Leksiyon 6

Pagpraktis sa Pagtudlo

Mga Tabang sa Pagtudlo sa mga Leksiyon gikan sa Kapitulo 3 sa Isangyaw ang Akong Ebanghelyo

Ang paghatag sa mga sakop sa klase og balik-balik nga mga oportunidad sa pagtudlo makadugang sa ilang pagsalig ug abilidad sa pagpakigbahin sa ebanghelyo ni Jesukristo. Makapalig-on usab kini sa ilang pagpamatuod sa Manluluwas ug sa Iyang doktrina.

Unsaon sa paggamit kini nga leksiyon

Lider sa diskusyon: Kini nga leksiyon naghatag og mga ideya sa pagtabang sa mga estudyante nga magtuon ug motudlo sa mga kamatuoran gikan sa kapitulo 3 sa Isangyaw ang Akong Ebanghelyo. Samtang imong tinoon kon unsaon ug kanus-a gamiton ang mga ideya niini nga leksyon, ikonsiderar ang mosunod:

• Kasagad [Frequency]: Ang mga sakop sa klase makabenepisyo gikan sa balik-balik nga mga oportunidad sa pagtudlo sa tibuok kurso.

• Mga Ehemplo: Sa dili pa dapiton ang mga sakop sa klase sa pagtudlo, pakitaa sila og mga panig-ingnan kon unsay gihangyo nga ilang buhaton. Sama pananglit, mahimo nimong (1) ipakita kon unsaon sa pagtudlo og kamatuoran, o (2) mogamit sa mubo nga sampol nga mga leksiyon gikan sa “Motudlo Kon Makakita Kamo” (Isangyaw ang Akong Ebanghelyo, 175–176).

• Palibot: Seguradoha nga ang matag tawo adunay matudloan. Seguroha nga sila moatubang sa ilang pares o grupo ug nga ang tanan makadungog sa usag usa. Awhaga ang mga tigkat-on sa pagtahod sa ilang mga kaedad nga nagtudlo nila.

• Pagbalik-balik: Sulayi sa paghatag ang mga tigkat-on og mga oportunidad sa pagtudlo sa samang kamatuoran sa makadaghang higayon sa usa ka sesyon sa klase. Makatabang kini nila nga makapahiuyon ug mouswag. Mahimo nimong tahasan sila sa pagtudlo og lainlaing mga tawo sa matag higayon.

• Pagpahiangay: Sa paglabay sa panahon, mahimo nimong matabangan ang mga tigkat-on nga motutok sa mas maayong mga kahanas sa pagtudlo, sama sa pagtudlo sa kompanyon, paghatag og epektibo nga mga pagdapit, o pagpangutana og maayong mga pangutana. Para sa mga ideya sa dugang nga mga kahanas nga mahimo nimong iapil, tan-awa ang mga pagpraktis sa mga kahanas dapit sa kataposan niini nga manwal.

Mga ideya nga makatabang sa mga sakop sa klase nga magpraktis sa pagtudlo

Lider sa diskusyon: Ang mosunod nga mga giya sa pagtudlo gidisenyo aron sa pagtabang sa mga tigkat-on sa paghimo sa unang mga lakang sa pagkahimong epektibo nga mga magtutudlo.

Daklit nga minubong saysay

Lider sa diskusyon; Kini ang labing dali ug labing yano nga opsiyon. Ang mga tigkat-on makaandam ug makatudlo og daklit nga minubong saysay sa usa ka hilisgotan sa ebanghelyo sulod sa pipila lamang ka minuto. Mahimo nilang buhaton kini og panagsa sa pagsugod sa klase, sa dili pa nimo sugdan ang imong nakatakda nga leksiyon.

Aron matabangan ang mga sakop sa klase sa pag-andam og daklit nga minubong saysay, ipakita ang mosunod nga mga instruksiyon:

1. Pangitaa ang seksiyon nga giulohan og “Sukaranan nga Doktrina” sa leksiyon 1, 2, or 3 gikan sa kapitulo 3 sa Isangyaw ang Akong Ebanghelyo (mga pahina 36–54, 55–69, 70–82).

2. Pagpili og usa sa mga hilisgotan niini nga seksiyon nga gusto nimong tun-an. Paggahin og pipila ka minuto sa pagtuon ug pagsabot niini nga hilisgotan.

3. Pagpakigbahin og usa o duha ka minuto nga minubong saysay sa imong hilisgotan ngadto sa usa ka kauban o gamay nga grupo.

Yano nga latid sa leksiyon

Lider sa diskusyon Kini nga opsiyon mohatag sa mga tigkat-on og oportunidad sa pagpuno og dugang nga mga bahin ngadto sa ilang panudlo. Kini nga mga bahin naglakip sa pagpakigbahin og usa ka may kalabotan nga kasulatan, pagpaabot og imbitasyon, ug pagpakigbahin og pagpamatuod.

1. Pangitaa ang seksiyon nga giulohan og “Sukaranan nga Doktrina” sa leksiyon 1, 2, or 3 gikan sa kapitulo 3 sa Isangyaw ang Akong Ebanghelyo (mga pahina 36–54, 55–69, 70–82).

2. Pagpili og usa sa mga hilisgotan niini nga seksiyon nga gusto nimong tun-an. Dugangi ang imong pagsabot niini nga hilisgotan pinaagi sa (1) pagbasa sa sanga nga seksiyon ug pagtimaan sa imong nakaplagan nga labing mahinungdanon, (2) pagtuon sa ubang mga kasulatan nga anaa sa “Pagtuon sa Kasulatan” nga kahon.

