Giya alang sa Pagtudlo sa Pagpangandam sa Misyonaryo

Welcome dinhi sa pagpangandam sa misyonaryo! Kini nga kurso mahimong adunay mahinungdanong papel sa mga kinabuhi sa kabatan-onan ug mga young adult kinsa nag-andam sa misyonaryo nga serbisyo. Mopanalangin usab kini sa batan-ong mga tawo kinsa wala magplano sa misyonaryo nga serbisyo apan ganahan nga molambo sa ilang abilidad sa pagpakigbahin sa ebanghelyo ni Jesukristo.

Ang katuyoan sa misyonaryo mao ang “pag-imbitar sa uban sa pagduol ngadto kang Kristo pinaagi sa pagtabang kanila nga makadawat sa gipahiuli nga ebanghelyo pinaagi sa pagbaton og hugot nga pagtuo kang Jesukristo ug sa Iyang Pag-ula, paghinulsol, pagpabunyag, pagdawat sa gasa sa Espiritu Santo, ug paglahutay hangtod sa kataposan” (Isangyaw ang Akong Ebanghelyo [2023], 1). Kini nga katuyoan mao ang among paagi sa pagpundok sa Israel, ug mao kini ang responsibilidad sa matag miyembro sa Simbahan.

Sa unsang paagi kni nga klase makapanalangin sa kabatan-onan ug sa mga young adult?

Ang tanan nga sulod niini nga kurso gituyo sa pagtabang sa mga tigkat-on nga malig-on ang ilang pagkakabig ngadto ni Jesukristo ug sa Iyang gipahiuli nga ebanghelyo. Sa pagkakabig moabot ang dugang nga tinguha ug kapasidad aron ipakigbahin ang ebanghelyo ni Jesukristo ngadto sa uban. Aron mahimo ang mga kondisyon nga makatabang sa pagkakabig, ang mga sakop sa klase mahimong dapiton sa:

• Pagsubsub sa ilang kaugalingon sa Isangyaw ang Akong Ebanghelyo aron sila makasinati sa gahom ug sa kaimportante niini nga manwal. Ipaila usab sila ngadto sa Pag-adjust sa Misyonaryo nga Kinabuhi (2013).

• Pagkat-on sa katuyoan sa misyonaryo (tan-awa sa Isangyaw ang Akong Ebanghelyo; 1) ug sutaon kon sa unsang paagi kini makagiya kanila, sa ilang mga kinabuhi karon ug sa tanang aspeto sa buhat sa misyonaryo.

• Pagbuhat og mga pasalig nga makatabang nila sa pagpanginabuhi sa ebanghelyo ni Jesukristo, pag-andam alang sa misyonaryo nga pagserbisyo, ug sa pagpakigbahin sa ebanghelyo sa Manluluwas diha sa pamilya ug mga higala.

• Pagkat-on ug pagpraktis sa pagtudlo sa mga kamatuoran nga makita sa kapitulo 3 sa Isangyaw ang Akong Ebanghelyo.

• Pagpraktis sa mga kahanas nga makatabang nila nga mahimong mas maayo nga magtutudlo sa ebanghelyo ug mas lig-on sa emosyon.

Sa unsang paagi giorganisa ang mga materyal?

Kini nga manwal naglakip sa duha ka matang sa mga kasinatian sa pagkat-on: kinauyokan nga leksiyon ug mga pagpraktis sa kahanas.

Kinauyokan nga mga Leksiyon

Ang kinauyokan nga leksiyon mao ang nag-unang kapanguhaan niini nga kurso. Sila nagtutok sa mga kapitulo 1–6 ug 11 sa Isangyaw ang Akong Ebanghelyo. Kini nga mga kapitulo mao ang labing may kalabotan sa kabatan-onan ug sa mga young adult kinsa sa kasamtangan wala magserbisyo og misyon.

Ang mosunod mao ang lista sa kinauyokan nga mga leksiyon:

• Leksiyon 1: Kita Modapit sa Uban nga Moduol ngadto ni Kristo

• Leksiyon 2: Pasiuna sa Isangyaw ang Akong Ebanghelyo

• Leksiyon 3: Pagtuman sa Misyonaryo nga Katuyoan (Isangyaw ang Akong Ebanghelyo kapitulo 1)

• Leksiyon 4: Siksika ang mga Kasulatan ug Isul-ob ang Tibuok nga Panagang sa Dios (Isangyaw ang Akong Ebanghelyo, kapitulo 2)

• Leksiyon 5: Magtuon ug Motudlo sa Ebanghelyo ni Jesukristo (Isangyaw ang Akong Ebanghelyo, kapitulo 3)

