Pagbansay sa Kahanas 6

Pakighinabi sa Tanan

Kon ang mga batan-on makigsulti og mga tawo nga dili nila kaila, kasagaran dili sila komportable o makulbaan. Kini nga kalihokan makatabang sa mga sakop sa klase sa pagpakig-istorya og mga tawo nga bag-o lang nilang nahimamat.

Lider sa diskusyon: Paningkamoti nga mahuman dayon ang mga seksiyon nga “Hatagi og kahulogan” ug ang “Ipakita” aron ang mga tigkat-on adunay daghang panahon sa pagpraktis.

Hatagi og kahulogan

Lider sa diskusyon: Ipasabot nga kanang bahin sa misyonaryo nga buhat naglakip sa pagpakigsulti sa mga tawo nga dili nimo kaila kada adlaw.

Unsa ang bag-o nimong kasinatian sa dihang nakigsulti ka og tawo sa unang higayon? Kumusta kini?

Lider sa diskusyon: Sa dili pa ipaila ang piho nga mga giya nga maoy tutokan niini nga Pagbansay sa kahanas, ikonsiderar ang pagbasa og dungan sa “Pakig-istorya sa Tanan” (Isangyaw ang Akong Ebanghelyo [2023], 189–90). Mahimo nimong dapiton ang mga estudyante sa paghisgot sa mga sugyot nga ilang nakita nga labing makatabang.

Ipasabot nga kini nga pagbansay sa kahanas magtutok sa tulo ka sumbanan nga gi-summarize gikan sa Isangyaw ang Akong Ebanghelyo (tan-awa sa mga pahina 166–67) ug Pag-adjust ngadto sa Misyonaryo nga Kinabuhi (tan-awa sa mga pahina 35–36). Ipakita kini nga mga sumbanan ug dapita ang pipila ka sakop sa klase nga magpuli-puli sa pagbasa niini og kusog

Pangitag simple nga paagi sa pagpakig-istorya. Pagmadasigon, matinud-anon, ug mahigalaon. Sulayi ang pagpangumusta, paghatag og pagdayeg, pagtanyag og tabang sa usa ka butang, o pagpangutana (tan-awa ang sunod nga timaan [bullet] alang sa mga sanglitanan).
Mangutana. Ikonsiderar ang pagpangutana sa mga tawo mahitungod sa mga butang nga makapainteres o importante para nila. Mahimong maglakip kini sa ilang trabaho, mga kalingawan, mga interes, pamilya, o kon asa sila nagsimba o nag-eskwela. Magmatinguhaon sa pagtubag sa ilang mga pangutana mahitungod usab kanimo.
Sinsero nga maminaw. Tutoki kon unsay gisulti sa laing tawo labaw pa sa unsay imong sunod nga isulti. Kanunay nga motan-aw sa mata sa tibuok nga pag-istoryahanay. Ipakita nga interesado ka sa tawo nga imong kaistorya ug sa unsay ilang gisulti. Mahimo nimong pangutan-on sila og dugang nga mga pangutana aron makakat-on pa.

Ipakita

Lider sa diskusyon: I-modelo kini nga mga kahanas alang sa klase pinaagi sa pagdapit og matinguhaon nga partisipante sa pag-adto sa atubangan sa kwarto. Pakig-istorya gamit ang mga giya nga gilista sa miagi nga seksiyon. Kon mahuman ka na, dapita ang klase sa pagpakigbahin kon giunsa nila pag-obserbar ang mga sumbanan nga gisunod.

Laing paagi nga imong mapakita kini nga kahanas mao ang pagpasalida sa bidyo nga “Pakig-istorya sa Tanan” (ChurchofJesusChrist.org; tan-awa gikan sa time code 4:00 ngadto sa 6:08).

Ipraktis

Lider sa diskusyon: I-assign ang matag partisipante og kauban. Dayon ipakigbahin ang mosunod nga mga instruksiyon. Kon itugot sa panahon, hatagi ang mga tigkat-on og oportunidad sa pagsubli niini ngadto sa uban diha sa klase.

Uban sa imong kapares, pagpuli-puli sa pagsugod og panag-istoryahanay pinaagi sa paggamit sa tulo ka sumbanan nga atong gihisgotan:

Pangitag simple nga paagi sa pagpakig-istorya.
Mangutana.
Sinsero nga maminaw.

Gamita

Lider sa diskusyon: Ipakigbahin ang mosunod nga pagdapit. Mahimo nimong ikonsiderar ang pag-follow up niini nga imbitasyon sa umaabot nga klase.

Pangita og mga oportunidad sa sunod nga semana sa pagsugod og usa ka panag-istoryahanay og tawo nga wala pa nimo mahimamat o dili pa kaayo kaila. Pagpraktis gamit ang mga kahanas nga imong nakat-onan karon atol sa inyong pag-istoryahanay.