ang akong gisulat og usab aron makaugmad og maayong panghunahuna
Dili ko ganahan nga mobangon og sayo.	Dili ko gustong maganahan niini. Morag makahimo ko niini. Kon mobangon ko ug mosugod sa paglihok, basin mas moarang-arang ang akong pamati. Makaampo ko aron mangayo og tabang sa Dios.
Dili gayod ko makalahutay niining adlawa.	Hangtod karon nakalahutay ko niini kada adlaw, ug molahutay ko karong adlawa. Ang kinahanglan lamang nakong buhaton sa pagkakaron mao ang unsay anaa sa akong atubangan, sa tagsa-tagsa ka lakang. Samtang magtan-aw ko sa Manluluwas, tabangan ko Niya nga makalahutay niining adlawa.
Palpak kaayo kadto nga leksiyon.	Ang ubang leksiyon mas maayo kay sa uban. Maayo kay gusto kong mouswag. Nahibalo ako nga dawaton sa Dios ang akong labing maayong mga paningkamot. Tingali makatabang nako ang akong kompanyon nga molambo.

Lider sa diskusyon: Dapita ang mga tigkat-on sa pagpakigbahin kon sa unsang paagi nila nakita ang tulo ka sumbanan nga gipakita niini nga mga sanglitanan. Pwede usab nimong hisgotan ang mga pangutana sama sa mosunod:

Unsay nagpabilin sa imong hunahuna niini nga mga sanglitanan?
Sa unsang paagi ang paghunahuna niini makaapekto sa imong kinabuhi?

Ipraktis

Lider sa diskusyon: Hatagi ang mga estudyante og oportunidad sa pagpraktis niini nga kahanas nga may kapares. Ikonsiderar ang pagpakita sa mosunod nga mga instruksiyon:

Usba og sulat ang mosunod nga negatibong mga hunahuna ngadto sa mga pamahayag nga mas malaomon ug matinud-anon, ug nga magpakita sa hugot nga pagtuo kang Jesukristo:

“Ang tanan mas maayo niini kay kanako. Ingon og dili ko angayan dinhi.”
“Dili ko makahimo sa pagpakigsulti og estranghero. Makahadlok kaayo na!”
“Kanunay kong dili organisado.”

Lider sa diskusyon Pagdapit og pipila ka matinguhaon nga sakop sa klase sa pagpakigbahin kon sa unsang paagi nila giusab sa pagsulat ang usa sa mga negatibo nga mga hunahuna. Alang sa dugang nga pagpraktis, ikonsiderar ang pagdapit sa mga tigkat-on sa pagsulat og pipila ka negatibong mga hunahuna nga ilang nahunahuna kaniadto. Hatagi sila og panahon sa pagpraktis nga usbon sa pagsulat kini nga mga hunahuna aron mahimong mas malaomon, matinud-anon, ug puno sa pagtuo.

Gamita

Lider sa diskusyon: Ipakigbahin ang mosunod aron matabangan ang mga tigkat-on nga magamit kini nga kahanas:

Sa sunod nga pito ka adlaw, paggahin ug panahon sa pagsulat sa pipila ka negatibong mga hunahuna nga naa nimo. Dayon sublia kini sa pagsulat aron mahimong mas malaomon matinuoron sa pagpakita sa inyong pagtuo ni Jesukristo. Hatagi’g pagtagad kon sa unsang paagi kini nga praktis makaapekto kaninyo.