• Leksiyon 6: Pagpraktis sa Pagtudlo (Mga Tabang alang sa Pagtudlo og mga Leksiyon gikan sa kapitulo 3 sa Isangyaw ang Akong Ebanghelyo)

• Leksiyon 7: Ang Imbitasyon nga Magpabunyag ug Magpakompirma (Isangyaw ang Akong Ebanghelyo, kapitulo 3)

• Leksiyon 8: Magtinguha ug Mosalig sa Espiritu (Isangyaw ang Akong Ebanghelyo, kapitulo 4)

• Leksiyon 9: Gamit sa Gahom sa Basahon ni Mormon (Isangyaw ang Akong Ebanghelyo, kapitulo 5)

• Lerksiyon 10: Pagtinguha sa Kristohanong mga Hiyas (Isangyaw ang Akong Ebanghelyo, kapitulo 6)

• Leksiyon 11: Pagtabang sa mga Tawo nga Mohimo ug Motuman sa mga Pasalig (Isangyaw ang Akong Ebanghelyo, kapitulo 11)

• Leksiyon 12: Pag-adjust ngadto sa Misyonaryo nga Kinabuhi

• Leksiyon 13: Padayon uban sa Hugot nga Pagtuo

Ang Kaimportante sa Kapitulo 3

Tulo sa kinauyokan nga mga leksiyon nga tutokan sa kapitulo 3 sa Isangyaw ang Akong Ebanghelyo. Kini nga kapitulo naglangkob sa upat ka leksiyon nga itudlo sa misyonaryo ingon man sa seksiyon nga mahitungod sa pagdapit nga magpabunyag ug magpakompirma. Himoa ang pagtuon sa kapitulo 3 nga usa ka nag-unang prayoridad.

Leksiyon 6: “Pagpraktis sa Pagtudlo” magtabang sa mga sakop sa klase nga magkat-on ug magtudlo gikan sa mga leksiyon sa kapitulo 3. Mahimo kang mogahin og sobra sa usa ka yugto sa klase niini nga leksiyon. Tingali pwede ka usab nga mogahin sa mga bahin sa laing yugto sa klase gamit ang mga ideya gikan sa leksiyon 6. Ang pagbuhat sa ingon maghatag sa mga sakop sa klase og balikbalik nga kahigayonan sa pagtuon, pagkat-on, ug paggamit sa mga baroganan gikan sa kapitulo 3 sa Isangyaw ang Akong Ebanghelyo.

Organisasyon sa Kinauyokan nga mga Leksiyon

Ang kinauyokan nga mga leksiyon nagdapit sa mga partisipante sa pagkat-on pinaagi sa hugot nga pagtuo aron sila makapalig-on sa ilang pagkakabig ngadto ni Jesukristo. Pagkat-on pinaagi sa hugot nga pagtuo nagkinahanglan og paningkamot ug aksiyon. Ikonsiderar kon sa unsang paagi ang gidesinyo nga mga elemento makatabang sa mga sakop sa imong klase nga makat-on pinaagi sa hugot nga pagtuo ug mapaduol ngadto sa Manluluwas.

Magrebyo ug Mag-follow Up

Sa sinugdanan sa matag leksiyon, ang mga tigkat-on mamalandong sa mga pasalig nga ilang gihimo sa dili pa ang klase. Gamita kini isip usa ka oportunidad sa pagtabang sa mga sakop sa klase sa pag-ila sa ilang espirituwal nga pagtubo.

Mga Opsiyon sa Kalihokan sa Pagkat-on

Kadaghanan sa kinauyokan nga mga leksiyon maglakip sa daghang opsiyon sa kalihokan sa pagkat-on. Pagsukod sa mga panginahanglan sa mga sakop sa imong klase ug tinguhaa ang giya sa Espiritu Santo samtang ikaw magpili sa mga kalihokan sa pagkat-on nga imong gamiton. Mahimo usab ka nga mangutana sa mga sakop sa klase asa nga mga leksiyon ug mga kalihokan sa pagkat-on nga sila mas makabenepisyo.

Dili na kinahanglan nga gamiton nimo ang tanan nga mga opsiyon sa kalihokan sa pagkat-on sa leksiyon sa usa ka sesyon sa klase. Tutoki ang pagkakabig, dili ang paghurot sa pagtudlo sa tibuok leksiyon. Kon ang imong pagpadagan sa eskedyul motugot, mahimo kang mogahin og sobra sa usa ka yugto sa klase sa matag leksiyon nga tutokan sa lainlain nga mga kalihokan sa pagkat-on.

