Leksiyon 13

Padayon uban sa Hugot nga Pagtuo

Kini nga leksiyon gituyo aron sa pagtabang sa mga estudyante sa pagtimbang-timbang sa ilang pag-uswag ug pagtubo isip mga disipulo ni Jesukristo atol sa ilang pag-apil sa kurso nga Pagpangandam sa Misyonaryo.

Magrebyo ug Mag-follow Up

Lider sa diskusyon: Dapita ang mga tigkat-on sa paghunahuna mahitungod sa ilang bag-ong mga paningkamot sa paggamit sa unsay ilang nakat-onan niini nga klase. Mahimo nimo silang dapiton sa pagpakigbahin og pipila sa ilang mga paningkamot uban sa kapares o isip tibuok klase.

Gisugyot nga Kalihokan sa Pagkat-on

Pagpamalandong sa espirituwal nga pag-uswag

Lider sa diskusyon: Mahimo nimong ipakita ang mga hulagway ni Jesukristo nga nag-ampo ug si Joseph Smith nga nagbasa sa Biblia. Dapita ang mga tigkat-on sa pagpamalandong sa mga hulagway samtang magbasa sila sa Marcos 1:35; Lucas 6:12; ug Joseph Smith—Kasaysayan 1:12–13. Awhaga sila sa pagpangita og komon nga mensahe niini nga mga bersikulo.

• Unsa ang gisulti sa mga kasulatan nga gibuhat sa Manluluwas ug ni Joseph Smith aron molambo sa espirituhanong paagi?

• Sa unsang paagi nausab ang kinabuhi ni Joseph Smith pinaagi sa pagpamalandong sa iyang nabasa sa Santiago 1:5?

Lider sa diskusyon: Ipasabot nga ang paggahin og panahon sa mainampoong paghinuklog ug pagpamalandong sa atong espirituhanong pag-uswag makatabang kanato nga makadawat og giya gikan sa Ginoo.

Aron matabangan ang mga sakop sa klase sa pagbuhat niini, mahimo kang magdrowing og tulo ka stick figure diha sa pisara ug markahan kini og Sugod sa Klase, Karong Adlawa, ug Unom ka Bulan gikan Karon. Dayon ipakigbahin ang mga instruksiyon diha sa ubos:

Pamalandonga ang imong espirituwal nga pag-uswag sukad sa imong pagsugod sa klase. Usab, ikonsiderar ang pag-uswag nga gusto pa nimong buhaton. Isulat ang imong mga hunahuna ug espirituwal nga mga impresyon. Ang mga pangutana nga sama niini makatabang:

Maghunahuna sa nangagi

• Kon itandi sa imong pagkaandam sa wala pa mokuha niini nga klase, sa unsang mga paagi nga gibati nimo nga mas andam ka na nga moserbisyo og misyon o sa pagpakigbahin sa ebanghelyo ngadto sa uban?

• Sa unsang paagi nga ang pagtuon sa Isangyaw ang Akong Ebanghelyo nakaapekto kanimo?

• Sa unsang paagi nga nausab ang imong relasyon sa Amahan ug ni Jesukristo?

• Unsang mga kasinatian atol sa o human sa klase ang nakahimo og kalainan para nimo?

Sa pagpadayon

• Unsa ang gusto gihapon nimong buhaton aron magpadayon sa pagpangandam alang sa misyonaryo nga serbisyo? Sa imong gibati unsay angay nga sunod nimong mga lakang aron matuman kini nga mga tumong?

• Kinsa ang gusto nimong tabangan nga mas maduol ngadto sa Langitnong Amahan ug ni Jesukristo? Unsay imong buhaton aron matabangan sila?

Lider sa diskusyon: Dapita ang mga estudyante sa paghisgot og mga tubag nga komportable nilang ipakigbahin ngadto sa ilang kapares o sa gamay nga grupo. Kini usab tingali usa ka maayo nga panahon aron madapit ang andam nga mga sakop sa klase nga ipakigbahin ang ilang pagpamatuod bahin ni Jesukristo ug sa Iyang ebanghelyo diha sa klase.

Ikonsiderar ang pagtapos pinaagi sa pagpakigbahin sa mosunod nga pamahayag ni Elder David A. Bednar:

Mahimo nimong palamboon ang imong tinguha sa pag-alagad sa Dios, ug mahimo nimong sugdan sa paghunahuna ingon sa hunahuna sa mga misyonaryo, sa pagbasa sa gitun-an sa mga misyonaryo, sa pag-ampo sama sa inampoan sa mga misyonaryo, ug nga mobati sama sa bation sa mga misyonaryo. Likayan ninyo ang mga butang kalibotanon nga maoy makahimo sa Balaang Espiritu sa pagbiya, ug makabaton ka og pagsalig nga makaila ug pagtubag sa mga espirituhanong awhag. Lagda human sa usa ka lagda, diyutay dinhi ug diyutay didto, kamo sa hinay-hinay mahimong misyonaryo nga inyong gipangandoy ug ang misyonaryo nga gilaoman sa Manluluwas. (“Pagkahimong Usa Ka Misyonaryo,” Liahona, Nob. 2005, 45)

Lider sa panaghisgot: Ipahayag ang imong gugma alang sa mga partisipante, ang imong pagpamatuod sa Manluluwas, ug ang imong mga pagbati mahitungod sa importansiya sa pagsangyaw sa Iyang ebanghelyo. Awhaga ang mga tigkat-on sa pagpadayon uban sa pagtuo sa ilang pagpangandam, aron mahimo silang mga misyonaryo ug mga disipulo nga gusto sa Ginoo nga ilang maabot.