3. Paghimo og yano nga outline nga naglangkob sa:

   • Mubo nga saysay sa imong nakat-onan.

   • May kalabotan nga kasulatan nga ipakigbahin.

   • Usa ka pagdapit nga imong ikahatag.

   • Imong pagpamatuod.

   • Gamita ang imong latid sa pagtudlo og usa ka kauban mahitungod sa hilisgotan nga imong gitun-an.

Pagtudlo ang duha o mas daghan pa nga kamatuoran

Lider sa diskusyon: Kini nga opsiyon motugot sa mga tigkat-on nga motudlo og duha o mas daghan pa nga mga kamatuoran pinaagi sa mubo nga leksiyon. Aron tabangan sila nga makakompleto niini nga opsiyon, iapud-apod ang handout nga giulohan og “Giya alang sa Pag-andam ug Pagtudlo og Mubo nga Leksiyon.”

Giya alang sa Pag-andam ug Pagtudlo og Mubo nga Leksiyon

Hain sa mosunod nga mga leksiyon gikan sa kapitulo 3 sa Isangyaw ang Akong Ebanghelyo ang imong gamiton sa pagtudlo? (Pagpili og usa.)

• ____ Leksiyon 1: Ang Mensahe sa Pagpahiuli sa Ebanghelyo ni Jesukristo

• ____ Leksiyon 2: Ang Plano sa Langitnong Amahan sa Kaluwasan

• ____ Lesson 3: Ang Ebanghelyo ni Jesukristo

Adto sa “Sukaranan nga Doktrina” nga seksiyon sa leksiyon nga imong gipili. Susiha ang gipabaga ang mga letra [bolded] nga mga ulohan. Pagpili og labing minos duha sa mga hilisgotan nga gusto nimo nga ipraktis og tudlo. Unsa nga mga ulohan ang imong gipili?

Sa pagtabang nimo nga maandam, paghunahuna og usa ka tawo nga posible nga mabulahan sa mga kamatuoran nga gusto nimong itudlo. Isulat ang pangutana, kabalaka, o panginahanglan nga anaa niini nga tawo nga mahimong mahupay sa imong leksiyon.

Ihan-ay ug ipamubo ang imong itudlo. Pag-andam og leksiyon nga imong matudlo sulod sa lima ngadto sa pito ka minuto. Ikonsiderar ang pagbuhat sa mosunod: (1) Pagpili og labing minos usa ka kasulatan nga imong ipakigbahin. (2) Pagrekord og labing minos usa ka pangutana nga imong ipangutana. (3) Paghunahuna og kasinatian o ehemplo nga imong ipakigbahin. (4) Ikonsiderar kon kanus-a ka mohatag sa imong pagpamatuod. (5) Irekord ang imbitasyon nga imong ikahatag.

Andama ang imong outline gamit ang luna sa ubos ug sa likod niini nga pahina. Kon ikaw magtudlo, ayaw kabalaka nga dapat matudlo nimo ang tanan. Pagtudlo gikan sa imong kasingkasing, gamit ang imong kaugalingong mga pulong.

Pamalandong

Lider sa diskusyon: Human sa klase papraktisa ang mga sakop sa klase sa pagtudlo, ikonsiderar ang paghisgot sa ilang kasinatian. Mahimo kang mangutana sama sa mosunod:

• Unsa ang imong nakat-onan gikan sa proseso sa pag-andam ug pagtudlo?

• Unsa ang imong gitun-an ug gitudlo nga labing makahuloganon para nimo? Ngano man?

• Sa unsang paagi ka gustong molambo isip usa ka magtutudlo?

Pagtakda og tumong

Lider sa diskusyon: Hatagi og panahon ang mga sakop sa klase sa pagpamalandong sa unsay ilang nakat-onan karong adlawa ug sa pagtakda og mga tumong. Pwede usab nimong ipakita ang mosunod aron matabangan sila:

Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod, o paghunahuna og inyong kaugalingong ideya.

• Itudlo ang mga kamatuoran nga imong giandam ug gitudlo karong adlawa ngadto sa usa ka tawo nga wala sa klase.

• Pagpili og usa o mas daghan pa sa mga leksiyon sa kapitulo 3 sa Isangyaw ang Akong Ebanghelyo nga tun-an pa og dugang.

Akong tumong

• Ako mo … (aksiyon nga imong himoon).

• Akong kab-oton ang akong tumong pinaagi sa … (usa ka yano nga plano).

Lider sa diskusyon: Kon ang mga tigkat-on adunay grupo nga masultihan sa ilang mga tumong, hatagi sila og panahon sa pagpakigbahin kon unsaon nila sa pagsuporta o pagpahinumdom ang usag usa sa dili pa ang sunod nga klase.

Sa Sunod nga Higayon

Lider sa diskusyon: Kon andam ka na nga motudlo sa leksiyon 7 sa sunod nga higayon, ikonsiderar ang pagdapit og mga tigkat-on sa pagtuon sa “Ang Imbitasyon nga Magpabunyag ug Magpakompirma” gikan sa kapitulo 3 sa Isangyaw ang Akong Ebanghelyo (mga pahina 32–33) agig pagpangandam. Mahimo usab nimong padad-an sila og pahinumdom.