Ang matag kalihokan sa pagkat-on aduna nini nga mga parte:

• Pagtuon. Mga ideya aron moapil ang mga tigkat-on sa pagtuon nga nag-awhag sa mga aksiyon nga nagdasig og hugot nga pagtuo, sama sa pagbasa, pagsiksik, pag-higlight, pagpamalandong, pagrekord, panaghisgot, ug pagpamatuod.

• Pagpraktis. Ang mga sugyot sa pagtabang sa mga sakop sa klase nga mapraktis nila unsa ang ilang nakat-onan. Kini kasagaran naglangkob sa pag-summarize, pagpasabot, ug pagtudlo.

• Pagtakda og tumong. Ang panahon nga gigahin alang sa mga sakop sa klase sa pagsukod unsa ang ilang nakat-onan ug unsa nga mga pasalig ang mahimo nilang himoon aron makakat-on, motubo, ug molambo. Mahimo nimong dapiton ang mga tigkat-on sa pagdala og personal nga journal sa pagtuon aron isulat ang ilang mga tumong sa tibuok kurso.

Mga istruksiyon alang sa mga magtutudlo o panaghisgot sa mga lider sa mga leksiyon

Kasagaran ang mga kalihokan sa pagkat-on gipangulohan sa magtutudlo. Busa, tingali adunay mga sirkumstansiya diin ang kalihokan sa pagkat-on gigamit sa lider sa Simbahan, ginikanan, young adult, o kabatan-onan. Aron sa pagpamalandong niini nga mga posibilidad, ang mga leksiyon naglakip sa instruksiyon diha sa mga kahon nga adunay sulat nga “lider sa diskusyon.”

Lider sa diskusyon: Hatagi ang mga sakop sa klase og panahon sa pagpamalandong sa unsay ilang nakat-onan ug sa pagtakda og mga tumong. Mahimo nimong ipakita ang mosunod alang kanila.

Kini nga mga instruksiyon makagiya sa mga magtutudlo o sa mga lider sa diskusyon sa ilang pagpangandam ug pagtudlo.

Mga Pagpraktis sa Kahanas

Kini nga kurso naglakip sa 10 ka kahanas sa kataposan sa manwal. Ang pagpraktis sa mga kahanas gidisenyo aron sa pagtabang sa mga tigkat-on nga molambo ang mga kahanas alang sa epektibo nga pagtudlo ug kalig-on sa emosyon.

Ang mosunod mao ang lista sa mga pagpraktis sa kahanas:

• Pagbansay sa Kahanas 1: Ipaila ang Basahon ni Mormon ngadto sa mga Tawo

• Pagbansay sa Kahanas 2: Gamita ang mga Kasulatan sa Imong Pagtudlo

• Pagbansay sa Kahanas 3: Tudloi ang mga Tawo Unsaon sa Pag-ampo

• Pagbansay sa Kahanas 4: Mangutana og Dinasig nga mga Pangutana

• Pagbansay sa Kahanas 5: Maningkamot sa Pagsag-ulo sa mga Kasulatan

• Pagbansay sa Kahanas 6: Pagpakighinabi sa Tanan

• Pagbansay sa Kahanas 7: Pagtubag sa mga Pagbati nga Dili Angayan

• Pagbansay sa Kahanas 8: Tinuyo nga Pagginhawa

• Leksiyon 9: Gamiton sa Matarong ang Teknolohiya

• Pagbansay sa Kahanas 10: Pagpalambo og mga Sumbanan sa Himsog nga Panghunahuna

Ang mga pagpraktis sa kahanas matudlo atol sa samang yugto sa klase isip usa ka kinauyokan nga leksiyon. Ang pipila sa kinauyokan nga leksiyon naghatag og mga sugyot sa may kalabotan nga mga pagpraktis sa kahanas.

Ang mga pagpraktis sa kahanas gidisenyo nga mokabat sa 15 hangtod 20 ka minuto, apan ikaw makapahaom niini nga mas motaas o mas mapamubo. Dili kinahanglan nga itudlo nimo ang matag pagpraktis sa kahanas, ug makatudlo ka niini sa dili han-ay. Samtang ang mga pagpraktis sa kahanas importante, kasagaran sa imong oras sa pagtudlo sa yugto sa kurso kinahanglan nga gigahin sa kinauyokan nga mga leksiyon.

Irekord ang Inyong mga Hunahuna

Tan-awa ang mga lista sa mga pagpraktis sa kahanas. I-highlight ang usa nga sa imong hunahuna tingali makapanalangin sa mga tawo nga imong gitudloan.

Kinsa ang makabenepisyo gikan sa pagtambong niini nga kurso?

Samtang daghan sa mga tigkat-on kinsa motambong niini nga klase nag-andam sa pangtudlo nga misyon, ang uban tingali nag-andam sa pangserbisyo nga misyon. Ang uban tingali walay plano nga moserbisyo og full-time nga misyon, apan adunay tinguha sa pagpakigbahin sa ebanghelyo sa mas epektibo ug motabang sa pagpundok sa Israel. Mahimong sensitibo sa mga panginahanglan sa mga partisipante, dili lang sa mga nag-andam alang sa pangtudlo nga misyon. Pangita og mga oportunidad nga makatabang sa tanan nga tigkat-on nga makakita sa mga panalangin ug kaayohan niini nga kurso. Pananglitan, mahimo kang mogahin og pipila ka higayon atol sa kurso sa pagrebyo sa mga oportunidad ug mga panalangin sa pagserbisyo og misyon (tan-awa sa ChurchofJesusChrist.org/service-missionary alang sa dugang nga impormasyon).

Ang mga sakop sa klase ba makadawat og kredito sa institute alang niini nga kurso?

Alang sa impormasyon mahitungod kon unsaon sa pagkadwat og kredito nga aron makagradwar sa institute o kredito nga mahimong mabalhin ngadto sa mga eskwelahan sa Simbahan, tan-awa sa InstituteCredit.ChurchofJesusChrist.org.

Sa unsang paagi nako nga mas maayong maorganisa kini nga kurso alang sa mga tawo nga nagtambong sa akong klase?

Kini nga kurso bisan asa magamit. Mahimo kining magamit sa mga branch, mga ward, mga stake, ug sa mga institute. Mahimo kining magamit isip usa ka klase nga molungtad lamang og pipila ka semana o sa usa nga molungtad sa pipila ka bulan. Mahimo usab kini nga ipahaom alang sa panimalay nga gamit.

Ang mosunod nga table nagpakita kon giunsa sa pag-organisa sa 50 ka minuto nga yugto sa klase:

50 ka Minuto nga Klase			50 ka Minuto nga Klase			50 ka Minuto nga Klase
50 ka Minuto nga Klase Magrebyo ug Mag-follow Up 5 ka minuto	50 ka Minuto nga Klase Usa ka Kalihokan sa Pagkat-on 30 ka minuto	50 ka Minuto nga Klase Pagpraktis sa Kahanas 15 ka minuto

Ang mga klase nga magkita hangtod sa daghang bulan mahimong mogahin sa sobra sa usa ka klase sa gihatag nga leksiyon.

90 ka minuto nga Klase			90 ka minuto nga Klase			90 ka minuto nga Klase
90 ka minuto nga Klase Magrebyo ug Mag-follow Up 5 ka minuto	90 ka minuto nga Klase Usa ka Kalihokan sa Pagkat-on 60 ka minuto	90 ka minuto nga Klase Pagpraktis sa Kahanas 25 ka minuto

Ang mosunod nga mga ehemplo nagpakita sa lainlain nga matang sa pagtudlo sa sulod niini nga kurso.

Ehemplo 1: Klase sa Stake (20 ka sesyon; 60 ka minuto matag klase)

Si brother Lawal nag-andam sa pagtudlo sa kurso nga pagpangandam sa misyonaryo alang sa iyang stake sa Accra, Ghana. Ang iyang klase magkita kada semana. Si brother Lawal mihimo niini nga plano:

• Magtudlo og usa ka kinauyokan nga leksiyon sa una ug ikatulong mga Dominggo sa bulan.

• Tungod kay ang klase adunay daghang bag-ong mga miyembro sa Simbahan ug ang pipila kinsa dili miyembro sa Simbahan, si brother Lawal nagdesisyon nga hatagan og dugang gibug-aton ang kinauyokan nga leksiyon 6. Siya nagdesisyon nga himoon ang kalihokan sa pagkat-on gikan sa kinauyokan nga leksiyon 6 sa ikaduha ug ikaupat nga mga Dominggo sa matag bulan. Kini maghatag sa iyang klase og daghang oportunidad sa pagtuon ug pagtudlo sa importante nga doktrina gikan sa kapitulo 3 sa Isangyaw ang Akong Ebanghelyo.

• Siya usab moila sa upat ka pagpraktis sa kahanas nga gusto niyang gamiton sa klase. Gitino niya nga mohimo siya og usa ka pagpraktis sa kahanas matag semana. Ang usa ka kahanas importante kaayo sa iyang klase nga siya mihukom nga gamiton niya kini sa duha ka managlahi nga sesyon sa klase.

Ehemplo 2: Klase sa Stake (7 ka sesyon; 60 ka minuto matag klase)

Si brother ug sister Green nag-andam sa pagtudlo sa misyonaryo nga pagpangandam alang sa ilang stake sa Provo, Utah. Ang ilang klase magkita matag laing semana.

• Human sa pagpakigtambag sa ilang presidente sa stake, sila mihukom sa pagtudlo sa kinauyokan nga mga leksiyon 1, 3, 6, 9,ug 12. Sila mogamit og tulo ka klase nga mga sesyon aron tutokan ang kinauyokan nga leksiyon 6. Ang pagbuhat sa ingon makahatag og daghang kahigayonan sa pagkat-on, pagsabot, ug pagraktis sa pagtudlo sa mahinungdanong mga kamatuoran gikan sa kapitulo 3 sa Isangyaw ang Akong Ebanghelyo.

• Base sa tambag gikan sa ilang presidente sa stake, ang mga Green mangita usab og oras atol sa kurso alang sa mga pagpraktis sa kahanas “Pagpalambo og Sumbanan sa Himsog nga Panghunahuna” ug “Pakighinabi sa Tanan.”

Ehemplo 3: Klase sa Institute (14 ka sesyon; 90 minuto kada klase)

Si sister Silvia nag-andam sa pagtudlo sa pagpangandam sa misyonaryo nga klase alang sa iyang institute sa Manaus, Brazil. Ang iyang klase magkita matag semana sa 90 ka minuto. Si sister Silvia mihukom sa pagbuhat sa mosunod:

• Siya mogahin og 50 ka minuto sa unang 11 ka semana sa lahilahi nga kinauyokan nga mga leksiyon. Nasayod nga ubay-ubay sa iyang mga sakop sa klase adunay mga pangutana mahitungod sa Espiritu Santo, siya mihukom sa paggahin sa labing minos duha ka klase sa kinauyokan nga leksiyon 8: “Pagtinguha ug Pagsalig sa Espiritu.”

• Si sister Silvia gusto nga motabang sa mga sakop sa iyang klase nga molambo ang ilang pagsalig aron makatudlo sa ebanghelyo ngadto sa uban. Siya nagtino nga ang unang 11 ka semana, 6 sa klase mahimong maglakip sa 30 ka minuto nga paggamit sa kinauyokan nga leksiyon 6 aron sa pagtabang sa mga sakop sa klase nga makat-on ug motudlo sa doktrina diha sa kapitulo 3 sa Isangyaw ang Akong Ebanghelyo. Siya usab mihukom nga sa mga semana 12 ug 13, sila mogahin sa tibuok klase sa pag-andam ug pagtudlo og mubo nga leksiyon sa matag usa.

• Si sister Silvia miila sa pipila ka kahanas nga bulahang makapraktis ang mga sakop sa iyang klase. Siya mihukom sa pagbuhat niadto nga mga pagpraktis sa kahanas atol sa 11 ka semana sa mga adlaw kon walay eskedyul sa pagtudlo gikan sa kapitulo 3.

• Sa kataposang adlaw, siya nagplano sa pagtapos sa kurso uban sa kinauyokan nga leksiyon 13: “Padayon uban sa Hugot nga Pagtuo.”

Irekord ang Inyong mga Hunahuna

Gamit ang mosunod nga mga pangutana, pagsugod sa pagplano unsaon nimo paggamit sa mga kapanguhaan niini nga kurso:

• Pila ka klase ang imong mahuptan? Unsa ka gidugayon ang panagkita sa klase?

• Unsaon nimo sa pag-implementar sa kinauyokan nga leksiyon ngadto sa imong kurso?

• Unsa ka sagad ang imong klase mogamit sa Leksiyon 6 “Pagpraktis sa Pagtudlo”?

• Asa nga mga pagpraktis sa kahanas ang mas labing bililhon sa imong klase? Kanus-a nimo kini gamiton?

Paghimo og plano nga haom sa imong klase. Samtang ikaw magplano sa imong eskedyul, tingali gusto nimong tinguhaon ang mga ideya sa mga sakop sa klase mahitungod kon asa nga mga hilisgotan ang adunay dakong interes ug kalabotan ngadto kanila.

Hinumdomi, ang nagpahipi nga tumong mao ang pagkakabig ngadto ni Jesukristo, dili ang paghurot og tudlo sa leksiyon. Ayaw pasobrahi ang eskedyul sa imong klase. Ang espirituhanong paglambo dili madali o mapugos. Makontinto kon unsa ang imong mabuhat sa makahuloganong paagi sa oras nga naa nimo.